Ko e Peresona Mooli Kia e Atua?
Tau tali fa mahani:
◼ “Ko ia he tau matakavi oti, mo e he tau mena oti. Kua tuga e matagi a ia.”
◼ “Ko ia ko e pulotu ne mua e malolō, ko e agaaga teao noa.”
Ko e heigoa ne talahau e Iesu?
◼ “Ne loga e tau mena ke nonofo ai ke he fale he haku a Matua.” (Ioane 14:2) Ne talahau e Iesu tuga kua fai fale, po ke fai haeleaga e Atua.
◼ “Kua hau au mai he Matua, mo e hau au ke he lalolagi; ko e toka foki ne fai e au e lalolagi, mo e fano au ke he Matua.” (Ioane 16:28) Ne talitonu a Iesu, ko e Peresona mooli e Atua ne nofo he taha matakavi.
NE NAKAI hagaao a Iesu ke he Atua ko e agaaga noa. Kehe mai ai, ne tutala mo e liogi a ia ke he Atua. Ne fā ui tumau e ia a Iehova ko e Matua haana he lagi, ko e tau kupu ne fakakite e fakafetuiaga tata lahi haana mo e Atua.—Ioane 8:19, 38, 54.
Mooli kua “nakai fakai ni taha ne kitia e Atua” ti ko e “Atua ko e [A]gaga ni a ia.” (Ioane 1:18; 4:24) Ka e nakai kakano e mena nei kua noa a ia mo e tino. Kua tala mai e Tohi Tapu ki a tautolu: ‘Ka ha i ai e tino ti ha i ai e tino ke he agaga.’ (1 Korinito 15:44) Ti ha ha kia ia Iehova e tino fakaagaaga?
E. He liu tu mai, ne “haele atu a Keriso ke he . . . lagi ni, kua fakakite ainei a ia ki mua he Atua ma tautolu.” (Heperu 9:24) Kua fakaako he mena nei ki a tautolu ua e mena aoga hagaao ke he Atua. Fakamua, kua fai haeleaga a ia. Uaaki, ko e Peresona a ia, nakai ko e malolō gahuahua teao ne haia he tau mena oti.
Maeke fēfē mogoia e malolō he Atua ke lauia ke he tau mena oti? Maeke e Atua ke fakafano e agaaga tapu, po ke malolō gahuahua haana, ke he ha matakavi he lagi mo e lalolagi katoatoa. Tuga e matua taane ne fakaolo atu haana lima ke fakamafana mo e lalago e tau tama haana, kua foaki mai he Atua e agaaga tapu haana ke fakakatoatoa aki e finagalo haana.—Salamo 104:30; 139:7.
Ha ko e Atua ko e Peresona, ne ha ha foki ia ia e aga fiafia mo e nakai fiafia—ti fai logonaaga foki. Kua tala mai e Tohi Tapu ki a tautolu kua fakaalofa a ia ke he tau tagata haana, olioli ke he tau gahua haana, vihiatia e tapuaki tupua, ti mamahi ha ko e tau mahani kelea. (Kenese 6:6; Teutaronome 16:22; 1 Tau Patuiki 10:9; Salamo 104:31) He 1 Timoteo 1:11, ne fakahigoa a ia ko e “Atua monuina [po ke, fiafia].” Ko e mena ia ati pehē a Iesu kua maeke ia tautolu ke fakaako ke fakaalofa ke he Atua nei mo e loto katoaha tautolu!—Mareko 12:30.a
[Matahui Tala]
a Ma e falu vala tala foki ke he matakupu nei, kikite e veveheaga 1 he tohi Ko e Heigoa ne Fakaako Moli he Tohi Tapu? ne taute fakailoa he Tau Fakamoli a Iehova.
[Blurb he lau 5]
Tuga e matua taane ne fakaolo atu haana lima, kua foaki mai he Atua e agaaga tapu haana ke fakakatoatoa aki e finagalo haana