Kua Uho Lahi e Laliaga!
KO E Tapuakiaga he Magafaoa mo e fakaako Tohi Tapu kua aoga lahi he feaki e fanau ke he “tau kupu akonaki mo e tau kupu fakamafana [ha Iehova].” (Efeso 6:4) Kaeke ko e matua a koe, kua iloa e koe na mukamuka e tau fanau ikiiki ke ahumate. Maeke fēfē ia koe ke fakatumau a lautolu ke fanogonogo? Manamanatu ke he tau mena ne taute he falu matua.
“Magaaho ne ikiiki lalahi e fanau,” he ui e George, i California, U.S.A., “ne lali au mo e hoana haaku ke fakakehekehe e fakaako Tohi Tapu he magafaoa. Falu magaaho ne tui e mautolu e tau mena tui tuga e tau tagata he Tohi Tapu ti fakataitai e tala ne totou e mautolu he My Book of Bible Stories. Taute foki e mautolu e tau koloa taute tala—tau pelu, tau tokotoko, tau kato, mo e falu mena pihia. Ne taute foki e mautolu e tau tala Tohi Tapu he ‘fakafili ko hai au’ mo e talaga e lapa pelē Tohi Tapu ne ha ha ai e tau hūhū kehekehe. Fai matagahua foki, tuga e talaga e fakatokaaga he vaka ha Noa po ke fakamau hifo e fakapapahiaga he tau mena tutupu he Tohi Tapu. Fakaaoga e mautolu falu magaaho ke ta e tau fakatino ne fakakite e tau tagata po ke tau tala he Tohi Tapu. Ko e mogonei kua fakatokatoka a mautolu he matagahua ke ta e tapulu tau fakaagaaga ne fakamaama he Efeso 6:11-17, ti igatia a mautolu mo e fakamaama e kakano he tau vala. Kua lagomatai he tau puhala nei a mautolu ke olioli e fakaako fakamagafaoa ha mautolu.”
Ko Debi, ko e matua fifine i Michigan, U.S.A., ne talahau: “Ne uka e taane haaku mo au ke hokotia ke he tama fifine ha maua he magaaho ne tolu e tau haana. Ti hoko ke he taha aho, he totou fakaleo lahi e tala ki a Isaako mo Repeka mai he My Book of Bible Stories, ne lagaki hake e au ua e punua fakatino ti kamata ke taute tala. Mogonei kua fanogonogo a ia ke he tau kupu oti! He tau mahina fakamui, ne eke e tau punua fakatino ua nei mo tau tagata kehekehe he Tohi Tapu. He oti e totou e mautolu e tala, ko e tama fifine ha maua ne kumi ke he fale ke tamai e tau toi po ke falu mena foki kua maeke ke taute aki e tala. Kua tuga e kumi he mena galo! Ne eke e puha tevae mo e lipine kula mo fale ha Raava ne ha ha i ai e toua kula. Ko e gata fakatai molū ne lima e futu [1.5 e mita] he loa ne viko he tafi, ne latatonu mo gata apa kula he Numera 21:4-9. Ne tuku e mautolu e tau koloa taute tala he taga kalaie lahi. Fiafia lahi a maua ha kua fa nofo e tama fifine ha maua he loto fale mo e veu haana ‘kato tala Tohi Tapu.’ Ko e olioli ke kitia a ia ne taute e tala ke he puhala kehe lahi ni haana!”
Ko e feaki he tau fanau ko e mena nakai mukamuka, ti lahi atu e magaaho mai he lagataha he faahi tapu ke tuku ki a lautolu e manako ke fekafekau ki a Iehova. Ka e maeke e tapuakiaga he magafaoa mo e fakaako Tohi Tapu ke eke mo fakavēaga ma e falu fakaakoaga fakaagaaga. Nakai fakauaua, kua uho lahi e laliaga!