November

Mo re berekela Jehova, go na le dilo tsa go tlala tso re nyoko tlang re di kraya tsa gore Adamo le Efa ba yye ba fo di lesetsa di ya le noka, tsa go tshwana le go kraya lephelo la go ya go yye. Adamo le Efa ba šitegiye go berekela Jehova ka taba la gore ke mo ba sa nape ba resa mo ba re baa mo nyaka. Mara, Jehova o yye a fo ba lesetsa gore ba phele, ba be le bana ke mokane ba tigudisele bona ka mokgo bona ba nyakang. Tso Adamo le Efa ba di makiyeng tsa go nyaka go tilawola di napiye di šupetsa gore ke tsa botlayela. Morwayi wa bona ye mogolo o yye a bolaya monyanana a sa sinya selo, ke mokane mo nako yi kene yi ya, batho ba go kwana le dibhakela le ba go tipona ba yye ba yeketsega ho lefaseng. (Gen. 4:8; 6:11-13) Mara Jehova ke mo a na le mokgwa wage wa go phonisa bana ka mokana ga bona ba Adamo le Efa bo ba nyakang go mmerekela. (Joh. 6:38-40, 57) Mo o kene o tšhuta ka Jehova ke mokane o di bona gabutši gore wa re nyaka fote o re lefisela pelo, le wene o nyoko kwa gore o mo nyaka ka matla. O nyoko karakara ka matla gore o kganele kgole le mekgwa ya go tshwana le yela ya Adamo le Efa ke mokane wa tineyela ga Jehova. w19.03 2 ¶3; 4 ¶9

Mo o nyaka go tšhuta go kwelana go baba, leketsa go kwisisa seyemo so ba mutši wago ba fetang ga sona le so magageru ka ho phutegong ba fetang ga sona. Leketsa go bolabola le bo ba sa ga golang ka ho phutegong le ba gore a ba titsose, bokokwane le bo ba gore ba kgwele ke magagabo. O ka ba butsisa gore ba tsoga byang. O sa ba tshware molomo mo ba go hlayisela gore ba tikwa byang. Maka gore ba di bone gore o kwisisa seyemo sa bona. Ba thuše ka mokgo o ka kgonang. Mo re maka ka mokgonone, re ko ba re šupetsa gore re nyakanana tsa mannete. (1 Joh. 3:18) Di nyaka re kwisise seyemo gabutši mo re nyaka go gelepa ba bangwana. Ke ntaba? Ka taba la gore batho a ba tshwane. Ba bangwana baa tipolabolela, mara ba bangwana a ba fo bolabola ka ditaba tsa bona le ye mongwana le ye mongwana. Le mo re nyaka go ba gelepa, a di nyake re ba butsisanya diputsiso tsa go kenelela ka matla. (1 Mathes. 4:11) Le mo ba bangwana ba go botsa so se leng ho pelong, o ka kraya wene o sa bone dilo ka mokgo bona ba di bonang. Mara di nyaka o kwisise gore ke ka mokgo yene a tikwang ka gona. Di nyaka re yakgoswela go theetsela, mara re sa tabogele go bolabola.—Mat. 7:1; Jak. 1:19. w19.03 19 ¶18-19

Ayitsano le wene wa tšhoga mo o tšhomayela nnete bathong? Nagana ka monna yela ba reng ke Nehemiya. Ke mo a bereka ga kgoši ya go ba le matšhika. Nehemiya o yye a kwelela taba ya gore go na le bo ba sinyanyang mapharo le digheyiti tsa Jerusalema, taba yone yi mo kgongwetsiye ka matla. (Neh. 1:1-4) Mo kgoši yi re a hlaye gore ke ntaba a kgongwele, di ka makega gore ka mokgo a yyeng a tšhoga ka gona o yye a kwa nkare go khwešugiye se sengwana! Nehemiya o yye a rapela ka go yakgoswa ke mokane a mo fetola. Mo kgoši yi kwa tsotsone, yi leketsiye ka matla gore yi gelepe batho ba Modimo. (Neh. 2:1-8) Nagana fote le ka Jona. Mo Jehova a mo kgopela ga Jona gore a ye bolabola le batho ba hala Ninive, ke mo a tšhugiye ka matla a šinya a tšhabela ga gore a baa mo roma gona. (Jona 1:1-3) Mara Jehova o yye a mo gelepa ga Jona gore a ye a tšhomayelele batho ba Ninive. Fote mantsu ya a yyeng a ma botsa batho ba Ninive ma ba gelepiye ka matla. (Jona 3:5-10) Taba ya Nehemiya yi re tšhutisa gore di gabutši ka matla go thomisa ka go rapela mo re soko fetola. Ga Jona re tšhuta gore re ka di kgona go berekela Jehova le mo go nyarela tsa go re tshosanya ka matla. w19.01 11 ¶12

Senghana sa rune le batho ba bangwana se ka tšhentšha mo re thomisa go phela ka nnete ya Baebele, le bošaga bo ka fela. Ke ntaba? Jeso o yye a rapelela bo ba mo latelelang a re: “Maka gore nnete yago yi ba hlawole; lentsu lago ke nnete.” (Joh. 17:17) Mantsu ya gore “ba hlawole” ma ka rela gore “maka gore ba sa tshwane le ba bangwana.” Mo re yamogela nnete, a re sa tshwana le lefase ka taba la gore re hlawogiye ga lona. Batho ba ka re tseya ka mokgo mongwana mo ba bona re sa sa le ka mokgola ba re tšibang, ba tiputsisa gore anthe re kenne king. Re latelela nnete yo yi tšhutisang ke Baebele. Banghana ba rune le ba ka mo mutšing kela mašaga ba ka keketlela ku kgole le rune kela ba ganetsa so re se dumelang, le mo rune re sa di nyake tsotsone. Tsotsone a di re makatse. Jeso le yene ke mo a di tšiba gore: “Ka nnete, manaba ya motho go nyoko ba bo a dulang nabo ka mutšing.” (Mat. 10:36) Fote o ba tshepisiye gore ke ye kgolo ka matla patela yo ba nyoko yi krayang ka taba la go reka nnete. w18.11 6 ¶11

Pawulo wa lepostola ke mo a ma tseyela gedimo magegeru ya banna le basadi, o šupetsiye tsotsone ka mokgo ne a bolabola nabo. Ka moka matšatši mo a rapela a ntoši, ke mo a leboga Modimo gore o mo neyye batho ba go tshwana nabo. Fote o yye a ba botsa tsotsone le nakwela a ba ngwalela marifi. Ga 15 ya ditemanyana tsa mathomo tsa Maroma 16, Pawulo o hlayye 27 ya Makreste ka mabitso. Pawulo o yye a gopola gabutši gore Phriska le Akhwila ba yye ba ‘re ba ka mpane ba kupiwa le melala’ ka taba lage, a boya a hlaya gore Foyibhi o yye a ‘yemelela batho ba go tlala,’ le yene mong Pawulo o yye a mo yemelela. O thanakiye magageru yawa ya banna le basadi ka taba la gore mo ba maka dilo, ke mo ba šupetsa gore di ro ba baba. (Mrm. 16:1-15) Pawulo ke mo a di tšiba gabutši tsa gore magagabo a ma yenela gabutši, mara o yye a bolabola ka dilo tsa go bafala tso ba di makiyeng. O fo nagana nje gore magageru yawa ma yye ma tikwa ma tiyelele byang mo ma kwa go badiwa lengwalo lowa la Pawulo ka phutegong! Sosone se makiye gore senghana sa bona le Pawulo se nape se ro tiya. Nje le wene o fela o leboga batho ba ka phutegong ya genu ka dilo tsa go bafala tso ba di makang kela tso ba di hlayang? w19.02 16 ¶8-9

Ayitsano di nyaka re be batho ba gore ba yenele gore re thogo tshepega? Phela rune beng mo re tilebelele, re di bona gabutši gore re gayela ga tsa go tlala. Di nyaka re sa hlagasele ka taba la gore Jehova aa lebelele dilo tso di re šitang. Lentsu lage le re botsa gore: ‘Wene Jah, ayitsano o gona barena Jehova wa gore ke mo a ka yema mola o dulela go lebelela dilo tso di re šitang?’ (Pis. 130:3) Wa di tšiba tsa gore a ra yenela, le gore ra mo sinyela fote wa re tshwarela. (Pis. 86:5) Fote, Jehova wa di tšiba gore ga tse dingwana a re segelele, fote le ka tšatši ka lloši a ka sa nyake re maka dilo tsa gore di ya re šita. (Pis. 103:12-14) Gore malata ya Jehova ma tshepege, di nyaka ma mo nyake ga Jehova kela go mo rata. Mo re re ga Modimo re ya mo nyaka fote re mo ngangarele ga Papa yewa wa rune wa legedimong, di ra gore re make dilo tsa go felegelela, tsa go philega kela tsa go yenela. Mo ga Jehova re ka mo nyaka ka mokgonone le mo go ka ba le tsa go re ghula, tsotsone di nyoko ba di šupetsa gore ra tshepega. (1 Dikor. 28:9; Mat. 22:37) Re ya di tšiba tsa gore Jehova o re beyele melawo ya go loka, byalo tso rune re hlupegang ka tsona ka matla ke go jabodisa Papa wa rune wa legedimong. Ka gore re mo nyaka ka matla, re beya yene ka ku mahlong gore re thogo segelela dipheto tsa gabutši fote tsotsone di šupetsa gore re ya tshepega. w19.02 3 ¶4-5

Tumelo ya rune ya tiyelela mo re bona dilo di gahlana ka taba la gore re maka dilo gabutši. (Jak. 1:2, 3) Re kwa re jabola ka taba la gore Jehova aa kwe a tšeba mo a re ke rune bana bage fote sosone se napa se maka gore re ngangarele ga tso di mo jabodisang. (Diy. 27:11) Se sengwana le se sengwana so se leketsang go re phiriketsa se ya re šiginya, gore di thogo šupetsa gore a ra tšhela loto ka lloši ka ho ga Jehova. (Pis. 119:113) Mara, re šupetsa gore ga Jehova re mo nyaka ka dipelo tsa rune ka mokana ga tsona, fote re tiputsiye gore re nyoko theetsela melawo yage le go maka tso yene a di nyakang ka dipelo tsa go felegelela. (1 Mag. 8:61) Ayitsano di ka makega gore re tšwe pateng? Eya; phela a ra yenela gabutši ho mmeleng. Mo re ka tšhoga re tšwile pateng, o sa lebale gore le ga Kgoši Hezekiya di makegiye. Le yene o di makiye tsa go tšwa pateng. Mara o yye a tisola ke mokane a ya mahlong a berekela Jehova “ka pelo ya go felegelela.” (Jes. 38:3-6; 2 Dikor. 29:1, 2; 32:25, 26) Byalo, tla re sa kganeleneng thina le Sathane, a ka šinya a re fokola. Tlaneneng re fo rapela gore Modimo a re neye “pelo ya gore ya theetsela fote” re nyoko dula re tshepegela Jehova.—1 Mag. 3:9; Pis 139:23, 24. w19.01 18-19 ¶17-18

Di thuša le rune mo re fetola mogahlanong. (Jes. 48:17) Byang? Sa mathomo, mo re tiputsiye gore re nyaka go segela re fetola mogahlanong, sosone se nyoko re tšhofa gore re lukiselele gabutši. Mo re lukiselela gabutši, re thogo kwisisa Lentsu la Modimo, a re wukuli ka gedimo. Fote mo re kwisisa dilo gabutši, re thogo berekisa dilo tso re di tšhutang. Sa bobedi, re nyoko kwa re natefela ke mogahlano ka taba la gore le rune re ya fetola. Sa boraro, ka taba la gore a di lola go fetola mogahlanong, mara mo re fetodiye le mo go ka ba go le botala, a re lebale tso re yyeng ra di fetola. Fote, re jabodisa Jehova mo re bolabola ka tumelo ya rune. A re kamake gore Jehova wa re theetsela fote o jabola ka matla mo re garagara gore re thogo fetola megahlanong. (Mal. 3:16) Wa re rufa go šupetsa gore wa leboga mo re leketsa ka matla go maka so a se nyakang. (Mal. 3:10) Di napa di ba lekgwaying gore ke ntaba re fetola megahlanong. w19.01 8 ¶3; 9-10 ¶7-9

Jehova o ma tseyela hlogong ka matla malata yage. Aa fo re neya melawo ya go sa fele, mara o re tšhutisa molawo wa gore re nyakanane, molawo wone o re tšhutisa wona a kene a re lefisela pelo. O nyaka gore re phele ka ditšhiko tsage, fote o nyaka gore re nyenye go maka tsa go befa. Re ka tšhuta ga tso Jeso ke mo a di Tšhutisa ku Thabeng, ka taba la gore di bolabola ka dilo tso di ka makang gore motho a feleletse a maka tsa go befa. (Mat. 5:27, 28) Ku lefaseng la nyuwane, Kreste o nyoko fo ya mahlong a re tšhutisa gore re thogo gonyolla sa go befa ga sa go bafala, ka taba la gore go nyoko ba go le yene Kgoši ya Mmušo wa Modimo. (Maheb. 1:9) O nyoko maka gore re boyele re yenele gabutši mmeleng le monaganong. O fo nagana nje, o ka sa sa di tšiba gore mo ba bolabola ka sebe ba ra ying kela le go tlela ke dilo tsa go baba tso se di leyang. Ke mokane mafelelong, o nyoko tikwisa ka ‘go lokologa ga mannete’ ga gore o go tshepisiye ke Jehova. (Mrm. 8:21) Nnete ke gore le ga lefase la nyuwane go lokologa go nyoko ba le mokgero. Di ya kwala gore mo re yekisela Modimo, re ba nyaka ka matla magageru, le rune re ko tikweng gore re lokologa tsa mannete.—1 Joh. 4:7, 8. w18.12 23 ¶19-20

Monna wa Leisrayele ke mo a ka mo hlala mosadi wage “mo a ka kraya gore mosadi yene o makiye se sengwana sa go solega.” Molawo wone a wa hlatolla gore ke selo sa mošaga mang “sa go solega.” Di šupa nkare ke mo go le selo sa go tšebisa kela se segolo, go se selonyana sa go kgana. (Dot. 23:14) Sa go kwisa go baba ke gore nakwela Jeso a sa le ho lefaseng, Majuda ya go tlala ke mo ma fo hlala “ga selonyana sa mohlobo wo mongwana le wo mongwana.” (Mat. 19:3) Rune a re nyake go tshwana nabo. Moporofeta Maleyaki o hlayye gore Modimo o re king ka taba yowa ya go hlala. O bolabodiye tsotsone nakwela go sa tlele taba ya gore monna ke mo a fo maka mathayithayi ya gore a hlale ‘mosadi ye a nyalanneng naye go sa le lethari’ ke mokane a nyala wa gore o sa tikwelela, wa gore ke wa setšhaba sa go sa dumele ga Modimo. Maleyaki o ngwadiye tso Modimo a di naganang ka taba yone, a re: “Tsa go hlalana ke di hloyye.” (Mal. 2:14-16) Mantsu yanane ma sipidisana gabutši le so Lentsu la Modimo le se bolabolang ka lenyalo la mathomo, mo le re: “[Monna] o nyoko mamarela mosadi wage, ke mokane bona go nyoko ba nama ka yyoši.” (Gen. 2:24) Jeso le yene ke mo a šupetsa gore o tseyela lenyalo gedimo go tshwana le Papage, o yitseri: “So Modimo a se swineleleng lejokong, go sa be le motho ye a se tlemollang.”—Mat. 19:6. w18.12 11 ¶7-8

Mayemo ya magageru ya mangwana ya banna le ya basadi maa dumela gore ba rore. Ba fo tshwana le moporofeta Jesaya. Mo a fetola putsiso ya Jehova ya gore, “Nko roma mang, re ko yela ke mang?” O yitseri mo a fetola: “Ke nna yewa! Nrome!” (Jes. 6:8) Ayitsano wa nabela gore mo seyemo se dumela, le wene o fetole ka mokgonone mo go nyakega tse dingwana ga tso tsa Modimo? Mo ga taba ya go tšhomayela le go tšhutisa batho, Jeso o yitseri: “Byalo, kgopelaneng mong wa mašemo gore a romele dibereki di tl’le buneng ho gage.” (Mat. 9:38) Ayitsano o ka ye tšhomayela mo go gayelang Dihlatse, nakwenngwana o phayona gona? Kela o ka gelepa ye mongwana go maka tsotsone? Magageru ya go tlala ma kwa nkare re ko ba re šupetsa gore ga Modimo le bayagelani re ba nyaka ka matla mo re ka fo phayona ga dipoleke kela ditšhomo tsa gore go gayela dihlatse fote go nyakega tsa go tlala. Ayitsano di gona tso o ka di makang gore o yeketse mmereko wo o wo makelang Modimo? O nyoko jabola ka matla mo o maka tsotsone. w18.08 27 ¶14-15

Re di tšiba gabutši gore Diebangedi di re Jehova o nagana ying ga dilo tsa majabajaba. Modimo o yye a tihlawolela babelegi ba ho lefaseng ba gore ke mo a nyaka ba gudise Morwayi wage—monna yewa le mosadi wage ke mo go le batho ba gore a ba na dilo tsa majabajaba. (Lef. 12:8; Luk. 2:24) Nakwela Jeso a belegiwa, Mariya “o yye a mmeya ga gore ba tšhela tsa go ja tsa dikgomo kela diphoolwane tse dingwana, ka taba la gore ke mo ba sa kraya kamara ya go yetsela.” (Luk. 2:7) Mola Jehova a di nyakiye, ke mo a ka berekisa mekgwa ya go tlala gore mo Morwayi wage a belegiwa, a kraye ga go yetsela ga gore go kawone. Yene ke mo a fo tinyakela gore Jeso a golele ga mutši wa gore o tlalele ka matla ga tso tsa Modimo. Taba yowa ya go tšwa ka Baebeleng yi napa yi re šupetsa gabutši gore Jehova o di tseya byang dilo tsa majabajaba. Babelegi kela batswadi ba bangwana baa karakara ba nyaka gore bana ba bona ba hlekeletse dilo tsa majabajaba, ba re a go na taba le mo bana bone ba sa tlalele ga tso tsa Modimo. Gabutšibutši, Jehova o tseya tso tsage go le tsona tse dikgolo ka matla. Nje le wene o tshwana le Jehova ka mokgo o tseyang dilo? Tso o di makang di šupetsa ying? w18.11 24 ¶7-8

Modimo o nyaka gore re jabole ka taba la gore ke yene Tšhiko ya mojabolo, fote ke yene ga go tlala a makang gore re jabole. (Dot. 12:7; Mmo. 3:12, 13) Mara nnete barena ke gore ga lefase la lekgono a go lola gore motho a jabole. Ke ntaba? Dinako tsa go baba—tsa go tshwana le ho lešaga la rune le hlokofele kela le ntshiwwe ka ho phutegong kela mo o hlalana le motho kela o felela ke mmereko—di ka re kgongwetsa. Go ngwapanana ka mutšing le go sa bolabodisane gabutši di ka maka gore re sa jabole fote re sa phidisane tsona. Go tshwariwa go baba ke bo re berekang nabo kela bo re kenang nabo sekolo, go hlorisiwa ka taba la so re se dumelang, kela go tshwariwa ra ya jele go ka maka gore re dule re sa jabola. Re ka tikwa ka mokgonone mo re ka thomisa go lwala, re na le malwele ya go sa fole kela go gatelelega. Mara Jeso Kreste, yene “Kgoši ka yyoši le ya go jabola,” wa jabola mo a kgomoletsa batho le go maka gore ba jabole. (1 Thim. 6:15; Mat. 11:28-30) Nakwela Jeso a Tšhutisa ku Thabeng, o bolabodiye ka dilo tsa go tlalanyana tsa go maka gore motho a jabole le mo go kene go thathafa ho lefaseng la Sathane. w18.09 17-18 ¶1-3

Motho gore a lahle ditšo le dilo tse dingwana tsa gore a di yelane le Mangwalo gore re thogo reka nnete, a go fo ba moroba. (Diy. 23:23) Go ka fo ba lola ga ba bangwana gore ba theetsele mo Mangwalo ma re ba lahle dilo tsone, ba bangwana ba ka kamaka ka taba la gore ba tšhaba bo ba dulang nabo ka mutšing kela mašaga, bo ba berekang nabo le banghana. Di ka napa di roba ka matla mo o kraya ba go tšhofa gore o phase badimo. Mo re bona ba bangwana ba šišimala ke mokane ba tšhentšha maphelelo, le rune re ka di bona gore di ya kgonega. Makreste ya Efeso ya gore ne ma maka tsa masalamose ma makiye byang gore ma lahle dilo tsa go sa yelane le Mangwalo ke mokane ma reka nnete? Baebele yi re: “Ba yye ba kgobeketsa dipuku tsa bona ke mokane ba di tšhuba, batho ka moka ba lebelele. Ke mokane ba balela gore di ka kala bokaye, ba kraya gore di kala 50 000 ya dipetlo tsa siliva.” (Meber. 19:19, 20) Ke mo go se lola gore Makreste yawa ya go tshepega ma lahle dilo tsowa, mara ma yye ma rufiwa ka matla. w18.11 7 ¶15-16

Mo Maisrayele ma fetsa go tshela Jorodane, Jošuwa o yye a gahlana le monna ye mongwana a tshwere sabola. Ke mo go le “kgoši ya masole ya Jehova,” wa gore ke mo a tikemisele go lwela batho ba Modimo. (Još. 5:13-15) Morongwa yene wa go yeta mahlong o yye a botsa Jošuwa gore a make ying gore a thogo hlula mutši wa Jeriko. Mathomisong ke mo di šupa nkare tso ba mmotsang gore a di make di ka sa bereke. Mo re beyisa, Jehova o yitseri banna ka mokana ga bona ba bollwe, sosone ke mo se nyoko maka gore ba fetse matšatši ya go tlala ba sa kgone go lwa. (Gen. 34:24, 25; Još. 5:2) Di šupa nkare masole yane ya Maisrayele ma yye ma tiputsisa gore mo ma ka fo kutulugela ke manaba, ayitsano ma ko di kgoneng go lwela mitši ya wona. Mara ka go yakgoswa, go yye gwa nyarela ditaba tsa gore ‘go kwadiwe digheyiti tsa Jerikho ka taba la Maisrayele.’ (Još. 6:1) Nje a baa napa ba mo tshepa ga Modimo mo ba bona go makega taba ya mohlobo wowa ya go fo tšhentšha ga dilo ba sa nagana? w18.10 23 ¶5-7

Re ka maka byang gore re tinyanafatse go tshwana le Pawulo? Sa mathomo ke gore re sa nape re yemela batho gore ba re thanake ka taba la dilo tso re di segeleleng ka matšhika ya go tšwa ga Jehova. Ye mongwana le ye mongwana o ko ba a maka gabutši mo a tiputsisa gore: ‘Batho bo ke ba tšhomayelelang ke ba tseya byang? Ayitsano nka fo ba ke šupa nkare le nna ke hlawola-hlawola mohlobo wo mongwana wa batho bo ba dulang ga poleke ya rune?’ Dihlatse tsa Jehova lefaseng ka mokana ga lona di maka taba ye nngwana ya go bafala ka matla ya go hlokotša ho tšhomong ya bona go bona gore nje a ba sa le šiyo ba gore ba ka jabolela ditaba tsowa tsa go bafala. Go gongwana ba šinya ba tšhuta le mmolabolo le ditšo tsa batho ba gore ba tseyediwa fase hone setšhabeng. Mo bo go leng Dihlatse ba segela ga batho ba mošaga wonone, a di nyake ba kakola magetla ba kwa nkare bona ke bona. Mara baa karakara gore ba kwisise motho ye mongwana le ye mongwana ke mokane mo ba thomisa go mmotsa se sengwana, selo sone ga motho yene se segela se mo tikisa pelo. w18.09 5 ¶9, 11

Maroma ma yye ma mmolaya ga Judase. Le mo re sa bolabole ka Judase le masole ya go ba le tšhinghi, Majuda ya mangwana ke mo ma litiye ka mahlo ya makhubedu gore go segele Mesiya wa dipolotiki. Ke mo ba tseya gore mo Mesiya a segela, o nyoko tla a hlabolla le go ntsha setšhaba sa bona bobhantiting bya Roma. (Luk. 2:38; 3:15) Ba go tlala ke mo ba tshepa gore mo Mesiya a leya mmušo ho lefaseng, o nyoko o beya ku Isirayele. Ke mo ba tseya gore tsotsone di nyoko maka gore dimiliyone tsa Majuda bo ke mo ba tlalaganne le naga, ba sologe ba boyele gaye. Gopola gore Johane wa go Kolobetsa o yye a butsisa Jeso gore: “Ayitsano go tla wene kela re sa yemele ye mongwana?” (Mat. 11:2, 3) Di ka makega gore Johane ke mo a nyaka go tšiba gore kela go sa na le ye mongwana ye a nyoko makelang Majuda tso ma di nyakang. Malata ka mabedi ya ma gahlanneng le Jeso ku pateng ya go ya Emawusi nakwela go se botala a tsugiye bakgung, le bona ke mo go na le dilo tso ke mo ba di yemele ka Mesiya. (Luk. 24:21) A di ya tseya nako, malata ya Jeso ma mmutsisa gore: “Morena, ayitsano o šele o leyela Israyele mmušo gana byalo?”—Meber. 1:6. w18.06 4 ¶3-4

Di nyaka re sa yakgoswe re tshepa ditaba tso re di kwelelang ka batho ba Jehova. O sa lebale gore Sathane o lebela malata ya Modimo ya go tshepega. (Kut. 12:10) Jeso le yene o hlayye gore bo ba go re phigisa ba nyoko “bolabola matsaka ka mokana ga wona ya mohlobohlobo ba hlaya dilo tsa go befa” ka rune. (Mat. 5:11) Mo taba yone re ka fo yi tseyela hlogong, re ka sa tšhoge ho re kwa ba bolabolela batho ba Jehova matsaka. Ayitsano le wene ke wene mohlobo wela wa go kwana natso tsa go romela banghana bago le bo o ba tšibang molayetsa ka e-mail? Mo nkare go ka mokg’onone, di ra gore mo o bona taba ye nngwana ya go jabodisa ho ditabeng kela o kwelela tse dingwana, o ka fo kwa o nabela gore ba di kwe ka wene la mathomo. Mara, yemanyana mo o soko bane o romela ye mongwana molayetsa wone, o tiputsise gore: ‘Mara nje taba yowa ke nyoko di sabalatsang ke nnete? Nje ke tšiba ditaba ka mokana ga tsona?’ Mo nkare a o di tšibi gabutši, o ka fo kraya o šele o butsiye magageru matsaka. Mo o kwa lekwalo lago le go teya, napa o pota mola ga gore sola, o sa romele. w18.08 3 ¶3; 4 ¶6-7

Jeso o nyaka gore re jabole ka taba la go sa konane. Batho ba go tlala baa jabola mo ba neyiwa se sengwana. Nnete ke gore a yi ka moka bo ba jabolelang so re ba makelang sona, mara tšatši lo ba nyoko thomisang go šupetsa gore baa leboga, re ko di boneng le rune. Byalo wene o sa lesetse go ba neya, le ho ba šupa ba leboga kela ba sa yi keni yago. O ka sa tšibi, nakwenngwana sosone ka ssoši o se makang, o ka fo bona se gelepa go gongwana. Batho ba go sa konane tsa mannete ho ba neya motho selo, a ba makele gore motho yene ka motshwana a neye bona. Jeso mo a šinya a tšhutisa ka taba yowa ke mo a bolabola taba ke yowa: “Mo o maka phathi, mema ba go hlopega, digole, ba go popela mahlo; ke mokane o nyoko jabola, ka taba la gore sa go go patela ka sona a ba naso.” (Luk. 14:13, 14) Motho ye mongwana wa go ngwala puku ya Baebele o yitseri: “Motho wa go sa konane o nyoko rufiwa.” Ye mongwana o yitseri: “Go jabola ye a šupetsang ba bangwana gore o ba tseyela gedimo.” (Diy. 22:9; Pis. 41:1) Nnete di nyaka re neye batho ba bangwana ka taba la gore sosone se maka gore re jabole. w18.08 21-22 ¶15-16

Go tšiba ditaba ka mokana ga tsona le go di nyakolla gabutši a go lola lekgono, ka taba la gore tsa go tikela ku di tlele fote le rune a ra felegelela gabutši ho mmeleng. Re ka gelepang king ga taba yowa ye kgolo? Di nyaka re tšibe ditšhiko tsa Baebele re boye re di berekise. Tšhiko ye nngwana yi re mo motho a fo yakgoswela go fetola taba a soko bane a yi kwa gabutši, ke setlayela fote wa tipoyila. (Diy. 18:13) Tšhiko ye nngwana ya Baebele yi re gopotsa gore re sa fo tshepa lentsu le lengwana le le lengwana, di nyaka re butsise. (Diy. 14:15) Sa mafelelo ke gore re pasope gore re sa titshepe, le mo go ka fo ba go le botala re le Makreste. Ditšhiko tsa Baebele di nyoko re gelepa ho le rune re ka fo berekisa ditaba tsa gore ke nnete gore re thogo tseya dipheto tsa gabutši, tsa go šupetsa gore re hlalefiye. w18.08 7 ¶19

Mo re kolobetsiwa ka meetši, re maka gore taba yowa yi tšibege fote re šupetsa batho gore Jehova ke yene a re lawolang fote re mmerekela re sa tšhofe ke motho. Jeso le yene o makiye tsotsone nakwela a kolobetsiwa, o bolabodiye a botsa Jehova gore: “Ke nabela go maka tso di nyakang ke wene, Modimo waka.” (Pis. 40:7, 8) Jehova o yitseri king mo Jeso a kolobetsiwa? Baebele yi re: “Mo Jeso a šele a kolobetsiwwe, ka nako yonone a yinuga ka ku meetšing; ye lune! magedimo ma yye ma bulega, ke mokane a bona moya wa Modimo o phologa o tla mo gage go tshwana le leba. Lebelela! Ke mokane gwa kwala lentsu ku magedimong le re: ‘Yewa ke Morwayi waka, ke mo nyaka ka matla, Ke mo tseyela gedimo.’” (Mat. 3:16, 17) Le mo yi le gore Jeso ke mo a na a tšiba ke Papage wa ku legedimong, Jehova ke mo a jabola ka matla mo a bona Morwayi wage a di nyaka go mmerekela a sa tšhofe ke motho. Le ho ga rune, Jehova o jabola ka matla mo re tineyela gage fote o nyoko re rufa a sa fetse.—Pis. 149:4. w18.07 23 ¶4-5

Mo Moše a šala a berekisa lentsu la gore “re,” di šupa nkare ke mo a ra yene le Arone. Mantsu yane ya Moše ma šupetsiye gabutši gore ke mo a tseyela Jehova fase ka matla, Yene ye a makiyeng mohlolo wone. Pisalema 106:32, 33 yi napa yi kgahlisela gore taba yone yi ka fo ba ka mokg’onone mo yi re: “Ba yye ba Mo lebela ku meetšing ya Meriba, ke mokane dilo tsa sa sepelele Moše gabutši ka taba la bona. Ba mo silikisiye ka matla, a šinya a ntsha tsa go ranya ka ho molomong wage.” (Dip. 27:14) A go na taba gore o makiye king, mara tso Moše a di makiyeng di makiye gore go sa thanakiwi Jehova. Mo Jehova a bolabola le Moše le Arone, o yitseri: “Lune ka babedi ga lune a le ya theetsela tso di hlayyeng ke nna.” (Dip. 20:24) Yii, ke mo ba sinnye ka matla! Ku nthago, Jehova o yye a ganela Maisrayele go kena Kanana ka taba la gore ke mo ba kokola. (Dip. 14:26-30, 34) Jehova o makiye gabutši fote le mo a yahlola Moše o mo makiye tsetsela tsa go tshwana nabo ka taba la tso a di makiyeng. Ba mo ganele go kena Lefaseng lo le Tshepisiwweng. w18.07 14 ¶9, 12; 15 ¶13

Mo nkare o maka dilo mara di thonoga mogageru wa gore lekwalo lage a le bereke go tshwana le lago, nje o ka lesetsa go maka dilo tsone le mo wene di go jabodisa? Ka nnete o ka di lesetsa. Magageru ba bangwana nakwela ba soko tšhuta dinnete, ke mo ba kwana ka matla le lepotlela, mara gana byalo ba tiputsiye gore ba nyoko kganela kgole le mokgete. Mo ga rune aa šiyo wa gore a ka jabola mo a ka maka gore mogageru a boyele ga tsetsela a di lesetsiyeng botala tsa gore di kwaletsa ka matla! (1 Makor. 6:9, 10) Byalo, mo o memme mogageru, o ko ba o sa make tsona mo o mo gapeletsa gore a nwe mokgete le mo yene a sa nyake. Thimothi o yye a bollwa mo a sa le gana ku ga bo-20 ya mongwaga, le mo go maka tsotsone go baba, ka taba la gore ke mo a sa nyake go kwatisa Majuda ya ne a ma tšhomayelela. Ke mo a bona dilo go fo tshwana le mopostola Pawulo. (Meber. 16:3; 1 Makor. 9:19-23) Ayitsano le wene wa nabela go maka dilo tse dingwana go tshwana le Thimothi, ka taba la gore o sa nyake go kwisa ba bangwana go baba? w18.06 18-19 ¶12-13

Ke Jehova a gogang batho bo ba tlang ba tl’le gahlanela le rune ka ho diphutegong tsa rune fote ke yene a ba dumeleleng gore ba kene, o gelepa batho ba dipelo tsa go tshepega gore ba nabele go mo rapela ka nnete. (Joh. 6:44) Mo go se botala o gahlanne le motho wa gore aa gahlanele le rune, ayitsano di gona tso o ka di bolabolang ka motho yene? Nakwenngwana o fo ba o tšiba lebitso lage le go mmona mahlong, mara a di rele gore o mo tšiba tšibi-tšibi. Mara mo o gahlana le motho wa gore ga Jehova wa mo tšiba fote wa mo nyaka, a go be ka mokgonone. Le mo a ka ba a gudisiwwe byang, go le wa mohlobo mang, a tšwa ga setšo kela ga poleke yifing, go na le tsa go tlala tsa gore wa di tšiba ka motho yene fote le yene o tšiba tsa go tlala ka wene. Mo re beyisa, o yakgoswa o mo tshwara ka “mmolabolo” gore wene le yene le ya tshwana, ka gore le bolabola “mmolabolo wa go yela” wa mannete. Ka babedi ga lune le dumela dilo tsa go tshwana ka taba la gore le rapela Modimo ka wwoši, le latelela melawo ya go tshwana fote le tshepela ga tso re nyoko di krayang ku mahlong. Dilo tsone ke tsona tse dikgolokgolo tsa gore mo motho a di tšiba ka motho ye mongwana, o napa a mo tshepa ka matla. Di maka le gore re be le senghana sa gabutši le batho ba bangwana. w18.12 21 ¶9-10

Kreste o yye a maka gore mogoba wa go lawola o fetse ka gore Makreste ya gore a yi wona Majuda a di nyake gore ma bollwe. (Meber. 15:19, 20) Mara Majuda ya go tlala ma yye ma fo ba ma kene ma bolotsa bana ba wona le mo ba kwile sepheto sone. Mara re ka tiputsisa gore, ‘Ke ntaba Jeso a f’lo lesetsa taba yone yi lekaleka ka nako ya go lefa ka mokgonowa mara likgu lage le tseyele Molawo wa Moše mmereko?’ (Makol. 2:13, 14) Ga ba bangwana, di tseya nako gore ba kwisise dilo mo di beyiwa ka mokgwa wo mongwana wa nyuwane. Makreste ya Majuda ke mo ma nyaka nako gore ba thogo wolola ka mokgo ba kwisisang dilo. (Joh. 16:12) Ba bangwana ke mo di ba roba go dumela gore go bollwa a go sa tseyiwa go le setwaba sa gore motho o na le senghana sa go hlawolega le Modimo. (Gen. 17:9-12) Ba bangwana, ke mo ba tšhaba gore ba nyoko hlopegisiwa, ba tšhaba go thuletsa gore bona ba yemme kaye mo ba na le Majuda ya mangwana. (Magal. 6:12) Mara, mo bo kene bo sa, Kreste o yye a ba yetetsa a berekisa mangwalo ya ma ngwadiyeng ke Pawulo.—Mrm. 2:28, 29; Magal. 3:23-25. w18.10 24-25 ¶10-12

Mo go šele go fifele, Kheyifase o yye a romela masole gore ma tshware Jeso. Jeso ke mo a di bonne botala gore ba nyaka go mo maka tsotsone tsa go tšebisa, ke mokane mo ba šele ba fetsiye go ja tsa go ja tsa mafelelo le mapostola yage, o yye a ba botsa gore ba tle le disabola. Disabola ka dipedi ne di lekanele gore di ba tšhutise taba ye kgolo. (Luk. 22:36-38) Mo go šele go le bošego, Petro o yye a kwaletsa ye mongwana gana hone mogobeng ka sabola. Yene ke mo a kwatisiye ke gore ba maka Jeso swele mo ba mo tshwara go le bošego. (Joh. 18:10) Mara Jeso o yitseri ga Petro: “Yi busetse nthago sabola yone yago, ka taba la gore bo ba tseyang disabola, ba nyoko bolayiwa ka sabola.” (Mat. 26:52, 53) Jeso o ba tšhutisiye taba ye kgolo ka matla ya gore ne yi yelana le yo a yi rapeleleng mo go thoma go fifala ka letšatši lone—ya gore a di nyake ba kenela tsa lefase lo. (Joh. 17:16) Go lwela gore dilo di loke a yi mmereko wa rune, re di šiyela Modimo. Gabutšibutši, rune re dula re bebiye fote re le selo ka ssoši. Mo Jehova a lebelele ka mokg’o lefase la rune le dulang le lwa ka gona, o jabola ka matla mo a bona batho bage ba kwana.—Zef. 3:17. w18.06 7 ¶13-14, 16

Sathane aa berekisi selobo fela, o leketsa go re tšoka mo a kene a re gogeyisa go baba gore re šinye re jikela Jehova. Ka nako tse dingwana o fo berekisa memmušo gore yi re rakele go tšhomayela. Kela a ka maka gore bo re kenang nabo sekolo le bo re berekang nabo ba poyile taba ya rune ya go titshwara ka mokg’o Baebele yi bolabolang. (1 Pet. 4:4) Fote aa tshwate go fo maka gore mašaga ya rune ma re rakele go ya mogahlanong. (Mat. 10:36) Re ka maka ying mara mo re gahlana le tsotsone? Sa mathomothomo di nyaka re di tšibe gore go hlopegisiwa ke ga rune—Sathane a ka sa re lese gana byalo, o ntweng ye kgolo. (Kut. 2:10) Byalo di nyaka gore rune re tigopotse gore gale ke ntaba go makega dilo tsowa—akere Sathane o re rune ga Jehova re mo nyaka fela mo go tematema. O re mo re ka fo manyega ka go nyananyana, re nyoko mo lahla ga Modimo. (Job. 1:9-11; 2:4, 5) Sa mafelelo ke go fore re tikokotlele ka Jehova gore a re neye matšhika ya go lwa le taba yo. O sa lebale gore a ka sa tsoge a re lahliye.—Maheb. 13:5. w18.05 26 ¶14

Le mo di šupetsa nkare ditaba tsa Mmušo tso re di bolabolang a di tikisi dipelo tsa batho, tla re sa tseyeleneng mmereko wa rune fase. Batho ba go tlala a ba re theetsele, mara ba re lebelele. Baa re bona mo re yapara gabutši, mo re titshwara gabutši le mo re tshega nabo. Mo goya-goya, ba bangwana ba segela le mo ba tiponelang gore tso di bolabodiwang ka rune, ke matsaka. Sergio le Olinda, ba gore ke mašupatsela ba re: “Re tsere nako re sa sa ya ku ne re tšhomayela gona ka taba la go lwala. Mo re boyela, bo ba gore ke mo ba fela ba feta-feta ba yye ba re butsisa gore, ‘Anthe ke mo le nyamalele kaye? Ke mo re le hlologele.’” Nnete ke gore solanka “re sa šepisi” ga taba ya go gaša pewu ya Mmušo, re nyoko ba re tšhediye letsogo ‘gore ditšhaba ka moka di tiponele.’ (Mat. 24:14) Ga dilo tsowa ka mokana ga tsona, re jabola stereka mo re tšiba gore re jabodisa Jehova, fote ba go ‘yengwa ba kene ba tiyisela’ o kwana nabo ka matla”!—Luk. 8:15. w18.05 16 ¶16-18

Go tlugisela mo batho ba sinya ke mokane ba feleletsa ba sa yenela mmeleng, Jehova o yye a tišupetsa gore ke yene Modimo wa go tiyisana. Mo tsa ku Edeni di šaša, ka nako yonone o yye a neya bana ba Adamo lešiši. Mo batho ba kwisisa tso di bolabolang ke Genesi 3:15, ba nama ba tshepa gore go se botala go nyoko fela ka “noga ya botala,” Sathane Diyabolo, le dilo tsage ka moka tsa go kekema. (Kut. 12:9; 1 Joh. 3:8) Nnowa ke mo go le lelata la Jehova fote a phela polekeng ya gore batho ba gona a ba yisi felo ka Modimo, ba go rapela Jehova ke mo go fo ba yene le ba mutši wage. Ku ga gore Nnowa ke mo a dula gona ke mo go tlele dikgohlane le batho ba go kwana le tsa maroga, fote dilo tsone ke mo di topele ka matla mo ga bona, di ka fo ba di yye tsa mo kgongwetsa. (Gen. 6:4, 5, 9, 11; Juda 6) Mara Jehova o yye a botsa Nnowa gore o nyaka go fetsa ka lefase lo la go befa le go mmotsa gore a make ying gore mutši wage o thogo phona. (Gen. 6:13-18) Jehova o tišupetsiye gabutši ga Nnowa gore ke yene Modimo wa go tiyisana. w18.04 15 ¶1-2

Go ka sa be tsona mo re ka fo tipotsa gore rune re ka sa tiyisi ba bangwana ka taba la gore rune ka hlago tsa go bolabola di ya re šita. Tsa go tiyisa ba bangwana a di nape di ro nyaka gore le dule fase—go fo ngwalangwala mo o tamisa batho ba bangwana, wa ba tiyisa ka tsotsone. Mo motho a tamisiwa mara a fo tlema mokgakga, di ka fo ba di šupetsa gore o kokona ke se sengwana, byalo mo re ka fo mo theetsela, a ka šala a kgomoletsegiye ka matla. (Jak. 1:19) Ka mokana ga rune re ka di kgona go tiyisa magageru ya ma nyakang go kgomoletsiwa. Kgoši Solomoni o ngwadiye gore: “Lentsu lo le bolabodiwang ka nako ya gabutši a yi go natefela ga lona! Go fo getsula selo sa go jabodisa go jabodisa pelo; pego ya gabutši yi maka gore mašapo ma hlohlotele.” (Diy. 15:23, 30) Pawulo o šupetsiyi le gore go yepelela koša ya Mmušo re le goteya le gona go tiyisana ka matla. (Meber. 16:25; Makol. 3:16) Go tiyisana tsa mannete go nyoko nyakega ka matla ka taba la gore letšatši la Jehova ke lowa re ya le bona “le kene le ya šutela.”—Maheb. 10:25. w18.04 23 ¶16; 24 ¶18-19