Fakatata Atu ke he Atua
Ko e Fakafili ne Taute Tumau e Mena Kua Hako
FAKAFILI TONU. Mahani tonu. Nakai fili tagata. Nakai kia futiaki a koe ke he tau aga lilifu pihia? Kua manako pauaki a tautolu ko e tau tagata ke taute mai ki a tautolu e mahani tonu. Momoko ai, kua lahi mahaki e nakai fakafili tonu he lalolagi he vahā nei. Pete ia, kua latatonu ia tautolu ke falanaki ke he ha tautolu a Fakafili, ko Iehova ko e Atua. Ne taute tumau e ia e mena kua hako. Kua kitia maali e mena nei he fakatutalaaga ha Iehova mo Aperahamo, ne fakamau ia Kenese 18:22-32.a
He magaaho ne tala age e Iehova ki a Aperahamo e fifiliaga Haana ke kumikumi e tau tuaga i Sotoma mo Komora, ne matakutaku a Aperahamo ke he haohao mitaki he tau tagata tututonu ne nonofo i ai, putoia e nefiu haana ko Lota. Ne ole a Aperahamo ki a Iehova: “To fakamahakava kia e koe e tau tagata tututonu fakalataha mo e tau tagata mahani kelea? Kaeke ke ha ha he ma[a]ga tokolimagofulu e tagata tututonu; to fakamahakava kia e koe ti nakai fakamagalo e ma[a]ga ha ko e tokolimagofulu e tagata tututonu ha ha i ai?” (Kupu 23, 24) Ne pehē e Atua to fakahao e ia e tau maaga kaeke ke 50 ni e tagata tututonu i ai. Ne liu foki lagalima e ole ha Aperahamo ki a Iehova, he fakatote hifo fakahaga e numera ato hoko ke he hogofulu. He tau magaaho takitaha, ne pehē e Atua to nakai fakamahakava e ia e tau maaga kaeke ke tokologa e tagata tututonu i ai.
Kua taufetoko kia a Aperahamo mo e Atua? Nakai pihia! To fakakite he mena ia e aga fakaikaluga. Ko e puhala he leo ha Aperahamo ne fakakite e fakalilifu mo e mahani fakatokolalo. Ne hagaao a ia ki a ia ni ko e “efuefu mo e efuefu afi.” (Kupu 27, 30-32) Lafi ki ai, ne fakakite he tau kupu a Aperahamo e mauokafua haana ke he mahani tonu a Iehova. Ko e manatu ke fakamahakava he Atua e tau tagata tututonu fakalataha mo e tau tagata mahani kelea to ‘mamao e mena ia,’ he talahau e Aperahamo—nakai lagataha ka e lagaua. Ne talahau he tupuna tua fakamooli e mauokafua haana to “hako e mena ka eke” he “[F]akafili he lalolagi oti.”—Kupu 25.
Hako nakai e tau mena ne talahau e Aperahamo? Ē mo e nakai. Ne hehē a ia he talahau kavi ke he hogofulu e tagata tututonu i Sotoma mo Komora. Ka e hako mooli a ia he talahau to nakai “fakamahakava [he Atua] e tau tagata tututonu fakalataha mo e tau tagata mahani kelea.” He moumou he Atua e tau maaga kelea ia he magaaho fakamui, ne fehola a Lota mo e tau tama fifine tokoua haana ne tututonu, he lagomatai he agelu.—2 Peteru 2:7-9.
Ko e heigoa he tala nei ne fakaako ki a tautolu hagaao ki a Iehova? He fakakite ki a Aperahamo e finagalo Haana ke kumikumi e tau maaga, ne uiina mooli e Iehova a ia ke talahau e tau manatu haana. Ti fanogonogo fakaeneene a ia ke he kapitiga haana ko Aperahamo he talahau e tau tupetupe he loto haana. (Isaia 41:8) Kua fulufuluola mooli e mena nei ne fakaako ki a tautolu, ko Iehova ko e Atua mahani fakatokolalo, ne fakamatalahi mo e fakalilifu e tau fekafekau haana he lalolagi! Maaliali ai, ha ha ia tautolu e tau kakano ke falanaki katoatoa ki a Iehova, ko e Fakafili ne taute tumau e mena kua hako.
[Matahui Tala]
a He magaaho ia, ne hukui he agelu a Iehova mo gutuvagahau ma Haana. Taha fakataiaga foki, kikite e Kenese 16:7-11, 13.
[Blurb he lau 10]
Ne ole a Aperahamo ki a Iehova hagaao ki a Sotoma mo Komora