Enekwasu—Kansi muyeja-yeja kuti muyenelele kutumikila monga ntumiki woyavya?

1. Kansi Paulo enzeŵawona tyani atumiki oyavya?

ATUMIKI oyavya okata ntchito zofunika ngako m’mipingo. Ntumwi Paulo enzewona kuti enekwasu amene aŵa okhulupilika ni ofunika ngako. Mwachisanzo, mukalata yechilembela Akhilisitu aku Filipi, yove epeleka moni kuli atumiki oyavya komasoti akulu.—Afil. 1:1.

2. Kansi mkwasu muyakine zina yake Luis akumvwa chifukwa chakuti ni ntumiki woyavya?

² Enekwasu achilumbwana amene ni obatizika komasoti akulu-akulu, osangalala ngako kutumikila monga atumiki oyavya. Mwachisanzo, Devan enkhala ntumiki woyavya ali na vyaka 18. Koma mkwasu muyakine zina yake Luis enkhala ntumiki woyavya ali na vyaka vopitilila 50. Kansi yove akumvwa tyani kutumikila monga ntumiki woyavya? Yove enena kuti: “Nine wosangalala ngako kutumikila enekwasu na akalongosi mwanjila yamene iyi. Ove onichitila vinthu vinyinji poniwonesha chikondi, ndipo palipano nili na mwayi woŵawonesha kuti nuŵakonda!” Atumiki anyinji oyayva akumvwasoti chimozi-mozi.

3. Kansi tikambilane makonsho otyani munkhani ino?

³ Keno nimwe mkwasu wobatizika ndipo nimwelini ntumiki woyavya, kansi mungakonde kuliikila cholinga? Kansi n’chinji chingakuyavyeni kuti munkhale ntumiki woyayva? Kansi ni viyeneleso votyani va m’Malemba vamufunikila kukwanilisha? Munkhani ino, tikambilane mayankho a makonsho amene aŵa. Koma poyamba, tiyeni tikambilane ntchito za atumiki oyavya.

KANSI ATUMIKI OYAVYA OKATA NTCHITO ZOTYANI?

4. Kansi atumiki oyavya okata ntchito zotyani? (Onanisoti chithunzi.)

⁴ Ntumiki woyavya ni mkwasu wobatizika woikiwa na mzimu utuŵa kuti akoyavya akulu mwakukata ntchito zinyinji zofunika mumpingo. Ayakine mwa atumiki oyavya, ali na ntchito yowoneshesha kuti wofalisa aliyense ali na gawo yokwanila komasoti vofalisa vangakatishile ntchito muutumiki. Ayakine oyavya pa ntchito yotuŵisha komasoti kuwamya Ng’anda ya Ufumu. Atumiki oyavya otumikilasoti monga akalinde, kukatishila ntchito vokujila mawu komasoti vowoneshela mavidiyo pamisonkhano yampingo. Ntchito zonse zamene izi zakukata atumiki oyavya ni zofunika ngako. Chofunika ngako n’chakuti atumiki oyavya okonda Yehova komasoti okonkheja mfundo zake. Ove oŵakondasoti ngako enekwasu na akalongosi. (Mat. 22:37-39) Kansi mkwasu wobatizika angachite tyani kuti ayenelele kutumikila monga ntumiki woyavya?

5. Kansi mkwasu angakwanilishe tyani cholinga chake kuti ankhale ntumiki woyavya?

⁵ Baibolo yufotokoza viyeneleso vakufunikila mkwasu kuti ankhale ntumiki woyavya. (1 Tim. 3:8-10, 12, 13) Mwewo mungayenelele pautumiki wamene uyu mwa kuphunzila viyeneleso vamene ivi va m’Malemba noyeja-yeja mwakhama kuti muvikwanilishe. Koma poyamba, mufunika kulifufuza mosamala ngako kuti volinga vanu n’votyani pamufuna udindo wamene uyu.

KANSI CHOLINGA CHANU N’CHOTYANI PAMUFUNA UTUMIKI WOYAVYA?

6. Kansi mufunika kunkhala na cholinga chotyani keno mufuna kutumikila enekwasu na akalongosi? (Mateyo 20:28; onanisoti chithunzi .)

⁶ Ganizilani za Yesu wamene ni chisanzo chasu chiweme ngako. Yove enzechita vinthu vonse chifukwa chokonda Atata ŵake komasoti ŵanthu. Chikondi chemuyayva kuti akochita vinthu molipeleka komasoti kukata ntchito zonyozeka. (Ŵelengani Mateyo 20:28; Yoh. 13:5, 14, 15) Keno mwewo muli na chikondi, Yehova azakudaliseni komasoti kukuyavyani kuti mukwanilishe viyeneleso vamufunikila kuti munkhale ntumiki woyavya.—1 Ako. 16:14; 1 Pet. 5:5.

7. Ndaŵa yanji mkwasu ofunikila kupewa ntima wofuna kutchuka?

⁷ Nthawe zinyinji ŵanthu amuli ichi chalo, okumbwila ŵanthu amene cholinga chawo n’kunkhala otchuka. Koma ŵanthu a Yehova alilini teti. Mkwasu wamene okonda ŵanthu monga ni mwenzechitila Yesu, opewa ntima wofuna kulamulila ayakine olo kuliwona kuti ni wofunika ngako. Keno cholinga cha munthu wamene uyo n’chofuna kunkhala wotchuka akankhala paudindo mumpingo, angakane kukata ntchito zonyozeka zamene n’zofunika posamalila mbelele zantengo wapatali za Yehova. Yove angakane kukata ntchito zamene izo chifukwa choliwona kuti ni wofunika ngako. (Yoh. 10:12) Yehova angadaliselini khama ya munthu aliyense wolikonda olo wamene cholinga chake nikutchuka.—1 Ako. 10:24, 33; 13:4, 5.

8. Kansi Yesu epeleka malangizo akuti tyani kuli atumwi ŵake?

⁸ Olo ayake apantima a Yesu, nthawe ziyakine enzefuna maudindo na volinga vophoniyeka. Ganizilani vechichita ntumwi—Yakobo na Yohani. Ove esenga Yesu kuti aŵapase udindo wapalulu mu Ufumu wake. Yesu aliyeŵauje kuti achita luweme kusenga udindo. Mmalo mwake, yove euja atumwi ŵake onse 12 kuti: “Aliyense wamene ofuna kuti ankhale nkulu pakati panu ofunikila kunkhala ntumiki wanu.” (Mko. 10:35-37, 43, 44) Enekwasu amene ofuna udindo ali na volinga viweme—kuti akotumikila ayakine—azankhale daliso mumpingo.—1 Ates. 2:8.

KANSI N’CHINJI CHINGAKUYAVYENI KUTI MUKWANILISHE CHOLINGA CHANU?

9. Kansi mungakulishe tyani ntima wofuna kunkhala ntumiki woyavya?

⁹ Tukaikilalini kuti mwewo mukonda Yehova ndipo mufuna kutumikila ayakine. Koma olo n’tetyo, payakine mungachite ulesi mukaganizila ntchito ikulu yakukata atumiki oyavya. Kansi n’chinji chingakutang’isheni? Tyani kuganizila mwamungasangalalile potumikila enekwasu na akalongosi? Yesu enena kuti: “Kupasa kutichitisha kunkhala osangalala ngako kupambana kulondela.” (Mach. 20:35) Mfundo yamene iyi niye yenzekatishila ntchito yove pamoyo wake. Yove enzesangalala ngako potumikila ayakine, ndipo namwesoti mungankhale osangalala.

10. Kansi Yesu ewonesha tyani kuti enzesangalala kutumikila ayakine? (Maliko 6:31-34)

¹⁰ Ganizilani chisanzo chimozi chamene chuwonesha kuti Yesu enzesangalala potumikila ayakine. (Ŵelengani Maliko 6:31-34.) Panthawe iyakine, Yesu na atumwi ŵake enze eŵeŵa. Ove epanga ulwendo woluta kumalo ayakine kuliye ŵanthu kuti akapumuleko. Koma gulu ya ŵanthu niye iyambilila kufwika pamalo amene awo, ndipo yenze yembekezela kuphunzisiwa na Yesu. Yove enze na ufulu wokana kuŵaphunzisa. Ndipo kuyangijila pamene apo, yove na ayake “enzeve nthawe yopumula olo yakuti alye chakulya.” Payakine Yesu sembe echingoŵaphunzisa tyala mfundo imozi olo ziŵili za chonadi noŵauja kuti alute kwawo. Koma chifukwa chakuti yove enzeŵakonda “eyamba kuŵaphunzisa vinthu vinyinji.” Ndipo epitilija kuŵaphunzisa mpaka “kunja kwefipa.” (Mko. 6:35) Yove aliye chite vamene ivo chifukwa chakuti penzeve mwangachitile, koma chifukwa chakuti “eŵamvwila chisoni.” Yove enzefuna kuŵaphunzisa chifukwa chakuti enzeŵakonda. Yesu enzesangalala ngako potumikila ayakine.

11. Kansi Yesu enzeyavya ŵanthu poŵachitila chinji? (Onansi soti chithunzi.)

¹¹ Yesu echita vinthu vinyinji penzetumikila gulu ya ŵanthu, osati kuŵaphunzisa tyala. Yove eŵapasasoti vinthu venzefunikila mwakuthupi. Yove epeleka chakulya modabwisa, ndipo euja ophunzila ŵake kuti ayaŵile ŵanthu. (Mko. 6:41) Mwakuchita vamene ivi, yove ephunzisa ophunzila ŵake vangachite potumikila ayakine. Yesu ewoneshasoti kuti kuchita utumiki wofunika—wolingana na wakuchita atumiki oyavya—n’kofunika ngako. Ganizilani mwechisangalalila atumwi pokata ntchito pamozi na Yesu yoyaŵila ŵanthu chakulya chodabwisa mpaka ‘ŵanthu onse kulya nokuta’! (Mko. 6:42) N’chendi, Yesu enzeika vakufuna ayake pasogolo, ndipo chamene ichi n’chisanzo tyala chimozi. Yove enzetumikila ŵanthu kwamoyo wake wonse pano pa chalo. (Mat. 4:23; 8:16) Yesu enze na moyo wosangalala komasoti wokhutila chifukwa chakuti enzephunzisa ayakine komasoti enzelichefya noŵapasa vinthu vakufunikila. Osati mukokaikila kuti namwe muzankhale osangalala ngako keno muyeja-yeja kuti muyenelele kunkhala ntumiki woyavya muli na volinga viweme.

12. Ndaŵa yanji tinganene kuti tonse tili na mphaso zatingakatishile ntchito poyavya mumpingo?

¹² Keno muliwona kuti muliye luso iliyonse yapadela, osataya ntima. Tukaikilalini kuti muli na minkhalidwe iyakine iweme yamungakatishile ntchito poyavya mumpingo. Mungapindule ngako pomusenga Yehova kuti akuyavyeni kumvwisha vechilemba ntumwi Paulo pa 1 Akolinto 12:12-30. Mawu a ntumwi Paulo owonesha kuti ntumiki aliyense wa Yehova, kupamikijapo mwewo, niwofunika komasoti ali na luso yapadela yangakatishile ntchito poyavya mumpingo. Keno mukaliye kwanilisha viyeneleso kuti mutumikile monga ntumiki woyavya, osati mutaye ntima. M’malo mwake, chitani vonse vamungakwanishe potumikila Yehova komasoti poyavya Akhilisitu ayanu. Ziŵani kuti akulu azawone vamuchita ndipo azakupaseni utumiki uliwonse wamufunikila.—Alo. 12:4-8.

13. Kansi viyeneleso vinyinji vakufunikila munthu kuti ankhale paudindo nivokhuza chinji?

¹³ Ganizilani chifukwa chiyakine chamufunikila kuyeja-yeja kuti munkhale ntumiki woyavya: Vinyinji mwa viyeneleso vamene ivi ni vofunika kuli Akhilisitu onse. Kulaŵila chendi, Nkhilisitu aliyense angakwanishe kunkhala paushamwali na Yehova, kusangalala pochitila ayake viweme, komasoti kupeleka chisanzo chiweme kuli Akhilisitu ayake. Kansi mkwasu angachite tyani kuti ayenelele kutumikila monga ntumiki woyavya?

VAMUNGACHITE KUTI MUTUMIKILE MONGA NTUMIKI WOYAVYA

14. Kansi mawu akuti ‘ankhale aliye masoŵela’ otanthauza chinji? (1 Timoteyo 3:8-10, 12)

¹⁴ Tiyeni tikambilane viyeneleso viyakine vutomolewa pa 1 Timoteyo 3:8-10, 12. (Ŵelengani.) Ntumiki woyavya ofunika ‘kunkhala aliye masoŵela.’ Mawu amene aŵa angamasuliliwe soti kuti “wasiliyasi,” “woyenelela,” komasoti “wamene ŵanthu omulemekeza.” Ivi vutanthauzalini kuti ofunikalini kuseka olo kuchita nthabwala. (Mlal. 3:1, 4) Koma olo n’tetyo, mukonkhala siliyasi posamalila maudindo ŵanu. Mukayamba kuziŵika na mbili yakuti nimwe odalilika, Akhilisitu mumpingo akokulemekezani.

15. Kansi mawu akuti “asalaŵila mwachinyengo” komasoti “asakonda kufwana pindu mwachinyengo”, otanthauza chinji?

¹⁵ “Asalaŵila mwachinyengo” kutanthauza kuti mufunikila kulaŵila chendi, kunkhala wachilungamo, komasoti ŵanthu akokudalilani. Mukochita vamulaŵila, komasoti mukopewa kutala wenye. (Miy. 3:32) “Asakonda kufwana pindu mwachinyengo”, kutanthauza kuti mukochita chilungamo pa bizinesi komasoti mwamukatishila ntchito ndalama. Vingankhalelini luweme kukatishila ntchito ayanu amumpingo mwadyela pofuna tyala kuti mufwane ndalama.

16. (a) Kansi mawu akuti “asamwa ngako vinyu” otanthauza chinji? (b) Kansi kunkhala na “chikumbuntima chituŵa” kutanthauza chinji?

¹⁶ “Asamwa ngako vinyu” kutanthauza kuti mufunikalini kumwa mopilila malile olo kuziŵika na mbili iipa ya uchakolwa. Kunkhala na “chikumbuntima chituŵa” kutanthauza kuti mukokatishila ntchito mfundo za Yehova pamoyo wanu. Olo kuti muliye ungwilo, mufunika kunkhala paushamwali uweme na Yehova ndipo vamene ivi vingakuyavyeni kuti munkhale na ntendele wamuntima.

17. Kansi mkwasu angawoneshe tyani kuti ni wodalilika keno akulu ‘omuyesa poyamba kuti awone keno ni woyenelela’? (1 Timoteyo 3:10; onanisoti chithunzi.)

¹⁷ “Ayesewe poyamba kuti keno ni oyenelela” vutanthauza kuti akulu oyamba awona kuti musamalila luweme ntchito zamupasiwa mumpingo ndipo angakudalileni. Tetyo, akulu akakupasani ntchito mukokonkheja mosamala malangizo ŵawo komasoti ŵayupeleka gulu yasu. Mukosimikijila kuti mwamvwisha luweme mwamungaikatile ntchito yamene iyo komasoti nthawe yamungaisilije. Keno mukata luweme komasoti molitwala ntchito zamupasiwa, enekwasu na akalongosi mumpingo azaziŵe kuti nimwe odalilika. Akulu, mukowoneshesha kuti muyavya enekwasu amene ni obatizika. (Ŵelengani 1 Timoteyo 3:10.) Kansi mumpingo mwanu muli ŵana olo achilumbwana obatizika? Kansi ali na chiyoloŵezi chiweme chophunzila paŵeka ndipo okonzekela luweme misonkhano? Kansi oyankha pamisonkhano nthawe zonse komasoti kuloŵa muutumiki wakumunda? Keno vili tetyo, mungaŵapase ntchito zangakwanishe kukata mokatijana na nsinkhu komasoti mwavilili vinthu pamoyo wawo. Mwanjila yamene iyi, enekwasu achilumbwana amene aŵa ‘mungaŵayese poyamba keno ni oyenelela.’ Pavuli pake, ove angayenelele kutumikila monga atumiki oyavya akakwanisha vyaka 20.

18. Kansi mawu akuti ankhale “aliye chifukwa chomulaŵilila vinthu viipa” otanthauza chinji?

¹⁸ “Aliye chifukwa chomulaŵilila vinthu viipa” kutanthauza kuti ŵanthu ofunikalini kunkhala na vifukwa vokwanila vomuyopejela vinthu viipa. N’chendi kuti Akhilisitu angayopejelewe mulandu wawenye. Naye Yesu, ŵanthu emuyopejela vinthu vawenye, ndipo elosela kuti nawo ophunzila ŵake vamene ivo vizaŵachitikile. (Yoh. 15:20) Koma olo n’tetyo, keno muchita vinthu viweme monga ni mwenzechitila Yesu, muzankhale na mbili iweme mumpingo.—Mat. 11:19.

19. Kansi kunkhala “mwanalume wamene ali na mwanakazi mmozi” kupamikijapo chinji?

¹⁹ “Mwanalume wamene ali na mwanakazi mmozi.” Yehova pechiyambisha banja yoyambilila, enena kuti ukwati ukonkhala pakati pa mwanalume mmozi na mwanakazi mmozi. Akhilisitu onse ofunika kumvwila lamulo yamene iyi. (Mat. 19:3-9) Mwanalume wa Chikhilisitu ofunikalini kuchita chiwele-wele. (Ahe. 13:4) Koma palisoti vinthu viyakine vinyinji vakufunikila kuchita. Mufunikila kunkhala wokhulupilika kuli mwanakazi wanu, ndipo mufunikila kupewelatu kukopana na mwanakazi muyakine.—Yobu 31:1.

20. Kansi mwanalume angachite tyani kuti ‘akololela luweme’ ŵanthu am’banja mwake?

²⁰ “Ololela luweme ŵana ŵawo na mabanja ŵawo.” Keno nimwe mutu wa banja, mukoutolela siliyasi udindo wanu. Mukochita kulambila kwapabanja nthawe zonse. Mukoloŵa muutumiki pafupi-pafupi na aliyense m’banja mwanu mwamungakwanishile. Ayavyeni ŵana ŵanu kunkhala paushamwali wotang’a na Yehova. (Aife. 6:4) Mwanalume wamene osamalila luweme banja yake angakwanishe kusamalalila mpingo.—Yelekezelani na 1 Timoteyo 3:5.

21. Kansi mungachite tyani keno nimwelini ntumiki woyavya?

²¹ Enekwasu, keno nimwelini ntumiki woyavya, pulizi musengeni Yehova kuti akuyavyeni pamuganizila mfundo zili munkhani ino. Phunzilani za viyeneleso vakufunikila kukwanilisha atumiki oyavya noyeja-yeja kuvikwanilisha. Ganizilani mwamumukondela Yehova komasoti enekwasu na akalongosi. Kulishani ntima wanu wofuna kuŵatumikila. (1 Pet. 4:8, 10) Laŵani kuti muwone chisangalalo chamungafwane potumikila banja yanu yauzimu. Yehova adalise ngako kuyeja-yeja kwamuchita kuti munkhale ntumiki woyavya!—Afil. 2:13.