MAWU KULI OSONKHANA

ANTCHITO OLIPELEKA Keno mufuna kuyavya pa ntchito ziyakine pansonkhano uno, laŵilani na a Dipatimenti yothandiza ŵanthu komasoti Opanamila Antchito Olipeleka.

DIPATIMENTI YACHIPATALA Pulizi kumbukilani kuti dipatimenti yamene iyi yuyavya tyala pa vochitika va mwazizizi.

MALO ONKHALA Yeja-yejani kuganizila ayanu. Mukokumbukila kuti ŵanthu ŵamufunikila kusungila malo ni a m’banja mwanu, a mwawela nawo pa motoka imo, ŵamunkhala nawo ng’anda imozi olo ŵamuphunzila nawo Baibolo. Pulizi osaika vinthu pamalo onkhala, kupatulapo keno mwasungila munthu muyakine malo amene awo.

OLONDELA ALWENDO Olondela alwendo ntchito yawo nikukuyavyani. Tetyo, konkhejani malangizo onse ŵangakuujeni okatijana na malo aweme opanamikako ma motoka, ma honda, njinga, njila zokatishila ntchito poloŵa m’malo ansonkhano na pofuma, kusunga malo onkhala na vinthu viyakine.

UBATIZO Malo kuli ŵala akuyabatiziwa azasungiwe kusogolo kwa pulatifomu. Keno pali malangizo ayakine osiyana na amene aŵa azalaŵiliwe. Ŵanthu amene awo akuyabatizika ofunika kuzankhala pamipando yamene iyi, Pa Chiŵelu mmawa nkhani ya ubatizo ikaliyeyamba. Aliyense ofunika kuleta chopukutila manzi, na vovwala voyenelela.

VOTAIKA NA VOPEZEKA Mukadoba chinthu chilichonse, mukachitwale ku Dipatimenti ya Votaika. Keno mwataya vinthu viyakine, lutani ku dipatimenti yamene iyi mukawone vinthu vanu. Mukafwana mwana waluŵila, mukamutwale ku dipatimenti yamene iyi. Komalomba dipatimenti yamene iyi niyosungilakolini ŵana, mukoŵasamalila ŵana ŵanu ndipo nthawe zonse mukonkhala nawo pamo.

ZOPELEKA Pofunika ndalama zinyinji kuti tinkhale na malo aweme ochitila nsonkhano, tinkhale na vokujila mawu, vipangizo vowoneshela mavidiyo, komasoti vinthu viyakine vuyavya kuti nsonkhano wamene uyu unkhale wosangalasa komasoti kuti utiyavye kutang’isha ushamwali wasu na Yehova. Ndalama zamungatwale pano pansonkhano, ziyavye kulipila vinthu vamene ivi komasoti ziyavye pa ntchito ya pachalo chonse. Mabokosi olembewa luweme ŵamungaponyemo zopeleka zanu, aikiwa m’malo osiyana-siyana pansonkhano wamene uno. Mungapelekesoti ndalama zanu pa intaneti kupitila pa donate.jw.org. Tutembeja ngako chifukwa cha vopeleka vanu. Bungwe Yutonga yukutembejani ngako chifukwa choyavya na ntima wonse pa ntchito ya Ufumu.

NSONKHANO WAPADELA

Sikulu ya Akhilisitu Olalikila za Ufumu Apainiya avyaka va pakati pa 23 na 65 amene ofuna kuingijila utumiki wawo oitiwa kuti azaŵe nawo pansonkhano wa ofuna kuloŵa Sikulu ya Akhilisitu Olalikila za Ufumu wamene uzachitike Pa sondo nzuŵa. Nthawe na malo kwauti uzachitikile nsonkhano wamene uyu vizalengezewe.