Sebenzisa I-jw.org Nawutjhumayelako

I-jw.org ilithulusi eliqakatheke khulu elisisiza sirhatjhe iindaba ezimnandi “kufikela emaphethelweni wephasi.” (IzE. 1:8) Abaninimuzi abanengi abakghoni ukuzifumanela ngokwabo i-jw.org. Kunalokho, baba nelwazi ngayo ngemva kobana umrhuweleli abatjengise yona. Nokho, ngaphambi kokusebenzisa i-tablet namkha ufunjathwako wakho nawutjhumayelako qiniseka bona kuphephile ukwenza lokho. Utjheje khulu nawuseendaweni ezidume ngobugebengu. Nawunganaso isisetjenziswa se-elekthroniki, ngokuhlakanipha ungabuza umninimuzi bona ungamtjengisa na i-jw.org kwesakhe isisetjenziswa.

Umbonisi okhambako othileko ufake ividiyo ethi, Kubayini Kufuze Ufunde IBhayibheli? kufunjathwako wakhe begodu uyitjengisa abantu nanyana kunini nekafumana ithuba. Ngokwesibonelo, nekatjhumayela endlini ngendlu, uthi: “Ngivakatjhe kafitjhazana bona ngisize abantu bafumane iimpendulo zemibuzo emithathu eqakathekileko: Kubayini iphasi linemiraro eminengi kangaka? UZimu uzoyirarulula njani? Singaqalana nayo njani kwanjesi? Ividiyo efitjhani le ikhuluma ngemibuzo leyo.” Bese uyayidlala aqale ukuthi umninimuzi usabela njani. Ividiyo le ikarisa khulu kangangobana abantu abanengi bayibukela bekube sekupheleni. Ngemva kwalokho umbonisi okhambako uthi: “Usandukuzwa ukuthi ungabawa isifundo seBhayibheli ku-Inthanethi. Njengombana ngila, ngingakutjengisa msinyana bona siragwa njani.” Nengabe umninimuzi uyavuma, umtjengisa bona isifundo siragwa njani asebenzisa incwajana ethi, Iindaba Ezimnandi. Nengabe umninimuzi akanasikhathi, wenza amalungiselelo wokumtjengisa ekukhambeleni okulandelako. Nekaya esitolo esithengisa ikofi ayokuphumula, utjho okufanako kiloyo ahlezi eduze naye ngemva kokuthomisa ingcoco ngobungani. Uyayisebenzisa na i-jw.org nawutjhumayelako?