Bana obuteke bw’Ekinywa ky’oMungu obo wangakolesya

Omughulu tukasoma eBiblia, twanganabanamo obuteke b’obunya-kirimu omwikwesa-kwesa emyatsi. Aliwe, twangakolaki eribana obuteke obo bo ndeke-ndeke?

Ubye ukayiteghererya n’ehyatsi hike-hike omo myatsi eyikanibwe omo Biblia. Ng’eky’erileberyako, kumbe iwasonda eriminya oyo wahandika erisako eryo ukasoma nga nindi, ng’ahandikiryalyo bandu bahi, kandi mughulu wahi. Kandi kumbe iwaminya emyatsi nga yabya yiti oko mughulu ahandika omwatsi oyo, ebyabya embere n’enyuma w’erihandika omwatsi oyo.

Usondaye esomo esyowangatolamo omwiyibulya amabulyo ng’ano: ‘Abandu abakakanibawako hano babya bakayowa bati? Mubakangania emibere yahi? Busanaki nitolere inigha emibere eyo bakanganaya kutse inayihighula kuyo?’

Ubye ukakolesya esyosomo esyowamigha, omo mubiiri w’eritulira kutse omo ngebe yaghu y’obuli kiro. Wamakola utya ighukendibya n’amenge ngoko eBiblia ikabugha yiti: “Owamenge [asyakolesya] emyatsi eyi.”​—Esy. 107:43.

• Eky’erikola: Uyiteghereraye ngoko emyatsi eyikabanika omo kitsweka eky’omo muhindano w’omo kati-kati k’eyenga ekiri n’omutwe Eby’obughuli omo Kinywa ky’oMungu yikatuwatikaya eriminya ngoko tukendikolesya ebyo tukigha. Kangyi-kangyi ekitsweka ekyo kikabya mo amabulyo agho tutolere eriyibulya, emyatsi eyo twangalengekaniako buli, n’esyofoto esyo twangatungerera.