Ukuthuthukisa Amakghonwethu Ekonzweni—Ukutlola Phasi Abanekareko

“Uzeluse wena nefundiso yakho.” (1 Thim. 4:16) Isiluleko esiphefumulelwekwesi esivela kumpostoli uPowula siyakuThimothi sitjengisa bona kufuze sizimisele ukuthuthuka, kungakhathaliseki bona sibatjha namkha kade sihlanganyela. Ukusisiza bona senze njalo, isihloko esitjha esimlandelande esithi, “Ukuthuthukisa Amakghonwethu Ekonzweni” sizokuvela kuKonzwethu YomBuso. Isihloko ngasinye sizokucoca ngekghono eliqakathekileko, begodu sizokunikela neemphakamiso zokobana singalihlawulela njani. Phakathi nenyanga, soke sikhuthazwa bona sitjheje ngokukhethekileko ikghonwelo. Ngemva kokuphela kwenyanga, ingcenye yomHlangano weKonzo izosinikela ithuba lokutjho indlela esizuze ngayo ngokudzimelela ekghonwenelo. Inyanga le sikhuthazwa bona sisebenzele ekutloleni phasi abanekareko.

Okwenza Kuqakatheke: Bona senze umsebenzethu ngepumelelo, kufuze senze okungaphezu kokutjhumayela. Kufuze sibuyele kilabo ababenekareko, sibafundise, sisezele imbewu yeqiniso esiyitjalileko. (Mat. 28:19, 20; 1 Kor. 3:6-9) Lokho kubandakanya ukufumana umuntu loyo godu, ukukhuluma ngokumthintako, nokwakhela ekulumiswaneni esibenayo naye. Ngalokho, nasifumana umuntu onekareko, kuqakathekile ukumtlola phasi.