Imbewu Kufuze Ithelelelwe Bona Ikhule
1. Khuyini ekufuze ithelelelwe bona ikhule?
1 Imbewu etjalwe esimini kufuze ithelelelwe bona ikhule. Ngokufanako nangembewu yeqiniso etjalwe eenhliziyweni zabantu esiminethu. (1 Kor. 3:6) Kufuze senze amabuyelo, sithelelele imbewu engokomfanekiso le sisebenzisa iLizwi lakaZimu nesifuna bona ibe nemirabho, ikhule, begodu itlhurhe.
2. Singasibeka njani isisekelo sokukhambela okulandelako?
2 Buza Umbuzo: Newulungiselela itjumayelwakho, kubayini ungalungiseleli nombuzo ovusa ikareko ongawuphendula newubuyako? Buza umbuzo emaphethelweni wengcoco yokuthoma, wenze namalungiselelo aqinisekileko wokubuyela. Abanengi bakufumana kuzuzisa ukukhetha okuthileko okusencwadini ethi Lifundisani IBhayibhili okuzobavumela batjengise bona isifundo seBhayibhili siragwa njani.
3. Ngimiphi imininingwana ongayitlola ngomuntu onekareko omfumene esimini?
3 Tlola Phasi: Msinyana ngemva kokuphetha ingcoco yokukhambela kokuthoma, ziphe isikhathi sokutlola phasi. Tlola ibizo nesiphande somuntu. Godu kuhle ukutlola ilanga nesikhathi okhulume naye ngaso, enikhulume ngakho, nokobana ngiyiphi incwadi omnikele yona, neyikhona. Uthe ungowekolo ethileko? Unomndeni? Ukhulumile ngezinto azithandako nezimtshwenyako? Ukwazisa okunjalo kungakusiza wenze iingcoco zenu zesikhathi esizako zifanelane nobujamo bakhe. Godu tlola isikhathi enivumelene bona uzokubuya ngaso nombuzo ozowuphendula.
4. Nekuziwa ekulandeleni ikareko, kubayini kufuze siphikelele?
4 Phikelela: USathana ngeze aphumule eemzamwenakhe ‘yokuthatha ilizwi’ elitjalwe ehliziyweni yomuntu. (Mar. 4:14, 15) Ngalokho, ungapheli amandla newuba nobudisi bokungasamfumani ekhaya umuntu onekareko. Ungamthumela incwadi namtjhana umtjhiyele umlayezo emnyango? Elinye iphayona lathoma isifundo ebelisiraga lijame emnyango nomfazi othileko kodwana zange lisamfumana asekhaya godu, ngalokho lamtlolela incwadi. Emaswapheleni udade nekamfumana asekhaya, umfazi lo watjho bona uthinteke kangangani ngekareko yomuntu mathupha etjengiswe kuye. Njengombana sithelelela imbewu yeqiniso, singafumana ithabo elilethwa kuyibona itlhurha, ikhulela ekuvuthweni, begodu ‘ithela: enye ngamatjhumi amathathu, enye ngamatjhumi asithandathu, begodu enye ngekhulu.’—Mar. 4:20.