Kansi Mukumbukila?

Kansi mwiŵelenga bwino-bwino magazini a Nsanja za Mulonda za chino chaka? Chabwino, yejani kuyankha makonsho aŵa ali mnyansi:

Kansi tingadalisiwe tyani keno tupatulako kanthawe kuti tilaŵile na Yehova, kumumvwishila noganizila za yove?

Tikopanga vosankha mwanzelu, tinkhale aphunzisi aweme, chikhulupililo chasu chinkhale chotang’a ngako, komasoti tiyambe kukonda ngako Yehova.—w22.01, pedji 30-31.

Kansi kuphunzila kukhulupilila Yehova na ŵanthu ŵakukatishila ntchito pano pachalo kungatiyavye tyani?

Ino niye nthawe yophunzila kukhulupilila njila ya Mulungu yochitila vinthu, mwa kusakaikila vosankha vakupanga akulu na mwakusogolelela. Chisauso chikulu chikazayamba, tizankhale okonzeka kumvwila olo tikazalondela malangizo owoneka kuti ni achilwendo olo osamvwishishika.—w22.02, pedji 4-6.

Kansi mfundo ya mngelo yenze yotyani pechiuja Zekariya za “nthambo yopimila ya bilida mmanja mwa [Bwanankubwa] Zerubabele”? (Zek. 4:8-10)

Mensomphenya amene aŵa eŵasimikijila ŵanthu a Mulungu kuti kachisi wamene enze wosiyana polinganija na wala woyamba, azasilijiwe kumangiwa monga ni mwenzefunila Mulungu.—w22.03, pedji 16-17.

Kansi tingankhale tyani “chisanzo chiweme . . . pa kalaŵilidwe”? (1 Tim. 4:12)

Tikolaŵila mowama ntima komasoti mwaulemu mu utumiki, tikoimba na ntima wonse, kupeleka ndemanga nthawe zonse pamisonkhano, kulaŵila vachendi, komasoti kulimbikisa ayakine nopewa kulaŵila mawu aipa.—w22.04, pedji 6-9.

Ndaŵa yanji kawonekedwe ka vinyama 4 (maufumu) vamene vufotokozewa m’buku ya Danieli chapitala 7, kopezeka tyala mu chinyama chimozi monga mwayuwoneshela lemba ya Chivumbulutso 13:1, 2?

Chinyama chufotokozewa m’buku ya Chivumbulutso 13 chupanamilalini tyala boma imozi, monga Roma. Mmalomwake, chupanamila maboma onse amene olamulila ŵanthu mpaka pano.—w22.05, pedji 9.

Kansi njila ikulu yatingawoneshele kuti tudalila chilungamo cha Yehova ni yotyani?

Keno munthu muyakine watinyoza, kutikhumudwisa, olo kutichimwila, tupewa kunkhala wokalipa na kusunga vifukwa, nosiya nkhani yonse mmanja mwa Yehova. Yove azasilije mavuto onse amene owela chifukwa cha uchimo.—w22.06, pedji 10-11.

Kansi m’bale wamene opeleka pemphelo pamisonkhano ofunika kukumbukila chinji?

Pemphelo ni njilalini yopelekela malangizo olo vilengezo. Tetyo, m’bale wamene opemphela ofunikalini kulaŵila “mawu anyinji,” makamaka m’pemphelo yosegulila misonkhano. (Mt. 6:7)—w22.07, pedji 24-25.

Kansi ŵala “enzechita viipa azauke kuti aweluziwe” mu njila yotyani? (Yoh. 5:29)

Ove azaweluziwelini mwa kutamanishiwa, potolela vinthu vechichita akaliyemwalila. Koma azayesewe mokatijana na maganizo ŵawo na vochita vawo pavuli pakuti aushiwa.—w22.09, pedji 18.

Kansi ni mawu otyani olimbikisa ŵechilaŵila J. F. Rutherford pa nsonkhano wachigawo wichitika mu September 1922?

Pa nsonkhano wachigawo wamene wichitikila ku Cedar Point, Ohio, U.S.A., yove enena kuti: “Mfumu yayamba kale kulamulila! Ndipo mwewo nimwe atumiki ŵake olengeza za Ufumu wamene uyu. Tetyo, lengezani, lengezani, lengezani, za Mfumu na Ufumu wake!”—w22.10, pedji 3-5.

Kansi buku ya Yesaya chapitala 30 yuwonesha njila zitatu zotyani za mwakutiyavyila Mulungu kupilila?

Chapitala chamene ichi chuwonesha kuti yove (1) omvwishila mwatchelu na kuyankha mapemphelo ŵasu, (2) otisogolela, komasoti (3) otipasa madaliso palipano ndipo azatidalise kusogolo.—w22.11, pedji 9.

Ndaŵa yanji tinganene kuti mawu apa Salimo 37:10, 11, 29 ekwanilishiwa kale ndipo azakwanilishiwesoti kusogolo?

Mawu a Davide ofotokoza bwino ngako madaliso amene enze mu Isiraeli, monga pa nthawe ya ulamulilo wa Solomo. Yesu efotokoza za paladaiso akuza kusogolo ndipo ekata mawu apa vesi 11. (Mt. 5:5; Lk. 23:43)—w22.12, pedji 8-10, 14.