Ko e Ha Kua Lata ke Hoko Atu Tuai?

KUA nakai mukamuka tumau ke hoko atu tuai, po ke nakai mule. Falu he tau paleko ka lata ia tautolu ke fehagai ki ai ko e loa e puhala he fenoga, lavelave e puhalatū, mo e loga e tau matagahua. Ka kua aoga ke hoko atu tuai. Ma e fakatai, ke he gahuaaga, ko e tagata ne hoko atu tuai kua mailoga ko e tagata kua falanaki ki ai mo e fakamakutu. He taha faahi, ko e tagata fa mule ka lauia e gahua he falu mo e tuaga he tau koloa mo e tau gahua. Ko e mule ka fakatupu e tama aoga ke tonoa e falu vahega ti mataofi e holo ki mua he fakaakoaga haana. Ko e mule ka fina atu ke he ekekafo po ke taute nifo he magaaho kotofa ka lauia e tuluiaga haana.

He falu matakavi, kua nakai aoga lahi e hoko atu tuai. He takatakaiaga ia, kua mukamuka lahi ke mule tumau a tautolu. Ka pihia, kua aoga ke feaki e tautolu e manako ke hohoko atu tuai. Ko e maama e aoga he hoko atu tuai ka lagomatai mooli a tautolu ke hoko atu tuai. Ko e heigoa falu kakano he hoko atu tuai? Maeke fēfē ia tautolu ke kautū ke he paleko ke nakai mule? Ti ko e heigoa e tau fua mitaki ka amanaki a tautolu ke moua he hoko atu tuai?

Iehova—Ko e Atua Nakai Mule

Ko e matapatu kakano ati manako a tautolu ke hohoko atu tuai ha kua manako a tautolu ke fifitaki e Atua ne tapuaki e tautolu. (Efeso 5:1) Fakatoka e Iehova e fakafifitakiaga mitaki lahi mahaki he nakai mule. Ne nakai lagataha e mule haana. Ne muitua katoatoa a ia ke he fakaholoaga haana ke fakamooli haana tau finagalo. Ma e fakatai, magaaho ne fifili a Iehova ke moumou e lalolagi nakai mahani Atua he fakapuke, ne tala age a ia ki a Noa: “Kia ta e koe māu e vaka ke he akau ko e kofa.” He tata atu ke he fakaotiaga, ne tala age a Iehova ki a Noa ke hu atu ke he vaka mo e fakailoa ki a ia: “Ha ko e mena toe po fitu to fakato hifo ai e au e uha ke he lalolagi ke he fagofulu e aho ti fagofulu e po; to fakaoti ai e au mai he fuga kelekele e tau mena momoui oti kana ne eke e au.” He magaaho tonu ia ni, “kua hoko ke he aho fitu, ti hoko mai ai e vai he fakapuke ke he lalolagi.” (Kene. 6:14; 7:4, 10) Manamanatu la ke he mena ka tupu ki a Noa mo e magafaoa haana ane mai nakai huhū atu tuai a lautolu ki loto he vaka. Tuga e Atua ha lautolu ne tapuaki, kua lata ia lautolu ke hohoko atu tuai.

Kavi ke he 450 e tau he mole e Fakapuke, ne tala age a Iehova ke he tupuna ko Aperahamo to fanau e ia e tama taane ka tupu mai e Tega ne mavehe. (Kene. 17:15-17) Ne pehē e Atua to fanau a Isaako “ke he vaha pehenai ke he tau ka hau.” Ti fakamooli nakai e mena ia? Talahau he tau Tohiaga Tapu ki a tautolu: “Kua fatu ni a Sara, ti fanau e ia e tama tane ma Aperahamo, ka kua motua tuai a ia, ke he vaha ia ni ne talahau ai he Atua kia ia.”—Kene. 17:21; 21:2.

Loga e fakafifitakiaga he Tohi Tapu ne fakakite e nakai mule he Atua. (Iere. 25:11-13; Tani. 4:20-25; 9:25) Tala mai e Tohi Tapu ki a tautolu kia tatali atu ke he aho he fakafiliaga ha Iehova i mua. Pete he tuga kua “fakamule” mai he kitiaaga he tagata, kua fakamafana ki a tautolu to “nakai mule mai.”—Hapa. 2:3.

Aoga e Hoko Atu Tuai ke he Tapuakiaga

Ko e tau tagata taane Isaraela oti kua lata ke haia mo e nakai mule ke he tau matakavi ne fakatoka ma e “tau galue . . . kia Iehova.” (Levi. 23:2, 4) Ne fifili foki he Atua e tau magaaho ke huhunu e tau poa pauaki. (Esoto 29:38, 39; Levi. 23:37, 38) Nakai kia fakakite he mena nei e manako he Atua ke he tau fekafekau haana ke hohoko atu tuai ke he tapuakiaga ha lautolu?

He senetenari fakamua, ne fakatonu he aposetolo ko Paulo e tau Korinito ke he puhala kua lata ke taute aki e tau feleveiaaga Kerisiano, ne tomatoma a ia ki a lautolu: “Kia eke e tau mena oti mo e fulufuluola mo e taute fakamitaki.” (1 Kori. 14:40) Ko e mena ia, kua lata e tau fakapotopotoaga ma e tapuakiaga faka-Kerisiano ke kamata he magaaho kotofa. Nakaila hiki e onoonoaga ha Iehova ke he nakai mule. (Mala. 3:6) Ko e heigoa mogoia e tau mena ka taute e tautolu ke hohoko atu tuai ke he tau fakapotopotoaga Kerisiano nei?

Fehagai mo e Paleko he Hohoko Atu Tuai

Moua he falu kua lagomatai lahi e fakatokatoka tuai. (Fakatai 21:5) Tuga anei, ke maeke ia tautolu ke hohoko atu he magaaho kotofa ke he matakavi ka o atu ki ai, to pulotu kia ke hoko atu ni ka e kamata? Nakai kia ko e mena mitaki ke fai minuti gahoa foki ke nakai mule a tautolu, pete foki e ‘tau mena ka tutupu ai’ he o atu he puhalatū? (Fakama. 9:11) “Taha mena ke lagomatai e tau tagata ke hohoko atu tuai ko e iloa mitaki ko e fiha e tulā he fenoga,” he talahau he fuata taane ko José ne fa hoko atu tuai.a

Ma e falu, liga lata ke taute e tau fakatokaaga ke toka tuai e gahuaaga ke fakaatā e lahi he magaaho ma lautolu ke hoko atu tuai ke he tau feleveiaaga Kerisiano. Pihia e mena ne taute he taha Fakamoli i Ethiopia he magaaho ne mailoga e ia to 45 e minuti haana he mule ma e tau feleveiaaga he fakapotopotoaga ha ko e hikihiki he tau tulā gahua. Ne fakatokatoka e ia ke hau tuai e kapitiga gahua haana ke matutaki e gahua haana he tau pō feleveiaaga. Ha ko e fakatokaaga ia, ne talia he Fakamoli ke gahua fitu foki e tulā ma e kapitiga gahua haana.

Ka fai fanau ikiiki a tautolu, kua paleko pauaki e hohoko atu tuai ke he tau feleveiaaga. Ko e matagahua ke tauteute e tau tama kua fa lago ke he matua fifine, ka kua maeke mo e kua lata he falu tagata he magafaoa ke lagomatai. Ko e matua fifine i Mesikō ne higoa ko Esperanza nukua leveki tokotaha e tau fanau tokovalu. Ne 5 ke he 23 e tau tau momoui ha lautolu mogonei. Fakamaama e Esperanza e puhala ne maeke e magafaoa haana ke hohoko atu tuai: “Ne lagomatai e tau fanau fifine lalahi haaku ke tauteute a lautolu ne ikiiki. Fakaatā he mena nei au ke fakaotioti e tau gahua kaina haaku ti tauteute foki au ke o atu he magaaho kotofa ke he tau feleveiaaga.” Ne fai magaaho kotofa e magafaoa nei ke toka e kaina, ti kaufakalataha e tau tagata oti ke maeke ke taute pihia.

Aoga Mai he Hoko Atu Tuai ke he Tapuakiaga Haau

He manamanatu ke he tau monuina ne moua e tautolu he hoko atu tuai ke he tau feleveiaaga Kerisiano ka fakamalolō e manako mo e mauokafua ha tautolu ke taute e tau mena oti ke nakai mule. Ko e fifine fuata ne higoa ko Sandra, ne feaki e aga ke hoko atu tuai ke he tau feleveiaaga, ne talahau: “Kua fiafia au ke hoko atu tuai ha kua fai magaaho au ke feleveia mo e tau matakainaga, tutala mo lautolu, mo e maeke ke iloa mitaki a lautolu.” Ka hohoko atu tuai a tautolu ke he Fale he Kautu, maeke ia tautolu ke aoga mai he logona e fakauka mo e gahua fakamooli he falu i ai. Ha ko tautolu i ai mo e tau fakatutalaaga atihake, kua maeke ia tautolu ke lauia mitaki foki ke he tau matakainaga ha tautolu, ‘he fakalagalaga a lautolu ke he fakaalofa mo e tau gahua mitaki.’—Hepe. 10:24, 25.

Ko e lologo mo e liogi hafagi he tau feleveiaaga Kerisiano takitaha ko e vala aoga lahi ke he tapuakiaga ha tautolu. (Sala. 149:1) Kua fakaheke he tau lologo ha tautolu a Iehova, he fakamanatu ki a tautolu e tau mahani kua lata ia tautolu ke feaki, mo e fakamalolō a tautolu ke fakalataha fiafia ke he fekafekauaga. Ka e kua e liogi hafagi? He tau vahā i tuai, ne fakahigoa e Iehova e faituga ko e haana “fale liogi.” (Isaia 56:7) He vahā nei, kua fakapotopoto a tautolu ke liogi ke he Atua he tau feleveiaaga ha tautolu. Ko e liogi hafagi ne nakai ni ko e tau ole ma e takitakiaga mo e agaga tapu ha Iehova ka e tauteute foki e tau manamanatuaga mo e tau loto ha tautolu ke moua e tau vala tala ka fakatutala ki ai. Kua lata ia tautolu ke eketaha ke hohoko atu tuai ke he tau feleveiaaga ha tautolu ma e lologo mo e liogi hafagi.

He tutala ke he kakano haana ati hoko atu tuai ke he tau feleveiaaga, ne pehē a Helen ne 23 e tau he moui: “Manatu au ko e puhala a ia ke fakakite e fakaalofa haaku ki a Iehova, ha kua foaki e ia e tau vala tala oti kana ne kua fakatoka mai, putoia e tau lologo mo e liogi hafagi.” Nakai kia lata ia tautolu ke onoono pihia foki? E, lata ia tautolu. Ko e mena ia, kia eketaha a tautolu ke feaki e aga nakai mule ke he tau matagahua oti ha tautolu, mua atu ke he tau matagahua ne lauia ha tautolu a tapuakiaga ke he Atua mooli.

[Matahui Tala]

[Fakatino he lau 26]

Tauteute tuai

[Fakatino he lau 26]

Fakaatā e magaaho ma e ‘tau mena ka tutupu ai’

[Tau Fakatino he lau 26]

Moua e tau fua mitaki he hohoko atu tuai ke he tau feleveiaaga