Ko Ia kua “Iloa e Tau Loto he Tau Tagata”

KO HAI ia tautolu ne nakai tupetupe ke he tau paleko mo e tau lekua he moui? He falu mogo, tuga kua nakai fai tagata ka maama mooli e tau taufetului kua fehagai mo tautolu po ke mamahi lahi ne logona hifo e tautolu. Ka e, ha ha i ai taha ne maama katoa e tau logonaaga ha tautolu—ko Iehova ko e Atua. Maeke ke moua e tautolu e mafanatia he tau kupu a Solomona ne moua ia 2 Nofoaga he Tau Patuiki 6:29, 30.

Kua liogi a Solomona he fakauluaga he faituga i Ierusalema he 1026 F.V.N. He liogi haana, liga hogofulu e minuti he loa, ne fakaheke e Solomona a Iehova ko e Atua he mahani fakamooli, ko e Fakakatoatoa he tau maveheaga, mo e Fanogonogo liogi.—1 Tau Patuiki 8:23-53; 2 Nofoaga he Tau Patuiki 6:14-42.

Ne kumi atu a Solomona ke he Atua ke logona e olelalo he tau tagata tapuaki haana. (Kupu 29) Pete he talahau e Solomona e tau matematekelea loga (kupu 28), ne mailoga e ia kua igatia e tagata tapuaki mo e iloa e ‘malaia haana’ mo e logona e ‘mamahi haana.’ Taha tagata kua liga fakaatukehe ha ko e taha mena ka e kehe mamao e momoko he taha.

Ko e heigoa ni e mena ne tupu, ko lautolu ne matakutaku Atua liga nakai lata ke hahamo ne lautolu e tau lekua ha lautolu. He liogi ha Solomona, ne tokaloto e ia e tau tagata tapuaki takitaha ne liga omoomoi ke ‘nikiti ai e ia hana tau lima,’ he fina atu ki a Iehova he liogi mai he loto.a Liga manatu e Solomona e haana matua taane ko Tavita he mogo ne tupetupe lahi a ia, ti pehē: “Kia tuku atu kia Iehova e tau mena ne fakaatukehe ai a koe.”—Salamo 55:4, 22.

To tali fēfē e Iehova e tau ole mooli ma e lagomatai? Ne kumi atu a Solomona ki a Iehova: “Kia fanogonogo mai a a koe mai he lagi, ko e mena kua haele ai a koe, mo e fakamagalo mai, mo e foaki mai e koe ke he tau tagata takitokotaha ke lata mo e ha lautolu a tau mahani oti.” (Kupu 30) Iloa e Solomona kua leveki he ‘Fanogonogo liogi’ e tau tagata tapuaki haana, nakai ko e matakau hokoia ka e pihia foki e tau tagata takitokotaha. (Salamo 65:2) Foaki e Iehova e lagomatai kua lata, putoia e fakamagaloaga he tagata agahala ne liu mai ke he Atua mo e haana loto katoa.—2 Nofoaga he Tau Patuiki 6:36-39.

Ko e ha kua mailoga mooli e Solomona to tali e Iehova e olelalo he tagata tapuaki ne tokihala? He matutaki e liogi haana, ne talahau e Solomona: “Kua iloa ai e [Iehova] hana loto; ha kua iloa ni e koe e tau loto he tau tagata oti kana.” Mailoga e Iehova e malaia po ke mamahi ne liga ha ha he tau loto he tau tagata tapuaki tua fakamooli takitaha, ti mailoga e Ia e matematekelea haana.—Salamo 37:4.

Maeke ke moua e tautolu e mafanatia mai he liogi a Solomona. To nakai maama katoatoa he tau tagata e tau logonaaga he tau loto ha tautolu—ko e “malaia mo e mamahi he tau loto” ha tautolu. (Tau Fakatai 14:10) Ka e iloa e Iehova e tau loto ha tautolu, ti leveki fakalahi e ia a tautolu. He liligi e tau loto ha tautolu ki a ia he liogi ka taute e tau kavega ha tautolu ke mukamuka lahi ke hahamo. “Kia tuku atu kia ia e tau mena oti kua fakaatukehe ai a mutolu,” he talahau he Tohi Tapu, “ha ko e mena kua manatu e ia a mutolu.”—1 Peteru 5:7.