Veveheaga 68

Falu Fakaakoaga Foki he Aho ke Fitu Aki

KO E aho fakahiku he Galue he Tau Fale Api, ko e aho ke fitu aki, hane fa e gahua agaia. Ko e fakaako a Iesu he vala he faituga ne iloa ko e “mena ne toka ai e tau tupe.” Ko e vala nei ne fakahigoa ko e Lotopa he Tau Fifine ne toka ai e tau puha ne tuku he tau tagata ha lautolu a tau mena fakaalofa.

Ko e tau po oti he galue, ne ha ha i ai e fakatataaga pauaki he maama kikila ke he vala nei he faituga. Fa e tuaga lamepa lalahi ne fakatu he matakavi e, igatia mo e fa e pa lalahi ne puke ke he lolo. Ko e maama mai he tau moli nei, ko e lolo ne tugi he 16 e pa, ne malolo ke maama mamao atu he matakavi ia he po. Ko e vagahau ha Iesu he magaaho nei ke fakamanatu ki a lautolu hana a tau tagata fanogonogo ke he fakatataaga nei. “Ko au nai ko e maama he lalolagi,” he fakapuloa e Iesu. “Ko ia ke mui mai kia au, nakai fano a ia ke he pouli, ka e moua e ia e maama he moui.”

Ne totoko e tau Farasaio: “Kua talahau ne koe a koe, nakai fakamoli hau a talahau.”

Ne tali e Iesu: “Kaeke ke talahau e au a au ti fakamoli ni haku a talahau; ha kua iloa e au e mena ne hau ai au, mo e mena ke fano au ki ai; ka kua nakai iloa e mutolu e mena ne hau ai au, mo e mena ke fano au ki ai.” Ne lafi atu e ia: “Ko au nei kua talahau e au a au, ha ne talahau foki au he Matua ne fakafano mai au.”

“Ko fe e Matua hau?” ne manako e tau Farasaio ke iloa.

“Nakai iloa e mutolu au, po ke haku a Matua,” he tali e Iesu. “Ane iloa e mutolu au, po kua iloa foki e mutolu haku a Matua.” Pete ni he manako e tau Farasaio ke tapaki a Iesu, ne nakai aamo e taha a ia.

“Kua fano kehe au,” he liu a Iesu talahau. “Nakai maeke ia mutolu ke o ke he mena ke fano au ki ai.”

Ko e mena nei ne manamanatu e tau Iutaia ki ai: “To kelipopo kia e ia a ia? He pehe mai a ia, Nakai maeke ia mutolu ke o ke he mena ke fano au ki ai.”

“Ko mutolu ko lalo nai a mutolu,” he fakamaama e Iesu. “Ko au mai luga au; ko mutolu ko e lalolagi nai a mutolu, nakai ko e lalolagi au nai.” Ne lafi foki e ia: “Ha ko e mena ka nakai talia e mutolu, ko au hanai ko ia, ati mamate ai a mutolu ke he tau hala ha mutolu.”

Ko e moli ko e tala a Iesu ke he moui fakamua hana i luga he lagi, mo e ko ia ko e Mesia, po ke Keriso, he maveheaga. Ka e pete ni a ia, ne huhu a lautolu, mo e nakai fakauaua e vihiatia lahi: “Ko hai kia a koe?”

Ke he tau mata ha lautolu ne nakai talia, ne tali a Iesu: “Ko au ne tala atu ai e au kia mutolu tali mai he kamataaga.” Ka e liu ni a ia vagahau: “Ka e fakamoli ni a ia ne fakafano mai au; ko e tau mena foki ne fanogonogo ai au ia ia, kua talahau e au e tau mena ia ke he lalolagi.” Ne matutaki a Iesu: “Ka ta hake e mutolu e Tama he tagata, ti iloa ai e mutolu ko au hanai ko ia; nakai eke noa foki e au ha mena, ha ko e mena tuga ne fakaako mai he haku a Matua kia au, ko e tau mena ia ne tala atu ai e au. Ko ia foki ne fakafano mai au, ha ha ia au a ia; nakai toka tokotaha au e Matua ha ko e mena eke mau e au e tau mena kua mitaki kia ia.”

Ko e magaaho ne vagahau e Iesu e tau mena nei, ne tokologa ne tua ki a ia. Ne pehe a ia ki a lautolu: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu. To iloa foki e mutolu e mena moli, ko e mena moli foki ke toka noa ai a mutolu.”

“Ko mautolu nai ko e fanau a Aperahamo,” he fakaleo mai he hana tau tagata totoko, “ti nakai fakatupa a mautolu kia taha tali he kamataaga, kua tala mai fefe a koe, To toka noa a mutolu?”

Pete ni e fa mahani e tau Iutaia ke nonofo i lalo hifo he pule lotu kehe, ne nakai mailoga e lautolu e ha tagata totoko ne eke ko e iki. Ne nakai talia e lautolu ke fakahigoa ko e tau tupa. Ka e fakakite ne Iesu ko e tau tupa moli a lautolu. Ke he puhala fe? “Ko e moli, ko e moli, ke tala atu e au kia mutolu,” he talahau e Iesu, “ko e tagata kua hala ke he mena kua eke ko e tupa he hala a ia.”

Ha kua nakai talia e lautolu ko e tau tupa ke he hala kua fakahagahaga kelea he tau Iutaia e tuaga ha lautolu. “Ko e tupa foki, nakai nofo mau a ia ke he kaina,” he fakamaama e Iesu. “Ko e tama to nofo fakaoti ai a ia.” Ha kua nakai fai tonuhia e tupa ke he tau koloa mai he matohiaga fanau, ti liga hagahaga kelea ke vega kehe a ia he ha magaaho ni. Ko e tama fanau ni po ke hiki mai ke he magafaoa ka nofo mau “fakaoti,” ko e pehe a ia, ko e uta ni e leva ke he hana a moui.

“Ko e hanai, ka toka noa he Tama a mutolu,” he matutaki e Iesu, “kua toka noa fakamoli a mutolu.” Ti ko e mena ia, ko e mena moli ne toka noa aki e tau tagata ko e mena moli hagaao ia ke he Tama, ko Iesu Keriso. Ko e puhala ni hokoia ko e poa he hana a tino moui mitaki katoatoa ke fakahao ha tagata taha mai he hala he mate. Ioane 8:​12-36.

▪ Ko e fakaako i fe a Iesu he aho ke fitu aki? Ko e heigoa ne tupu ke he po he mogo ia, mo e matutaki fefe e mena ia ke he fakaakoaga ha Iesu?

▪ Ko e heigoa ne talahau e Iesu ke he hana a kamataaga, mo e fakakite fefe he mena nei a ia?

▪ Ko e puhala fe ne ko e tau tupa e tau Iutaia, ka ko e heigoa e mena moli ke fakatoka noa aki a lautolu?