Hagaaki Fakailoilo e Tau Laliaga Haau
1. Ko e heigoa e fakaaogaaga he 1 Korinito 9:26 ke he gahua he fonua?
1 Ne tohi he aposetolo ko Paulo: “Kua poi pihia au, nakai fakahaupo; kua tau pihia au, nakai tuga e taumoto ke he matagi.” (1 Kori. 9:26) Ne hagaao a Paulo ke he haana a foliaga fakatonu mo e hagaaki e mataala he tutuli e tau foliaga fakaagaaga. Ka e he matapatu fakaakoaga ko e tau kupu nei kua hagaao foki ke he gahua he fonua. Manako a tautolu ke hagaaki e “taumoto” po ke tau laliaga fakailoilo ha tautolu ke lahi e mena mitaki ka taute. Fēfē?
2. Maeke fēfē a tautolu ke fifitaki a Paulo mo e tau tagata evagelia he senetenari fakamua he fifili e magaaho mo e matakavi ke fakamatala?
2 Ō ke he Mena ne Haia e Tau Tagata i Ai: Ko Paulo mo e falu he tau tagata evagelia he senetenari fakamua ne fakamatala he matakavi ne amanaki a lautolu to fai tagata. (Gahua 5:42; 16:13; 17:17) Ti ka tokologa he fonua ha tautolu kua haia i kaina he afiafi, liga ko e magaaho mitaki lahi anei ke ō he taha fale ke he taha fale. Kua lavelave kia e tuaga pasi po ke tuleni he tau mogo pogipogi kī mo e tau magaaho afiafi ka ō e tau tagata ke gahua po ke liliu ki kaina? Magaaho fe he tau fale koloa he fonua kua puke ke he tau tagata? Maeke e fakamatala he puhala tū ke fua mitaki lahi he tau mogo pehēnei.
3. Maeke fēfē a tautolu ke hagaaki e tau laliaga fakailoilo ha tautolu ke he puhala kua gahua e fonua ha tautolu?
3 Gahua Fakailoilo e Fonua: Lata foki ke mataala ke hagaaki fakailoilo e tau laliaga ha tautolu ke he gahua he fonua ha tautolu. Ma e fakatai, he nakai uta e matakau lahi ke he taha e matakavi, nukua lata ke lahi e magaaho mo e gahua ke fakatokatoka mo e gahua tumau, kua liga mitaki ke vevehe e matakau. Pihia foki, ka gahua he tau faahi tua, to mafiti lahi e taute e tautolu e fonua ti loga e magaaho ke tutala ai ka nakai lahi mahaki e tau matakau ne ō he motokā. Maeke nakai a tautolu ke moua e matakavi fakatagata ne tata ke he kaina ha tautolu, ke fakatote hifo e magaaho ke ō fenoga ai?
4. Ko e heigoa ka lagomatai a tautolu ke kautū he eke mo “takafaga ke he tau tagata”?
4 Ne fakatatai e Iesu e tau tagata evagelia ki a lautolu ne “takafaga ke he tau tagata.” (Mare. 1:17) Ko e foliaga he tagata takafaga ika ne nakai ke hī ika hokoia ka e ke moua e tau ika. Ko e mena ia, ko e tau tagata takafaga ika ne kautū kua ō ke he matakavi mo e magaaho kua amanaki ke moua e tau ika, ti kamata agataha a lautolu ke hī ika. E, kua hagaaki fakailoilo e tau laliaga ha lautolu. Kia fakakite e tautolu e fakamakutu pihia he gahua he fonua ha tautolu.—Hepe. 6:11.