Ekitabu ky’Eribisulirwa kikabugha kitiki oko biro byaghu ebikasa?

1. Abandu bosi batolere eriyisogha omwatsi wahi w’omughaso?

MUNABWIRE abandu batolere ibayisogha omwatsi w’omughaso munene. Banemwendiligha Yehova mo mutabali oyutolere w’ekihugho n’ekyanya kyosi, kutse banemwendisighala oko luhande lw’enzighu yiwe nyitsibu, Sitani Diabolo? Obuli mundu atolere inyayisogha oluhande olw’aliko, sihali luhande oluli omo katikati. Ekyo bakendiyisogha kikendikangania nga banemwendisyabyaho kera na kera kutse iyehe. (Mat. 25:31-33, 46) Omughulu “w’eryendererya rinene,” basyahirwako ekiminyikalo ky’erilama kutse eky’eritoghotibwa.​—Erib. 7:14; 14:9-11; Eze. 9:4, 6.

2. (a) Erisako ry’ Abaebrania 10:35-39 rikatusaba erikolaki? (b) Ekitabu ky’Eribisulirwa kyangatuwatikya kiti?

² Soma Abaebrania 10:35-39. Wamabya iwabiriyisogha erimira obutabali bwa Yehova, iwabirikola eriyisogha ry’amenge. Lino uli n’engumbu nene y’eriwatikya abandi erisombola ndeke. Okw’ekyo wanganakolesya emyatsi eyiri omo kitabu ky’Eribisulirwa. Ekitabu ky’embaghane ekyo kikakanganaya ebikendisyahikira abakaghana Yehova, aliwe kandi kikakanganaya ng’akasyahemba ati abakimira butaleghula obutabali bwiwe. Tukayira ndeke eriyiteghererya esyokwenene sy’omughaso esyo. Erikola ekyo rikendiwatya eriyisogha ryetu ry’eritendileka erikolera Yehova. Kandi twanganakolesya ebyo twam’igha eriwatikya abandi eriyisogha erikolera Yehova n’erilola embere erimukolera.

3. Tukendisubirya oko mabulyo wahi omo mwatsi ono?

³ Omo mwatsi ono, tukendisubirya oko mabulyo ano: Ni byahi byo byasyahikira abakimira obutabali bw’oMungu? Ni byahi byo byasyahikira abakasombola erimira enyama y’olukula-kula eyikanibweko omo kitabu ky’Eribisulirwa?

EBYASYAHIKIRA ABAKAKOLERA YEHOVA BUTALEGHULA

4. Ni kikuto kyahi kyo Yoane alangira haghuma na Yesu omo lubula?

⁴ Omo nzoli, omukwenda Yoane mwalangira ebikuto bibiri by’abandu abakimira obutabali bwa Yehova n’eribana emiyisa y’engebe y’erikota. Omo kikuto ky’erimbere muli abandu 144 000. (Erib. 7:4) Bakasombolawa oko kihugho eriyakola eguvernema kutse oBwami haghuma na Yesu omo lubula. Haghuma na Yesu, basyatabala ekihugho. (Erib. 5:9, 10; 14:3, 4) Omo nzoli, Yoane mwabalangira ibanimene haghuma na Yesu oko kitwa Sioni omo lubula.​—Erib. 14:1.

5. Ni kyahi ekikendihika oko bakisigha b’oko bahirirwe kw’amaghuta?

⁵ Eritsuka oko mughulu wa Yoane erihika lino, amaelfu w’abandu babirisombolwa eribya baghuma b’oko 144 000. (Luka 12:32; Rom. 8:17) Aliwe, Yoane akabugha ati abasighalire kutse abake b’omo mighanzo eyo, bo basyabya ibakineho oko kihugho omo biro by’enduli. “Abakisigha” abo, basyahirwako “ekiminyikalo” ky’omwiso ky’erikangania ngoko Yehova abalighire embere obulighe bunene butsuke. (Erib. 7:2, 3; 12:17) Neryo, oko katambi kalebe omo mughulu w’obulighe bunene, abakisigha abo basyatwalwa elubula eriyahindana n’abandi b’oko 144 000 abakasyabya ibabirihola mo bataleghula. Basyatabala haghuma na Yesu omo Bwami bw’oMungu.​—Mat. 24:31; Erib. 5:9, 10.

6-7. (a) Ni kindi kikuto kyahi kyo Yoane alangira, n’eBiblia yibughire yitiki oko kikuto ekyo? (b) Busanaki abakisigha b’oko bahirirwe kw’amaghuta n’ab’omo “ndeko nene” batolere eriyiteghererya ebikanibweko omo kitabu ky’Eribisulirwa esura 7?

⁶ Enyuma sy’erilangira ekikuto ky’omo lubula, Yoane mwalangira “endeko nene.” Abandu abali omo kikuto eki, ibo sibawite mighanzo. (Erib. 7:9, 10) Tuk’ighaki okw’ibo? Yoane akabwirawa ambu: “Aba ni bandu abakalua omw’endererya linene, ibabirierya esyokanzu syabo n’eriyirasyo mo nyeru-nyeru omo musasi w’Ekyana ky’Embuli.” (Erib. 7:14) Ab’omo “ndeko nene” eyi, bakendisyabya babala okw’endererya linene, bakendisyikala hano h’oko kihugho n’eribanako emiyisa mingyi eyikatsemesaya.​—Esy. 37:9-11, 27-29; Emi. 2:21, 22; Erib. 7:16, 17.

⁷ Twamabya itwabirisombolwa erisyaya elubula kutse erisyasighala hano h’oko kihugho, litolere itw’ikirirya ngoko twasyayilangirira emyatsi eyikanibweko omo kitabu ky’Eribisulirwa esura 7. Oyo asyabya mughulu w’obutseme oko bikuto bibiri byosi by’abaghombe b’oMungu! Tukendisyatsema kundu kusangwa motwasombola erimira obutali bwa Yehova. Ni yindi myatsi yahi eyo ekitabu ky’Eribisulirwa kikatubwira okw’endererya linene?​—Mat. 24:21.

EKIKENDISYAHIKIRA ABAKALWA N’OMUNGU

8. Obulighe bunene bwasyatsuka buti, n’abandu bangyi basyayiwata bati?

⁸ Omo mwatsi owalaba motwalebirye ngoko hakisiya hake amatabali w’ekipolitike inyabindukira Babeli Mukulu, ni bughambu ebisomo byosi by’amabehi ebiri oko kihugho kyosi. (Erib. 17:16, 17) Ekyo kyasyabya nzuko y’obulighe bunene. Aliwe, ekyo kinemwendisyaleka abandu bangyi ibatsuka erikolera Yehova? Iyehe. Omo mwanya w’ekyo, ekitabu ky’Eribisulirwa 6 kikakanganaya ngoko oko mughulu owakalire oyo, abandu abatekolera Yehova abo basyasonda obuteya oko myatsi y’ekipolitike n’oko bitunga by’ekomerese by’ekihugho kino ebisosekanibwe n’ebitwa. Kundi sib’imira oBwami bw’oMungu, Yehova asyabalangira mo bandu abakalwa naye.​—Luka 11:23; Erib. 6:15-17.

9. Omughulu w’obulighe bunene, abandu b’oMungu sibendisyayiwata bati ng’abandi, na busana n’ekyo, basyahikirwa naki?

⁹ Kwenene, abaghombe bataleghula ba Yehova sibendisyayiwata ng’abandi bandu omo mughulu owakalire oyo ow’obulighe bunene. Ibo bo basyabya ibakine kikuto kighuma kisa oko kihugho eky’abandu abakakolera Yehova Mungu n’erighana eribya oko luhande lwe “nyama.” (Erib. 13:14-17) Busana n’obutaleghula bw’abakakolera oMungu, abakalwa na Yehova basyahitana kutsibu. Busana n’ekyo ebihanda ebyabiriyihira haghuma byasyalwa n’abandu b’oMungu ab’omo kihugho kyosi. EBiblia ikahula amalwa oyo mo malwa wa Gogi na Magogi.​—Ezek. 38:14-16.

10. Ngoko kikanganibwe omo Eribisulirwa 19:19-21, Yehova asyakolaki busana n’ebihanda erilwa n’abandu biwe?

¹⁰ Busana n’amalwa awakalire aya, Yehova asyakolaki? Akatubwira ati: “Erihitana lyaghe lyasyakanyirira.” (Ezek. 38:18, 21-23) Ekitabu ky’ Eribisulirwa esura 19 kikakanganaya ebikendisyabya enyuma syaho. Yehova asyatuma Mughala wiwe eriteya abandu biwe n’erikinda esyonzighu syabo. “Emilondo y’elubula” ni bughambu abamalaika bataleghula haghuma n’abandu 144 000, basyawatikania na Yesu omo malwa Ayo. (Erib. 17:14; 19:11-15) Amalwa aya asyahwa ati? Abandu bosi n’ebitunga byosi ebikalwa na Yehova byasyatoghotibwa olosi!​—Soma Eribisulirwa 19:19-21.

AMALWA ABIHWA, ERIHERUKYA

11. Omwatsi w’omughaso munene omo kitabu ky’Eribisulirwa ni wahi?

¹¹ Terilengekania abaghombe bataleghula b’oMungu nga basyayowa bati bakalama okw’itoghotibwa olosi ery’esyonzighu sy’oMungu! Oyo asyabya mughulu w’obutseme bunene kundu! Nomo hanemwendisyabya omulenge munene w’obutseme omo lubula Babeli Mukulu akatoghotibwa, hane oghundi mwatsi owasyaletera obutseme bunene. (Erib. 19:1-3) Omswatsi oyo, w’omwatsi w’omughaso munene omo kitabu ky’Eribisulirwa​—ni bughambu “eriherukya ry’Ekyana ky’Embuli.”​—Erib. 19:6-9.

12. Ngoko kiri omo Eribisulirwa 21:1, 2, eriherukya ry’Ekyana ky’Embuli ryasyabya mughulu wahi?

¹² Eriherukya ryasyabya mughulu wahi? Akatambi kake embere amalwa we Armagedoni abye, abandu 144 000 bosi basyabya omo lubula. Aliwe, oyo watendisyabya mughulu w’eriherukya ry’Ekyana ky’Embuli. (Soma Eribisulirwa 21:1, 2.) Eriherukya ry’Ekyana ky’Embuli, ryasyabya enyuma sy’amalwa we Armagedoni n’esyonzighu sy’oMungu syosi syabitoghotibwa.​—Esy. 45:3, 4, 13-17.

13. Okw’iherukya ry’Ekyana ky’Embuli hasyakolekaki?

¹³ Okw’iherukya ry’Ekyana ky’Embuli hasyakolekaki? Endwa yikamatanaya omulume n’omukali. Kutya endwa y’Ekyana ky’Embuli yasyamatania omwami Yesu Kristo haghuma n’abandu 144 000, “omuheruki” wiwe. Omwatsi w’omughaso munene oyo, asyatsukisya obutabali buhya-buhya obwasyatabala ekihugho kyosi omo myaka 1 000.​—Erib. 20:6.

OMUYI W’OLUKENGERWA, N’EBIRO BYAGHU EBIKASA

14-15. Ekitabu ky’ Eribisulirwa esura 21 kikasosekanaya abandu 144 000 naki? (Lebaya epitsa eyiri oko kijalada.)

¹⁴ Kandi, ekitabu ky’ Eribisulirwa esura 21 kikasosekanaya abandu 144 000 n’omuyi owakangabasenie owakahulawa mo ‘Yerusalema nyiha-nyihya.’ (Erib. 21:2, 9) Omuyi oyo abya ahimbire oko kibanza (fondasio) ky’amabwe 12 awasakire “kw’amena ikumi n’abiri w’abakwenda erikumi n’ababiri b’Ekyana ky’Embuli.” Busanaki omwatsi oyo mwatsemesya Yoane? Kundi mwasunga erina liwe irinahandikire oko righuma ry’oko mabwe ayo. Olo lwabya lukengerwa lunene kundu!​—Erib. 21:10-14; Efe. 2:20.

¹⁵ Omuyi w’ekisosekanio oyu syasosire oghundi muyi wosi-wosi. Awite embalu (nzira) y’esy’amaghetsi nyibuya-buya, esyonyuyi 12 sy’elulu, ekibanza n’ekiyite ebibambire kw’amabwe w’emisindo yosi y’obughuli bunene, n’olulengo (ebipimo) oluhikire. (Erib. 21:15-21) Aliwe, Yoane mwalangira ngoko habulire kindu kilebe! Langira eby’akatasyatubwira: ‘Nikwa mondalangira ehekalu omo muyi oyo, kusangwa Omukama oMungu Omutoki W’ebyosi n’Ekyana ky’Embuli bo hekalu y’omuyi oyo. Kandi omuyi oyo siali n’obwaga bw’eryuba kutse omukera by’erikolerya mugo kusangwa olukengerwa lw’oMungu lukakolerayago n’etala yago ni Kyana ky’Embuli.’ (Erib. 21:22, 23) Abali omo muyi oyo basyabya haghuma na Yehova busu kwa busu. (Ebr. 7:27; Erib. 22:3, 4) Neryo, Yehova na Yesu bo hekalu y’omuyi oyo.

16. Omo butabali bw’emyaka elfu nguma bw’oBwami bw’oMungu, abandu bosi basyabanaki?

¹⁶ Erilengekania oko muyi oyo kikatsemesaya abahirirwe kw’amaghuta bo kutsibu. Aliwe, abawite amaha w’erisyikala oko kihugho nabo litolere ibatsemera omwatsi oyo. Omo butabali bw’emyaka elfu nguma bw’oBwami bw’oMungu, eYerusalema nyihya-nyihya yasyaleta emiyisa mingyi oko kihugho. Yoane mwalangira emiyisa eyi yikasenda ng’olusi “lw’amaghetsi w’engebe.” N’oko misike ibiri y’olusi olo habya “omuti w’engebe” owaliko ebikoma “by’erilamya ebihanda.” (Erib. 22:1, 2) Abandu bosi abasyabya ibaliho oko mughulu oyo, basyabya n’akanya k’eribana endundi omo syondegheka esyo. Lyolo-lyolo, abandu bosi abak’owa oMungu basyahika-hikana. Sihendisyaswabya amakoni, obulumi, n’emisonia y’obulighe.​—Erib. 21:3-5.

17. Ngoko kikanganibwe omo kitabu ky’ Eribisulirwa 20:11-13, ni bahi bo basyabana endundi omo Butabali bw’Emyaka Elfu Nguma?

¹⁷ Ni bahi bo bakendisyabana endundi omo syondegheka esyo? Ab’erimbere abakendisyabana endundi, y’endeko nene y’abandu abakendisyalama oko Armagedoni n’abana bosi abasyabutwa omo kihugho kihya-kihya. Aliwe kandi, ekitabu ky’ Eribisulirwa esura 20 kikalagha ngoko abaholi basyalubukibwa. (Soma Eribisulirwa 20:11-13.) “Abatunganene” bataleghula ababirihola “n’abatatunganene” abahola isibebabana akanya k’erigha oko Yehova, abosi basyalubukibwa erikala oko kihugho ko hano. (Emib. 24:15; Yoa. 5:28, 29) Ekyo kinasondire eribugha kiti obuli mundu asyalubukibwa oko ngebe oko kihugho omughulu w’obutabali bw’emyaka elfu nguma? Iyehe. Abataligha erikolera Yehova embere bahole sibendisyalubukibwa oko ngebe. Mobabana akanya aliwe mobakangania ko sibatolere erikala oko kihugho Paradiso.​—Mat. 25:46; 2 Tes. 1:9; Erib. 17:8; 20:15.

ERILENGWAKO RY’ENDULI

18. Emyatsi yasyabya yiti oko kihugho oko nduli y’emyaka 1 000?

¹⁸ Emyaka 1 000 yasyabya yahwa, abandu bosi abali oko kihugho basyabya ibabirihika-hikana. Sihendisyaswabya omundu n’omughuma oyukasyabya inyakinatulawako n’erilolo ly’enzuko eryasighalibawa na Adamu. (Rom. 5:12) Eritakira eryasira omo rilolo rya Adamu, ryasyabya isirikiri n’ahake. Neryo ekyo ni bughambu abandu abali oko kihugho “basyasuba oko ngebe” kundi oko nduli y’emyaka 1 000 basyabya ibabiribya bandu abahika-hikene.​—Erib. 20:5.

19. Busanaki litolere ihabya erilengwako ry’enduli?

¹⁹ Tunasi ngoko Yesu mwasighala mutaleghula oko Mungu nibya n’omughulu Sitani abya akamulengako. Aliwe abandu bosi abahika-hikene banemwendisyakola batya omughulu Sitani asyahabwa akanya k’eribalengako? Obuli mundu asyakangania nga ni na mutaleghula oko Yehova kutse iyehe omughulu Sitani asyalusibwa omo abiso oko nduli y’emyaka 1 000. (Erib. 20:7) Abakendisyakangania ko ni bataleghula omughulu w’erilengwako ry’enduli bakendisyabana engebe y’erikota n’eritsemera obwiranda bw’ekwenene. (Rom. 8:21) Abakendisyayisamambula oko Yehova, basyatoghotibwa kera na kera, haghuma na Diabolo n’esyombinga syayo.​—Erib. 20:8-10.

20. Ukayowa wuti busana n’amaminyereri awakatsemesaya awali omo kitabu ky’Eribisulirwa?

²⁰ Wamayowa wuti twabitasyayiteghererya emyatsi eyiri omo kitabu ky’Eribisulirwa? Kyanamakutsemesya eriyilangirira eribererera ry’amaminyereri awakaswekaya aya? Kwenene ekyo kyamakukuna erikokya abandi eriyighunga netu omw’iramya ery’erire ery’oMungu wetu? (Erib. 22:17) Nikwa kundi twamabikania oko myatsi eyi eyikendibererera omo biro ebikasa, tuli n’engumbu nene kandi twanzire eribugha ng’omukwenda Yoane, oyo wabugha ati: “Amina! Omukama Yesu, wase.”​—Erib. 22:20.