Veveheaga 118

Afo mo e Tapaki

KUA molea e tulotopo he takitaki e Iuta e tau kautau tokologa, tau ekepoa ne mua, tau Farasaio, mo e falu foki ke he kaina i Ketesemane. Kua talia he tau ekepoa ke totogi a Iuta ke he tau tupe ne 30 ke afo aki a Iesu.

Fakamua, he magaaho ne fano kehe a Iuta mai he kaiaga he Paseka, ne finatu fakahako a ia ke he tau ekepoa ne mua. Ne fakapotopoto fakamafiti e lautolu ha lautolu a tau fekafekau, fakalataha ai foki e matakau kautau. Na liga takitaki fakamua e Iuta a lautolu ke he matakavi ne fakamanatu e Iesu mo e hana a tau aposetolo e Paseka. He mailoga e ia kua o kehe a lautolu, ko e moto tagata tokologa mo e tau kanavaakau mo e tau lamepa mo e tau hulu ne mumui ia Iuta he o kehe mai i Ierusalema mo e o ke he fahi atu he Pahua ko Ketarono.

He takitaki e Iuta e tau tagata tokologa ki luga he Mouga ko Olive, ne logona moli e ia e matakavi ke moua ai a Iesu. Ko e fahi tapu kua mole, he tau fenoga tafeliuaki a Iesu mo e tau aposetolo i Petania mo Ketesemane, ne fa mahani a lautolu ke okioki he kaina i Ketesemane mo e tutala. Ka e, ko e magaaho nei, liga galo a Iesu he pouli i kelekele he tau akau olive, to kitia fefe he tau kautau a ia? Liga nakai la kitia e lautolu a ia fakamua. Ko e mena haia ne taute e Iuta e fakamailoga, he pehe: “Ko ia ka fakafigita e au ko ia haia; kia tapaki e mutolu a ia, mo e takitaki fakamalolo atu e mutolu a ia.”

Kua takitaki e Iuta e moto tagata tokologa ki loto he kaina, ne kitia a Iesu mo e hana a tau aposetolo, mo e finatu hako ki a ia. “Rapai na e, fakaalofa,” he talahau e ia mo e figita hofihofi ki a ia.

“Teme na e, kua hau a koe ke ha?” He tali ita e Iesu. Ne tali ni e Iesu hana huhu, ne pehe a ia: “Iuta na e, to afo kia e koe e Tama he tagata mo e fakafigita?” Ka e toka atu la hana tagata ne afo a ia! Ne laka a Iesu ki mua ke he maama he tau hulu kua tugi mo e tau lamepa mo e huhu: “Ko hai kia ne kumi e mutolu?”

“Ko Iesu ko e Nasareta,” e tali.

“Ko au hanai,” he tali e Iesu, he tu fakamalolo a ia ki mua ha lautolu. Ne ofo lahi ha ko e hana a malolo mo e nakai iloa ko e heigoa ne amanaki ki ai, ne tukumuli e tau tagata mo e veveli ke he kelekele.

“Kua tala atu tuai e au kia mutolu, ko au hanai,” he talahau fakatotoka e Iesu. “Hanai, kaeke ke kumi mai e mutolu au, ati toka ai a lautolu nai ke o.” Ne nakai la leva ia fakamua he poko tapa ki luga, ne tala age e Iesu ke he hana Matua he liogi, kua leveki e ia e hana tau aposetolo fakamoli mo e nakai galo taha “ka ko e tagata he malaia hokoia.” Ko e mena haia, ke maeke ke fakamoli aki hana kupu, ati ole e ia ke toka hana tau tutaki ke o.

Ne liu moua he tau kautau ha lautolu a malolo, ti tutu ki luga, mo e kamata ke lili a Iesu, ne mailoga he tau aposetolo e mena ko e eke ne fai. “Ko e Iki na e, to ta nakai e mautolu ke he pelu?” he huhu e lautolu. Fakamua to tali a Iesu, ko Peteru, ne fakaaoga taha mai he ua e pelu ne ta mai he tau aposetolo, ta aki a Maliko, ko e fekafekau he ekepoa ne mua. Ne hepe e ta ha Peteru ke he ulu he fekafekau ka e to kehe hana teliga matau.

“Toka a; aua ia,” he vagahau e Iesu mo e fakalaga atu. Ne aamo e ia e teliga ha Maliko, ti fakamaulu e motu. Ko e magaaho ia ne fakaako e ia e fakaakoaga aoga lahi, he poaki ki a Peteru: “Ati liuaki a hau a pelu ke he hana tokaaga; ha ko lautolu oti kana ke toto e pelu, to mamate a lautolu he pelu. Piko kia a koe nakai maeke ia au ke ole atu ainei ke he haku a Matua, ti fekau mai e ia kia au e tau agelu ne mua he tokologa ke he tau lekeona ne hogofulu ma ua?”

Ne finagalo a Iesu ke tapaki, ha kua fakamaama e ia: “Ti fakamoli ai fefe e tau Tohiaga kaeke ke pihia, kia hoko ni e tau mena ia ke lata ai?” Ne lafi atu e ia: “Nakai kia inu au ke he kapiniu ne ta mai kia au he haku a Matua?” Kua talia katoatoa a ia mo e finagalo he Atua ma hana!

Ne vagahau a Iesu ke he moto tagata. “Kua o mai kia a mutolu mo e tau pelu mo e tau katoua ke tapaki a au, tuga ne tagata fofo mena?” he huhu e ia. “Ne nofo mau au mo mutolu ke he tau aho, he fakaako atu ke he faituga, ka e nakai tapaki ai e mutolu au. Ka kua hoko e tau mena oti ia, kia fakamoli ai e tau tohiaga he tau perofeta.”

Ko e magaaho ia ko e matakau kautau mo e tau fekafekau he tau Iutaia ne tapaki mo e lili a Iesu. Kua kitia e mena nei, ti tiaki he tau aposetolo a Iesu mo e fehola. Ka e taha e mena, ko e taha fuata​—liga ko e tutaki ko Mareko​—ne toe hifo mo e moto tagata. Liga ha ha i ai a ia he kaina ne fakamanatu e Iesu e Paseka mo e he magaaho fakamui ne mui he moto tagata mai i ai. Ka e magaaho nei, kua mailoga e lautolu a ia, mo e fai laliaga ke tapaki a ia. Ka e tiaki hifo e ia e ie lino mo e hola. Mataio 26:​47-56; Mareko 14:​43-52; Luka 22:​47-53; Ioane 17:12; 18:3-12.

▪ Ko e ha ne iloa moli e Iuta to moua e ia a Iesu ke he kaina i Ketesemane?

▪ Fakakite fefe e Iesu hana a tupetupe ma e hana tau aposetolo?

▪ Ko e heigoa ne taute e Peteru ke lago aki a Iesu, ka ko e heigoa ne talahau e Iesu ki a Peteru hagaao ke he mena ia?

▪ Fakakite fefe e Iesu ko e katoatoa hana a taliaaga mo e finagalo he Atua ki a ia?

▪ Ko e magaaho ne tiaki he tau aposetolo a Iesu, ko hai ne toe hifo, mo e ko e heigoa e mena ne tupu ki a ia?