Veveheaga 71

Nakai Talitonu Pauaki he Tau Farasaio

KO E tau matua he tagata matapouli fakamua ne matakutaku he magaaho ne ui a laua ki mua he tau Farasaio. Ne iloa e laua kua fita he fifili ko e taha ka fakakite e tua ki a Iesu to vega kehe mai he sunako. Ko e vevehe kehe ia he matutakiaga mo e falu he maaga to eke ia mo mena uka lahi, mua atu ke he magafaoa nonofogati. Ko e mena haia ne fakaeneene lahi e tau matua.

“Ko e tama kia ha mua a enei, ne tala mai e mua kua matapouli he fanau mai?” he huhu he tau Farasaio. “Po ke ala nai fefe?”

“Kua iloa e maua, ko e tama ha maua a enei, ne matapouli foki e fanau mai,” he fakamoli he tau matua. “Ka e nakai iloa e maua po ke ala fefe ainei, nakai iloa foki e maua po ko hai e tagata ne fakaala hana tau mata.” Ko e moli liga kua tala age he tama tane ha laua e tau mena oti ne tutupu, ka e iloilo e tau matua mo e pehe: “Kua lahi a ia, ati hūhu atu a kia ia, kia talahau atu e ia a ia.”

Ti ko e mena ia, ti liu foki e tau Farasaio ui e tagata. Ka ko e magaaho nei ne lali a lautolu ke fakamatakutaku a ia he pehe kua moua e lautolu e tau fakamoliaga kelea ki a Iesu. “Tuku atu a e fakahekeaga ke he Atua,” he poaki fakamakamaka e lautolu. “Kua iloa e mautolu ko e tagata hala a ena.”

Ne nakai fakatikai he tagata ne matapouli fakamua ha lautolu a hokotaki, mo e mailoga: “Nakai iloa e au po ke tagata hala a ia.” Ka e lafi atu e ia: “Ka e taha e mena kua iloa e au, ne matapouli au, ka kua kitia tuai e au ainei.”

Ko e lali ke kumi hepe ke he hana a fakamoliaga, ne liu huhu foki e tau Farasaio: “Ko e heigoa e mena ne eke e ia kia koe? Po ke fakaala fefe e ia hau a tau mata?”

“Kua oti he tala atu e au kia mutolu,” he hohoha he tagata, “ka e nakai fanogonogo mai ni a mutolu, Ko e ha ne fia fanogonogo mai ai foki a mutolu?” Ne huhu fakafiufiu a ia: “Po ke manako kia a mutolu ke eke mo tutaki hana?”

Ne ita lahi e tau Farasaio ke he tali nei. “Ko koe hana tutaki,” he talahau fakakelea e lautolu, “ka ko mautolu, ko e tau tutaki a Mose a mautolu. Kua iloa e mautolu ne vagahau mai e Atua kia Mose; ka ko e tagata na, nakai iloa e mautolu po ke mai fe a ia.”

Ne fakakite hana a ofomate, ne tali fakatokolalo e tagata nofogati: “Ko e mena hanai ke ofo ai, he nakai iloa e mutolu po ke mai fe a ia, ka kua fakaala mai e ia haku a tau mata.” Ko e heigoa e fakaotiaga ne moua mai he mena nei? Ne talahau he tagata kaiole e talahauaga ne talia oti: “Kua iloa foki e tautolu, nakai fanogonogo e Atua ke he tau tagata hala; kaeke ke matakutaku taha ke he Atua, mo e eke hana finagalo, kua fanogonogo mai a ia kia ia. Nakai logona ni tali mai he vaha tuai, he fakaala e taha e tau mata ha taha ne fanau mai kua matapouli.” Ti ko e mena ia, kua kitia maaliali e talahauaga fakahiku: “Ane nakai hau mai he Atua e tagata na, po kua nakai maeke ia ia ha mena taha ke eke.”

Ne nakai fai tali e tau Farasaio ke he talahauaga mahino, fakapapahi ia. Ne nakai maeke ia lautolu ke talia e mena moli, mo e tauage e lautolu e tagata: “Ne fanau mai a koe mo e hala ni kua lahi, ke fakaako mai kia e koe a mautolu?” Ke he mena nei, ne vega e lautolu e tagata ki fafo, ti vega kehe e lautolu a ia mai he sunako.

Ko e magaaho ne iloa e Iesu e mena ne taute e lautolu, ne kitia e ia e tagata mo e pehe: “Po kua tua nakai a koe ke he Tama he Atua?”

Ke he tali, ne huhu he tagata kaiole fakamua: “Ko e iki na e, ko hai kia a ia, kia tua au kia ia?”

“Ko ia foki hanai kua vagahau nai kia koe,” he tali e Iesu.

Ko e magaaho ia ni ne hufeilo e tagata ki a Iesu mo e pehe: “Ko e Iki na e, kua tua tuai au.”

Ko e magaaho ia ne fakamaama e Iesu: “Ko e fakafiliaga, ne hau ai au ke he lalolagi nai, kia kitia e lautolu kua nakai kitia, kia fakamatapouli foki a lautolu ne kitia.”

Ko e mena ia, ko e tau Farasaio ne fanogonogo ne huhu: “Kua matapouli kia foki a mautolu?” Kaeke ke talahau e lautolu ko e matapouli ke he tau manamanatuaga, to ha ha i ai e fakamolemole ke he ha lautolu a totoko ki a Iesu. Tuga ni he tala age e Iesu ki a lautolu: “Ane mai kua matapouli a mutolu, po kua nakai fai hala a mutolu.” Ka e taha e mena, ne loto mao a lautolu mo e fakafekefeke ko e nakai matapouli a lautolu ti nakai lata ke fai maama fakaagaga. Ti ko e mena ia ne kitia e Iesu: “Ane mai kua matapouli a mutolu, po kua nakai fai hala a mutolu.” “Kua pehe a mutolu ainei, Ko e mena ala a mautolu; ko e mena ia ke toka mau ai ha mutolu a hala.” Ioane 9:​19-41.

▪ Ko e ha e tau matua he tagata matapouli ne matakutaku ai he magaaho ne ui ki mua he tau Farasaio, ti tali fakaeneene fefe e laua?

▪ Fakamatakutaku fefe he tau Farasaio e tagata matapouli ne kua maeke ke kitia?

▪ Ko e heigoa e talahauaga tonu he tagata ne fakaita aki e tau Farasaio?

▪ Ko e ha e tau Farasaio ne nakai fai mena ke fakamolemole aki e ha lautolu a totoko ki a Iesu?