“Nakai Manako Au”
1 Ko e tali mahani a ia ke he fekau ha tautolu he falu matakavi. Ko e heigoa ka lagomatai a tautolu ke fakamamao mai he loto lolelole ka fehagai mo e fakateaga mai he fonua? Maeke fēfē a tautolu ke fakalagalaga e fiafia ke he tala mitaki?
2 Fakatumau e Olioli: He manatu e kakano ne fakateaga e tokologa ka lagomatai a tautolu ke fakatumau e olioli. Ko e tau tagata ne fakaako e fakaakoaga ke he tupu mai noa po ke feaki hake he kaufakalatahaaga ko e mena nakai fai Atua ne liga nakai la manamanatu ke he uho he Tohi Tapu. Liga nakai fiafia e falu ha ko e fakatupua ne kitia e lautolu he lotu. Ma e falu, ko e fakateaga ha lautolu ne liga fakaata e ita mo e nakai fai amaamanakiaga ha lautolu. (Efeso 2:12) Ne ‘nakai mailoga’ he falu ha kua pehia a lautolu he tau fakaatukehe he moui.—Mata. 24:37-39.
3 Pete ne tau aga nakai mitaki he falu, moua e tautolu e olioli he fekafekauaga, he iloa kua fakaheke he tau laliaga ha tautolu a Iehova. (1 Pete. 4:11) Lafi ki ai, he tutala ke he kupu mooli, ti pihia ki a lautolu ne nakai la loto fakaaue ki ai, kua fakamalolō e tua ha tautolu. Kia lali fakalahi mogoia a tautolu ke kitia e tau tagata he fonua tuga ne kitia e Iehova. Ne momoko a ia ke he tau tagata Nineva ne nakai “iloa e lautolu po ko fe e lima matau ha lautolu, po ko fe e lima hema ha lautolu.” (Iona 4:11) Ko lautolu ne nonofo he matakavi ha tautolu kua lata mo e tala mitaki! Ko e mena ia, kua nakai lata ia tautolu ke tiaki ka e kumi puhala ke fakalagalaga aki e fiafia ha lautolu ke he fekau he Tohi Tapu.
4 Fakatutala ke he Tau Kapaletū he Matakavi: Liga talahau e koe e manatu ne kapaletū e matakavi he kamata e tutala haau ti hūhū ke he tagata he kaina ke fakakite haana tau manatu. Fanogonogo he vagahau a ia, ti fakakite ki a ia e fekau mafanatia he Tohi Tapu he tali ke he tau kapaletū haana. He mole e matematekelea he matakavi, taha e Fakamoli ne fakakite e momoko mooli haana he tau gutuhala oti. “Amanaki ai, ti kamata tutala e tau tagata,” he talahau e ia. “Ne loga e tau fakatutalaaga mitaki haaku he aho ia ha kua fakakite e au e fiafia ke he tau momoui ha lautolu.”
5 Ko e tau lekua oti ne fehagai mo e tau tagata ka fakamafola ai he Kautu he Atua. Lali ke maama e lekua ne kapaletū lahi e tagata he kaina. To liga fakaatā e ia a koe ke fakamaama e fekau he amaamanakiaga he Tohi Tapu. Ka nakai, to liga makai a ia ke fanogonogo ‘ka liu foki.’—Gahua 17:32.