Siza Abantu Balalele UZimu
1. Ngiyiphi incwajana eyatjhatjhululwa emhlanganweni wesigodi othi, “UMbuso Wakho Awuze!” begodu khuyini eyenza ibe lithulusi elilisizo?
1 Emhlanganweni Wesigodi othi, “UMbuso Wakho Awuze!” kwatjhatjhululwa incwajana ethi, Lalela UZimu Uphile Ngokungapheliko. Ngombana incwajana le inemitjho emncani, ingatjhugululwa msinyana begodu lula. Eqinisweni, incwajana ethi, Lalela UZimu Uphile Ngokungapheliko ngaphambi kobana itjhatjhululwe kwagunyazwa bona itjhugululelwe eenlimini ezi-431.
2. Bobani abazokuzuza encwajaneni le?
2 Bobani abazokuzuza ngokukhethekileko encwajaneni le? Cabangela ubujamo obulandelakobu obuphakama qobe ephasini loke:
• Umrhuweleli ukhulumisana nomninimuzi, kungaba sekukhambeleni kokuthoma namtjhana nekenza ibuyelo, uyabona bonyana umninimuzi akakafundi namtjhana akakwazi ukufunda kuhle.
• Umrhuweleli utjhumayela ebantwini abakhuluma ilimi esitjhugulula iincwadi ezimbalwa zalo nofana esinganazo iincwadi zalo. Namtjhana, inengi labantu abasesimini abakwazi ukufunda ilimi abakghona ukulikhuluma kuhle.
• Umrhuweleli usebenzisa ilimi lezandla bona atjhumayele emntwini ongakwazi ukukhuluma osesiminakhe.
• Umbelethi unesifiso sokufundisa iqiniso umntwanakhe osesemncani ongakakwazi ukufunda.
3. Yenziwe njani incwajana ethi, Lalela UZimu Uphile Ngokungapheliko?
3 Indlela Eyenziwe Ngayo: Incwajana ethi, Lalela UZimu Uphile Ngokungapheliko yenzelwe ukufundwa nalabo abangakwazi kuhle ukufunda. Phezulu ngesinceleni ekhoneni lesifundo ngasinye esinamakhasi amabili kunombuzo ophendulwa emakhasini lawo. Kuhlanganisa neemfanekiso ekhulunyelweko nemitlolo ekhonjiweko. Ekhoneni elingenzasi lamakhasi amanengi kunebhoksi elinamaphuzu engeziweko neMitlolo ekhonjiweko okungakhulunywa ngayo, kuye ngekghono lomfundi.
4. Kunini lapho singakhambisa incwajana le begodu njani?
4 Indlela Yokuyisebenzisa: Ungakhambisa incwajana le ekonzweni yomuzi nomuzi nanyana kunini newubona kuzokuzuzisa ukwenza njalo, ngitjho nalokha kungasi yinyanga yokukhambisa iincwajana. (Qala ibhoksi elithi, “Indlela Engakhanjiswa Ngayo.”) Ungayethula newenza ibuyelo ngokutjela umuntu onekareko bona ufuna ukumbonisa okuthileko bese umnikela incwajana. Nenicoca ngesithombe ngasinye ningafunda namezwi akhambisana nemitlolo.
5. Singamsiza njani umuntu esifunda naye iBhayibhili bona athuthuke?
5 Siza Umfundi Athuthuke: Pheze, ingcocwakho izokwenza umfundi abe nesifiso sokutaditjha nesokufunda bona angenise ngokwakhe ilwazi ngoJehova. (Mat. 5:3; Jwa. 17:3) Nokho, umfundi uzabe angakakulungeli ukubhabhadiswa ngemva kokuqeda incwajana le. Ngemva kwalokho kufuze nifunde incwadi ethi, Okufundiswa YiBhayibhili nofana incwadi efanelekako ezomenza alizwisise ngokuzeleko iBhayibhili.
6. Kubayini sithokoza ngethulusi elitjheli esizolisebenzisa ekonzweni?
6 Abantu kufuze balalele uMbusi wendawo yoke nengabe bafuna ukuphila ngokungapheliko. (Isa. 55:3) Intando kaJehova kukobana “boke abantu” kuhlanganise nalabo abangakwazi ukufunda, bafunde indlela yokumlalela. (1 Thi. 2:3, 4) Qala bona sithokoza kangangani ngethulusi elitjheli esingalisebenzisa ukufundisa abantu indlela yokulalela uZimu!
[Ibhoksi elisekhasini 7]
Indlela Engakhanjiswa Ngayo
Tjengisa umninimuzi amakhasi 2-3, bese uthi: “Ungakuthabela na ukuphila ephasini elifana naleli? [Lindela ipendulo.] IMitlolo ithembisa [namtjhana, incwadi ecwengileko ithembisa] bona msinyana uZimu uzokwenza iphasi libe lihle, libe yindawo enokuthula, lapho kuzabe kunganamuntu otlhagako nofana ogulako. Tjheja lokho okufuze sikwenze bona siphile endaweni leyo. [Funda u-Isaya 55:3, odzubhulwe ekhasini 3 phezulu.] Iveseli lisitjela bona ‘size’ kuZimu begodu ‘simlalele.’ Kodwana simlalela njani uZimu?” Vula emakhasini 4-5, begodu nicoce ngependulo. Nengabe akanasikhathi, mtjhiyele incwajana begodu wenze amalungiselelo wokubuyela niyokucoca ngependulo.