NKHANI YOPHUNZILA N.° 31
NYIMBO N.° 12 Yehova ni Mulungu nkulu
Vawachita Yehova kuti apulumushe ŵanthu ku uchimo na imfwa
“Mulungu ekonda ngako chalo mwakuti epeleka Mwana wake wovyalika yeka.”—YOH. 3:16.
CHOLINGA CHANKHANI
Tiwone vakuchita Yehova pofuna kutiyavya kulimbana na uchimo, komasoti mwakutiyavyila kuti tinkhale na chiyembekezo cha moyo wosasila komasoti uliye uchimo.
1-2. (a) Kansi uchimo n’chinji, ndipo tingachite tyani kuti tiugonjese polimbana nawo? (b) Kansi tiphunzile chinji munkhani ino komasoti munkhani ziyakine zili m’Magazini ino? (Onanisoti mawu ali papedji 32 akuti “Okondewa.”Onanisoti nkhani yakuti “Mawu kuli oŵelenga” m’magazini ino.)
KANSI mwewo mungakonde kuti mumvwishe luweme mwakukukondelani ngako Yehova Mulungu? Pali njila iweme yamene ingakuyavyeni pankhani yamene iyi: Mukophunzila vawachita Yehova pofuna kukumasulani ku uchimo na imfwa. Uchimoa ni mdani muipa ngako, ndipo mwewo pamweka mungakwanishelini kumugonjesa. Sewo tuchimwa nsiku iliyonse, komasoti tikufwa chifukwa cha uchimo. (Alo. 5:12) Koma Yehova otisimikijila kuti azatipulumushe ku uchimo na imfwa mpaka kale-kale!
2 Yehova Mulungu wankhala oyavya ŵanthu pankhondo yolimbana na uchimo kwa vyaka 6.000. Ndaŵa yanji? Chifukwa chakuti yove otikonda. Yehova wankhala owonesha kuti okonda ŵanthu kufumila panthawe yechiŵalenga. Chifukwa chakuti cha vamene ivi, yove wachita vinthu vinyinji kuti akoŵayavya akachimwa. Mulungu oziŵa kuti uchimo upaya, ndipo yove ofunalini kuti sewo tikokufwa. Yove ofuna kuti sewo tinkhale na moyo mpaka kale-kale. (Alo. 6:23) Vamene ivi niye vakufuna Mulungu kuli mwewo. Munkhani ino, tikambilane makonsho atatu: (1) Kansi Yehova epeleka tyani chiyembekezo kuli ŵanthu ochimwa? (2) Kansi ŵanthu aliye ungwilo otomolewa m’Baibolo echita tyani kuti Mulungu akokondwela nawo? (3) Kansi Yesu echita tyani kuti apulumushe ŵanthu ku uchimo?
KANSI YEHOVA EPELEKA CHIYEMBEKEZO CHOTYANI KULI ŴANTHU OCHIMWA?
3. Kansi n’chinji chechitika kuti makolo ŵasu oyambilila achimwe?
3 Yehova pechilenga mwanalume na mwanakazi woyambilila, enzefuna kuti ove akosangalala. Yove eŵapasa malo aweme onkhala, mphaso yaukwati, komasoti ntchito yochitisha chidwi. Ove enzefunikila kuvyala ŵana nozuja chalo, komasoti kuchitisha kuti chalo chonse chinkhale paladaiso monga ni mwewenzele munda wa Edeni. Yove echingoŵapasa tyala lamulo imozi yamene yenze yosavuta kumvwila. Komasoti Mulungu eŵachenjeja kuti akafwaya lamulo yamene iyo nomupandukila mwalona, azafwe chifukwa cha chimo yamene iyo. Adamu na Hava echita vechiŵauja mngelo muyakine muipa Satana, wamene enzekondalini Mulungu komasoti ŵanthu ndipo efwaya lamulo yechiŵapasa Mulungu. Ove echita chimo chifukwa chokangiwa kudalila Atata ŵawo achikondi. Monga nimwatuziŵila, mawu ŵechilaŵila Yehova ekwanilishiwa. Kufumila nthawe yamene iyo kuluta kusogolo, ove enzefunikila kulimbana na vokonkhapo viipa vakusamvwila kwawo. Ove eyamba kukalamba ndipo posilijila pake echifwa.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Kansi ndaŵa yanji Yehova osangalalalini na uchimo komasoti otiyavya kuti tinkhale naye paushamwali? (Aloma 8:20, 21)
4 Yehova echitisha kuti nkhani yomvwisha chisoni yamene iyi ilembewe kuti sewo tiphunzilepo kanthu. Nkhani yamene iyi yutiyavya kumvwisha chifukwa chake Mulungu ouzonda ngako uchimo. Uchimo utikangisha kunkhala paushamwali na Atata ŵasu, komasoti upaya. (Yes. 59:2) Satana omukondalini Yehova komasoti okondalini ŵanthu. N’chifukwa chake yove echitisha kuti Adamu na Hava achimwe, komasoti opitilija kuyesa ŵanthu masiku ŵano. Pavuli pakuti Adamu na Hava achimwa, payakine Satana eganiza kuti wakwanisha kusokoneza cholinga chenze nacho Mulungu kuli ŵanthu. Koma yove enzeziŵalini kuti chikondi cha Yehova n’chikulu ngako. Mulungu aliyechinje cholinga chake chokhuza ŵana ŵa Adamu na Hava. Mulungu oŵakonda ngako ŵanthu, n’chifukwa chake echitapo kanthu mokulumija kuti apeleke chiyembekezo kuli ŵanthu. (Ŵelengani Aloma 8:20, 21.) Yehova enzeziŵa kuti ŵanthu ayakine azasankhe kumvwila yove komasoti malamulo ŵake. Yehova epanga makonzedwe kuti ŵanthu amene aŵa ankhale naye paushwamwali uweme, komasoti kuti aŵapulumushe ku uchimo na imfwa. Kansi Yehova echita tyani kuti vinthu vonse vamene ivi vinkhale vokwanishika?
5. Kansi Yehova epeleka nthawe yanji chiyembekezo kuli ŵanthu ochimwa? Fotokozani. (Genesis 3:15)
5 Ŵelengani Genesis 3:15. Mokulumija, Yehova enena kuti azamuwononge Satana, ndipo epeleka chiyembekezo kuli ŵanthu. Yehova elosela kuti kuzawele “mbewu” yamene ikuti izapulumushe ŵanthu. Mbewu yamene iyo izafwaye Satana nosilija mavuto onse ŵechiyambisha yove mu Edeni. (1 Yoh. 3:8) Koma poyamba, Satana enzefunika ‘kuwononga’ olo kuti kupaya mbewu yamene iyo. Vamene ivi sembe vemuŵaŵa ngako Yehova. Koma Yehova enzewokonzeka kutamana na chisoni komasoti kulola kuti “mbewu” yamene iyo ikumane na mavuto, chifukwa enzefuna kuti ŵanthu apulumuke ku uchimo na imfwa.
KANSI ŴANTHU ALIYE UNGWILO OTOMOLEWA M’BAIBOLO ENZECHITA TYANI KUTI YEHOVA AKOKONDWELA NAWO?
6. Kansi analume okhulupilika, monga Nowa na Abele, echita tyani kuti ankhale paushamwali na Yehova?
6 Mwapatontho na patontho, Yehova ewonesha kuti n’vokwanishika kuti ŵanthu aliye ungwilo ankhale naye paushamwali. Abele, wamene enze mwana wachiŵili wa Adamu na Hava, enze munthu woyambilila kukhulupilila Yehova pavuli pakuti ŵanthu apanduka mu Edeni. Chifukwa chakuti Abele enzekonda Yehova ndipo enzefuna kuchita vinthu vomukondwelesha nonkhala naye paushamwali, yove epeleka nsembe kwa Mulungu. Abele enze nchiŵeta wa mbelele, tetyo epaya ŵana ayakine ambelele zake kuti apeleke nsembe kwa Yehova. Kansi Yehova echita tyani? Yove “ekondwela naye Abele komasoti nsembe yake.” (Gen. 4:4) Yehova enzekondwelasoti na nsembe zenzepeleka ŵanthu ayakine chifukwa chomukonda komasoti kumudalila,—monga Nowa. (Gen. 8:20, 21) Mwakulondela nsembe zamene izo, Yehova ewonesha kuti ŵanthu aliye ungwilo angakwanishe kumukondwelesha komasoti kunkhala naye paushamwali.b
7. Kansi tuphunzila chinji kuli Abulahamu wamene enze wokonzeka kupeleka nsembe mwana wake?
7 Yehova esenga Abulahamu munthu wachikhulupililo chotang’a, kuti achite chinthu chiyakine chovuta ngako—emuuja kuti apeleke nsembe mwana wake Isaki. N’vowonekelatu kuti vamene ivi vemuvutisha ngako muntima Abulahamu. Koma olo n’teyo, yove eyamba kukonzekela kuti achite vechimuuja Mulungu. Abulahamu penze esala patontho kuti apaye mwana wake, Mulungu emulesha. Mulungu eziŵa kuti Abulahamu angatamane ngako na chisoni akapaya mwana wake. Chisanzo chamene ichi chutiphunzisa vinthu venzeyembekezela Yehova kuti achite kusogolo—Yehova enzeyembekezela kupeleka Mwana wake mofunishisha kuti ankhale nsembe. Yehova oŵakonda ngako ŵanthu.—Gen. 22:1-18.
8. Kansi nsembe zinyinji zenzepeleka ŵanthu pokonkheja Chilamulo zenzepanamila chinji? (Levitiko 4:27-29; 17:11)
8 Yehova pechipeleka Chilamulo kuli Aisiraeli, eŵauja kuti akopeleka nsembe za nyama kuti akoŵakhululukila machimo ŵawo. (Ŵelengani Levitiko 4:27-29; 17:11.) Nsembe zamene izo zenzepanamila nsembe ikulu ngako, yamene ikuti izapulumushe ŵanthu ku uchimo mpaka kale-kale. Mulungu eujila aneneli ŵake kuti alembe vokhuza mbewu yolonjezewa. Ove efotokoza kuti Mwana wokondewa wa Mulungu azatamanishiwe komasoti kuti azapaiwe. Yove enzeyembekezela kupaiwa monga ni mbelele kuti ankhale nsembe. (Yes. 53:1-12) Ganizilani tyala: Yehova enzeyembekezela kuti apeleke nsembe Mwana wake wokondewa pofuna kuti apulumushe ŵanthu—kupamikijapo mwewo—ku uchimo na imfwa!
KANSI YESU ECHITA TYANI KUTI APULUMUSHE ŴANTHU KU UCHIMO?
9. Kansi Yohani m’Batizi enena chinji vokhuza Yesu? (Ahebeli 9:22; 10:1-4, 12)
9 M’chaka cha 29 C.E., Yohani m’Batizi ewona Yesu ndipo enena kuti: “Onani Mwana wa Mbelele wa Mulungu wamene ochosa uchimo wa chalo!” (Yoh. 1:29) Mawu amene aŵa owonesha kuti Yesu niye mbewu yapadela yechilonjeza Mulungu. Yove enze ewela pachalo kuti azapeleke nsembe yechilonjeza Mulungu. Ŵanthu masiku ŵano ali na chiyembekezo chosimikijilika ngako kupambana kale yonse—tuyembekezela kuti uchimo uzagonjesewe mpaka kale-kale.—Ŵelengani Ahebeli 9:22; 10:1-4, 12.
10. Kansi Yesu ewonesha tyani kuti ‘ewela kuzaita’ ŵanthu ochimwa?
10 Cholinga chikulu cha Yesu chenze kuyavya ŵanthu amene enzelimvwila chisoni chifukwa cha machimo, ndipo eŵaita kuti ankhale ophunzila ŵake. Yove enzeziŵa kuti ŵanthu okumana na mavuto chifukwa cha uchimo. Tetyo, yove enzeyavya analume na anakazi amene enzetamana chifukwa choziŵika na mbili yakuti ni ochimwa. Pokatishila ntchito fanizo, yove efotokoza kuti: “Ŵanthu aweme ofunikilalini dokota, koma olwala niye amene omufuna.” Yove enenasoti kuti, “Niliyewele kuzaita ŵanthu olungama, koma ochimwa.” (Mat. 9:12, 13) Ndipo vamene ivi niye vechichita Yesu pautumiki wake. Yove ewonesha kuwama ntima pechikhululukila mwanakazi muyakine wamene esambika mendo ŵake na misozi yake. (Luk. 7:37-50) Yove ephunzisasoti mwanakazi waku Samaliya mfundo zofunika ngako za chonadi, olo kuti enzeziŵa kuti ni hule. (Yoh. 4:7, 17-19, 25, 26) Mulungu epelekasoti mphamvu kuli Yesu kuti agonjese vokonkhapo vonse va uchimo—vamene vuleta imfwa. Motyani? Yesu eusha ŵanthu osiyana-siyana—analume na anakazi, ŵana komasoti akulu-akulu.—Mat. 11:5.
11. Kansi ndaŵa yanji ŵanthu ochimwa enzemasuka naye Yesu?
11 N’vosadabwisa kuti ŵanthu amene enzeziŵika na mbili yakuti ni ochimwa, enzemasuka ngako kunkhala pafupi na Yesu. Yove enzemvwisha mwenzemvwila muntima mwawo ndipo enzechita nawo vinthu mowama ntima. Ove enzeyopalini akafuna kulaŵila na Yesu. (Luk. 15:1, 2) Komasoti Yesu enzeŵatembeja ŵanthu amene enzemukhulupilila ndipo enzeŵayavya. (Luk. 19:1-10) Chisanzo chake chiweme chuwonesha kuti Atata ŵake ali na chifundo. (Yoh. 14:9) Tikaganizila mawu a Yesu na mwenzechitila vinthu na ŵanthu ochimwa, tukwanisha kuwona kuti Yehova niwachifundo chikulu wamene okonda ŵanthu ochimwa ndipo ofuna kuŵayavya. Yesu enzeyayva ŵanthu ochimwa kuti achinje moyo wawo nonkhala ophunzila ŵake.—Luk. 5:27, 28.
12. Kansi Yesu ephunzisa chinji vokhuza imfwa yake?
12 Yesu enzeziŵa kuti azapeleke moyo wake kuti unkhale nsembe. Moweleja-weleja, yove enzeŵauja ophunzila ŵake kuti azapelekewe nopaiwa pachimuti. (Mat. 17:22; 20:18, 19) Yove enzeziŵa kuti nsembe yake izachose uchimo wa chalo, mokatijana na mwechinenela Yohani komasoti aneneli ayakine. Yesu enzeziŵasoti kuti pavuli pakuti wapeleka moyo wake kuti inkhale nsembe, ‘azadonsele ŵanthu osiyana-siyana’ kuli yove. (Yoh. 12:32) Ŵanthu ochimwa sembe ekondwelesha Yehova mwa kumuvomela Yesu kunkhala Ambuye wawo, komasoti kukonkheja chisanzo chake. Vamene ivi sembe vechitisha kuti ‘amasuliwe ku uchimo.’ (Alo. 6:14, 18, 22; Yoh. 8:32) Tetyo, Yesu mofunishisha etang’a ntima kuti afwe imfwa yoŵaŵa ngako monga niyamene iyo kuti apulumushe miyoyo yasu.—Yoh. 10:17, 18.
13. Kansi Yesu echifwa imfwa yotyani, ndipo imfwa yake yutiphunzisa chinji vokhuza Yehova Mulungu? (Onanisoti chithunzi.)
13 Muyake wapantima, emupeleka Yesu kuli adani ŵake. Ndipo adani ŵake amene awo emukata, kumunyoza, komasoti kumuyopejela vinthu valiyechite. Posilijila pake, masodja emukhomelela pachimuti ndipo echifwa. Yesu epilila mokhulupilika mavuto onse ŵechikumana nawo. Koma olo n’tetyo, Yehova niye enzunzika ngako na chisoni penzewona mavuto onse ŵechikumana nawo Mwana wake. Yehova enze na mphamvu komasoti nzelu zotetezela Mwana wake ku mavuto, koma aliye muteteze. Ndaŵa yanji? Kansi n’chinji chechitisha Tata wachikondi monga niwamene uyu kuti achite vinthu mwanjila yamene iyi? Kuyankha mwachidule, ni chikondi. Yesu enena kuti: “Mulungu ekonda ngako chalo mwakuti epeleka Mwana wake wovyalika yeka, kuti aliyense womukhulupilila osati awonongewe koma ankhale na moyo wosasila.”—Yoh. 3:16.
Yehova etamana ngako na chisoni pechivomela kuti Mwana wake apaiwe pofuna kuti sewo timasuliwe ku uchimo komasoti imfwa (Onani ndime 13.)
14. Kansi nsembe ya Yesu yukuphunzisani chinji?
14 Nsembe ya Yesu, ni umboni ukulu ngako wamene uwonesha kuti Yehova oŵakonda ngako ŵana ŵa Adamu na Hava amene aliye ungwilo. Nsembe yamene iyi yuwonesha kuti Yehova okukondani ngako mwewo. Yove epeleka Mwana wake wokondewa monga nsembe, komasoti epilila chisoni chikulu ngako kuti akupulumusheni ku uchimo na imfwa. (1 Yoh. 4:9, 10) Kulaŵila chendi, Mulungu ofuna kuyavya munthu aliyense pankhondo yolimbana na uchimo—chifukwa ofuna kuti tipambane!
15. Kansi tufunikila kuchita tyani kuti tipindule na nsembe ya dipo ya Yesu yechipeleka Mulungu?
15 Mphaso ya dipo yechipeleka Mulungu kupitila muli Mwana wake wovyalika yeka, niye ichitisha kuti vinkhale vokwanishika kuti Mulungu akotikhululukila machimo ŵasu. Koma kuti Mulungu atikhululukile machimo ŵasu, tufunikila kuchitapo kanthu. Kansi tingachite tyani? Yankho tuifwana pa mawu ŵechilaŵila Yohani m’Batizi komasoti Yesu Khilisitu amene onena kuti: “Lapani, chifukwa Ufumu wakululu wavwendela.” (Mat. 3:1, 2; 4:17) Chifukwa chakuti tiliye ungwilo, tufunikila kulapa kuti tipitilije kutumikila Yehova komasoti kunkhala naye paushamwali uweme. Koma kansi kulapa kupamikijapo chinji, ndipo kungatiyavye tyani kuti tikochita vinthu vakukondwela navo Yehova olo kuti nise ochimwa? Nkhani yokonkhapo izapeleke yankho.
NYIMBO N.° 18 Tutembeja chifukwa cha dipo
a KUMVWIKISHA LUWEME: M’Baibolo, mawu akuti “uchimo”, angatanthauze kuchita vinthu viipa vakulesha Yehova, olo kusachita vinthu viweme vakufuna Yehova. Koma mawu akuti “uchimo” angatanthauzesoti uchimo wetilondela kuli Adamu. Uchimo wetilondela kuli Adamu niye uchitisha kuti ŵanthu onse akokufwa.