Mukololesha kwa Yehova kuti akutonthojeni

1. Fotokozani mwevenzele vinthu pamoyo wa Ayuda penze kuukapolo.

GANIZILANI mwenzemvwila Ayuda penze kuukapolo ku Babulo. Pa nthawe iyakine, ove ewona adani ŵawo penzewononga chalo chawo. Ove etolewa kwawo noluta kuchalo chiyakine chifukwa cha machimo ŵechichita ove komasoti makolo ŵawo akale. (2 Mbiri 36:15, 16, 20, 21) Nichendi kuti ku Babulo ove enze na ufulu wochita vinthu viyakine pamoyo wawo. (Yer. 29:4-7) Koma olo nitetyo, moyo ku Babulo wenze wovuta ndipo chenzelini cholinga chawo kuti akankhale akapolo. Kansi vamene ivi veŵakhuza tyani Ayuda? Onani mawu ŵechilemba Myuda muyakine wamene enze kuukapolo, yove enena kuti: “Tenkhala pansi mmbali mwamimana ya ku Babulo. Telila petikumbukila Ziyoni.” (Sal. 137:1) Chifukwa chakuti Ayuda enze okhumudwa kuukapolo enzefunikila kutonthojewa, koma kansi sembe echifwana kuni chitonthojo?

2-3. (a) Kansi Yehova eŵachitila chinji Ayuda penze kuukapolo? (b) Kansi tikambilane chinji munkhani ino?

² Yehova ni “Mulungu wamene otitonthoja pavuto iliyonse.” (2 Ako. 1:3) Monga Mulungu wachikondi, yove osangalala kupeleka chitonthojo kuli aliyense wali naye paushamwali wotang’a. Yehova enzeziŵa kuti Ayuda ayakine amene enze kuukapolo enzelimvwila chisoni ngako chifukwa chochita vinthu mosamumvwila, komasoti enze okonzeka kumutumikila mokatijana na chifunilo chake. (Yes. 59:20) Tetyo, kukali vyaka vopitilila 100, Mulungu eujila mneneli Yesaya kuti alembe buku yoziŵika na zina yake. Kansi yove enze na cholinga chotyani? Yesaya enena kuti: “‘Tang’ishani ŵanthu ŵangu. Shuwa atang’isheni.’ Wanena tetyo Mulungu wanu.” (Yes. 40:1) Nichendi, kupitila muli mneneli wamene uyu, Yehova epeleka chitonthojo chenzefunikila Ayuda ku ukapolo.

³ Molingana na Ayuda amene enze ku ukapolo, nasesoti tufunikila kutang’ishiwa nthawe na nthawe. Munkhani ino, tikambilane njila zitatu zechikatishila ntchito Yehova potonthoja Ayuda kuukapolo: (1) Yehova elonjeza kuti azakhululukile ŵanthu olapa, (2) yove epeleka chiyembekezo kuli ŵanthu ŵake, komasoti (3) eŵayavya kuti osati akodela nkhaŵa. Tiphunzilesoti vakuchita Yehova potitonthoja masiku ŵano.

YEHOVA OTIKHULULUKILA MWACHIFUNDO

4. Kansi Yehova ewonesha tyani kuti ni Mulungu wachifundo? (Yesaya 55:7)

⁴ Yehova ni “Tata wachifundo chikulu.” (2 Ako. 1:3) Mulungu ewonesha nkhalidwe yamene iyi pechilonjeza kuti azakhululukile Ayuda olapa amene enze kuukapolo. (Ŵelengani Yesaya 55:7.) Yove enena kuti: “Chifukwa cha chikondi changu chokhulupilika chamene chingasilelini, nizakuchitile chifundo.” (Yes. 54:8) Kansi Yehova ewonesha tyani chifundo chake? Olo kuti Ayuda enzeyembekezela kukumana na vokonkhapo vavochita vawo viipa, Yehova eŵalonjeza kuti azankhalelini ku Babulo mpaka kale-kale. Ove sembe enkhala akapolo ku Babulo kwa nthawe tyala itontho. (Yes. 40:2) Mawu amene aŵa eŵatonthoja ngako Ayuda amene elapa komasoti amene enze na ntima wofuna kukondwelesha Yehova!

5. Ndaŵa yanji tinganene kuti tili na vifukwa vinyinji votembejela chifundo cha Yehova kupambana Ayuda penze kuukapolo?

⁵ Kansi tuphunzilapo chinji? Yehova ofunishisha kukhululukila atumiki ŵake munjila yapalulu ngako. Mosiyana na Ayuda amene enze kuukapolo, masiku ŵano tili na vifukwa vinyinji vokhulupilila kuti Yehova akotikhululukila. Ndaŵa yanji tunena tetyo? Chifukwa tuziŵa makonzedwe awapanga Yehova pofuna kukhululuka machimo aŵanthu. Papita vyaka mahandiledi anyinji kufumila pechilemba ulosi wake Yesaya, Yehova etumija Mwana wake wokondewa kuti azapeleke dipo kuli ŵanthu onse antima wolapa. Chifukwa chakuti Yesu etifwila, Yehova angatikhululukile machimo ŵasu—mpaka kale-kale. (Ntchi. 3:19; Yes. 1: 18; Aife. 1:7) Kulaŵila chendi, Yehova ni Mulungu wamene okhululuka machimo!

6. Kansi tupindula tyani keno tuganizila za chifundo cha Yehova? (Onanisoti chithunzi.)

⁶ Mawu a Yehova oujiliwa opezeka pa Yesaya 55:7 angatitonthoje keno tuliimba mulandu chifukwa cha vinthu vetichita. Ayakine asewo tingapitilije kuliimba mulandu chifukwa cha vinthu vetiphoniyesha kuvuli olo pavuli pakuti talapa. Vamene ivi vingankhale tetyo ngako-ngako keno tikalipitilija kuvutika chifukwa cha vokonkhapo va vophoniya vasu. Koma olo ni tetyo, keno tewulula machimo ŵasu nolapa tingankhale na chidalilo kuti Yehova etikhululukila machimo ŵasu. Ndipo Yehova akatikhululukila okumbukilalini soti machimo ŵasu. (Yelekezelani na Yeremiya 31:34.) Tetyo keno Yehova okumbukila lini machimo ŵasu akuvuli, nasesoti tufunikalini kuŵakumbukila. Vinthu vakukumbukila Yehova ni vatuchita palipano, osati vetiphoniyesha kuvuli. (Eze. 33:14-16) Ndipo kwalombapano Atata ŵasu achifundo chikulu azatimasule ku vokonkhapo va vinthu vatuchita palipano.

7. Kansi ni chinji chingatiyavye kufotokozela akulu keno tachita chimo ikulu?

⁷ Kansi tufunika kuchita tyani keno tuliimba mulandu chifukwa chakuti tachita chimo iyakine ndipo tufuna lini kulaŵila vachendi? Baibolo yutilangiza kuti tikosenga thandizo kuli akulu. (Yako. 5:14, 15) Koma olo ni tetyo, nthawe ziyakine vingativute kulaŵila kuti tachita chinthu chiipa. Koma tufunika kukumbukila kuti Yehova okatishila ntchito analume amene awo pofuna kutiyavya, komasoti kuti azatichitile vinthu viweme, mwachikondi na mwachifundo. Keno tukumbukila mfundo yamene iyi nolapa tizafunishishe kulaŵila nawo. Ganizilani mwechitonthojelewa nkwasu muyakine zina yake Arthur,a na chifundo cha Yehova pa nthawe yenzevutika ngako na chikumbuntima chake. Yove enena kuti “Nenzelolela vinthu volaula kwa pafupi-fupi chaka. Koma penimvwishila nkhani yokhuza chikumbuntima newo neulula chimo yangu kuli mwanakazi wangu komasoti akulu. Nechimvwa luweme ngako peniulula chifukwa chikumbuntima chiliye pitilije kunivutisha. Akulu enikumbusha kuti Yehova akalifuna mphela kuti ninkhale naye paushamwali. Yove otizuzula chifukwa chakuti otikonda. Mawu ŵawo aweme enisisimula ndipo eniyavya kuziŵa kuti Yehova enikhululukila chendi.” Palipano, Arthur otumikila monga mpainiya komasoti ntumiki woyavya. Nivokondwelesha ngako kuziŵa kuti Yehova owonesha chifundo chake kuli ŵanthu olapa!

YEHOVA OTIPASA CHIYEMBEKEZO

8. (a) Kansi Yehova epeleka chiyembekezo chotyani kuli Ayuda penze kuukapolo? (b) Mokatijana na Yesaya 40:29-31, kansi chiyembekezo cheŵakhuza tyani Ayuda amene elapa?

⁸ Molingana na kuwona kwa ŵanthu, Ayuda penze kuukapolo enzeve chiyembekezo chilichonse. Ufumu wamphamvu pachalo chonse wa Babulo wenzeziŵika na mbili yakuti umasulalini akapolo ŵake. (Yes. 14:17) Koma olo ni tetyo, Yehova epeleka chiyembekezo kuli ŵanthu ŵake. Mulungu enze elonjeza kuti azamasule ŵanthu ŵake, ndipo paliye chingamukangishe kukwanilisha vawalonjeza. (Yes. 44:26; 55:12) Mmenso mwa Yehova Ababulo enze monga ni lukungu. (Yes. 40:15) Lukungu ukaifuzilila yuchoka mokulumija. Umu niye mwevenzelesoti vosavuta kwa Yehova kuti amasule ŵanthu ŵake. Kansi chiyembekezo chamene ichi chiŵayavya tyani Ayuda? Chiyembekezo chamene ichi chiŵatonthoja. Koma chiŵayavyasoti munjila zinyinji. Yesaya elemba kuti: “Ŵanthu amene oyembekezela Yehova azafwanesoti mphamvu.” (Ŵelengani Yesaya 40:29-31.) Ove sembe enkhala monga ni vinombo vamene vundalala mmululu ngako chifukwa cha chiyembekezo chechiŵapasa Yehova.

9. Kansi ni chinji cheyavya Ayuda amene enze kuukapolo kukhulupilila malonjezo a Yehova?

⁹ Yehova epelekasoti vifukwa vokwanila kuli Ayuda voŵayavya kukhulupilila malonjezo ŵake. Motyani? Ganizilani za maulosi a Mulungu amene enze ekwanilishiwa kale panthawe yamene iyo. Ove enzeziŵa kuti Asiriya egonjesa ufumu wakumpoto wa Aisiraeli ndipo etola ŵanthu noluta nawo kuukapolo. (Yes. 8:4) Ove ewona na menso ŵawo Ababulo pechiwononga Yelusalemu notola ŵanthu kuluta nawo kuukapolo. (Yes. 39:5-7) Ove enze moyo Mfumu Zedekiya pechituliwa menso nonyamuliwa kuluta kuukapolo. (Yer. 39:7; Eze. 12:12, 13) Mawu onse ŵenze enenelatu Yehova ekwanilishiwa. (Yes. 42:9; 46:10) Vinthu vonse vamene ivi viŵayavya Ayuda kuti akokhulupilila ngako lonjezo ya Yehova yakuti azaŵamasule kuukapolo!

10. Kansi ni chinji chingatiyavye kupitilija kunkhala na chiyembekezo chotang’a masiku ŵano osilijila?

¹⁰ Kansi tuphunzilapo chinji? Tikakhumudwa chiyembekezo chingatitonthoje notiyavya kufwanasoti mphamvu. Masiku ŵano osilijila ni ovuta, ndipo ayakine mwa adani ŵatulimbana nawo ali na mphamvu ngako. Koma olo ni tetyo, tufunikalini kutaya ntima ngako. Yehova otilonjeza kuti azatipase moyo wosasila mpaladaiso—mu chalo chamene icho tizankhale otetezeka komasoti mwantendele. Tufunikila kupitilija kuganizila ngako za chiyembekezo chamene ichi. Tikaleka kuchita vamene ivi tingaŵe monga ni munthu wamene ololesha malo aweme kupitila pawindo ifipa, yove angakwanishelini kuwona kuwama kwake. Kansi ‘tingatuŵishe tyani windo’ kuti chiyembekezo chasu chikowoneka luweme? Tikonkhala na chiyoloŵezi chopatula nthawe yoganizila moyo uweme watuyembekezela mu chalo chanyowani. Tingaŵelenge nkhani, kulolela mavidiyo, olo kumvwishila nyimbo zamene zunena za chiyembekezo chasu. Komasoti tingamuuje Yehova mpemphelo za vinthu vatuyembekezela mwachidwi kuwona kukwanilishiwa kwake.

11. Kansi ni chinji cheyavya kalongosi muyakine penze elwala matenda akulu kuti afwanesoti mphanvu?

¹¹ Ganizilani mwechimutonthojela chiyembekezo kalongosi muyakine zina yake Joy, wamene enzelwala matenda akulu ngako. Yove enena kuti: “Nikakhumudwa ngako chifukwa cha mavuto ŵanukumana nawo numufotokozela Yehova mwanumvwila ndipo nuziŵa kuti yove onimvwisha. Monga vokonkhapo vake, Yehova onipasa ‘mphamvu zopambana zovyalika nazo.’” (2 Ako. 4:7) Joy opatulasoti nthawe yoganizila kuti ali mu chalo chanyowani mwamene “paliye munthu aliyense wonkhala mu chalo chamene icho akuti azanene kuti: ‘Newo nulwala.’” (Yes. 33:24) Keno nase tumukhutululila Yehova vonse vamuntima mwasu noganizila ngako za chiyembekezo chasu tizafwanesoti mphamvu.

12. Kansi tili na vifukwa votyani vokhulupilila malonjezo a Yehova? (Onanisoti chithunzi.)

¹² Molingana na mwechichitila kuli Ayuda penze kuukapolo, Yehova watipasasoti vifukwa vinyinji vokhulupilila malonjezo ŵake. Ganizilani za maulosi ŵatuwona okwanilishiwa masiku ŵano. Mwachisanzo, sewo tuwona kuti ufumu wamphamvu pachalo chonse, ‘pavinthu viyakine niwotang’a koma pavinthu viyakine niwosatang’a.’ (Dan. 2:42, 43) Tikumvwasoti za ‘vivomelezi mmalo osiyana-siyana’ ndipo tukata ntchito yolalikila “kuli ŵanthu amitundu yonse.” (Mat. 24:7, 14) Maulosi amene aŵa komasoti ayakine anyinji otiyavya kukhulupilila kuti malonjezo otonthoja a Yehova azakwanilishiwe chendi.

YEHOVA OTIYAVYA KUTI OSATI TIKOCHITA WOWA

13. (a) Kansi Ayuda sembe ekumana na mavuto otyani panthawe ya kumasuliwa kwawo? (b) Molingana na mwayufotokozela lemba ya Yesaya 41:10-13, kansi Yehova eŵatonthoja tyani Ayuda penze kuukapolo?

¹³ Yehova epeleka chiyembekezo chiweme kuli Ayuda penze ku Babulo chonena kuti azaŵamasule. Koma yove enzeziŵa kuti vinthu vizankhale vovuta pamoyo wawo vamene ivi vikezesala patontho kuchitika. Yove enze elosela kuti mfumu iyakine yampamvu izayambe kuukila noyamba kulamulila matauni ayakine ozenguluka Babulo, ndipo pavuli pake izaukile tauni ngayo-ngayo ya Babulo. (Yes. 41:2-5) Kansi Ayuda enzefunika kuchita wowa? Kukali vyaka vinyinji kuti vamene ivi vichitike, Yehova etonthoja ŵanthu ŵake poŵauja kuti: “Osachita wowa chifukwa newo nili nawe. Osadela nkhaŵa chifukwa newo nine Mulungu wako.” (Ŵelengani Yesaya 41:10-13.) Kansi yove enzetanthauza chinji na mawu akuti “newo nine Mulungu wako”? Pechilaŵila mawu amene aŵa Mulungu enzekumbushalini Ayuda kuti ofunika kumulambila, chifukwa ove enzeziŵa kale kuti ofunika kulambila Mulungu. Mmalomwake, Mulungu enzeŵakumbusha kuti yove enze akalimphela kumbali yawo.—Sal. 118:6.

14. Kansi Yehova echitasoti tyani poyavya Ayuda kuti osati achite wowa?

¹⁴ Yehova eyavyasoti Ayuda kuti osati akochita wowa poŵakumbusha za mphamvu zake komasoti nzelu zake ziliye malile. Yove eŵauja kuti aloleshe nyenyezi zakululu. Mulungu aliyeŵauje tyala kuti niyove epanga nyenyezi, koma eŵaujasoti kuti oziŵa zina ya nyenyezi iliyonse payeka-payeka. (Yes. 40:25-28) Keno Yehova oziŵa zina ya nyenyezi iliyonse, ni vosakaikisha kuti oziŵasoti zina ya ntumiki wake aliyense payeka-payeka! Ndipo keno Yehova ali na mphamvu zokwanisha kulenga nyenyezi, ni voziŵikilatu kuti ali na mphamvu zokwanisha kuyavya ŵanthu ŵake. Ni chendi, Ayuda penze kuukapolo enze navifukwa vokwanila vosadela nkhaŵa kalikonse olo kuchita wowa.

15. Kansi Mulungu eŵakonzekelesha tyani Ayuda penze kuukapolo kuti akumane na vinthu vakusogolo?

¹⁵ Yehova eŵafotokozelasoti venzefunika kuchita panthawe yakumasuliwa kwawo. Mu mbali yoyambilila ya buku ya Yesaya, Mulungu euja ntundu wamene uyo kuti: “Lutani mukaloŵe mu vipinda vanu vankati ndipo mukavale viseko. Mukafisame kwa nthawe itontho mpaka ukali wangu ulute.” (Yes. 26:20) Mawu amene aŵa ekwanilishiwa koyamba Mfumu Koresi pechilonda tauni ya Babulo. Kaswili wakale Wachigiliki enena kuti Koresi pechiloŵa mu tauni ya Babulo euja “[masodja ŵake] kuti apaye munthu aliyense wangafwane panja pang’anda.” Ganizilani tyala wowa wenze nawo ŵanthu aku Babulo! Koma Ayuda epulumuka chifukwa emvwila malangizo a Yehova.

16. Ndaŵa yanji tufunikalini kudela nkhaŵa ngako zasogolo yasu? (Onanisoti chithunzi.)

¹⁶ Kansi tuphunzilapo chinji? Kwalombapano tikumane na chisauso chikulu ngako chamene chikaliye chitikapo mu mbili yonse ya moyo wa ŵanthu. Chisauso chamene ichi chikezeyamba, ŵanthu pachalo chonse azachite wowa ndipo azasokonezeke ngako. Koma ŵanthu a Yehova azankhale mwantendele. Sewo tuziŵa kuti Yehova ni Mulungu wasu. Sewo tizankhale otang’a ntima poziŵa kuti ‘chipulumuso chasu chavwendela.’ (Luk. 21:28) Olo panthawe yatikuti tizaukiliwe na nkatijano wamitundu—tizapitilije mphela kudalila Mulungu. Yehova azatiteteze kupitila muli angelo komasoti malangizo ŵake. Kansi yove akotipasa tyani malangizo? Palipano paliye chatuziŵa. Koma olo ni tetyo, vuwoneka kuti tikolondela malangizo amene awo kupitila mu mipingo yasu. Mipingo yamene iyi izankhale monga ni ‘vipinda vasu vankati’ vamene vizatiyavye kunkhala otetezeka. Kansi tingachite tyani pokonzekela vinthu vakusogolo? Tufunika kunkhala okatijana ngako na akwasu na akalongosi, kunkhala okonzeka kumvwila malangizo a gulu, komasoti tikokhulupilila kuti Yehova niye osogolela gulu yasu.—Ahe. 10:24, 25; 13:17.

17. Kansi mwewo mungaloleshe tyani kwa Yehova kuti akutonthojeni?

¹⁷ Olo kuti moyo wenze wovuta kuli Ayuda penze kuukapolo ku Babulo, Yehova eŵatonthoja mwanjila yenze funikila. Mulungu azachite soti chimozi-mozi kuli sewo. Tetyo, mosasamala kanthu kuti mungakumane na vinthu votyani kusogolo, pitilijani kulolesha kwa Yehova kuti akutonthojeni. Mukokhulupilila kuti yove okhululukila atumiki ŵake na ntima wonse, komasoti kuŵasamalila. Pitilijani kutang’isha chiyembekezo chanu. Mukokumbukila kuti Yehova ni Mulungu wanu komasoti osati mukoyopa chilichonse.