Kautū e Matagahua Pauaki i Pulukaria

“Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.”—MATA. 9:37, 38.

KUA felauaki mooli e tau kupu ia ha Iesu mo e tuaga i Pulukaria (Bulgaria), ko e motu fulufuluola ha Palakana he faahi toga ki uta i Europa! Kua manako mooli mogonei ke he loga atu foki e tagata gahua ke uta e tala mitaki ke he molea e fitu e miliona tagata. Kavi ke he 1,700 e tagata fakailoa i Pulukaria, ka kua nakai maeke ia lautolu ke taute katoa e matakavi fonua. Ko e mena ia, ne talia he Kau Fakatufono ke uiina e Tau Fakamoli vagahau Pulukaria he tau motu kehekehe i Europa ke o mai mo e fakalataha ke he matagahua pauaki he 2009. Ne fakatoka e matagahua ke lata mo e fitu e faahi tapu he vahā mafana, ti fakahiku ke he Fonoaga he Faahimotu “Kia Mataala!” i Sofia, Aokuso 14-16, 2009.

Ko e Tali Ofoofogia

Ne manamanatu e tau matakainaga he la ofisa i Sofia ko e toko fiha la mai i Italia, Falani, Heleni, Polani, Sepania, mo Sihamani ka talia ai. Kakano to totogi ni he tagata e fenoga haana ki Pulukaria ti fakaaoga e tau magaaho okioki ke fakamatala. Ko e fiafia lahi ha ia he tokologa fakahaga e tau matakainaga ne ole atu he tau faahi tapu takitaha, ato hoko ke he 292! Ha kua tokologa pihia ne talia, ne maeke ai ke kotofa e tau tagata gahua foaki noa nei ke he tolu e taone ha Pulukaria: Ko Kazanlak, Sandanski, mo Silistra. Ne uiina he tau leveki takaiaga i Pulukaria e tau paionia mo e tau tagata fakailoa he matakavi ke lagomatai foki e matagahua. Fakahiku ai, ne 382 e tagata gahua noa ne fakamatala fakamakutu he tau matakavi ne lavea ke hoko ki ai mo e kupu mooli.

Ne fakafano atu e tau matakainaga he tau fakapotopotoaga ne tata mai ke fakatokatoka tuai e tau mena ke nonofo ai. Totogi e lautolu e tau poko mo e fakamau e tau hotela tau mukamuka. Kua gahua lahi e tau matakainaga nei he matakavi ke lagomatai e tau tagata gahua noa ka hohoko mai, ke moua e tau nonofoaga ti lagomatai ke he tau levekiaga ha lautolu. He tau taone tolu oti ia, ne totogi e tau fale ma e feleveiaaga. Ne fakatokatoka ke taute he tau matakainaga ahiahi e tau feleveiaaga he fakapotopotoaga. Kua fiafia mooli ke kitia e tau matakavi ne nakai taha e Fakamoli i ai, ka e 50 e tagata fakailoa ne feleveia ke fakaheke a Iehova.

Ne ofoofogia e makutu ha lautolu ne o mai he falu motu ma e matagahua. He vahā mafana, na maeke e vevela i Pulukaria ke molea e 40 e Celsius. Ka kua nakai fai mena ke taofi e tau matakainaga makutu nei. Ko Silistra, ko e taone he Vailele Danube ne molea e 50,000 tagata, ne lahi e fakamatala ki ai he tolu e faahi tapu fakamua. Ti maeke e tau matakainaga ke fakaholo atu e gahua ke he tau maaga tata mai, ti hoko atu foki ki Tutrakan, ne 55 e kilomita ke he faahi lalo ha Silistra. Fa kamata ha lautolu a gahua he fonua he matahola 9:30 he pogipogi. He mole e okioki kai laā, ne fa matutaki a lautolu ke hoko ke he matahola 7:00 he afiafi po ke loaloa atu. Ha kua ofoofogia pihia e makutu he tau tagata gahua noa nei, ne fakaholo atu e matagahua i Kazanlak mo Sandanski ke he tau maaga mo e tau taone ne tata ki ai.

Ko e Heigoa ne Moua?

Ofoofogia e gahua fakamatala ne taute he fitu e faahi tapu nei. Tuga ni he talahau he vahā he tau aposetolo, ko e tau tagata he tau taone nei kua maeke ke pehē, ‘Kua fakapuke e mutolu a maaga ke he tau kupu ha mutolu.’ (Gahua 5:28) Ko e Tau Fakamoli ne fakalataha ki ai ne foaki kavi ke he 50,000 e mekasini mo e kamata 482 e fakaako Tohi Tapu. Fiafia ai he taha e fakapotopotoaga ne fakatū i Silistra ia Sepetema 1, 2009, mo e fai matakau i Kazanlak mo Sandanski. Mafanatia ai ke kitia e tau tagata ne logona fakamua e tala mitaki he magaaho he matagahua nei hane tupu fakaagaaga ki mua.

He faahi tapu fakamua he matagahua, ko e matakainaga fifine paionia pauaki ne vagahau Pulukaria mai i Sepania ne fakamatala ki a Karina, ko e fifine i Silistra ne sela nusipepa he puhalatū. Ne fakakite e Karina e fiafia mo e hau ke he feleveiaaga. Ti makai a ia ke talia e fakaako Tohi Tapu. Ko e taane haana ne nakai talitonu na fai Atua, ti ole a Karina ke taute e fakaako Tohi Tapu he paaka. Ne fakalataha e fanau fifine tokoua haana ke fakaako Tohi Tapu. Ne fakakite he tama fifine lahi ko Daniela e loto fakaaue lahi ke he kupu mooli he Tohi Tapu. Ne totou e ia e tohi Fakaako he Tohi Tapu he taha e faahi tapu mo e fakagahua agataha e tau mena ne talahau he Tohi Tapu hagaao ke he nakai fakaaoga e tau mena fakatai he tapuakiaga. Ti kamata a ia ke tala age ke he tau kapitiga haana e kupu mooli. Tolu ni e faahi tapu he mole e fina atu fakamua haana ke he feleveiaaga he fakapotopotoaga, ne pehē a ia ke he matakainaga fifine ne fakaako mo ia: “Logona hifo e au kua tatai au mo e taha ia mutolu. Ko e heigoa haaku kua lata ke taute ke maeke foki au ke kamata fakamatala?” Ne matutaki a Daniela ke holo ki mua, pihia foki mo e matua fifine mo e tehina haana.

I Kazanlak, ko e matakainaga taane Pulukaria ne higoa ko Orlin ne hau i Italia ma e matagahua, ne liu atu ke he nofoaga haana he oti e gahua he fonua. He fina atu a Orlin, ne fakamatala a ia ke he tokoua e fuata taane ne nonofo he nofoa he paaka. Ne foaki e ia ki a laua e lagaki he tohi Fakaako he Tohi Tapu ti fakatoka ke liu aahi atu he aho hake. He aahi atu ia, ne kamata e Orlin e fakaako Tohi Tapu mo Svetomir ti matutaki he aho hake. He hiva e aho, ne laga valu e fakaako ha Orlin mo Svetomir. Ne talahau e Svetomir: “He ua e aho ato feleveia a taua, ne liogi au ke he Atua ma e lagomatai ke iloa a ia. Ti mavehe au ka lagomatai e ia au, to tukulele e au e moui haaku ki a ia.” He liu a Orlin ki Italia, ne matutaki e tau matakainaga he matakavi ke fakaako mo Svetomir, ti kua taute e ia e kupu mooli ma haana.

Loga e Monuina ma Lautolu ne Taute e Tau Foakiaga

Fēfē e logonaaga ha lautolu ne fakamokoi ke fakaaoga e tau aho okioki ha lautolu mo e totogi e fenoga ha lautolu ni ke he taha motu ke fakamatala e tala mitaki? Ko e motua ne fekafekau i Sepania ne tohi: “Kua fakatata lahi he matagahua e tau matakainaga he fonua Pulukaria i Sepania. Kua lahi e lauiaaga ke he tau matakainaga ne fakalataha ki ai.” Taha e hoa mau mai i Italia ne tohi: “Kua homo ue atu e mahina nei he tau momoui ha maua!” Lafi e laua: “Ne hiki he matagahua e tau momoui ha maua! He mogonei kua kehe tuai a maua.” Ne kamata e hoa nei ke manamanatu fakahokulo ke maeke ke hiki fakaoti atu ki Pulukaria ke fekafekau he matakavi ne manako lagomatai lahi. Ko Carina ko e matakainaga fifine paionia nakaila mau ne hau i Sepania, ne lalago e matagahua i Silistra. He mole ai, ne fakaoti e gahua tupe haana i Sepania mo e hiki ki Pulukaria ke lalago e fakapotopotoaga foou he taone ia. Lahi e tupe haana ne fakaputu ke nofo i Pulukaria ke he taha e tau. Pehē a Carina hagaao ke he fifiliaga haana: “Fiafia lahi au ha kua fakaatā e Iehova au ke fekafekau i hinei i Pulukaria, ti amanaki au to maeke ke leva e nofo hinei. Fitā e lima e fakaako Tohi Tapu haaku, ti tokotolu ia lautolu kua o mai ke he tau feleveiaaga.”

Ne manako e matakainaga fifine Italia ke fakalataha ke he matagahua, ka ko e kamata laia e gahua foou ti nakai fai aho okioki a ia. Nakai fakalolelole, ne ole a ia ke nakai gahua ke he taha e mahina mo e nakai totogi ti mautali ke fakaoti e gahua ka nakai talia e ole haana. Ne ofo a ia, he pehē e takitaki gahua haana: “Mitaki, ka e taha e mena: Lata ia koe ke fakafano mai ki a au e lautohi i Pulukaria.” Ne logona mooli he matakainaga fifine kua tali e Iehova e tau liogi haana.

Ko Stanislava, ko e matakainaga fifine fuata mai he taone ha Pulukaria ko Varna ne gahua mau ti totogi lahi foki, ne fai aho ne okioki mai he gahua ke fakalataha ke he matagahua i Silistra. Magaaho ne kitia e ia e fiafia he tokologa he tau paionia ne o mai mamao ke fakamatala e tala mitaki he motu haana, ne hihina e tau mata haana. Ne kamata a ia ke manamanatu ke he tau mena hane taute e ia he moui, ko e tutuli he feua fakalalolagi. He liu a ia ki kaina he ua e faahi tapu he mole, ne fakaoti e ia e gahua haana ti eke mo paionia tumau. Mogonei kua fiafia mooli a ia, he manatu haana Tufuga he vahā fuata haana.—Fakama. 12:1.

Ko e monuina ke malolō he fekafekauaga ha Iehova. Nakai fai mena kua mua e mitaki ke taute e koe ka e foaki e magaaho mo e malolō haau ke he gahua aoga he fakaako atu mo e fakamatala e tala mitaki. Fai puhala nakai kua maeke ia koe ke fakalahi e fakalataha haau ke he fekafekauaga fakahao moui nei? Liga fai matakavi he motu ni haau ne manako lahi ke he lagomatai. Maeke nakai a koe ke hiki ke he matakavi pihia? Po kua liga manamanatu a koe ke fakaako taha vagahau kehe ke lagomatai e tau tagata he motu haau kua manako lahi ke he kupu mooli he Tohi Tapu. Ko e ha hikiaga ni haau ka taute ke fakalahi e fakalataha haau ke he gahua he fonua, maeke ia koe ke mafanatia to fakamonuina lahi e Iehova a koe.—Fakatai 10:22.

[Puha/Fakatino he lau 32]

Ko e Aho ke Manatu

Tokologa ia lautolu ne o mai he falu motu Europa ke lalago e matagahua pauaki i Pulukaria ne pulega ke o atu he Fonoaga he Faahimotu “Kia Mataala!” i Sofia. Kua atihake lahi ma e tau matakainaga he matakavi ke feleveia mo e tau tagata tokologa ne ahiahi mai he tau motu kehe. Ko e fiafia lahi ha ia he toko 2,039 ne ha ha i ai he magaaho ne fakatoka mai he Matakainaga ko Geoffrey Jackson he Kau Fakatufono e liliuaga katoa he New World Translation of the Holy Scriptures ke he vagahau Pulukaria! Ne fakakite e lautolu oti ne ha ha i ai he Aho Faraile e loto fakaaue hokulo he olioli lahi ti loa e patipati. Tokologa foki ne hihina e tau mata he fiafia. Ko e fakaliliuaga tonutika nei ke he vagahau mukamuka ke maama, ka lagomatai e tau tagata Pulukaria ne loto fakamooli ke iloa a Iehova.

[Mepe he lau 30, 31]

(Ma e puhala katoa ne tohi aki, kikite e tohi)

PULUKARIA

SOFIA

Sandanski

Silistra

Kazanlak

[Tau Fakatino he lau 31]

Ofoofogia e gahua fakamatala ne taute he fitu e faahi tapu ia