“Osangalala ni ŵanthu okhulupilika kwa Yehova

1-2. (a) Kansi maboma ayakine achita votyani polimbana na ŵanthu a Yehova, lomba ŵanthu a Yehova amene awo ochita tyani? (b) Ndaŵa yanji tingankhale mphela osangalala olo patutamanishiwa? (Fotokozani chithunzi chapachikuto.)

PALIPANO ntchito yasu ni yoleshewa m’vyalo vopitilila 30 pachalo chonse. M’vyalo viyakine mwa vyalo vamene ivi, olamulila eika mu djeli abale na alongo ŵasu. Kansi ove ephoniya chinji? Paliye, Yehova owona kuti paliye chilichonse chechiphoniya. Vakuchita ove ni kuŵelenga na kuphunzila Baibolo, kuuja ayakine vakukhulupilila, komasoti kusonkhana na Akhilisitu ayawo. Ove okanasoti kutolamo mbali mu ndale. Olo kuti atumiki okhulupilika a Mulungu amene aŵa oshushiwa teti, ove opitilija kunkhala mphela okhulupilikab—vamene vuwonesha kuti ni olipeka ngako kwa Yehova. Kuchita vamene ivi kuŵayavya kunkhala osangalala!

² Vingachitike kuti mwawonapo vithunzi va ayakine mwa a Mboni otang’a ntima amene aŵa ndipo muwona kuti vyinso vawo ni vosangalala. Ove osangalala chifukwa oziŵa kuti Yehova osangalala nawo chifukwa chonkhala mphela okhulupilika kuli yove. (1 Mbiri 29:17a) Yesu enena kuti: “Osangalala ni ŵanthu amene otamanishiwa chifukwa cha chilungamo . . . Kondwelani, djumphani na chisangalalo chifukwa mphaso yanu ni ikulu.”—Mt. 5:10-12.

CHISANZO CHATINGATOLELE

3. Mokatijana na vili pa Machitidwe 4:19, 20, kansi atumwi echita tyani penzetamanishiwa, lomba ndaŵa yanji echita vamene ivo?

³ Vakukumana navo abale na alongo ŵasu niyesoti vechipilila atumwi penzetamanishiwa chifukwa cholalikila za Yesu. Moweleja-weleja, oweluza a khoti ikulu ya Ayuda ‘eŵalamula kuti aleke kulaŵila mu zina ya Yesu.’ (Mac. 4:18; 5:27, 28, 40) Lomba kansi atumwi amene awo echita tyani? (Ŵelengani Machitidwe 4:19, 20.) Ove enzeziŵa kuti wamene ‘eŵalamula kuti alalikile kuli ŵanthu na kupeleka umboni wokwanila’ unena za Khilisitu, ali na udindo ukulu kupambana oweluza amene awo. (Mac. 10:42) Tetyo, polaŵila m’malo mwa atumwi amene awo, Petulo na Yohane motang’a ntima enena kuti apitilije kumvwila Mulungu, osati oweluza amene awo ndipo alekelini kulaŵila vokhuza Yesu. Apa venze monga ove okonsha oweluza amene awo kuti, ‘Kansi muganiza kuti ŵanthu ofunika kumvwila mwewo kupambana Mulungu?’

4. Monga mwayuwoneshela lemba ya Machitidwe 5:27-29, kansi atumwi epeleka chisanzo chotyani kuli Akhilisitu onse achedi, lomba tingaŵakonkheje tyani?

⁴ Atumwi epeleka chisanzo chiweme chakukonkheja Akhilisitu onse achendi mpaka pano, chamene ni “kumvwila Mulungu monga wolamulila, osati ŵanthu.” (Ŵelengani Machitidwe 5:27-29.) Pechiniyatiwa chifukwa chonkhala mphela okhulupilika, atumwi amene awo echoka pamenso pa khoti ikulu ya Ayuda amene awo “ali osangalala chifukwa chakuti Mulungu eŵawona kuti ni oyenela kuchitiliwa nkhanza chifukwa cha zina ya Yesu,” ndipo epitilija kulalikila!—Mac. 5:40-42.

5. Kansi ni makonsho ayakine otyani ofunika kufwana mayankho ŵake?

⁵ Chisanzo cha atumwi amene aŵa chuchitisha kuti tinkhale mphela na makonsho ayakine. Mwachisanzo, kansi sembe vikwanishika tyani kuti ove okomvwila Mulungu osati ŵanthu, pa nthawe imozi-mozi nomvwila lamulo ya m’Malemba yakuti “aliyense akomvwila olamulila akulu-akulu”? (Aro. 13:1) Kansi tingachite tyani kuti “tikomvwila maboma komasoti olamulila,” monga ni mwechinenela ntumwi Paulo, koma nonkhala mphela okhulupilika kwa Mulungu monga Wolamulila wasu nkulu?—Tit. 3:1.

“OLAMULILA AKULU-AKULU”

6. (a) Kansi “olamulila akulu-akulu” otomolewa pa Aroma 13:1 ni ŵani, lomba tufunika kuchita nawo tyani vinthu? (b) Kansi ni mfundo yachendi yotyani yamene yukhuza olamulila onse?

⁶ Ŵelengani Aroma 13:1. Pa vesi yamene iyi, mawu akuti “olamulila akulu-akulu” onena za ŵanthu amene olamulila maboma. Akhilisitu ofunika kumvwila olamulila amene aŵa. Olamulila amene aŵa oyavya kuti m’chalo osati munkhale chisokonezo, owoneshesha kuti ŵanthu okonkheja malamulo, komasoti nthawe ziyakine oteteza ŵanthu a Yehova. (Chiv. 12:16) Tetyo, tulamuliwa kuti tikopeleka misonkho, tikoŵayopa, komasoti tikoŵapasa ulemu wakufuna. (Aro. 13:7) Koma olo n’tetyo, olamulila amene aŵa ali na mphamvu chifukwa chakuti Yehova waŵalola kuti ankhale nazo. Yesu emvwikisha bwino mfundo yamene iyi penzekonshewa makonsho na Bwanankubwa wa Chiroma, Pontiyo Pilato. Pilato pechinena kuti ali na mphamvu zokwanisha kumumasula olo kumupeleka kuti apaiwe, Yesu emuuja kuti: “Sembe muliyenkhale na mphamvu iliyonse pali newo kuti muliyepasiwe kufumila kululu.” (Yoh. 19:11) Monga mwevenzele na Pilato, mphamvu za olamulila komasoti andale onse masiku ŵano zili na malile.

7. Kansi ni pa vochitika votyani vatisafunika kumvwila olamulila, lomba olamulila amene aŵa ofunika kuziŵa chinji?

⁷ Akhilisitu omvwila maboma keno malamulo a m’chalo chawo oshushanalini na malamulo a Mulungu. Koma tingamvwilelini ŵanthu keno otisenga kuchita vinthu vakuzondana navo Mulungu olo keno otilesha kuchita vakufuna Mulungu. Mwachisanzo, ove angofuna kuti achilumbwana akoloŵa usodja noniyata nawo nkhondo.c Olosoti angaleshe Baibolo na mabuku ŵasu ofotokoza Baibolo, komasoti kutilesha kulalikila nochita misonkhano. Keno olamulila okatishila ntchito mphamvu zawo molakwika, monga kutamanisha ophunzila a Khilisitu, azayankhe kwa Mulungu chifukwa Yehova owona!—Mlal. 5:8.

8. Kansi pali kusiyana kotyani pa mawu akuti “akulu-akulu” na mawu akuti “nkulu-nkulu,” lomba kuziŵa vamene ivi n’koyavya tyani?

⁸ Mawu akuti “akulu-akulu” otanthauza “ŵanthu apalulu,” olo amene ali na “udindo ukulu.” Koma vutanthauzalini kuti ŵanthu amene aŵa ni “apalulu ngako” olosoti kuti ali na “udindo ukulu ngako,” chifukwa vamene ivi niye vakutanthauza mawu akuti “nkulu-nkulu.” Olo kuti maboma otomolewa kuti “olamulila akulu-akulu,” pali wolamulila muyakine waudindo ukulu ngako—wamene oitiwa kuti nkulu-nkulu. Maulwendo 4 m’Baibolo, Yehova Mulungu oitiwa kuti “Nkulu-nkulu.”—Dan. 7:18, 22, 25, 27.

“NKULU-NKULU”

9. Kansi mneneli Danieli ewona chinji m’mensomphenya?

⁹ Mneneli Danieli ewona mensomphenya amene ewonesha bwino kuti Yehova ni nkulu ngako kupambana olamulila onse. Choyamba, Danieli ewona vinyama vikulu-vikulu vokwana 4 vamene vupanamila maulamulilo amene enze amphamvu pachalo chonse—monga Babulo, Mediya na Perisiya, Girisi, komasoti Roma na ulamulilo wa Britain na America wamene ulamulila palipano. (Dan. 7:1-3, 17) Pavuli pake, Danieli ewona Yehova Mulungu alinkhale pampando wachifumu mu khoti yake yakululu. (Dan. 7:9, 10) Vechiwona mneneli wamene uyu wokhulupilika pavuli pake, vufunika kunkhala chenjezo kuli olamulila masiku ŵano.

10. Mokatijana na Danieli 7:13, 14, 27, kansi Yehova epeleka kwa ŵani ulamulilo wa chalo, lomba vamene ivi vutiuja chinji ponena za yove?

¹⁰ Ŵelengani Danieli 7:13, 14, 27. Mulungu etola mphamvu zonse na ulamulilo wenze nawo maboma novipeleka kuli oyenelela komasoti amphamvu ngako. Lomba kansi evipeleka kwa ŵani? Evipeleka kuli “muyakine owoneka monga ni mwana wa munthu,” Yesu Khilisitu, komasoti “atuŵa a Nkulu-nkulu,” a 144.000 amene akuti azalamulile “mpaka kale-kale.” (Dan. 7:18) N’vowonekelatu kuti Yehova niye “Nkulu-nkulu” chifukwa yoye yeka niye ali na mphamvu zochita vamene ivi.

11. Kansi Danieli elembasoti chinji powonesha kuti Yehova ni nkulu ngako kupambana olamulila onse?

¹¹ Vechiwona Danieli m’mensomphenya vukatijana ngako na venze enena kale. Danieli enena kuti: “Mulungu wakululu ochosa mafumu noika mafumu.” Yove elembasoti kuti “Wakululu niye Wolamulila wa maufumu a ŵanthu, yove akafuna kupeleka ulamulilo kwa munthu aliyense, omupasa.” (Dan. 2:19-21; 4:17) Kansi pali nthawe zamene Yehova zechichosa olo kuika olamulila? Eye!

12. Pelekani chisanzo chuwonesha mwamene kale Yehova mwechichosela mafumu m’mipando yawo. (Onani chithunzi.)

¹² Yehova wankhala owonesha kuti yove ni nkulu ngako kupambana “olamulila akulu-akulu.” Ganizilani visanzo vitatu ivi. Farao waku Iguputo, enzekatisha ŵanthu a Yehova ntchito yaukapolo, ndipo moweleja-weleja ekana kuŵamasula. Koma Mulungu eŵamasula ndipo embija Farao mu Nyanja Isweta. (Eks. 14:26-28; Sal. 136:15) Mfumu Belisazara waku Babulo, ekonza phwando ndipo ‘elikweja pamenso pa Ambuya wakululu’ komasoti ‘etamanda milungu wamba yasiliva na yagolide’ mmalo motamanda Yehova. (Dan. 5:22, 23) Koma Mulungu emuchosa pa ufumu munthu wamene uyu wolikuja. Yove epaiwa “usiku wamene uyo” ndipo ufumu wake wipelekewa kwa Amedi na Aperisiya. (Dan. 5:28, 30, 31) Mfumu Herode Agiripa I waku Palesitina epaya ntumwi Yakobo, ndipo pavuli pake eika mu djeli ntumwi Petulo na cholinga chakuti amupayesoti. Koma Yehova emukangisha kukwanilisha volinga vake vamene ivi. “Mngelo wa Yehova emukantha” ndipo echifwa.—Mac. 12:1-5, 21-23.

13. Pelekani chisanzo cha mwamene Yehova mwechigonjesela olamulila amene echita mgwilizano.

¹³ Yehova ewoneshasoti kuti ni nkulu ngako kupambana olamulila amene echita mgwilizano. Yove eniyatila nkhondo Aisraeli ndipo eŵayavya kuti awononge mgwilizano wa mafumu okwana 31 a Chikanani komasoti kuti agonjese mbali ikulu ya Chalo Cholonjezewa. (Yos. 11:4-6, 20; 12:1, 7, 24) Yehova egonjesasoti Mfumu Benihadadi pamozi na olamulila ayakine okwana 32 ŵa Asiriya amene enzeniyatana na Aisiraeli.—1 Maf. 20:1, 26-29.

14-15. (a) Kansi Mfumu Nebukadinezara na Dariyo enena votyani vokhuza ulamulilo wa Yehova? (b) Kansi wolemba masalimo enena chinji vokhuza Yehova na ŵanthu ŵake?

¹⁴ Moweleja-weleja, Yehova wankhala owonesha kuti yove ni Nkulu-nkulu! Mfumu Nebukadinezara yaku Babulo pechilikuja chifukwa chonkhala na mphamvu komasoti ulemelelo ukulu mmalo movomeleja kuti Yehova ni woyenelela kutamandiwa, Mulungu emuchitisha usilu. Pechipola, Nebukadinezara ‘etamanda Wakululu’ ndipo evomeleja kuti “ulamulilo wa [Yehova] uzankhalepo mpaka kale-kale.” Eyangijilasoti kuti: “Paliye aliyense wamene angaleshe kwanja yake.” (Dan. 4:30, 33-35) Pavuli pakuti Danieli wakumana na mayeselo komasoti kuti Yehova wamupulumusha m’chisengu cha mphondolo, Mfumu Dariyo ilamula kuti: “Ŵanthu akonjenjemela nochita wowa pamenso pa Mulungu wa Danieli. Pakuti yove ni Mulungu wamoyo, wamene akuti azankhalepo mpaka kale-kale ndipo ufumu wake uzawonongekelini komasoti ulamulilo wake uzankhalepo mpaka kale-kale.”—Dan. 6:7-10, 19-22, 26, 27.

¹⁵ Wolemba masalimo enena kuti: “Yehova wasokoneza volinga va ŵanthu a mitundu iyakine. Wakangisha maganizo a mitundu ya ŵanthu.” Eyangijila kuti: “Wosangalala ni ntundu wamene Mulungu wawo ni Yehova, ŵanthu amene yove waŵasankha kunkhala cholowa chake.” (Sal. 33:10, 12) Tili na vifukwa viweme ngako votichitisha kunkhala mphela okhulupilika kwa Yehova!

NKHONDO YOSILIJILA

16. Kansi tukaikilalini chinji ponena za “chisauso chikulu,” lomba ndaŵa yanji? (Onani chithunzi.)

¹⁶ Taŵelenga vinthu vawankhala ochita Yehova kuvuli. Lomba tiyembekezele votyani kusogolo? Tukaikilalini kuti Yehova azapulumushe atumiki ŵake okhulupilika pa nthawe ya “chisauso chikulu.” (Mt. 24:21; Dan. 12:1) Yove azachite vamene ivi pamene mgwilizano wa m’vyalo uitiwa kuti Gogi waku Magogi ukazaukila atumiki a Yehova okhulupilika pachalo chonse. Olo kuti mgwilizano wamene uyo uzapamikijepo vyalo vonse vokwana 193 vamene vili m’bungwe ya United Nations, ove azakwanishelini kulimbana na Nkulu-nkulu na gulu yake yakululu. Yehova olonjeza kuti: “Nizalilemekeze, kulituŵisha nochitisha kuti mitundu inyinji ya ŵanthu iniziŵe, ndipo ove azaziŵe kuti newo nine Yehova.”—Ezek. 38:14-16, 23; Sal. 46:10.

17. Kansi Baibolo yunena kuti n’chinji chikuti chizachitikile mafumu a pachalo komasoti ŵanthu amene onkhala mphela okhulupilika kwa Yehova?

¹⁷ Kuukila kwa Gogi kuzayambishe nkhondo ya Aramagedo, pamene Yehova pakuti azawononge “mafumu a pachalo chonse.” (Chiv. 16:14, 16; 19:19-21) Mosiyana na vamene ivi, “ŵanthu aweme mitima niye akuti azankhale pachalo, ndipo aliye cholakwa niye akuti azasalepo.”—Miy. 2:21.

TUFUNIKA KUNKHALA MPHELA OKHULUPILIKA

18. Kansi Akhilisitu anyinji achendi ankhala ololela kuchita chinji, lomba ndaŵa yanji? (Danieli 3:28)

¹⁸ Kwa vyaka vinyinji Akhilisitu ankhala ololela kuvutika komasoti kuika moyo wawo pa ngozi chifukwa chokonda Yehova monga Wolamulila wawo Nkulu. Ove ni okhulupilika molingana na Aheberi atatu amene epulumushiwa mu chiuvuni cha mulilo chifukwa chonkhala okhulupilika kuli Wolamulila Nkulu-nkulu.—Ŵelengani Danieli 3:28.

19. Kansi Yehova azaweluze ŵanthu ŵake potolela chinji, lomba sewo tufunika kuchita chinji?

¹⁹ Powonesha kufunika konkhala mphela wokhulupilika kwa Mulungu, wolemba masalimo Davide enena kuti: “Yehova azapeleke chigamulo ku mitundu ya ŵanthu. Niweluzeni mwewo Yehova, mokatijana na chilungamo changu, komasoti mokatijana na ntima wangu wosayaŵanika.” (Sal. 7:8) Yove elembasoti kuti: “Ntima wangu wosayaŵanika komasoti uweme uniteteze.” (Sal. 25:21) Chinthu chofunika ngako ni kupitilija kunkhala okhulupilika kwa Yehova olo tikumane na vinthu votyani pa moyo wasu! Tikachita tetyo, timvwe monga ni mwechimvwila wolemba masalimo wamene elemba kuti: “Osangalala ni ŵanthu asaphoniyesha kanthu . . . , ŵanthu amene okonkheja chilamulo cha Yehova.”—Sal. 119:1.