Iinkhombiso Zencwajana Ethi, IPilo NomSebenzi WobuKrestu IHlelo LomHlangano WeBandla
APRELI 13-19, 2012
AMAGUGU ASELIZWINI LAKAZIMU | GENESISI 31
“UJakopo NoLabani Benza Isivumelwano Sokuthula”
(Genesisi 31:44-46) Yeke mina nawe asenze isivumelwano, kube bufakazi phakathi kwami nawe.” 45 UJakopo wathatha ilitje walijamisa laba lilitje lesikhumbuzo. 46 ULabani wathi eenhlotjeni zakhe: “Buthelelani amatje.” Ngambala benza njalo bawakghubelela aba siqorho. Nabaqeda lapho bagomela esiqorhwenapho.
it-1 883 ¶1
IGaledi
Ngemva kokulungisa ukungezwani kwabo, uJakopo noLabani baphetha ngokwenza isivumelwano. UJakopo wathatha ilitje walijamisa wayala ‘abafowabo’ bona babuthelele amatje abesiqorho, mhlamunye aba njengetafula, lapho kwadlelwa khona isidlo sesivumelwano. Khonokho, uLabani wathi nakaqeda ukubuthelela amatje abasiqorho wabiza indawo leyo ngebizo lesi-Aramu wathi yiYegari-Sahaduta kodwana uJakopo wayibiza ngebizo lesiHebheru wathi yiGaledi. ULabani wathi: “Isiqorhwesi singufakazi phakathi kwami nawe namhlanjesi.” (Gen 31:44-48) Isiqorho samatje sababufakazi ebantwini abadlulako. Kunjengombana ivesi 49 litjho, “iMitsipa” yaba bufakazi bokobana uJakopo noLabani bavumelana ngokuthi bazokuhlalisana ngokuthula kuhlanganise nemindenabo. (Gen 31:50-53) Ngokukhamba kwesikhathi amatje bekasetjenziselwa ukuthi abebufakazi besivumelwano.—Jtj 4:4-7; 24:25-27.
(Genesisi 31:47-50) ULabani wasibiza bonyana yiYegari-Sahaduta, kodwana uJakopo wasibiza bonyana yiGaledi. 48 ULabani wathi: “Isiqorhwesi singufakazi phakathi kwami nawe namhlanjesi.” Kungebangelo kwathiwa yiGaledi. 49 Godu kwathiwa yiMitsipha ngombana uLabani wathi: “Inga uSomnini angaba mlindi phakathi kwami nawe lokha nasisemakudana. 50 Nakwenzeka uhlukumeze amadodakazami namkha uthathe abanye abafazi ngaphandle kwamadodakazami, ngitjho nanyana kungekho obonako, khumbula bonyana uZimu ungufakazi phakathi kwami nawe.”
it-2 1172
IMitsipha
UJakopo wajamisa isiqorho samatje wasibiza ngokuthi ‘yiGaledi’ (okutjho ukuthi “isiQorho sesiVumelwano”) nangokuthi ‘yiMitsipha.’ Ngemva kwalokho uLabani wathi: “Inga uSomnini angaba mlindi phakathi kwami nawe lokha nasisemakudana.” (Gen 31:45-49) Isiqorho samatje sababufakazi bokuthi uJehova ubaqalile bona isivumelwano sokuthula abasenzileko bazosiphetha na.
(Genesisi 31:51-53) Godu uLabani wathi: “Nasi isiqorho engisikghubelele phakathi kwami nawe begodu nanti nelitje lesikhumbuzo. 52 Isiqorho esingakimi nelitje lesikhumbuzo elingakuwe bufakazi besivumelwano sokobana angeze ngasidlula ngize ngakuwe bona ngikulimaze, nawe angeze wasidlula uze ngakimi bona ungilimaze. 53 UZimu kayihlo u-Abrahamu nabozinyana bakababa uNarhori bazakugweba phakathi kwethu.” UJakopo wafunga ngoZimu ohloniphekileko kuyise u-Isaka.”
Rhubhulula Ngezinto ZakaZimu Eziligugu
(Genesisi 31:19) Lokha uLabani nayokurhuna izimvu, uRarheli weba imihlalandlini” yakayise.
it-2 1087-1088
Umhlalandlini
Okwafunyanwa barhubhululi eMesopotamiya neendaweni eziseduze nakhona, kuveza ukuthi umhlalandlini bewusetjenziswa njengetshwayo lokuthi ngubani ozokuba yindlalifa. Ngokwelitje elafunyanwa eNuzi, ngaphasi kobujamo obuthileko abozimu behloko yomndeni bangakhetha umkhwenyana bona abeyindlalifa ngemva kobana ummukhwe wakhe ahlongakele. (Ancient Near Eastern Texts, edited by J. Pritchard, 1974, pp. 219, 220, and ftn 51) Kungenzeka bona uRarheli, emkhumbulwenakhe wazitjela ukuthi, kulungile bona athathe umhlalandlini ngebanga lokuthi uyise akhange aphathe kuhle ubabakwakhe uJakopo. (Madanisa Gen 31:14-16.) ULabani wabuthelela iinhlobo zakhe wagijimisa uJakopo amalanga alikhomba, ukuthi ayokufuna umhlalandlini, lokho kuveza ukuthi bewuqakatheke khulu bona umuntu afumane ilungelo lokubayindlalifa. (Gen 31:19-30) UJakopo bekangazi ukuthi uRharheli wenzeni (Gen 31:32) begodu ayikho into etjengisa ukuthi bekafuna ukusebenzisa umhlalandlini bona athathe ilifa lamadodana kaLabani. UJakopo bekangalotjhi abosingazimu. Yeke, bekazowutjhabalalisa umhlalandlini lokha nakatjhabalalisa abozinyana beentjhaba ngaphasi komuthi omkhulu ebewuseduze neTjhekemu.—Gen 35:1-4.
(Genesisi 31:41, 42) Ngiphile njalo iminyaka ematjhumi amabili yoke endawenakho. Ngikusebenzele iminyaka elitjhumi nane kobana ngifumane amadodakazakho amabili neminyaka esithandathu ukufumana umhlambi. Khonapho waphambanisa umrholwami katjhumitjhumi. 42 Nangathana uZimu wabobaba, uZimu ka-Abrahamu, uZimu ohloniphekako ku-Isaka gade angasi nami, ngiqinisile ngithi ngabe ungiqotjhe ngimkhonoze. Kodwana uZimu ubonile umtlhagwami nomjuluko wezandla zami bekwathi ebusukwini bayizolo wakusola.”
(1 Pitrosi 2:18) Nina nsebenzi, thobelani abaphathi benu ngayo yoke ihlonipho, ingasi labo abanomusa nesineke kwaphela, kodwana nalabo ababukhali.
UJehova—Likhaya Lethu
8 UJakopo nakafika eHarana, umalumakhe uLabani wamamukela ngezandla ezimhlophe ngokukhamba kwesikhathi wamnikela uLeya noRaheli bona babe bomkakhe. Nokho, ngokukhamba kwesikhathi, uLabani walinga ukudlelezela uJakopo, atjhugulula umrholo wakhe amahlandla alitjhumi! (Gen. 31:41, 42) Kodwana, uJakopo wakukghodlelela ukutlhoriswokho, aqiniseka ukuthi uJehova uzokuragela phambili amtlhogomela—nangambala wamtlhogomela! Phela, ngesikhathi uZimu atjela uJakobho bona abuyele eKanana, ihloko yembeleko le besele ‘inemihlambi emikhulu neenceku neencekukazi namakamela nabodumbana.’ (Gen. 30:43) Athokoza ngokudephileko, uJakopo wathandaza: “Awukangifaneli umusa wethando nakho koke ukuthembeka okutjengise encekwini yakho, ngombana ngawela iJordani ngiphethe idondolo lami kwaphela kodwana nje ngibe makampa amabili.”—Gen. 32:10.
Ukufundwa KweBhayibheli
(Genesisi 31:1-18) UJakopo wezwa bonyana amadodana kaLabani gade asithi: “UJakopo lo, sese athethe koke okungokwakababa. Uzinonise khulu ngakho koke ubaba anakho.” 2 Wabona bonyana uLabani akasese mehlweni njengaphambilini. 3 USomnini wathi kuJakopo: “Buyela emuva enarheni yaboyihlo neenhlobeni zakho. Ngizakuba nawe.” 4 Yeke uJakopo wathumela ilizwi kuRarheli noLeya bonyana beze emmangweni emhlambinakhe. 5 Wathi kibo: “Ngilemuke bonyana ubabenu akasese mehlweni kimapha njengombana gade angakho ngaphambilini, kodwana uZimu kababa ungisizile. 6 Nani niyazi bonyana ngisebenzele ubabenu ngamandlami woke. 7 Phezu kwalokho yena wangidlelezela ngokuphambanisa umrholwami kalitjhumi. Nokho uZimu akakamvumeli kobana angilimaze. 8 Bekathi lokha nakathi uzangikhokhela ngomhlambi omabalabala, woke umhlambi uzale iimvana neembuzana ezimabalabala. Athi lokha nakathi uzangikhokhela ngomhlambi onemitleza, woke uzale iimvana neembuzana ezinemitleza. 9 Nje-ke uZimu uthathele ubabenu ifuyo wayinikela mina. 10 “Ngesikhathi sokujarhwa ngakhe ngabhudanga, ngathi nangiqalako ngabona bonyana iimpongo ezijarha umhlambi ngezimabalabala, ezinemitleza nezimapharaphara. 11 Ingilozi kaZimu yathi kimi ebhudangweni, ‘Jakopo!’ ngathi, ‘Ngilapha!’ 12 Yaraga yathi, ‘Qala, zoke iimpongo ezijarha umhlambi ngezimabalabala, ezinemitleza nezimapharaphara. Lokhu kwenzeka ngombana ngibone koke uLabani akwenze kuwe. 13 NginguZimu weBhethe-Eli lapha wazesa khona ilitje nalapha wenze khona isifungo kimi. Nje-ke suka enarheni le bese ubuyela emuva enarheni yekhenu.”’ 14 URarheli noLeya baphendula bathi: “Sisese nesabelo elifeni lakababa na? 15 Angithi usithatha njengamaphandle! Akakasithengisi kwaphela, kodwana ugomojele koke esikhokhelwe ngakho.” 16 Ngambala woke umnono uZimu awumuke ubabethu ungowethu nabantwabethu. Yeke yenza nanyana yini uZimu akutjele bona uyenze.” 17 UJakopo walungisa, wakhweza abantwabakhe nabafazi bakhe phezu kwamakamela, 18 waraga yoke imihlambakhe okutjho yoke ifuyo azifumanela yona ePadana-Aramu, wanqomba kuyise u-Isaka enarheni yeKanana.
APRELI 20-26, 2012
AMAGUGU ASELIZWINI LAKAZIMU | GENESISI 32-33
“Kghani Uyasilwela Isibusiso?”
(Genesisi 32:24) Kuthe bona uJakopo asale yedwa, kwafika umuntu othize wabindana naye bekwasa.
w03 8/15 25 ¶3
Kghani Ufuna UJehova Ngokwethembeka?
EBhayibhelini kuneembonelo ezinengi zabantu abafuna uJehova ngokwethembeka. Omunye wabo nguJakopo, owabindana nengilozi kaZimu bekwasa. Ngebanga lalokho, uJakopo wathiywa ibizo elithi Israyeli (uwunawunene noZimu) ngombana “uphikelele” namkha “uwunawunene,” noZimu. Ingilozi yambusisa ngebanga lokuzimisela kwakhe—Genesisi 32:24-30
(Genesisi 32:25, 26) Umuntu loyo nakabona bonyana akahluli uJakopo wamkghodlha inyonga beyakhwamuka nakalokhu abindana naye njalo. 26 Wathi kuJakopo: “Ngilisa ngikhambe, nakhu kuyasa.” Kodwana uJakopo wathi: “Angizukulisa ungakangibusisi.”
it-2 190
Ukurholophala
Ukurholophala kwakaJakopo. Lokha uJakopo nakaneminyaka epheze ibema-97 ubudala, waqalana nemiphumela yokubindana nengilozi kaZimu ubusuku boke. Wabindana nengilozi bekwaba kulapha imbusisa khona. Ngesikhatheso, ingilozi yathinta inyonga kaJakopo warholophala. Ngebanga lalokho uJakopo wathoma ukuhluza. (Gen 32:24-32; Hos 12:2-4) Njeke kwaba nento ekhumbuza uJakopo ukuthi nanyana ‘awunawunene nabozinyana [ingilozi kaZimu] bewahlula,’ kodwana akhange ahlule ingilozi kaZimu ngamandla. Bekuyihloso kaZimu begodu nguye ovumele bona uJakopo abindane nengilozi, bona kube bufakazi bokuthi uJakopo bekasifuna kwamambala isibusiso sakaZimu.
(Genesisi 32:27, 28) Umuntu loyo wambuza wathi: “Ungubani ibizo lakho?” Yena wathi: “NginguJakopo.” 28 Umuntu wathi: “Ibizo lakho akusazokuba nguJakopo, kodwana uzakuba ngu-Israyeli ngombana uwunawunene nabozinyana nabantu bewahlula.”
it-1 1228
U-lsrayeli
1. Leli libizo uZimu alithiya uJakopo nasele aneminyaka epheze ibema-97 ubudala. Bekuhlangana nobusuku uJakopo ayama ngabo izibuko leJabokhi ayokuhlangana nomfowabo u-Esewu nakazakubindana nengilozi. Ngebanga lokubekezela kwakhe wathiywa ibizo elitjha elithi Israyeli, laba litshwayo lokuthi uJehova umbusisile. Bona uJakopo ahlale akhumbula isenzakalwesi, wathiya indawo leyo ngokuthi yiPeniyeli. (Gen 32:22-31) Ngokukhamba kwesikhathi nakaseBhethe-Eli, uZimu waqinisekisa ukutjhugululwa kwakaJakopo ibizo, wabizwa ngokuthi ngu-Israyeli bekwaba kulapho ahlongakala khona. (Gen 35:10, 15; 50:2; 1Kr 1:34) Ibizo elithi Israyeli livela iinkhathi ezingaphezu kweziyi-2 500, nanyana kunjalo liqalisela esizukulwaneni sakaJakopo njengesitjhaba.—Eks 5:1, 2.
Rhubhulula Ngezinto ZakaZimu Eziligugu
(Genesisi 32:11) Ngibawa kobana ungisindise esandleni somfowethu u-Esewu ngombana ngiyamesaba. Nginevalo lokobana uzangisahlela abe abulale abonobantwana nabantwana ababavikeleko.
(Genesisi 32:13-15) Wahlwa ubusukobo lapho, wakhethela umfowabo u-Esewu isipho phakathi kwalokho agade anakho: 14 iimbuzi ezisikazi ezimakhulu amabili neempongo ezimatjhumi amabili, izimvu ezisikazi ezimakhulu amabili namaqama amatjhumi amabili, 15 amakamela asikazi amatjhumi amathathu namakamedlana wakhona, iinkomazi ezimatjhumi amane neenkunzi ezilitjhumi, abodumbana abasikazi abamatjhumi amabili nabaduna abalitjhumi.
w10 6/15 22 ¶10-11
Amezwi Amahle Enza Kube Nokuthula
10 Ukukhuluma ngomusa kusisiza bona sihlale sinokuthula nabanye abantu. Ukwenza koke okusemandleni bona sibe nokuthula nabanye abantu, kungasisiza sithuthukise indlela esikhuluma ngayo. Ukwenzela abanye izinto ngomusa—ukufuna amathuba wokubasiza, ukubapha izipho ngokusuka ehliziyweni, nokwamukela iimvakatjhi—kungasisiza bona sihlalisane ngokuthula. Kungafana nokuthi ‘sidindela amalahle’ emntwini bona simsize aveze ubuntu obuhle, kwenze kubelula ukukhulumisana lokha nakunento esingavumelani ngayo.—Rom. 12:20, 21.
11 UJakopo uyazi kuhle indaba le. Umfowabo u-Esewu, wambambela amavunda kwatlhogeka bona abaleke ngombana asaba ukuthi uzombulala. Ngemva kweminyaka eminengi, uJakopo wabuya. U-Esewu weza wazomhlangabeza, akhamba namadoda ama-400. UJakopo wathandaza wabawa uJehova bona amsize. Ngemva kwalokho wathumela ifuyo ku-Esewu bona ibe sisipho sakhe. Isiphweso sathambisa ihliziyo ka-Esewu. Nabahlanganako u-Esewu besele athambile, wagijimela kuJakopo wafika wamanga.—Gen. 27:41-44; 32:6, 11, 13-15; 33:4, 10.
(Genesisi 33:20) Wajamisa lapho i-aldari, walibiza bonyana yi-Eli-Elohe-Israyeli.
it-1 980
I-Eli-Elohe-Israyeli
UJakopo wathiywa ibizo elitjha elithi Israyeli ngebanga lokubindana kwakhe nengilozi kaJehova ePeniyeli, kwathi ngemva kokuhlangana kwakhe ngokuthula nomfowabo u-Esewu, wayokuhlala eSukothi neTjhekemu. Wathenga indawo emadodaneni kaRhamori ngemva kwalokho wahloma itendakhe lapho. (Gen 32:24-30; 33:1-4, 17-19) “Wajamisa lapho i-aldari, walibiza bonyana yi-Eli-Elohe-Israyeli.” (Gen 33:20) Ngokuzibiza ngebizo elitjha elithi Israyeli nangokuthiya i-aldari ngebizo lakhe uJakopo utjengisa ukuthi uyalamukela ibizweli begodu uthokoza uZimu ngokumnqophisa bona abuyele eNarheni yesiThembiso aphephile. Indaba le ivela kanye kwaphela eBhayibhelini.
Ukufundwa KweBhayibheli
(Genesisi 32:1-21) UJakopo wangena indlelakhe, khonapho iingilozi zakaZimu zahlangana naye. 2 Kwathi lokha uJakopo nazibonako wathi: “Leli libutho lakaZimu!” Wathiya indawo leyo bonyana yiMarhanayimu. 3 UJakopo wathuma iinthunywa phambi kwakhe kumfowabo u-Esewu enarheni yeSeyiri kwa-Edomu. 4 Wathi kizo: “Tjelani ikosami u-Esewu bonyana incekwayo uJakopo ithi, ‘Bengiseze ngikhonze kwaLabani bekube gadesi. 5 Ngineenkomo nabodumbana, izimvu neembuzi, amakhoboka namakhobokakazi. Nje-ke ngithi angithumele umlayezo lo ekosinami kobanyana ngifumane umusa emehlwenayo.’” 6 Iinthunywa zabuyela kuJakopo zathi: “Sifikile kwamfowenu u-Esewu, nje-ke usendleleni uzokuhlangabeza, ukhamba namakhulu amane wamadoda.” 7 UJakopo wethukwa khulu bewakhathazeka ngalokho. Wahlukanisa abantu akhamba nabo, imihlambi yezimvu neembuzi, yeenkomo neyamakamela ngeenqhema ezimbili. 8 Wadlumbana wathi: “Kuzakuthi u-Esewu nakasahlela isiqhema esinye nokho kube nesinye esiphunyurhako.” 9 Yeke uJakopo wathandaza wathi: “Maye Zimu kabamkhulu u-Abrahamu, Zimu kababa u-Isaka! Somnini wena owathi kimi angibuyele enarhenekhethu neenhlotjeni zami begodu wathi uzangiphumelelisa, 10 ngimncani khulu bonyana ungabeze ube nomusa ongaka bewutjengise nokwethembeka okungaka kimi mina ncekwakho. Iye, benginedondolo kwaphela lokha nangiyama iJordani le, kodwana gadesi sele ngiziinqhema ezimbili. 11 Ngibawa kobana ungisindise esandleni somfowethu u-Esewu ngombana ngiyamesaba. Nginevalo lokobana uzangisahlela abe abulale abonobantwana nabantwana ababavikeleko. 12 Somnini wena ngokwakho uthe ngambala uzangiphumelelisa bewenze iinzukulwana zami zibe ngangehlabathi yelwandle engabalekiko.” 13 Wahlwa ubusukobo lapho, wakhethela umfowabo u-Esewu isipho phakathi kwalokho agade anakho: 14 iimbuzi ezisikazi ezimakhulu amabili neempongo ezimatjhumi amabili, izimvu ezisikazi ezimakhulu amabili namaqama amatjhumi amabili, 15 amakamela asikazi amatjhumi amathathu namakamedlana wakhona, iinkomazi ezimatjhumi amane neenkunzi ezilitjhumi, abodumbana abasikazi abamatjhumi amabili nabaduna abalitjhumi. 16 Koke lokhu wakubeka ezandleni zeensebenzi zakhe, wakuhlukanisa ngemihlambi wathi kizo: “Khambani phambi kwami, nitjhiye isikhala hlangana nemihlambi.” 17 Wayala isisebenzi esimrholi wathi: “Lokha umfowethu u-Esewu nakahlangana nawe bese abuze bonyana ungewakabani, uthathelaphi nokobana umhlambi ongaka lo ngewakabani, 18 uthi kuye, ‘Ngewencekwakho uJakopo. Usisipho esithunyelelwe ikosakhe u-Esewu. Ngikhuluma nje useenthendeni zethu. ’”19 Wayala nesisebenzi sesibili, sesithathu nazo zoke ezinye ezaziraga imihlambi wathi: “Nani nitjho njalo ku-Esewu nanihlangana naye. 20 Niqiniseke bonyana nithi, ‘UJakopo incekwakho useenthendeni zethu. ’” UJakopo wayala njalo ngombana wadlumbana wathi: “Ngizomthoba ummoya ngezipho engimthumelela zonezi. Ngemva kwalokho sengingaqalana naye. Mhlamunye uzangamukela.” 21 Yeke izipho zakaJakopo zakhamba phambi kwakhe, kodwana yena wahlwa ubusukobo ekampeni.
APRELI 27–MEYI 3
AMAGUGU ASELIZWINI LAKAZIMU | GENESISI 34-35
“Imiphumela Ebuhlungu Yokuzihlanganisa Nabantu Abangakalungi”
(Genesisi 34:1) UDina indodakazi kaJakopo ayibelethelwa nguLeya waphuma wayokubukela abantazana bendawo leyo
w97 2/1 30 ¶4
ITjhekemu—Idorobha Elihlangana Neentaba
Amasokana wenarheni leyo bekayiqala njani intombi ejayele ukuvakatjha enarheni yekhabo ikhamba yodwa? Kwathi indodana yekosi nayimbonako ‘yamthatha yamgagadlhela, ngendlela leyo yamrhubutjha.’ Kubayini uDina ehlelwa yinto embi kangaka ngokuzihlanganisa nabantu beKanana abangakalungi? Kghani kungombana bekafuna abangani babentazana abalingana naye? Kghani bekazithemba khulu njengabanye abafowabo? Sibawa ufunde indaba esencwadini kaGenesisi, linga ukuzwisisa ukugandeleleka nokuhlaziseka uJakopo noLeya abaqalana nakho ngebanga lemiphumela yokuzihlanganisa kwakaDina nabantu abangakalungi.—Genesisi 34:1-31; 49:5-7; funda nesiThala sesiZulu sangoJuni 15, 1985, ikhasi 31.
(Genesisi 34:2) Kwathi lokha uTjhekemu umsa kaRhamori umRhivi omphathi wendawo nakambonako wamthatha wamgagadlhela, ngendlela leyo wamrhubutjha.
“Kubalekeleni Ukwenza Izenzo Zomseme Ezisisono!”
14 Into eyenziwa nguTjhekemu kuDina beyamukelekile begodu ibonakala ingokwemvelo kuye. Wamrhalela njalo ‘wamthatha bewamgagadlhela.’ (Funda uGenesisi 34:1-4.) Ubugebengobu babangela umonakalo ongangani! UDina kunye nomndenakhe bavelelwa matlhuwo ngapha nangapha.—Genesisi 34:7, 25-31; Galatiya 6:7, 8.
(Genesisi 34:7) Kusesenjalo amadodana kaJakopo abuya emrhuleni ngombana gade sele ezwile okwenzekileko. Amadoda lawo bekaqumbelene agcwele ipotjwana ngobuhlola obenziwe nguTjhekemu ngokulala nendodakazi kaJakopo, into engakameli ukwenziwa kwa-Israyeli.
(Genesisi 34:25) Elangeni lesithathu lokha basese seenhlungwini, amadodana amabili wakaJakopo, uSimiyoni noLevi, abanakwabo kaDina, bobabili bathatha iinsabula zabo bazingenela edorobheni ngaphandle kwesiliyo, babulala boke abaduna.
w09 9/1 21 ¶1-2
Nawoniweko
Kanengi, abantu abafuna ukuzibuyiselela basuke balinga ukwehlisa ubuhlungu bokoniwa. Ngokwesibonelo, iBhayibheli lisitjela ukuthi ngesikhathi amadodana kaJakopo ezwa ukuthi uTjhekemu ugagadlhele udadwabo uDina ‘aqumbelena agcwala ipotjwana.’ (Genesisi 34:1-7) Bona azibuyiselele ngesenzo esenziwe kudadwabo amadodana kaJakopo aluka amano ngoTjhekemu nomndenakhe. USimiyoni noLevi bazingenela edorobheni babulala boke abaduna kuhlanganise noTjhekemu.—Genesisi 34:13-27.
Ingakghani ukuthuluka kweengazi kwenza bona zoke izinto zibuyele esigeni? Kwathi lokha uJakopo nakezwa ngesenzo samadodanakhe, wathi kiwo: “Ningibangele ihlekelele ngokungenza isizondo ebantwini balapha, . . . yeke nange bangazihlanganisa balwe nami, mina nomzami sizokurhayilwa.” (Genesisi 34:30) Kunokuthi ukuzibuyiselela kwabo kulethe imiphumela emihle, umndeni kaJakopo bekufuze uhlale uthukiwe ngebanga lokuthi iintjhaba abakhelene nazo zingabahlasela. Ukuvimbela lokho bona kungenzeki, uZimu wayala uJakopo bona athuthe umndenakhe enarheni leyo baye eBhethe-Eli.—Genesisi 35:1, 5.
Rhubhulula Ngezinto ZakaZimu Eziligugu
(Genesisi 35:8) Eduze neBhethe-EIi kunendawo okuthiwa yi-Owuku yesiLilo ngombana uDebhora imbelesi kaRabega wahlongakalela khona, wabulungwa lapho ngaphasi komuthi we-owuku.
it-1 600 ¶4
UDebhora
1. Imbelesi kaRabega. Ngesikhathi uRabega akhamba ekhabo aya ePalestina ayokutjhada no-Isaka uDebhora wakhamba naye. (Gen 24:59) Ngemva kokusebenza iminyaka eminengi emndenini Isaka, uDebhora waba lilunga lomndeni kaJakopo kungenzeka ngemva kokuhlongakala kwakaRabega. Kunobufakazi bokuthi ngemva kweminyaka eli-125 uRabega atjhade no-Isaka, uDebhora wahlongakala wabulungwa ngaphasi komuthi omkhulu eBhethi-Eli. Ibizo okwathiywa ngalo umuthi loyo (umuthi we-owuku okutjho ukuthi, umuthi omkhulu wesililo) litjengisa ukuthi umndeni kaJakopo bewumthanda kangangani uDebhora.—Gen 35:8.
(Genesisi 35:22-26) Kwathi u-Israyeli asahlezi kilesosifunda, uRubeni wangenela uBilirha ikhohlo lakayise, walala naye. U-Israyeli wakuzwa lokho. UJakopo gade anamadodana alitjhumi nambili: 23 Amadodana kaLeya bekunguRubeni, izibulo lakaJakopo, uSimiyoni, uLevi, uJuda, u-Isakari noZebuloni. 24 Amadodana wakaRarheli bekunguJosefa noBhenjamini. 25 Amadodana wencekukazi kaRarheli, okutjho uBhilirha, bekunguDani noNafitali. 26 Amadodana wencekukazi kaLeya, okutjho uZilipha, bekunguGadi no-Atjheri. Lawo-ke madodana kaJakopo abelethelwa wona ePadana-Aramu.
Imibuzo Evela Ebafundini
Eenkhathini zama-Israyeli wekadeni, izibulo ngilo na ebeliveza bona uMesiya uzokuvela kuphi?
Ngaphambilini bekhesiphethe ngokutjho njalo. Kubonakala kwanga ngilokho ukutjhiwo mtlolo webeHebheru 12:16. Umtlolo lo uthi u-Esewu ‘bekanganandaba’ nezinto zakaZimu yeke ‘wathengisela [uJakopo] ubuzibulo bakhe ngokudla kwesikhatjhana sinye.’ Lokho kwenza kubonakale kwanga ngesikhathi uJakopo afumana ilungelo lokuba “lizibulo” waba ngukhokho kaMesiya.—Mat. 1:2, 16; Luk. 3:23, 34.
Ukufundisisa imilando yeBhayibheli kutjengise bona indoda bekungatlhogeki ibe lizibulo bona ibe ngukhokho kaMesiya. Tjheja napu ubufakazi:
Amadodana kaJakopo (u-Israyeli), izibulo lakhe alibelethelwa nguLeya belinguRubeni. Ngokukhamba kwesikhathi indodana kaJakopo elizibulo alibelethelwa mkakhe amthanda khulu uRarheli kwaba nguJosefa. Kwathi bona uRubeni afunyanwe amlandu ngokuziphatha kumbi ilungelo lokuba lizibulo ladluliselwa kuJosefa. (Gen. 29:31-35; 30:22-25; 35:22-26; 49:22-26; 1 Kron. 5:1, 2) Nanyana kunjalo ikoro kaMesiya akhenge ivele ngabo bobabili uRubeni noJosefa. Yavela ngoJuda, indodana kaJakopo yesine ayibelethelwa ngoLeya.—Gen. 49:10.
Ukufundwa KweBhayibheli
(Genesisi 34:1-19) UDina indodakazi kaJakopo ayibelethelwa nguLeya waphuma wayokubukela abantazana bendawo leyo 2 Kwathi lokha uTjhekemu umsa kaRhamori umRhivi omphathi wendawo nakambonako wamthatha wamgagadlhela, ngendlela leyo wamrhubutjha. 3 Ihliziywakhe yanamathela kuDina indodakazi kaJakopo, wamthanda wabe wamsomasoma. 4 UTjhekemu wathi kuyise uRhamori: “Ngibawa ungithathele umntazana lo abe mkami.” 5 Lokha uJakopo nakezwa bonyana uDina indodakazakhe usilaphaziwe, amadodanakhe gade asekweluseni nomhlambakhe. Yeke wazithulela abe abuya ekweluseni. 6 URhamori nabakhambisani bakhe baya kuJakopo bona bayokukhuluma naye. 7 Kusesenjalo amadodana kaJakopo abuya emrhuleni ngombana gade sele ezwile okwenzekileko. Amadoda lawo bekaqumbelene agcwele ipotjwana ngobuhlola obenziwe nguTjhekemu ngokulala nendodakazi kaJakopo, into engakameli ukwenziwa kwa-Israyeli! 8 URhamori wenza isiphakamiso wathi kiwo: “Ihliziyo yendodanami uTjhekemu iyancithika ngomntwanenu. Yeke ngizoyibawela umkhamanzi. 9 Thathelanani nathi, siphani amadodakazenu bese nithatha amadodakazethu. 10 Hlalani nathi. Inarha ibanzi phambi kwenu, hlalani ninzinze kiyo. Dlisani umhlambenu nanyana kukuphi, nizizuzele ipahla enarhenapha.” 11 UTjhekemu wathi kuyise lakaDina nabafowabo: “Naningivumelako ngifumene umusa kini, ngizaninikela nanyana yini eniyibiza kimi. 12 Ningangibiza nanyana lilobolo eliphezulu kangangani ngomakoti nesipho esikhulu, ngizanikhokhela lokho enikubizako kimi. Kwaphela nginikelani umntazana abe mkami.” 13 Ngebanga lokobana udadwabo uDina gade asilaphaziwe, amadodana kaJakopo aphendula ngobuqili nakakhuluma noTjhekemu noyise uRhamori. 14 Bathi kibo: “Asikwazi ukwenza into enjalo, akwazeki ukunikela udadwethu indoda engakasoki. Lokho kungaba lihlazo kithi. 15 Singavumelana nawe kwaphela nange nivuma ukufana nathi ngokusoka boke abaduna benu. 16 Nanenze njalo, sizaninikela amadodakazethu bese sithatha amadodakazenu. Sizakuhlala nani sibe munye. 17 Kodwana naningavumelani nathi nisoke, sizakuthatha umntazanethu, sifuduke.” 18 Isiphakamiso sabo sabonakala sisihle kuRhamori nendodanakhe uTjhekemu. 19 Isokana ebegade kungelihlonitjhwako ngakwabo azange lone isikhathi, lenza njengombana batjhwile ngombana gade lithathekile ngendodakazi kaJakopo.