Iinkhombiso Zencwajana Ethi, IPilo NomSebenzi WobuKrestu IHlelo LomHlangano WeBandla
MEYI 4-10, 2012
AMAGUGU ASELIZWINI LAKAZIMU | GENESISI 36-37
“UJosefa Uba Ngungazimbi Wokufelwa Umona”
(Genesisi 37:3, 4) U-Israyeli gade athanda uJosefa khulu ukudlula amanye amadodana ngombana wabelethelwa yena sele amdala. Wamenzela ijasana kanokutjho. 4 Kuthe bona abafowabo babone bonyana uyise umthanda khulu kunabo boke, bamfela umona begodu nokukhuluma kwakhe kuhle bebangasakuthathi.
“Akhese Nilalele Nanti Ibhudango”
IBhayibheli liyaphendula: “Kuthe bona abafowabo babone bonyana uyise umthanda khulu kunabo boke, bamfela umona begodu nokukhuluma kwakhe kuhle bebangasakuthathi.” (Genesisi 37:4) Kuyazwakala ukuthi kubayini baba nomona kodwana abafowabo lakaJosefa benza ubudlhadlha ngokuvumela umona ubalawule. (IzAga 14:30; 27:4) Kghani khekwenzeke bona uzizwe unomona nawubona omunye anikelwa idumo namkha afumana amalungelo owafunako? Khumbula abafowabo lakaJosefa. Umona wabatjhukumisela bona benze izenzo ebebazozisola ngazo. Isibonelo sabo sikhumbuza amaKrestu ukuthi kukuhlakanipha ‘ukuthaba nabathabako.’—Roma 12:15.
UJosefa wabona ukuthi abafowabo bamfela umona. Kghani lokho kwenza bona afihle ijasanakhe kanokutjho nakanabafowabo? Kungenzeka walingeka bona ayifihle. Khumbula, uJakopo bekafuna bona ijasana le ibe litshwayo lokuthi umthanda kangangani uJosefa. UJosefa bekangafuni ukuzwisa uyise ubuhlungu yeke bekahlala ambethe ijasanakhe. UJosefa usibekele isibonelo esihle. Nanyana uBabethu wezulwini angakhethi kodwana ngezinye iinkhathi ukhetha abantu abathileko begodu atjho ngokunqophileko ukuthi uyabathanda. Ngaphezu kwalokho, ubabawa bona baziphathe ngendlela ehlukileko kuneyephasi. Njengejasana kaJosefa, indlela amaKrestu aziphatha ngayo yenza bona bahluke ebantwini abaphila nabo ephasina. Indlela abaziphatha ngayo yenza bona iphasi libahloye. (1 Pitrosi 4:4) Kghani lokho kutjho bona amaKrestu kufuze azifihle? Awa—kunalokho azokulingisa uJosefa ongakhenge ayifihle ijasanakhe.—Lukasi 11:33.
(Genesisi 37:5-9) UJosefa waba nebhudango, kwathi lokha nakatjela abafowabo, bamfela umona ukudlula.6 Wathi kibo: “Akhese nilalele nanti ibhudango engibe nalo: 7 Uyazi gade sibopha iintjherefu zekoroyi esimini. Qalani khonapho isitjherefu sami savuka sajama rwe, nanziya zenu zizombeleza bezikhothamele sami.” 8 Abafowabo bathi kuye: “Eya, hi! Utjho bonyana wena uzoba yikosethu, usibuse na?” Bamhloya khulu ngebanga lebhudango lakhelo nalokho akutjhwileko. 9 UJosefa waba nelinye ibhudango, watjela abafowabo godu wathi: “Lalelani, ngibe nelinye ibhudango. Ngibone ilanga nenyezi neenkwekwezi ezilitjhumi nanye zingikhothamela.”
(Genesisi 37:11) Abafowabo basilingeka ngaye, kodwana uyise wayidlela ngaphakathi indaba le.
“Akhese Nilalele Nanti Ibhudango”
Amabhudango la bekavela kuJehova. Bekasiphorofido begodu uZimu bekafuna uJosefa adlulisele umyalezo wawo. UJosefa bekufuze alingise abaphorofidi bangaphambili, amemezele izahlulelo zakaZimu ebantwini abangalaleliko.
Ngokuhlakanipha, uJosefa wathi kubafowabo: “Akhese nilalele nanti ibhudango engibe nalo.” Abafowabo bazwisisa ukuthi ibhudango litjho ukuthini kodwana akhange balithande. Baphendula bathi: “Utjho bonyana wena uzoba yikosethu, usibuse na?” Yeke, “bamhloya khulu ngebanga lebhudango lakhelo nalokho akutjhwileko.” Kwathi lokha uJosefa nakatjela uyise nabafowabo ngebhudangweli kwesibili, ubujamo bababumbi ukuyaphambili iBhayibheli lithi: “Uyise wamthethisa wathi: “Libhudango bani lakhweli wena msana? Udlumbana bonyana mbala mina nonyoko nabafowenu sizakuza kuwe sihlome iinhloko phasi phambi kwakho na?’” Nanyana kunjalo, uJakopo wayicabangisisa indaba le. Kghani nguJehova okhuluma nomsana lo?—Genesisi 37:6, 8, 10, 11.
UJosefa bekangasi mumuntu wokuthoma namkha wokugcina uZimu amyala bona amemezele isiphorofido esingathandwako nesizokurholela ekuhlunguphazweni. UJesu mumuntu obadlula boke owamemezela isiphorofido esinjalo watjela abafundi bakhe wathi: “Nangabe bangihlunguphaza, nani bazonihlunguphaza.” (Jwanisi 15:20) Woke amaKrestu, akhulileko nabancani bangafunda okunengi kuJosefa owaba nesibindi nokukholwa okuqinileko.
(Genesisi 37:23, 24) Kuthe lokha uJosefa nakafika kibomnakwabo, bamhlubulisa ijasanakhe agade ayembethe, okuyijasana kanokutjho. 24 Bamthatha bamphosela ngemgodini womphathamanzi onganalitho.
(Genesisi 37:28) Yeke kuthe lokha abarhwebi bamaMidiyani nabadlulako, abanakwabo bakhupha uJosefa ngemgodini bamthengisela ama-Itjhimayeli ngeempaparwana ezimatjhumi amabili zesiliva. Wona akhamba naye eGibhide.
Rhubhulula Ngezinto ZakaZimu Eziligugu
(Genesisi 36:1) Naku umlando ka-Esewu okutjho u-Edomu.
it-1 678
U-Edomu
(U-Edomu) [Obomvana], Ama-Edomu (Ama-Edomu).
Ibizo elithi-Edomu yihlathululo yebizo laka-Esewu, iwele lakaJakopo. (Gen 36:1) Wathiywa lona ngemva kokuthengisa kwakhe ubuzibulo ngebanga lesitjhebo esinzotho. (Gen 25:30-34) U-Esewu wabelethwa abomvana (Gen 25:25) begodu umbala lo bewujayelekile kwezinye iindawo ahlala kizo neenzukulwana zakhe zawufumana.
(Genesisi 37:29-32) Kuthe lokha uRubeni nabuyela emgodini womphathamanzi wafumana uJosefa angasekho lapho, warathula izambatho zakhe. 30 Wabuyela kubafowabo wafese wathi kibo: “Umsana loya [akasekho] lapha! Maye mina, ngizakuba yini?” 31 Yeke bahlaba imbuzi, bathatha ijasana kaJosefa bayenya eengazini zayo. 32 Bathumela ijasana kanokutjho leyo kuyise bathi: “Sithole lokhu. Kuqale bonyana akusi ngokwendodanakho na.”
it-1 561-562
Umtlhogomeli
Lokha umelusi nakavuma ukulusa namkha ukugada umhlambi bekazibopha ngokomthetho bona uzowutlhogomela begodu awuvikele. Bekaqinisekisa umnikazi womhlambi bona uzowutlhogomela awunikele ukudla aqinisekise nokuthi awetjiwa, nange angakwenzi lokho bekufuze ahlawule. Nanyana kunjalo, umthetho lo bewungambophi umelusi nakuvela ubujamo umuntu angekhe akghone ukubulawula namkha nakuhlasela isibandana esinelaka. Bona umelusi angathweswa umlandu bekufuze alethe ubufakazi, ngokwesibonelo bekufuze eze neensalela zesilwana esibuleweko. Ngemva kobana umnikazi womhlambi abone ubufakazi, bekabophekile bona angathwesi umelusi umlandu.
Kusetjenziswa ikambiso efanako nakwezinye iindawo, ngokwesibonelo indodana elizibulo beyibekwa ngokomthetho bona itlhogomele abafowabo nabodadwabo abancani. Yeke, lokho kwenza sizwisise ukuthi kubayini uRubeni bekatshwenyekile ngoJosefa njengombana kuvezwe emTlolweni kaGenesisi 37:18-30, lokha abanye abafowabo nabaluka amano wokumbulala wathi. “Singambulali.’ . . . ‘Ningathululi iingazi. . . . ningamusi isandla.’ URubeni watjho lokhu ukuze amphephise ezandleni zabo kobana akghone ukumbuyisela kuyise.” Lokha uRubeni nakafumana uJosefa angasekho ngemgodini wezwa ubuhlungu khulu kangangobana “warathula izambatho zakhe” warhuwelela wathi: “Umsana loya [akasekho] lapha! Maye mina, ngizakuba yini?” Bekazi ukuthi angabekwa umlandu ngokulahleka kwakaJosefa. Bona bangabekwa umlandu, abafowabo lakaJosefa baletha ubufakazi bokuthi uJosefa ubulawe sibandana esinelaka. Bathatha isambatho sakhe basifaka eengazini zembuzi. Ngemva kwalokho bathatha isambathweso basinikela uyise, nanyana uRubeni bekanikelwe umthwalo wokutlhogomela abafowabo akhange abekwe umlandu ngokulahleka kwakaJosefa ngombana ubufakazi obalethwako benza bona uJakopo aphethe ngokuthi uJosefa ubulewe sibandana esinelaka.—Gen 37:31-33.
Ukufundwa KweBhayibheli
(Genesisi 36:1-19) Naku umlando ka-Esewu okutjho u-Edomu. 2 U-Esewu wathatha abafazi emadodakazini weKanana: u-Ada indodakazi ka-Eloni umRhithi, u-Oholibhama indodakazi ka-Ana oyindodakazi kaTsibiyoni, umRhivi 3 noBhasemathi indodakazi ka-Itjhimayeli udadwabo kaNebayothi. 4 U-Ada wabelethela u-Esewu u-Elifazi, uBhasemathi wabeletha uRewuyeli, 5 u-Oholibhama wabeletha uJewutjhi, uJalamu noKhorarhi. Lawo bekumadodana ka-Esewu abelethelwa wona eKanana. 6 U-Esewu gade athethe abafazi bakhe, amadodanakhe, amadodakazakhe nabo boke bomndenakhe, ifuywakhe, zoke iinlwana ezinye kanye nayo yoke ipahla ayizuza enarheni yeKanana, wafudukela enarheni engepumalanga komfowabo uJakopo. 7 Ipahlabo besele iyinengi khulu kobana bebangaragela phambili nokuhlala ndawonye. Inarha ebegade bahlala kiyo besele ingasakghoni ukubondla bobabili ngebanga lefuywabo. 8 U-Esewu okutjho u-Edomu, wanzinza eentatjaneni zeSeyiri. 9 Lo mlando ka-Esewu uyise wama-Edomu wangeentatjaneni zeSeyiri. 10 Lawa-ke mabizo wamadodana ka-Esewu: u-Elifazi indodana ka-Ada umka-Esewu, uRewuyeli indodana kaBhasemathi umka-Esewu. 11 Amadodana ka-Elifazi bekunguTemana, u-Omari, uTsefo, uGatami noKhenazi. 12 Indodana ka-Esewu, u-Elifazi, gade anekhohlo ibizo lalo kunguTimna owambelethela u-Amalekhi. Lezo bekuziinzukulwana zomka-Esewu u-Ada. 13 Lawa bekumadodana kaRewuyeli: uNarhathi, uZerarhi, uTjhama noMiza. Lezo bekuziinzukulwana zomka-Esewu uBhasemathi. 14 Amadodana womka-Esewu u-Oholibhama, indodakazi ka-Ana oyindodakazi kaTsibiyoni, awabelethela u-Esewu bekunguJewutjhi, uJalamu noKhorarhi. 15 Lawa bekumakhosana weenzukulwana zaka-Esewu okumadodana ka-Elifazi izibulo laka-Esewu: ikosana uTemana, ikosana u-Omari, ikosana uTsefo, ikosana uKhenazi, 16 ikosana uKhorarhi, ikosana uGatamu, ikosana u-Amalekhi. Lawo bekumakhosana abelethelwe ngu-Elifazi enarheni yakwa-Edomu. Wona gade aziinzukulwana zaka-Ada. 17 Lawa bekumadodana kaRewuyeli umsa ka-Esewu: ikosana uNarhathi, ikosana uZerarhi, ikosana uTjhama, ikosana uMiza. Lawo-ke bekumakhosana abelethelwe nguRewuyeli enarheni yakwa-Edomu. Wona gade aziinzukulwana zomka-Esewu uBhasemathi. 18 Lawa bekumadodana ka-Oholibhama umka-Esewu: ikosana uJewutjhi, ikosana uJalamu, ikosana uKhorarhi. Lawo-ke bekumakhosana abelethwe mka-Esewu u-Oholibhama oyindodakazi ka-Ana. 19 Lezo bekuziinzukulwana zaka-Esewu okutjho u-Edomu ebegade zimakhosana weenkoro.
MEYI 11-17, 2012
AMAGUGU ASELIZWINI LAKAZIMU | GENESISI 38-39
“UJehova Akhenge Amtjhiye UJosefa”
(Genesisi 39:1) UJosefa gade asiwe eGibhide. Kwathi ama-Itjhimayeli nakafika lapho, uJosefa wathengiselwa uPothifara umGibhide ogade ayinduna ekulu kaFaro begodu amphathi wobuzimba.
“Ngingakwenza Njani Ukukhohlakala Okungaka?”
“UJosefa gade asiwe eGibhide. Kwathi ama-Itjhimayeli nakafika lapho, uJosefa wathengiselwa uPothifara umGibhide ogade ayinduna ekulu kaFaro begodu amphathi wobuzimba.” (Genesisi 39:1) Emezwini lawo, ukulandisa kweBhayibheli kusisiza sibone ihlazo lesokaneli njengombana labuye lathengiswa godu. Bekamane ayipahlo nje! Singacabanga ngoJosefa alandela umphathakhe omutjha, induna ekulu emGibhide, edorobheni elineentarada eziphithizelako ezizele ngeentolo ezinengi hlanu kwalapho esele kuzokuba likhaya lakhe elitjha.
Nakulikhaya lona! Besele kuyinto ehluke khulu kunaleyo uJosefa ebeka sele ahlala kilo. Wakhulela emndenini ebewuhlala ematendeni, bewuhlala uthutha ukhamba nomhlambawo wezimvu koke lapho uyakhona. Lapha-ke, uPothifara bekumGibhide onjingileko obekahlala emabayibayini, izindlu zakhona bezipendwe ngombala omuhle okhanyako. Abarhubhululi bathi amaGibhide wekadeni bewaneentoni ezihle, iingadi ezikantjelweko zitjalwe nemithi yomthunzi namadamu ebekutjalwa kiwo isitjalo se-papyrus, lotus nezinye iintjalo zemanzini. Eminye imizi beyakhiwe eengadini, kuneminyango eminengi ebethisa umoya omnandi, amafesidere amakhulu angenisa umoya opholileko, namakamaro amanengi kuhlanganise nekamaro elikhulu lokudlela kunye namakamaro weensebenzi.
(Genesisi 39:12-14) Yeke umkaPothifara wamtjhubelela ngesambatho sakhe wathi: “Ngiyakubawa hle, lala nami!” Kodwana uJosefa waphunyurha, watjhiya isambatho sakhe ezandleni zomfazi loyo, waphumela ngaphandle. 13 Kuthe umkaPothifara nakabona bonyana uJosefa utjhiye isambatho sakhe bewaphumela ngaphandle, 14 wabiza iinsebenzi zangekumbenakhe wathi: “Akhese nithi niyaqala, umHebheru lo ulethwe kithapha bonyana azosiphuphela! Khona nje ungene lapha bonyana azokulala nami kodwana ngarhuwelela.
(Genesisi 39:20) Wathatha uJosefa wamphosela ngejele lapha kubotjhwe khona iimbotjhwa zesigodlo. UJosefa gade asejele.
“Ngingakwenza Njani Ukukhohlakala Okungaka?”
Kuncani esikwaziko ngobujamo bamajele weGibhide wangeenkhathezo. Abarhubhululi bafumane iinsalela zeendawezo—imakhiwo emikhulu enamakamerwana wejele angemigodini. Kamva uJosefa wahlathulula indawo le ngebizo elitjho ukuthi ‘umgodi,’ elitjho indawo enzima tshu enganathemba. (Genesisi 40:15) Encwadini yamaRhubo, sifunda ngokuthi uJosefa wahlunguphazwa: “Baminyezela iinyawo zakhe ngamakhamandela, intamakhe yafakwa ikholoro yesimbi.” (IRhubo 105:17, 18) Ngezinye iinkhathi amaGibhide bewabekela iimbotjhwa imibandela, bazibophe imikhonwazo ngemuva eendololwaneni; ezinye bebazifaka iinkholoro zesimbi eentanyeni zazo. Qala bona uJosefa waphathwa kumbi kangangani kunganalitho alenzileko!
Ngaphezu kwalokho, lokhu bekungasi yinto yesikhatjhana. Ukulandisa kuthi uJosefa ‘wahlala ejele.’ Wahlala iminyaka eminengi endaweni embi leyo! UJosefa bekangazi ukuthi uzakhe atjhatjhululwe. Njengombana amalanga athusako lawo adosa, afikelela eemvekeni, abaziinyanga, wenza njani bona angalahlekelwa lithemba?
Ukulandisokhu kusinikela ipendulo esiqinisekisako: “[UJehova, NW] gade anaye. Waba nesisa kuye.” (Genesisi 39:21) Ayikho imithangala yejele, iinsimbi, nemigodi enzima tshu engavimbela ithando lakaJehova bona lifikelele eenkhonzini zakhe. (Roma 8:38, 39) Singamcabanga uJosefa athululela ubuhlungu bakhe kuBabakhe wezulwini ngomthandazo abuye godu afumane ukuthula nokuzola okulethwa ‘nguZimu wenduduzo yoke.’ (2 Korinte 1:3, 4; Filipi 4:6, 7) Khuyini enye uJehova ayenzela uJosefa? Sifunda ukuthi waragela phambili ‘ngokumenzela umusa phambi komphathijele.’
(Genesisi 39:21-23) Kodwana uSomnini gade anaye. Waba nesisa kuye bewamenzela umusa phambi komphathijele. 22 Umphathijele wabeka uJosefa bona abe yinduna phezu kwazo zoke iimbotjhwa. Wabekwa bonyana atjheje koke okwenziwa ngapho. 23 Umphathijele azange azitshwenye ngokutjhejisisa nanyana yini ebe ingaphasi kwelihlo lakaJosefa ngombana uSomnini gade anoJosefa begodu amphumelelisa kinanyana yini agade ayenza.
“Ngingakwenza Njani Ukukhohlakala Okungaka?”
Ukulandisokhu kusinikela ipendulo esiqinisekisako: “[UJehova, NW] gade anaye. Waba nesisa kuye.” (Genesisi 39:21) Ayikho imithangala yejele, iinsimbi, nemigodi enzima tshu engavimbela ithando lakaJehova bona lifikelele eenkhonzini zakhe. (Roma 8:38, 39) Singamcabanga uJosefa athululela ubuhlungu bakhe kuBabakhe wezulwini ngomthandazo abuye godu afumane ukuthula nokuzola okulethwa ‘nguZimu wenduduzo yoke.’ (2 Korinte 1:3, 4; Filipi 4:6, 7) Khuyini enye uJehova ayenzela uJosefa? Sifunda ukuthi waragela phambili ‘ngokumenzela umusa phambi komphathijele.’
Rhubhulula Ngezinto ZakaZimu Eziligugu
(Genesisi 38:9, 10) Kodwana u-Onani gade asazi bonyana nakuba nendodana angeze kwaba ngeyakhe, nje-ke bekuthi njalo lokha nayama umrharibakhe aphalazele imbewu phasi ukuze angabeletheli umnakwabo abantwana. 10 Isenzo sakheso saba simbi phambi kwakaSomnini, yeke wamliselela bona naye afe.
it-2 555
U-Onani
Ibizo elithi Onani litjho ukuthi [“umphumela wobudoda bami namkha amandla amakhulu].
Yindodana kaJuda, eyabelethwa yindodakazi yomKanana okuthiwa nguTjhuwa. (Gen 38:2-4; 1Kr 2:3) Ngemva kokuthi umfowabo ka-Onani obekanganabantwana u-Eri abulelwe nguJehova ngokwenza izinto ezimbi, uJuda watjela u-Onani bona athathe umrharibakhe omhlolokazi uTamari. Nangabe bekazombelethela indodana, bengeze kube ngeyaka-Onani, begodu izibulo ngilo ebelizokuba yindlalifa ka-Eri; nangabe idlalifa beyingekho, ngu-Onani ebekazokufumana ilifa. Bekuthi u-Onani nakalala no-Tamari, “aphalazele imbewu phasi” ukuze angabeletheli umnakwabo abantwana. Endabeni le u-Onani bekangaskomori, ngombana iBhayibheli lithi “bekuthi njalo lokha nayama umrharibakhe aphalazele imbewu phasi.” Umnqopho ka-Onani bekukuthi imbewakhe ingangeni kuTamari. Ngebanga lokuba marhamaru akhenge alalele uyise, begodu akhenge ahloniphe ilungiselelo lomtjhado elivela kuZimu, u-Onani azange abenabantwana, yeke uJehova wamliselela bona naye afe.—Gen 38:6-10; 46:12; Num 26:19.
(Genesisi 38:15-18) Kuthe uJuda nakambonako, wadlumbana bona uyingwadla ngombana gade agubuzese ubuso bakhe. 16 Waphambukela kuye angamboni bonyana ngumalukazanakhe, wafese wathi kuye: “Kunjani ngamabhayi?” Yena wathi kuJuda: “Uzawahlawula ngani amabhayi lawo?” 17 UJuda wathi: “Mina ngizakuthumelela imbuzana emihlambinami.” Yena wathi: “Kulungile, kwaphela nange unganginikela isibambiso kufikela lapha uthumela khona imbuzana leyo.” 18 UJuda wathi: “Alo, sibambiso bani nje engingakunikela sona?” Yena wathi: “Umtiya onedzilamnwana yetshwayo lakho kanye nedondolo lakhwelo kwaphela.” Yeke uJuda wamnikela izintwezo, wamngena-ke, wamenza waba sidisi.
w04 1/15 30 ¶4-5
Imibuzo Evela Ebafundini
UJuda wona ngombana akhange asizalise isithembiso sokobana atjhadise uTamari nendodanakhe uTjhelarhi. Waya emabhayini nomma wetempelini ebekacabanga bona uyingwadla. Lokhu bekungavumelani nomthetho kaZimu, othi umuntu kufuze aye emabhayini nomuntu atjhade naye kwaphela. (Genesisi 2:24) Eqinisweni, uJuda akhange aye emabhayini nengwadla. Kunalokho, wangena esikhundleni sendodanakhe uTjhelarhi angazi, wangena uTamari ngemva kwalokho wambelethela abantwana abasemthethweni.
Okwenziwa nguTamari bekungasi kuphula umthetho. Abantwana bakhe abamawele bebangaqalwa njengabantwana bobungwadla. Lokha uBhowazi weBhethe-Lehema angena uRute uMowabikazi, abadala beBhethe-Lehema bakhuluma kuhle ngendodana kaTamari uPereza, athi kuBhowazi: “Kuthi abantwana uSomnini akupha bona ngeqhakazaneli babe mndeni ofana nowakaPereza, uTamari awubelethela uJuda.” (Rute 4:12) UPerezi ubalwa hlangana nabokhokho bakaJesu Krestu.—Matewu 1:1-3; Lukasi 3:23-33.
Ukufundwa KweBhayibheli
(Genesisi 38:1-19) Ngesikhatheso uJuda watjhiya abafowabo wehla wayokuhlala nomuntu we-Adulamu okuthiwa nguRhira. 2 Lapho uJuda wafese wabona indodakazi yendoda yomKanana okuthiwa nguTjhuwa, wayithatha. Wayiyama, 3 yabeletha indodana, uJuda wayithiya ibizo bona ngu-Eri. 4 Yaba sidisi godu, yabeletha indodana, yayithiya ibizo bona ngu-Onani. 5 Yabeletha indodana godu yayithiya ibizo bona nguTjhela. [Ngesikhatheso] uJuda gade aseKeziba. 6 UJuda wathathela u-Eri izibulo lakhe umfazi, ibizo lakhe bekunguTamari. 7 Kodwana u-Eri, izibulo lakaJuda gade akhohlakele phambi kwakaSomnini, ngalokho uSomnini wamliselela bona afe. 8 Yeke uJuda wathi ku-Onani: “Ngena umkamnakwenu, ugcine isiko kuye njengomrharibakho ubelethele umnakwenu abantwana.” 9 Kodwana u-Onani gade asazi bonyana nakuba nendodana angeze kwaba ngeyakhe, nje-ke bekuthi njalo lokha nayama umrharibakhe aphalazele imbewu phasi ukuze angabeletheli umnakwabo abantwana. 10 Isenzo sakheso saba simbi phambi kwakaSomnini, yeke wamliselela bona naye afe. 11 UJuda wathi kumalukazanakhe uTamari: “Buyela ekhenu, uhlale umuhlolokazi bekukhule indodanami uTjhela.” Watjho njalo ngombana wadlumbana wathi: “Naye uzabe ahlongakale njengabafowabo.” Yeke uTamari wabuyela kwabo. 12 Ngemva kwesikhathi eside umkaJuda, indodakazi kaTjhuwa wahlongakala. Kuthe bona uJuda aqede ukuzila, wakhuphukela eTimna emadodeni ebegade arhuna izimvu zakhe. Waphekelelwa mkhongakhe uRhira we-Adulamu. 13 Kwathi bona uTamari atjelwe bonyana usosokanakhe uya eTimna ukuyorhuna izimvu zakhe, 14 wahlubula izambatho zobuhlolokazi, waziphotjhonga bewazigubuzesa ngesiyaya. Wathithibala ejikeni le-Enayimu, endleleni eya eTimna. Lokhu wakwenza ngombana wabona bonyana nanyana uTjhela sele akhulile, akanikelwa yena bona abe mfazakhe. 15 Kuthe u Juda nakambonako, wadlumbana bona uyingwadla ngombana gade agubuzese ubuso bakhe. 16 Waphambukela kuye angamboni bonyana ngumalukazanakhe, wafese wathi kuye: “Kunjani ngamabhayi?” Yena wathi kuJuda: “Uzawahlawula ngani amabhayi lawo?” 17 UJuda wathi: “Mina ngizakuthumelela imbuzana emihlambinami.” Yena wathi: “Kulungile, kwaphela nange unganginikela isibambiso kufikela lapha uthumela khona imbuzana leyo.” 18 UJuda wathi: “Alo, sibambiso bani nje engingakunikela sona?” Yena wathi: “Umtiya onedzilamnwana yetshwayo lakho kanye nedondolo lakhwelo kwaphela.” Yeke uJuda wamnikela izintwezo, wamngena-ke, wamenza waba sidisi. 19 Nakasuka lapho uTamari, wanqomba ekhaya, wahlubula isiyaya sakhe, wembatha izambatho zobuhlolokazi godu.
MEYI 18-24, 2012
AMAGUGU ASELIZWINI LAKAZIMU | GENESISI 40-41
“UJehova Wasiza UJosefa”
(Genesisi 41:9-13) Yeke ihloko yabaphathikapho yathi kuFaro: “Maye mina! Namhlanje ngikhumbula imitjhaphami. 10 UFaro wakhe wathukuthelela iinkhulu zakhe, ngalokho wangithatha ngikanye nehloko yababhagi wasifaka ngesikhungweni emzini womphathi wobuzimba. 11 Omunye nomunye wethu waba nebhudango ngobusuku bunye. Ibhudango ngalinye belinehlathululwalo. 12 Phakathi kwethu bekunesokana lomHebheru ebegade liyinceku yomphathi wobuzimba. Salitjela amabhudangwethu, lasihlathululela wona ngamunye ngamunye ngokwebhudango lakhe. 13 Ngambala kwenzeka poro njengombana lalihlathululile: Mina ngabuyiselwa esikhundleni sami kodwana indodenye leya yona yahlonywa esigodweni.”
“Angithi NguZimu Okwazi Ukuhlathulula Amabhudango?”
Kungenzeka bona umphathikapho wamkhohlwa uJosefa kodwana uJehova yena akhange amkhohlwe. Ngelinye ilanga, wenza bona uFaro abenamabhudango ararako. Ekuthomeni, wabhudanga iinkomo ezilikhomba ezinonileko zivela ngeMlanjeni iNayili, kwalandela ezilikhomba ezondileko. Iinkomo ezondileko zaginya ezinonileko. Ngokulandelako, uFaro wabhudanga iinqwambi ezilikhomba zekoroyi ezinothileko. Kwathi kusese njalo kwavela ezinye iinqwambi ezimatsikani, zarhiribidela ezimabhombo. Ekuseni, uFaro wavuka atshwenyekile, wabiza boke abosiyazi nabosomlingo beGibhide bona bazomhlathululela ukuthi amabhudango la atjho ukuthini. Kodwana bahluleka. (Genesisi 41:1-8) Ukuthi bathini kuFaro asazi, esikwaziko kukuthi wasilingeka ngebanga lokuhluleka kwabo ukuhlathulula amabhudangwakhe—uFaro bekafuna kwamambala ukwazi ukuthi amabhudango la atjho ukuthini.
Ekugcineni, umphathikapho wakhumbula uJosefa! Unembezakhe wamtshwenya, ngemva kwalokho watjela uFaro ngoJosefa ongejele owabahlathululela ngokunembileko amabhudangwabo banehloko yababhagi eminyakeni emibili eyadlulako. Msinyana, uFaro wayala bona uJosefa abizwe.—Genesisi 41:9-13.
(Genesisi 41:16) UJosefa waphendula uFaro wathi: “Awa, akusikho kwami ukuhlathulula amabhudango, kodwana nguZimu ozakunikela ipendulo elungele kuFaro.”
(Genesisi 41:29-32) “Kuzokuba khona inala ekulu kiyo yoke inarha yeGibhide iminyaka elikhomba. 30 Ngemva kwalokho kuzokuba khona indlala iminyaka elikhomba. Koke ukusutha kuzakulitjalwa eGibhide ngombana indlala izakukhothulula inarha. 31 lye, ukusutha angeze bekusakhunjulwa enarheni ngombana indlala leyo iza ngamandla. 32 Isizathu sokobana uFaro anikelwe ibhudango ngeendlela ezimbili kukobana indaba le uZimu uyiqinisekisile begodu uzayenza msinyazana.
“Angithi NguZimu Okwazi Ukuhlathulula Amabhudango?”
UJehova uyabathanda abantu abathobekileko nabathembekileko, yeke akusimangazi ukuthi wanikela uJosefa ukuhlakanipha bona akghone ukuhlathulula amabhudango ahlule abosiyazi nabaphristi. UJosefa watjela uFaro ukuthi amabhudango la atjho into eyodwa. Ngokubuyelela umlayezo lo, uJehova bekaqinisekisa ukuthi indaba le “uyiqinisekisile”—izokuzaliseka nakanjani. Iinkomo ezinonileko neenqwambi ezimabhombo zitjho iminyaka elikhomba yenala eGibhide, kuthi iinkomo ezondileko neenqwambi ezimatsikana zitjho iminyaka elikhomba yendlala ezokulandela ngemva kweminyaka yenala. Indlala le beyizokuza ngamandla, yenze bona ukusutha kungasakhunjulwa enarheni.—Genesisi 41:25-32.
(Genesisi 41:38-40) UFaro wakhuluma neenkhulu zakhe wathi: “Singamthathaphi umuntu onjengendoda le, umuntu onommoya kaZimu?” 39 Nje-ke wathi kuJosefa: “Njengombana uZimu akwambulele koke lokhu nje, kuyakhanya bonyana akakho omunye onelihlo nohlakaniphe njengawe. 40 Nguwe ozakuphatha isigodlo sami. Nje-ke boke abantu bami kumele balalele wena. Mina ngizakuba mkhulu kuwe ngesigodlo kwaphela.”
“Angithi NguZimu Okwazi Ukuhlathulula Amabhudango?”
UFaro wenza njengombana athembisile. Wambathisa uJosefa isambatho selineni. Wamfaka umncamo wegolide entanyeni, idzila mnwana etlikitliweko, wamkhweza ikarana esezingeni lesibili kuneyakhe wamenza umengameli wenarha yoke yeGibhide. (Genesisi 41:42-44) Ngelanga linye uJosefa waphuma ngejele waya esigodlweni. Wavuka asibotjhwa esingatjho litho kwathi nalitjhingako, walala sele angumengameli, angewesibili kusukela kuFaro. Kuyabonakala ukuthi uJehova wambusisa uJosefa ngebanga lokukholwa kwakhe! UJehova wakubona ukuphathwa kumbi kwakaJosefa, walungisa ubujamo ngesikhathi nangendlela efaneleko. UJehova bekangalungisi ukuphathwa kumbi kwakaJosefa kwaphela kodwana bekavikela nesitjhaba sangomuso sama-Israyeli. Eenhlokweni ezilandelako sizokubona ukuthi wakwenza njani lokho.
Rhubhulula Ngezinto ZakaZimu Eziligugu
(Genesisi 41:14) Yeke uFaro wathumela bona kubizwe uJosefa. Msinyana wakhutjhwa ngesikhungweni, warhuna iindevu bewembatha ezinye izambatho, weza kuFaro.
Bewazi?
Kubayini uJosefa warhuna ngaphambi kokuthi ayokubona uFaro?
Ngokuya ngendaba ekuGenesisi, uFaro wayala bona isibotjhwa esimHebheru, uJosefa silethwe kuye msinyana bona sizomhlathululela amabhudangwakhe ebekamtshwenya. Sele kuminyaka eminengi uJosefa angejele. Kungakhathaliseki bona uFaro wathi alethwe ngokurhabako, uJosefa wathatha isikhathi sakhe warhuna iindevu. (Genesisi 39:20-23; 41:1, 14) Ukuveza komtloli yoke imininingwana kutjengisa ukuthi bekawazi amasiko wamaGibhide.
Ukufuya itjebe bekuyinto ejayelekileko eentjhabeni ezinengi zekadeni kuhlanganise namaHebheru. Ngokuhlukileko, i-McClintock and Strong’s Cyclopedia of Biblical, Theological, and Ecclesiastical Literature ithi: “AmaGibhide wekadeni bekungiwo kwaphela isitjhaba sePumalanga esingavumeli bona umuntu afuye itjebe.”
Kghani bekuyitjebe kwaphela ebekufuze irhunwe? Umagazini i-Biblical Archaeology Review uthi, amanye amasiko weGibhide bekathi umuntu kufuze azilungise ngaphambi kobana ayokuvela phambi kwakaFaro, njengombana enza nakaya ethempeleni. Yeke uJosefa bekufuze arhune zoke iinhluthu ezisemzimbenakhe.
(Genesisi 41:33) “Nje-ke uFaro akakhethe indoda enelihlo nehlakaniphileko ayibeke bonyana yengamele inarha yeGibhide.
w09 11/15 28 ¶14
Abantu Abalotjha UZimu Kufuze Baziphathe Kuhle
14 Ngeenkhathi zeBhayibheli ababelethi abalotjha uZimu bebenza isiqinisekiso sokuthi bayabafundisa abantwana babo ukuthi kufuze baziphathe njani. Cabanga ngendlela u-Abrahamu no-Isaka ebebakhulumisana ngayo kuGenesisi 22:7. Ibandulo elihle alifumana kubabelethi bakhe silibona endleleni uJosefa aziphatha ngayo. Nakasejele, bekazihlonipha iimbotjhwa agade abotjhwe nazo. (Gen. 40:8, 14) Indlela akhuluma ngayo noFaro beyitjengisa ukuthi ufundisiwe indlela yokukhuluma nabantu abasesikhundleni esiphezulu.—Gen. 41:16, 33, 34.
Ukufundwa KweBhayibheli
(Genesisi 40:1-23) Emva kwesikhathi esithize, umphathikapho nombhagi wekosi yeGibhide bonela umphathabo oyikosi yeGibhide. 2 UFaro wathukuthelela iinduna ezikulu zakhe ezimbili okutjho ihloko yabaphathikapho nehloko yababhagi, 3 beyazibeka ngesikhungweni emzini womphathi wobuzimba, hlanu kwejele lapha bekunoJosefa khona. 4 Umphathi wobuzimba wanikela uJosefa eendunenezo bona azitjheje. Ngemva kobana zihlezi ngesikhungweni isikhatjhana, 5 enye nenye yazo, umphathikapho nombhagi wekosi yeGibhide, zaba namabhudango busukubunye zingesikhungwenapho. Elinye nelinye ibhudango gade linehlathululwalo. 6 Lokha uJosefa nakafika kizo ekuseni wazifumana zinyamile. 7 Yeke wabuza iindunezo ebegade zinaye ngesikhungweni emzini womphathakhe wathi: “Kubayini ninyukubele nje namhlanjesi?” 8 Zamphendula zathi: “Sibe namabhudango, kodwana akunamuntu ongasihlathululela wona.” UJosefa wathi: “Angithi nguZimu okwazi ukuhlathulula amabhudango? Ningangitjela amabhudangwenu lawo-ke.” 9 Yeke ihloko yabaphathikapho yatjela uJosefa ibhudango layo yathi: “Ebhudangweni lami bekunesidiribe ngaphambi kwami, 10 sinamahlumela amathathu. Sekwathi sisahluma njalo, satjhatjhaza, khonokho sathela amatjatho wamadiribe avuthiweko. 11 Ikapho kaFaro gade isesandleni sami, ngathatha amadiribe ngawaminyela ngekatjheni kaFaro leyo bengayibeka esandleni sakhe.” 12 UJosefa wathi: “Nakhu okutjhiwo libhudangwelo: Amahlumela amathathu atjho amalanga amathathu. 13 Emalangeni amathathu la uFaro uzakugweba umlandwakho abe akubuyisele esikhundleni sakho. Wena uzakubeka ikapho kaFaro esandleni sakhe njengaphambilini lokha nawugade usesemphathikaphakhe. 14 Kodwana ungikhumbule-ke nasele izinto zikukhambela kuhle. Ungizamele ngokungibika kuFaro, angikhuphe ngejelapha. 15 Ungibona nginje, ngathathwa ngekani enarheni yamaHebheru. NeGibhidapha sengaphoselwa ngemgodinapha ngingakenzi litho elimbi.” 16 Kuthe bona ihloko yababhagi izwe bonyana uJosefa ukhulume ihlathululo ekarisako yebhudango yathi kuye: “Uyazi nami ngibhudangile. Ebhudangweni lami gade ngithwele iinqwebu ezintathu zesikwa esimhlophe. 17 Esiqwebini esingaphezulu bekunemifunda yoke yezikwa ezikhethekileko ezibhagelwe uFaro, kodwana iinyoni bezikugoma seze kusehlokwami njalo.” 18 UJosefa wayiphendula wathi: “Nakhu okutjhiwo libhudango lakhwelo: Iinqwebu ezintathu malanga amathathu. 19 Emalangeni amathathu la uFaro uzakugweba umlandwakho abe akuhlomele esigodweni, iinyoni zinqothule inyamakho.” 20 Kwathi elangeni lesithathu okwakulilanga uFaro abelethwa ngalo, wenzela zoke iinkhulu zakhe umnyanya. Wagweba umlandu wehloko yabaphathikapho nowehloko yababhagi phambi kweenkhulu zakhe: 21 Wabuyisela ihloko yabaphathikapho esikhundleni sayo kobana ibuye godu ibeke ikapho esandleni sakaFaro, 22 kodwana wahlomela ihloko yababhagi esigodweni. Kwaba njengombana uJosefa gade azihlathululele. 23 Ihloko yabaphathikapho azange ikhumbule uJosefa. Yamkhohlwa nya.
MEYI 25-31, 2012
AMAGUGU ASELIZWINI LAKAZIMU | GENESISI 42-43
“UJosefa Wazibamba”
(Genesisi 42:5-7) Ngaleyondlela amadodana ka-Israyeli gade akhambisana nalabo ebebayokuthenga ikoroyi ngombana nenarheni yeKanana indlala beyiphodlha. 6 UJosefa gade ambusi wenarha yeGibhide, athengisela abantu ikoroyi. Nje-ke kuthe lokha abanakwabo nabafikako, baguqa bahloma iinhloko phasi phambi kwakhe. 7 Kuthe bonyana uJosefa abone abafowabo, wabazi kodwana wenza ngathi akabazi. Wabakhulumisa ngokubakgharameja wathi: “Nibuyaphi nina?” Baphendula bathi: “Sibuya eKanana sizokuthenga ukudla.”
“Ngisendaweni KaZimu?”
Kuthiwani ngoJosefa? Wababona baseza ukuthi laba bafowabo! Ngaphezu kwalokho, nakababona bakhothama phambi kwakhe, wakhumbula lokha asesemsana. IBhayibheli lisitjela ukuthi “wakhumbula amabhudangwakhe” uJehova amtjela wona nakasesemsana, amabhudango abikezela ngesikhathi abafowabo bazokhothama phambi kwakhe—kwenzeka njengombana kwabikezelwa! (Genesisi 37:2, 5-9; 42:7, 9) Bekazokwenzani uJosefa? Kghani bekazobasingatha? Namkha bekazozibuyisela?
“Ngisendaweni KaZimu?”
Mhlamunye angeze wazifumana usebujamweni obufana nebakaJosefa. Nanyana kunjalo, ukungazwani emndenini kujayelekile esikhathini esiphila kiso. Njengombana singakapheleli kulula ukuthi nasiqalane neentjhijilo ezinjalo senze izinto ngendlela esizizwa ngayo. Kukuhlakanipha ukuthi silingise isibonelo sakaJosefa begodu silinge ukwenze izinto ngendlela kaZimu. (IzAga 14:12) Kufuze sikhumbule ukuthi kuqakathekile bona sibenokuthula namalunga wemindenethu noJehova neNdodanakhe.—Matewu 10:37.
(Genesisi 42:14-17) UJosefa wathi kibo: “Ngisatjho bonyana niziinhloli nina! 15 Nasi-ke indlela enizakuhlolwa ngayo: Ngifunga uFaro ngithi anizukukhamba enarhenapha kungakalethwa umfowenu omncani. 16 Thumelani omunye phakathi kwenu ayomthatha, nina abanye nizakuhlala ngesikhungwenapha. Ngaleyondlela amezwi wenu azabe azizinywa ukubona bonyana nineqiniso kangangani. Nakungasinjalo, ngimfunge uFaro, ngithi niziinhloli nina!” 17 Ngambala wababeka boke ngesikhungweni amalanga amathathu.
“Ngisendaweni KaZimu?”
UJosefa walinga abafowabo ukuthi abone okuseenhliziyweni zabo. Atolikelwa, wakhuluma nabo ngelunya wathi, baziinhloli. Bona bazivikele bamtjela ngokuthi banemindeni begodu banomfowabo omncani abamtjhiye ekhaya. UJosefa wazibamba. Kghani kwamambala umfowabo omncani bekasaphila? Nje-ke uJosefa bekazi ukuthi uzokwenzani. Wathi: ‘Ngaleyondlela nizokuzizinywa,’ wabatjela ukuthi ufuna ukubona umfowabo omncani. Ngemva kwalokho, wavuma ukuthi bakhambe bayokuthatha umfowabo omncani nange omunye wabo azokusala abesibambiso.—Genesisi 42:9-20.
(Genesisi 42:21, 22) Bathi omunye komunye: “lye, sihlunguphazwa ngebanga lalokho esakwenza kumfowethu. Sambona bonyana gade akhathazeke kangangani lokha nasirabhelako, kodwana azange simlalele. Ngikho-nje iinkathazwezi zehlele phezu kwethu.” 22 URubeni wathi kibo: “Angithi nganitjela bona ningenzi ubumbi emsaneni? Kodwana nanghanghabala! Gadesi-ke sekumele sithwale umlandu ngeengazi zakhe.”
it-2 108 ¶4
UJosefa
Kwathi abafowabo lakaJosefa nababona koke lokhu, bacabanga ukuthi bajeziswa nguZimu ngebanga lokuthi bamthengisa bona ayokuba sigqila eGibhide. Bebasolo baphikisana ngokuthi bamlandu phambi kwakaJosefa kodwana bebangamboni ukuthi ngumfowabo. Kwathi uJosefa nakezwa ukuthi bayazisola, akhenge akghone ukuzibamba khonokhono wasuka phambi kwabo wayokulila. Nakabuyela kibo, wabopha uSimeyoni wathi angakhambi bekube kulapho babuya nomfowabo omncani.—Gen 42:21-24.
Rhubhulula Ngezinto ZakaZimu Eziligugu
(Genesisi 42:22) URubeni wathi kibo: “Angithi nganitjela bona ningenzi ubumbi emsaneni? Kodwana nanghanghabala! Gadesi-ke sekumele sithwale umlandu ngeengazi zakhe.”
(Genesisi 42:37) URubeni wathi kuyise: “Nakube angimbuyiseli kuwe uBhenjamini, ungabulala amadodanami womabili. Mbeke ngaphasi kwesandla sami, ngizambuyisa.”
it-2 795
URubeni
URubeni gade anehliziyo ehle, lokho sikubona lokha ngesikhathi abafowabo abalithoba nabaluka amano wokubulala uJosefa, weza neqhinga lokuthi bamphosele ngemgodini onganamanzi, bona azokukghona ukubuya azomkhupha. (Gen 37:18-30) Kwathi nanyana sekudlule iminyaka ema-20 kwenzekile lokho, abafowabo bathi umlandu abawuthweswe ziinhloli zeGibhide kungebanga lokuthi baphatha kumbi uJosefa, kodwana uRubeni wabakhumbuza ukuthi yena akhenge afake isandla eqhingeni labo lokobana kubulawe uJosefa. (Gen 42:9-14, 21, 22) Godu uJakopo nakala ukuthi uBhenjamini akhambe nabafowabo nababuyela kwesibili eGibhide, nguRubeni owenza isifungo ngamadodanakhe amabili, wathi: “Nakube angimbuyiseli kuwe uBhenjamini, ungabulala amadodanami womabili.”—Gen 42:37.
(Genesisi 43:32) Bamphakela yedwa, baphakela abanakwabo bodwa namaGibhide wodwa. AmaGibhide gade angagomi namaHebheru ngombana bekazila ukwenza njalo.
w04 1/15 29 ¶1
Amaphuzu Asencwadini KaGenesisi—II
43:32—Kubayini amaGibhide bekakunyenya ukudla namaHebheru? Lokhu kungenzeka ukuthi kungebanga lokubandlulula ngokobuhlanga. Abantu beGibhide bebabanyenya abelusi. (Genesisi 46:34) Kubayini? Ngombana abantu beGibhide bebabaqalela phasi abantu abalusako. Nofana kungebanga lokuthi amadlelo bewangakaneli yeke abantu beGibhide bebangabathandi abantu abazokufuna indawo yokulusela imihlambabo.
Ukufundwa KweBhayibheli
(Genesisi 42:1-20) Kuthe bona uJakopo ezwe bonyana kunekoroyi eGibhide, wathi emadodanenakhe: “Kubayini nihlalele ukuqalana ngemehlweni nje? 2 Qalani, ngizwe bonyana kunekoroyi eGibhide. Yehlani niyosithengela ukuze siphile singafi.” 3 Kwaba ngabalitjhumi kwaphela abanakwabo kaJosefa abehla ukuyokuthenga ikoroyi eGibhide 4 ngombana uJakopo wathi uBhenjamini olama uJosefa asale, angakhambi nabanye. Gade esaba bonyana naye angahle ehlelwe yingozi. 5 Ngaleyondlela amadodana ka-Israyeli gade akhambisana nalabo ebebayokuthenga ikoroyi ngombana nenarheni yeKanana indlala beyiphodlha. 6 UJosefa gade ambusi wenarha yeGibhide, athengisela abantu ikoroyi. Nje-ke kuthe lokha abanakwabo nabafikako, baguqa bahloma iinhloko phasi phambi kwakhe. 7 Kuthe bonyana uJosefa abone abafowabo, wabazi kodwana wenza ngathi akabazi. Wabakhulumisa ngokubakgharameja wathi: “Nibuyaphi nina?” Baphendula bathi: “Sibuya eKanana sizokuthenga ukudla.” 8 Nanyana uJosefa wabazi abanakwabo, kodwana bona akhange bamazi. 9 Wakhumbula amabhudangwakhe ngabo. Wathi kibo: “Sukanapha, niziinhloli nina! Nizele ukuzokuhlola bonyana kukuphi lapha inarha yekhethu le ingakavikeleki khona.” 10 Bamphendula bathi: “Awa kosi, iinceku zakho zizele ukuzokuthenga ukudla. 11 Nasinje siziinlamani zendoda yinye. Iinceku zakho zimadoda athembekileko, asisizo iinhloli.” 12 UJosefa wathi kibo: “Sukelani le! Nizele ukuzokuhlola bonyana kukuphi lapha inarha yekhethu le ingakavikeleki khona.” 13 Kodwana baphendula bathi: “Emanyeni iinceku zakho gade zibabafo abalitjhumi nambili, amadodana wendoda yinye ehlala enarheni yeKanana. Ubuphetjhani gadesi nje busele nobaba, kanti omunye akasekho.” 14 UJosefa wathi kibo: “Ngisatjho bonyana niziinhloli nina! 15 Nasi-ke indlela enizakuhlolwa ngayo: Ngifunga uFaro ngithi anizukukhamba enarhenapha kungakalethwa umfowenu omncani. 16 Thumelani omunye phakathi kwenu ayomthatha, nina abanye nizakuhlala ngesikhungwenapha. Ngaleyondlela amezwi wenu azabe azizinywa ukubona bonyana nineqiniso kangangani. Nakungasinjalo, ngimfunge uFaro, ngithi niziinhloli nina!” 17 Ngambala wababeka boke ngesikhungweni amalanga amathathu. 18 Elangeni lesithathu uJosefa wathi kibo: “Yenzani lokhu nizakuphila ngombana mina ngimumuntu owesaba uZimu: 19 Nakube nimadoda athembekileko akuthi omunye wenu asale esikhungwenapha khibe abanye benu nithatha ikoroyi nibuyele emindeninenu elambileko. 20 Kodwana kumele nilethe umfowenu omncani kimapha ukuze kuqinisekiswe amezwi wenu nokobana ningafi.” Mbala benza njalo.