Mukokonkheja angelo okhulupilika

1-2. (a) Kansi angelo ni osiyana munjila zotyani na ŵanthu? (b) Kansi angelo olingana munjila zotyani na ŵanthu?

YEHOVA pechikudonselani mu choonadi, ekuloŵeshani mu banja ya atumiki ŵake osiyana-siyana, amene opamikijapo mamiliyoni ŵa angelo okhulupilika. (Dan. 7:9, 10) Tikaganizila za angelo, tukwanisha kuwona kuti ove ni osiyana ngako na sewo. Mwachisanzo, angelo ankhala alipo kufumila kale-kale ngako kupambana ŵanthu. (Yobu 38:4, 7) Ove ni amphamvu ngako kupambana sewo. Kuyangijila pamene apo angelo ni atuŵa ndipo owonesha chilungamo kupambana sewo taŵanthu ochimwa.—Luk. 9:26.

² Koma olo kuti sewo nise osiyana na angelo, tulingana nawo mu vinthu vinyiji. Mwachisanzo, molingana na angelo, sewo tingakwanishe kuwonesha minkhalidwe iweme ya Yehova. Tili na ufulu wolisankhila seka vochita, molingana na angelo. Komasoti molingana na ove, sewo tili na umunthu, mazina komasoti maudindo osiyana-siyana. Komasoti molingana na ove, sewo tufunikila kulambila Nyamalenga wasu.—1 Pet. 1:12.

3. Kansi tingaphunzile chinji kuli angelo okhulupilika?

³ Chifukwa chakuti pali vinthu vinyinji vatulingana na angelo, chisanzo chawo chiweme chingatitang’ishe notilangiza njila yatufunikila kuyendamo. Kulaŵila chendi, pali maphunzilo anyinji aweme ŵatingaphunzile kuli ove. Munkhani ino, tikambilane vatingachite pokonkheja kulichefya kwa angelo okhulupilika, chikondi chawo kuli ŵanthu, kupilila kwawo komasoti khama yakuchita kuti mpingo unkhale utuŵa.

ANGELO NI OLICHEFYA

4. (a) Kansi angelo owonesha tyani kuti ni olichefya? (b) Ndaŵa yanji angelo ni olichefya? (Salimo 89:7)

⁴ Angelo okhulupilika ni olichefya. Olo kuti ove ali na maluso, mphamvu, komasoti nzelu zinyinji, omvwila malangizo a Yehova. (Sal. 103:20) Yehova akaŵapasa utumiki uyakine, ove olikujalini chifukwa cha vinthu vachita olo kukatishila ntchito mphamvu zawo pofuna kuliletela ŵeka ulemelelo. Ove osangalala kuchita chilichonse chatumiwa na Yehova olo kuti ŵanthu angaziŵe lini mazina ŵawo.a (Gen. 32:24, 29; 2 Maf. 19:35) Ove okana kulondela ulemelelo uliwonse wakufunikila kulondela Yehova. Ndaŵa yanji angelo ni olichefya teti? Chifukwa chakuti ove okonda Yehova komasoti omulemekeza ngako.—Ŵelengani Salimo 89:7.

5. Kansi mngelo muyakine ewonesha tyani kulichefya penzezuzula ntumwi Yohani? (Onanisoti chithunzi.)

⁵ Ganizilani chochitika chiyakine chamene chuwonesha kulichefya kwa angelo. Mu chaka cha 96 C.E. mngelo muyakine watisaziŵa zina, echita vinthu vodabwisa ngako mu mensomphenya a ntumwi Yohani. (Chiv. 1:1) Kansi Yohani echita tyani pechiwona mensomphenya amene awo? Yove enzefuna kuti amulambile mngelo wamene uyo. Koma cholengewa chauzimu chokhulupilika chamene icho, chimulesha mokulumija ndipo chinena kuti: “Samala! Osati uchite vamene ivo! Newo nangokhala tyala kapolo muyako komasoti wa enekwako . . . Lambila Mulungu!” (Chiv. 19:10) Kwamene uku kwenze kulichefya kukulu ngako! Yove enzefunalini kupasiwa ulemelelo. Mokulumija yove euja Yohani kuti alambile Mulungu. Mngelo wamene uyo, enzeliwonalini kuti ni muweme ngako kupambana Yohani. Olo kuti enzetumikila Yehova kwa nthawe itali ndipo enze na mphamvu ngako kupambana Yohani, yove molichefya enena kuti nikapolo muyake. Olo kuti mngelo wamene uyo emuzuzula Yohani, yove aliye chite vamene ivo mwankhanza. Mmalomwake, mngelo wamene uyo elaŵila mowama mtima. Vuwoneka kuti yove eziŵa kuti Yohani echita naye wowa ngako.

6. Kansi tingakonkheje tyani kulichefya kwa angelo?

⁶ Kansi tingachite tyani kuti tikonkheje kulichefya kwa angelo? Tikapasiwa utumiki uyakine tikopewa kulikuja olo kulifunila seka ulemelelo pa vatakwanisha kuchita. (1 Ako. 4:7) Kuyangijila pamene apo, tikopewa ntima woliwona kuti nise ofunika ngako kupambana ayakine chifukwa chakuti tatumikila Yehova kwa nthawe itali kupambana ove, olo kuti tili na maudido ayakine. Kulaŵila chendi keno tuchita vinyinji potumikila Yehova, tufunika kuliwona kuti nise ŵana atontho. (Luk. 9:48) Molingana na angelo amene awo tufuna kutumikila ayakine. Tufuna lini kuchitisha ŵanthu kuganiza kuti nise ofunika ngako kupambana ove.

7. Kansi tingawoneshe tyani kulichefya keno tufuna kuzuzula olo kulangiza munthu muyakine?

⁷ Tufunikasoti kunkhala olichefya keno tufuna kupeleka chizuzulo olo malangizo kuli munthu muyakine—Mkhilisitu muyasu olo mwana wasu. Nthawe ziyakine tingafune kupeleka malangizo a mphamvu. Koma molingana na mngelo wamene ezuzula Yohani mowama mtima, tufunika kupeleka malangizo paliye kuchitisha munthu wamene uyo kuliwona kuti niwatyala-tyala. Keno tuliwona lini kuti nise aweme ngako kupambana ayakine vizatiyavye kuti tikopeleka malangizo ofumila mu Baibolo mwanjila iweme komasoti mwa chikondi.—Akol. 4:6.

ANGELO OKONDA ŴANTHU

8. (a) Molingana na Luka 15:10, kansi angelo owonesha tyani kuti okonda ŵanthu? (b) Kansi angelo ali na udindo wotyani pantchito yolalikila? (Onanisoti chapachikuto.)

⁸ Angelo ochita vinthu mokatijana na ŵanthu, ndipo alilini nawo kutali. Ove okonda ŵanthu. Munthu wochimwa akalapa ove osangalala—vamene ivi vutanthauza kuti angelo osangalala mbelele yotaika ikajokela kwa Yehova olo kuti munthu akachinja moyo wake nowela mu choonadi. (Ŵelengani Luka 15:10.) Angelo okata soti ntchito yolalikila za Ufumu mwakhama ngako. (Chiv. 14:6) Olo kuti ove olalikila lini mwasitiliti kuli ŵanthu, angasogolele ofalisa kuli munthu wamene ofuna kuphunzila za Yehova. Ni chendi kuti tinganeneletu lini kuti angelo niye otisogolela kuli munthu aliyense watuphunzila naye. Komasoti Yehova angakatishile soti ntchito njila zinyinji—monga mzimu wake utuŵa—kuti ayavye ŵanthu amene ofuna kuziŵa za yove komasoti kusogolela atumiki ŵake. (Ntchi. 16:6, 7) Koma olo ni tetyo, yove okatishila ntchito angelo ŵake kuti atiyavye pa ntchito yolalikila. Tetyo, keno tukata ntchito yolakilila uthenga uweme, tingankhale na chidalilo chakuti angelo onkhala nase pamozi kuti atiyavye.—Onani bokosi yakuti “Mulungu eyankha mapemphelo ŵawo.”

9. Kansi tingakonkheje tyani angelo pankhani yowonesha chikondi kuli ŵanthu?

⁹ Kansi tingachite tyani kuti tikokonda ŵanthu monga ni mwa kuchitila angelo? Tikamvwa chilengezo chakuti munthu muyakine wajokela mu gulu, tikosangalala monga ni mwakuchitila angelo. Tikomusimikijila nkwasu olo kalongosi wamene uyo kuti tumukonda ndipo nise osangalala kutumikila naye soti pamozi. (Luk. 15:4-7; 2 Ako. 2:6-8) Tingakonkheje soti angelo pochita vonse vatingakwanishe pokata ntchito yolalikila. (Mlal. 11:6) Komasoti molingana na angelo amene otiyavya polalikila uthenga uweme, tingachite luweme kusakila njila zatingayavyile akwasu na akalongosi pa utumiki wawo. Mwachisanzo, tingaloŵe mu utumiki na wofalisa wanyowani. Olo tingayavye akwasu na akalongosi amene ni achikulile olo amene ali na mavuto athanzi poloŵa nawo pamozi mu utumiki.

10. Kansi tingaphunzile chinji kufumila pa vinthu vechitikila Sara?

¹⁰ Tyani keno vinthu pa moyo wasu vutilolalini kuchita vamene ivi? Tingafwanesoti njila ziyakine zatingakatile ntchito pamozi na angelo. Ganizilani vechitikila Sara,b kalongosi wa ku India. Pavuli pochita upainiya kwa vyaka 20, Sara elwala ndipo eyonekewa mu chipatala. Ni pomvwika kuti yove ekhumudwa ngako. Koma chifukwa cha thandizo ya chikondi yofumila ku banja yake ya uzimu, pamozi na kuŵelenga Baibolo, maganizo ŵake enzenkhazikika patontho na patontho. Sara eyambasoti kuwona vinthu mwa njila iweme. Ni vowonekelatu, kuti yove enzefunika kuphunzila njila yanyowani yochitila utumiki mokatijana na mwevenzele vinthu pa moyo wake. Chifukwa chakuti yove enzekwanisha lini kunkhazikika kuti alembe kalata, sembe ekwanisha kulalikila kupitila tyala pa foni. Tetyo, yove etumila maulwendo ŵake oweleja ndipo ove emufotokozela za ŵanthu ayakine achidwi. Kansi vokonkhapo vake venze votyani? Myezi itontho tyala, Sara efwana maphunzilo a Baibolo okwana 70—ndipo sembe aliye kwanishe kuphunzila nawo ŵanthu wonse amene awo. Tetyo, yove elinganija kuti maphunzilo ŵake ayakine akophunzila na ŵanthu ayakine amumpingo. Anyinji mwa ophunzila Baibolo amene awo opezeka pa misonkhano yasu. Angelo osangalala ngako kukata ntchito pamozi na akwasu na akalongosi ali monga ni Sara, amene ochita vonse vangakwanishe pokata ntchito yolalikila!

ANGELO NI OPILILA

11. Kansi angelo okhulupilika owonesha tyani kuti ni opilila ngako?

¹¹ Angelo okhulupilika nichisanzo chiweme ngako pa nkhani yopilila. Kwa vyaka mahandiledi anyinji, ove ankhala opilila vinthu viliye chilungamo komasoti viipa. Ove ewona Satana pamozi na volengewa vauzimu venze tumikila navo pamozi vupandukila Yehova. (Gen. 3:1; 6:1, 2; Yuda 6) Baibolo yutiuja za mngelo muyakine wokhulupilika wamene eniyatana na mngelo muyakine muipa kwa masiku anyinji. (Dan. 10:13) Kuyangijila pamene apo kufumila pechipanduka Adamu na Hava, ove ankhala owona ŵanthu osaŵelengeka osankha kusatumikila Yehova. Mosasamala kanthu za vinthu vonse vamene ivi, angelo amene awo opitilija kutumikila Yehova mosangalala komasoti mwakhama. Ove oziŵa kuti pa nthawe yake Yehova azafumyepo vinthu vonse viliye chilungamo.

12. Kansi ni chinji chingatiyavye kuti tikopilila?

¹² Kansi tingaŵakonkheje tyani angelo ponkhala opilila? Molingana na angelo, sewo tingakumane na vinthu viliye chilungamo olo kushushiwa. Koma molingana na ove sewo tuziŵa kuti pa nthawe iweme Yehova azafumyepo vinthu vonse viipa. Tetyo, molingana na angelo okhulupilika “osati tileke kuchita viweme.” (Agal. 6:9) Komasoti Mulungu watilonjeza kuti akotiyavya kuti tipilile. (1 Ako. 10:13) Tingamusenge Yehova kuti atipase mzimu wake wamene ungatiyavye kuti tinkhale oleza ntima komasoti osangalala. (Agal. 5:22; Akol. 1:11) Kansi mungachite tyani keno mushushiwa? Mukodalila ngako Yehova ndipo osati mukochita wowa. Yehova akokuyavyani nthawe zonse ndipo azakutang’isheni.—Ahe. 13:6.

ANGELO OYAVYA KUTI MPINGO UPITILIJE KUNKHALA UTUŴA

13. Kansi ni utumiki wopatulika wotyani walinawo angelo masiku ŵano osilijila? (Mateyo 13:47-49)

¹³ Masiku ŵano osilijila Yehova wapeleka utumiki wapadela kuli angelo. (Ŵelengani Mateyo 13:47-49.) Ŵanthu mamiliyoni kuzenguluka pa chalo chonse ochita chidwi na uthenga uweme. Ayakine mwa ŵanthu amene awo ochinja moyo wawo kuti akokonkheja mfundo za Yehova noyamba kumutumikila mwa njila yakufuna yove. Angelo elondela utumiki “wochosa ŵanthu aipa pakati pa olungama.” Vamene ivi vutanthauza kuti ove ali na ntchito yoyavya noteteza mpingo kuti unkhale utuŵa. Vamene ivi vutanthauza lini kuti munthu akaleka kutumikila Yehova pa vifukwa viyakine niyekuti angajokele lini soti, vutanthauzalini soti kuti mumpingo mukochitika lini vuto iliyonse. Koma olo nitetyo, tingankhale osimikijila kuti angelo okata ntchito mwamphamvu poyavya kuti mipingo yasu ipitilije kunkhala ituŵa.

14-15. Kansi tingakonkheje tyani angelo poyavya mpingo kuti unkhale utuŵa mu minkhalidwe komasoti mwauzimu? (Onanisoti chithunzi.)

¹⁴ Kansi tingaŵakonkheje tyani angelo pa nkhani yotuŵisha mpingo? Tufunika kuyeja-yeja mwakhama kuteteza ushamwali wasu na Yehova. (Sal. 101:3) Tingayavye soti Akhilisitu ayasu kuti apitilije kunkhala okhulupilika kwa Yehova. Mwachisanzo, kansi tufunikila kuchita tyani keno taziŵa kuti Mkhilisitu muyasu wachita chimo ikulu? Chifukwa chomukonda, tingamuuje nkwasu olo kalongosi wamene uyo kuti akalaŵile kuli akulu. Keno yove ofuna lini kuchita vamene ivo, sewo tingafunikile kuluta kuyafotokozela akulu za nkhani yamene iyo. Sewo tufuna kuti akwasu amene awononga ushamwali wawo na Yehova akofwana thandizo mokulumija ngako!—Yako. 5:14, 15.

¹⁵ Nivomvwisha chisoni kuti ŵanthu ayakine amene echita machimo akulu-akulu, efwika pochosewa mu mpingo. Vikankhala tetyo sewo “tuleka kukatijana” na ŵanthu amene awo.c (1 Ako. 5:9-13) Makonzedwe amene aŵa oyavya kuti mpingo upitilije kunkhala utuŵa. Kuyangijila pamene apo kuleka kukatijana na ŵanthu amene ni ochosewa, kuwonesha kuti nise aweme ntima. Keno tumvwila lamulo ya Yehova yulesha kukatijana na ŵanthu ochosewa, tingaŵayavye kuti ajokele soti mu mpingo. Ove akajokela soti kwa Yehova, sewo tusangalala pamozi na Yehova komasoti angelo ŵake.—Luk. 15:7.

16. Kansi mwewo mungakonkheje angelo mwanjila yotyani?

¹⁶ Ni mwayi ukulu ngako kuwona kululu na menso achikhulupililo komasoti kukata ntchito pamozi na angelo! Tiyeni tipitilije kukonkheja minkhalidwe yawo iweme yamene ni: kulichefya kwawo, chikondi chawo pa ŵanthu, kupilila kwawo komasoti khama yakuwonesha kuti mpingo upitilije kunkhala utuŵa mu minkhalidwe komasoti mwauzimu. Keno tukonkheja angelo okhulupilika nase tizankhale mu banja ya atumiki a Yehova kosasila.