August

Jeso ke mo a fo dula a bebiye le mo ba mo hlorisa ka taba la gore ke mo a di tšiba gore o maka tso di jabodisang Papage. O yye a theetsela le mo go se lula. Jeso ke mo a mo nyaka ka matla ga Papage fote a fo dula a yetisiye mahlong tso di nyakang ke Jehova. Mo a soko bane a tla ho lefaseng, ke mo a berekisana le Modimo go le “segele.” (Diy. 8:30) Nakwela a le ho lefaseng o yye a botsa batho ka Papage. (Mat. 6:9; Joh. 5:17) Tsotsone di makiye gore Jeso a dule a jabodiye. (Joh. 4:34-36) Le rune re ka mo yekisela ga Jeso ka go theetsela Jehova “re kene re na le dilo tsa go tlala tso re ka di makang mmerekong wa Morena.” (1 Makor. 15:58) Mo re ka fo ‘tshwaragana ka matla’ ka mmereko wa go tšhomayela, re ko thogo tšiba gore re ka makamaka byang gore re hlule mathatha ya re nang nawo. (Meber. 18:5) Ga go tlala, bo re gahlanang nabo ku tšhomong ba ghulana le tsa go feta tso rune re ghulanang natso. Mara mo ba tšhuta ka Jehova ba boya ba berekisa tso ba di tšhutang, lephelo la bona le ya tšhentšha ke mokane ba feleletsa le bona ba jabola. Mo re bona tsowa ka mokana ga tsona di makega, re napa re tshepa gore Jehova o nyoko re pasopa. w19.04 10-11 ¶8-9

Batho bowa ke mo ba tikemisele ka matla gore ba lahle go berekisana le moya woneng wa madimona. Dipuku tsone tsa bona tsa masalamose ke mo di sa turi lona. Mara a sanka ba beya dipuku tsone kela go di rekisela batho ba bangwana, ba yye ba di tšhuba. Ke mo ba hlupega ka matla ka taba ya go jabodisa Jehova, ba sa šekele ka gore dipuku tsone tsa bona di kala bokaye. Mara Makreste yane ya dinako tsa mapostola re ka ma yekisela byang? Re ko ba re šupetsa gore re hlalefiye mo re ka fo lahla dilo ka mokana ga tsona tso di nang le boloyi. Mone ga tsona go kena dilo tsa go tshwana le metlemo, mekhemese le tse dingwana tsa gore batho ba titiyisa ka tsona kela ba tipasopa ka tsona, dilo tsone ka mokana ga tsona ke tsa madimona. (1 Makor. 10:21) Tinyakolle gore tso o tijabodisang ka tsona di gabutši nje. Tiputsise gore, ‘Nje tso ke tijabodisang ka tsona a di na moya wa madimona le boloyi?’ Tikemisele go tseya sepheto so se ka go gelepang gore o dule o kganela kgole le selo se sengwana le se sengwana sa gore Jehova aa se nyake. Re nyaka go leketsa ka matla gore “re dule re na le makwalo ya go yela” mahlong ga Modimo.—Meber. 24:16. w19.04 22-23 ¶10-12

Mo bagolo ba di kwelela gore motho o sinnye ka matla, go na le dilo tsa go tlala tso ba tshwaneleng go di nyakolla gore ba thogo bona gore taba yowa yi ya le lefeng. Ba hlupega ka matla ka taba ya gore lebitso la Modimo le sa thilafatsiwi. (Lef. 22:31, 32; Mat. 6:9) Fote so ba napang ba hlupega ka matla ka sona, ke seyemo sa magageru ka ho phutegong fote ba di nyaka ka matla go gelepa bo ba yyeng ba hlorisiwa. Go tokegela gana hone, mo o kraya gore ye a makiyeng molato ke wa ka ho phutegong, bagolo ba leketsa ka matla gore mo go kgonega ba mmusetse pateng. (Jak. 5: 14, 15.) Mokreste ye a nabelang go maka dilo tsa go befa ke mokane a feleletsa a di makiye, di ra gore o thomisa go keketlela kgole le tso tsa Modimo. Sosone se rela gore senghana sage le Jehova se ya tekateka. Bagolo ke setšha go le botogotela ga tso tsa Modimo. Ba leketsa ka matla gore ba “bhantiše wa go lwala [ba ra motho yenewa wa gore o sinnye.]” Mo bagolo ba mo yeletsa ka Mangwalo, sosone se maka gore senghana sage le Modimo se be gabutši fote, mara tsone di makega mo a tisola tsa mannete.—Meber. 3:19; 2 Makor. 2:5-10. w19.05 10 ¶10-11.

Jehova a ka maka gore re nabele go maka tso yene a di nyakang. Mo re beyisa, di ka makega gore re bone go na le seyemo se sengwana ka ho phutegong kela sa gore kayekaye di nyaka gore re gelepe. Byalo di ka makega gore re tiputsise gore, ‘Nka maka ying gore ke thogo gelepa?’ Kela ba re kgopela gore re make mmereko wo mongwana, ke mokane wa kraya re tiputsisa gore, nje re ko wo kgoneng. Kela ka nthago ga go bala se sengwana ka ho Baebeleng, o ka kraya o tiputsisa gore, ‘Mara nka se berekisa byang go gelepa batho ba bangwana?’ Mo Jehova a di bona gore re ya di nyaka go maka se sengwana, a ka re gelepa gore re nabele go maka tso di mo jabodisang. Jehova a ka re neya matšhika ya gore re thogo karakara. (Jes. 40:29) Ka go re gelepa ka moya wa go hlawolega gore re thogo lokotšega ga tso re kgonang go di maka. (Ek. 35:30-35) Jehova a ka berekisa mokgahlo wage go re tšhutisa go maka mmereko wo mongwana. Mo nkare a wo di tšibi gabutši go maka mmereko wo mongwana, kgopela ba bangwana gore ba go gelepe. O sa tšhabe go kgopela Papa wa rune wa ku magedimong gore a go neye “matšhika ya gore ma ka kgakala ga ya re ma tlwayeleng,” ka taba la gore yene aa konane.—2 Makor. 4:7; Luk. 11:13. w19.10 21 ¶3-4

Lefase lowa le kutšetsela batho gore ba kwane natso tsa go tipona. Puku ye nngwana ya mo ba nyakolla ditaba yi re ka bo-1970 “dipuku tsa go bolabola ka go phomelela ka tsa lephelo di yye tsa yeketsega ka matla.” Dipuku tse dingwana “ke mo di maka batho gore ba titšibe le go tiyamogela ka mokgo ba leng ka gona fote ba jabolele so ba leng sona.” Mo re beyisa, puku ye nngwana ya mohlobo wonone yi bolabodiye gore: “Go na le motho ye mongwana wa go bafala la go sa hlayisege wa gore di nyaka o kwane naye ka matla, wa go jabodisa, wa gore aa šiyo wa go tshwana naye—motho yene ke wene.” Puku yone gabutšibutši yi ra gore “so motho a se dumelang se lawola ke gore motho o tikwa byang, lekwalo lage le re king le gore setšo sage se mmotsa ying, solanka tsotsone di mmerekela.” Nje tsotsone ba di bolabolang wa di tšiba? Sathane o kutšetsele Efa gore a make tsotsone. O mmutsiye gore a ka “tshwana le Modimo ka go tšiba sa go bafala le sa go befa.” (Gen. 3:5) Le lekgono lowa ba go tlala baa tipotsa, fote a ba nyake go butsiwa ke motho ye mongwana, le mong yene Modimo, a ba nyake a ba botsa gore sa go befa ke sefeng, sa go bafala ke sefeng. Mo re fo lebelela ka mokgo batho ba tseyang lenyalo ka gona lekgono, di napa di fo šupetsa gore ba mohlobo wonone ba tlele ka matla. w19.05 23 ¶10-11

Kgoši Dafita le yene ke mo di na le go mo kgahleletsa. Nagana ka tso a yyeng a gahlana natso tsa go mo phireketsa. O yye a kgongwetsa ke dilo tso a di makiyeng tsa go tšwa pateng. (Pis. 40:12) Morwayi wage ye ne a mo nyaka ka matla ye ba reng ke Absalomo, o yye a maka tsa go tšiba ke yene tsotsone tsa maka gore ba feleletse ba mmolayye. (2 Sam. 15:13, 14; 18:33) Monghanage ye mongwana wa gore ke mo a mo nyaka ka matla, o yye a mo sepela ka fase. (2 Sam. 16:23–17:2; Pis. 55: 12-14) Dikoša tsa go tlala tso Dafita a di ngwadiyeng di šupetsa gore ne a kgongwele ka matla fote ke mo a mo tshepiye ga Jehova a sa tekateki. (Pis. 38:5-10; 94:17-19) Mopisalema ye mongwana o yye a thomisa go nabela maphelelo ya batho ba dipelo tse diphifadu. Di ka makega gore ke mo go le motlogolo wa Asafa wa Lelifi, fote go ka makega gore ne a bereka ‘ga poleke ye kgolo ya go hlawolega yo ne yi berekisiwa mo go rapediwa Modimo.’ Mopisalema yewa o yye a kwa di mo kgahleletsiye ka matla tsa go šala a sa sa jabodiye fote a kwa a sa kgotsofala. O yye a thomisa le go sa sa tshepa gore Modimo o kene wa mo rufa.—Pis. 73:2-5, 7, 12- 14, 16, 17, 21. w19.06 17 ¶12-13

Sathane o berekisa go nabela ga hlago. Ke hlago ya rune gore re kwe re nyaka go tšhuta dilo tso di ka re gelepang go tipasopa rune beng le go pasopa ba mitši ya rune. (1 Thim. 5:8) Ga go tlala re ya sekolo gore re thogo tšhuta dilo tso di ka re gelepang fote re tšhuta re šwennye. Mara di nyaka re pasope. Dinageng tsa go tlala, dilo tso di tšhutiwang ku dikolo, tse dingwana tsa tsona di gabutši mara tse dingwana ke tsa gore batho ba f’lo tikhandela. Bana ba sekolo ba ba kutšetsela gore ba tiputsise gore nje Modimo o gona le go tseyela Baebele fase. Ba ba botsa gore taba yowa ya gore dilo di f’lo timakegela, ke yona yi hlatollang gabutši gore lephelo le tlogela kaye. (Mrm 1:21-23) Dilo tsone ba di tšhutisang di ganetsana le “go hlalefa ga Modimo.” (1 Makor. 1:19-21; 3:18-20) Napa o ro tipotsa gore wene a o nyake go tanya ke “dilo tsa go tikhandela le tsa gore a di šiyo” tsa lefase lowa la Sathane. (Makol. 2:8) Ariye mahlong o tipasopa gore o sa tšhoge o tannye ke mathayithayi ya Sathane. (1 Makor. 3:18) O sa mo yikele a šinya a maka gore o lebale Jehova. Berekisa melawo ya Jehova mo o kene o phela. O sa lesetse Sathane a go woka wa feleletsa o sa sa theetsela mo Jehova a go yeletsa. w19.06 5 ¶13; 7 ¶17

Mo o kgeta taba yo o nyakang go bolabola ka yona, thomisa ka go nagana ka batho bo o nyoko go bolabola nabo. O fo nagana nje, gore batho ba nyoko rufega byang ka so Baebele yi se tšhutisang. Mo o bolabola nabo o ba theetsele gabutši fote o šupetse gore o hlompa tso ba di bolabolang. Mo o maka tsotsoneng, o nyoko ba kwisisa gabutši fote di nyoko ba lola gore le bona ba theetsele tso o di bolabolang. Mo motho a soko bane a segelela sepheto sa go tšhuta Baebele, di ka nyaka gore o boyele gage ga tleletlele. Ke ntaba re reyano? Ka taba la gore ba bangwana a re ba kraye mo re boyela mitšing ya bona. Fote di ka go nyaka gore o boyele ga go tlalanyana gage, gore a go tlwayele ke mokane a fetse a yamogele gore le tšhute Baebele ggoši. O sa lebale gore sehlare se nyaka go tšheletsiwa ga tleletlele gore se thogo gola gabutši. Byalo, gore motho a feleletse a nyaka Jehova le Jeso, di nyaka re tšhute naye Baebele ga tleletlele. w19.07 14 ¶1; 15-16 ¶7-8

Jeso ke mo a ra byang? Jeso ke mo a sa rele gore di nyaka Makreste ma jabole mo ma hloyiwa. Mara, ke mo a fo ba pasopisa gore ba tšibe gore king tso ba nyoko gahlanang natso. A re kene felo ga tsa lefase lo. Re phela go ya ka tso Jeso a di tšhutisiyeng fote re tšhomayela molayetsa wo le yene a yyeng a wo tšhomayela. Ka taba lone, lefase le re hloyye. (Joh. 15:18-21.) Rune re nyaka go jabodisa Jehova. Byalo mo batho ba re hloya ka taba la gore re kwana le tsa Papa wa rune, ke tsa bona tsone. A di nyake re tseya gore mo ba sa re nyake di ra gore a yi rune selo. A re tšibi gore re ye thoma go hlupegisiwa leng kela gore ba nyoko rakela mmereko wo re wo makelang Jehova leng. Mara re tšiba gore di nyaka re thomise gana byalo go tilukiselela tsotsone ka go tiyisa senghana sa rune le Jehova, ka go titšhutisa go šišimala le go tšhuta gore re ka maka byang mo batho ba re hloya. Mo re ka tilukiselela gana byalo, re nyoko kgona go yema re tiyye ku mahlong. w19.07 6 ¶17-18; 7 ¶21

Mo re tšhuta Baebele le batho ba gore a ba kene kereke, di nyaka re ba gelepe re lefisiye pelo gore ba feleletse ba dumele gore Modimo o gona. Fote di nyaka re ba gelepe gore ba tshepe so Baebele yi se bolabolang. Tsone di ka nyaka gore re boyelele dilo tse dingwana ga tleletlele. Mo re kene re tšhuta nabo Baebele, di ka nyaka gore re ba hlatollele dilo tso di šupetsang gore Baebele ke Lentsu la Modimo, re ka tšhela le dilo tsa go tshwana le seporofeto sa Baebele, tsa sayense le dilo tsa nnete tso di yyeng tsa makega tsa ku botala, kela tso di šupetsang gore Baebele yi sa bereka le ho ga rune. Re gelepa batho gore go be malata ya Kreste ka go ba šupetsa gore re ya ba nyaka le mo ba ka fo ba ba kena kereke kela e-e. (1 Makor. 13:1) So re nyakang go se segelela mo re kene re ba tšhutisa ke go ba šupetsa gore Modimo o ba nyaka ka matla, fote o nyaka gore le rune re mo nyake ka matla. Batho ba gore ke mo ba sa nyake go kwa selo ka tso tsa Modimo baa kolobetsiwa mongwaga wo mongwana le wo mongwana ka taba la gore ba šele ba kwana ka matla le tsa Modimo. Byalo di nyaka o lefise pelo fote o šupetse batho ba mehlobo ka moka gore o ba nyaka ka matla fote o hlupega ka bona. Ba theetsele. Leketsa le go ba kwisisa. Maka gore ba kopisele ga tso o di makang gore ba thogo tšhuta gore go ba lelata la Kreste di ra gore king. w19.07 24 ¶16-17

Barwediya ba Shalume ke mo ba le gona le bona gare ga batho bo Jehova a yyeng a ba berekisa gore ba lukise mapharo ya Jerusalema. (Neh. 2:20; 3:12) Shalume ke mo go le ndhuna, mara barwediya bage ke mo ba di nabela ka matla go maka mmereko wowa le mo go le wa go baba fote wo le kotsi. (Neh. 4:15-18) Le ga dinako tsowa tsa rune, magageru ya basadi ba kwana natso ka matla tsa go maka mmereko wo mongwana wa go hlawolega—mmereko wone ke wa go yaga le go lukisa meyago ya gore ba yi neyele Jehova. Re leboga ka matla gore ba na le tso ba di tšibang, ba na le matšato fote baa tshepega, tsotsone di maka gore mmereko wowa wo sepele gabutši ka matla. Jehova o yye a maka gore Thabitha a kwe a di nabela tsa go yeketsa “mebereko ya go bafala le go neyana dilo ka taba la go kwelana go baba,” ka matlamatla a makela basadi ba gore ba kgwele ke banna. (Meber. 9:36) Mosadi yewa ke mo a sa konane wa tšiba, fote a na le pelo ya go bafala, ba go tlala ba yye ba mo llela ka matla mo ba di kwa gore o hlokofele. Mara ba yye ba jabola ka matla mo Petro wa lepostola a mo tsosa. (Meber. 9:39-41) Taba ya Thabitha yi re tšhutisa ying mara? Le mo re ka fo ba re le ba banyana kela ba bagolo, re le banna kela basadi, ka mokana ga rune re ka di kgona go maka se sengwana gore re thogo gelepa magageru. w19.10 23 ¶11-12

Re ka phiriketsa ye mongwana byang? Nagana ka taba ye nngwana ke yowa. Motho wa gore o tšhuta Baebele o feleletsa a kgona go lesetsa go tlayila. Ke mokane o di bona gabutši gore o tshwanele a lesetse go nwa mokgete, a tšhentšhe ke mokane a kolobetsiwe. Ka nthago, mogageru ye mongwana o mo mema gore a tle phathing ke mokane o mo neya mokgete, o re gage: “Mo motho a kgona go titshwara, le mo a nwa mokgete o nyoko kgona go meta.” O fo nagana nje gore ke mo go nyoko ba byang hala mogageru yewa a f’lo theetsela mantsu yane ya go sa yi ka tsela. Megahlano ya rune ya Sekreste yi re gelepa gore re thogo berekisa melawo yo yi leng ga temanyana ya lekgono. Di re šupetsa gore ke difeng tso Jehova a di tseyang go le mong tsona tsa gabutši le ka mokgo re ka di berekisang gore re thogo ba batho ba go hloka selabi. Fote di napa di maka gore ga Modimo le magageru re ba nyake ka matla. Mo re nyaka Modimo le magageru di tšwa pelong, re nyoko karakara ka matla gore re sa phiriketse magageru. w19.08 10 ¶9; 11 ¶13-14

Go na le batho ba go šupetsa nkare bona a ba titšhuge, ba gore ba fo bolabola se sengwana le se sengwana so se leng mo monaganong, mara tsotsone a di rele gore ba na le magetla. (Joh. 1:46, 47). Re na le dihlong kela e-e, di nyaka ka mokana ga rune re karakare gore re tinyanafatse tsa mannete. Tseya ka Pawulo wa lepostola. Jehova o yye a mmerekisa ka matla gore a thomise diphutego ga dipoleke tsa go tlala. Di ka makega gore o berekiye ka matla ga mmereko wo Jeso Kreste ne a mo neyye wona, go phala mapostola ya mangwana ka moka. Le mo go le sone, Pawulo a sanka a nagana gore o phala magageru ya mangwana. O bolabodiye gabutši gore senghane so ne a le naso le Jehova, a se make ke mekgwa yage ya go bafala kela dilo tso ne a di maka, mara ne yi le ka taba la gore Jehova o ro mo kwela. (1 Makor. 15:10) Pawulo ke motho wa gabutši ye re ka kopiselang gage, wa gore o yye a tinyanafatsa le mo ba bangwana ga phutego yone ya Makorente ne ba mo tseyela fase!—2 Makor. 10:10. w19.09 3 ¶5-6

Se sengwana so se ka makang gore go sa be lula go theetsela Jehova ke gore re belegiwwe re na le senyama fote a ra felegelela ho mmeleng. Byalo re na le go fela re kwa re sa nyake go theetsela Modimo. Ka nthago ga gore Adamo le Efa ba sa theetsele Modimo ke mokane ba ja tsa sehlare sela, ba yye ba maka tsa go tšiba ke bona. (Gen. 3:22) Le lekgono lowa, go na le batho ba go tlala ba gore a ba re selo ka Jehova fote ba tikgetela gore sa go loka le sa go sa loka ke sefeng. Le bowa ba gore ga Jehova ba mo nyaka ka matla di ka ba thathafela go theetsela Jehova ga se sengwana le se sengwana. Pawulo wa lepostola le yene o yye a di bona tsotsone. (Mrm. 7:21-23) Go fo tshwana le Pawulo, le rune re nyaka go maka tso Jehova a di nyakang. Mara re tshwanele re karakare gore re sa nabele go maka dilo tsa go befa. Se sengwana so se ka makang gore go thathafe go theetsela Jehova ke ditšo tso re goleleng ga tsona. Tsa go tlala tso batho ba di bolabolang a di sipidisane le tso Jehova a di nyakang, byalo di nyaka re garagare gore re sa nagane go tshwana nabo. w19.09 15 ¶4-6

Di nyaka re kwisisa taba ye nngwana gabutši. Rune batho a re tshwane ga taba ya go šupetsa matšato. Byalo di nyaka re pasope gore re nyaka go segelela ying. Mo re beyisa, re ka fo sinya nako ya go tlala re kgobeketsana le dilo tsa lefase lowa tsa majabajaba. Theetsela so Jeso a se bolabodiyeng nakwela mosogana yela wa go ghanya a mmutsisa gore: “Di nyaka ke maka ying gore ke kraye lephelo la go ya go yye?” Di ka makega gore morenewa ke mo a lukiye ka taba la gore Ebangedi ya Mareka yi hlaya gabutši gore Jeso ‘o yye a fo kwa a mo nyaka ka matla.’ Jeso o yye a kgopela so go bolabodiwang ka sona howa ga temanyana ya lekgono ga morenene. Morenene ke mo a kwele go baba ka matla, mara ke mo a šitega go šiya “dilo tsa go tlala tso ne a na le natso.” (Mar. 10:17-22) So a se makiyeng se šupetsa gabutši gore aa yamogela tso ne di hlaya ke Jeso, mara o yye mahlong a kene a lelekisana le ‘tsa go ghanya tsa lefase lowa.’ (Mat. 6:24) Mola go le wene nke o makiye byang? Mo nako yi kene yi ya, di gabutši ka matla gore re tinyakolle gore re thogo tšiba tso re tshwaneleng go di yetisa mahlong. Ke ntaba di nyaka re maka ka mokgonone? Taba ke gore re nyaka go tšiba gore nje nako ya rune re yi berekisa gabutši. w19.09 24 ¶17-18

Mmereko wa rune wa go tšhomayela wo nyoko fo ya mahlong go segela mo Jehova a re re fetsiye. Mara go šele nako ya go segela kaye gore batho ba tšibe ka Jehova le Jeso Kreste? (Joh. 17:3) Aritši. Mara re ya di tšiba gore mo go soko thomisa motšhatšhamelo wo mogolo, batho ba gore “ba tlalele ga tsa gabutši tsa lephelo la go ya go yye” ba ka yamogela ditaba tsa go bafala ke mokane ba berekela Jehova. (Meber. 13:48) Byalo, re ka ba gelepa byang batho bowa nako yi sa le gona? Jehova o berekisa mokgahlo wage gore wo re neye dithuluse tso re ka di berekisang mo re tšhutisa batho nnete. Mo re beyisa, re tšhutisiwa beke ye nngwana le ye nngwana ga megahlano ya gare ga beke. Mogahlano wone, wo re gelepa gore re tšibe gore re ka bolabola byang mo re ya la mathomo le mo re boyela. Fote mo o fetsa go bolabola le motho wa go jabolela ditaba tsowa, mo neye sephephane kela makazini gore a thogo ya mahlong a tipalela go segela mo o boyela gage. Byalo di nyaka rune beng re sa lesetse go dula re tšhomayela kgwedi ye nngwana le ye nngwana. w19.10 9 ¶7; 10 ¶9-10

Jehova o yye a tshepisa mokgalabye ye mongwana wa go tshepega wa hala Jerusalema ye ba reng ke Simiyoni gore a ka sa kgwe a soko bona Mesiya. Tsotsone tsa gore ba yye ba di tshepisa Simiyoni di šupa nkare di mo tiyisiye ka matla, ka taba la gore ke mo go le botala ka matla a mo yemele ga Mesiya yewa. O yye a rufiwa ka taba la go ba le tumelo le go tiyisela. Tšatši le lengwana, ‘moya wa go ba le matšhika wo yye wa mo tšhofa’ gore a tle tempeleng. Mo a le gana hala, o yye a bona ngwananyana wa gore o sa tšwa go belegiwa ye ba reng ke Jeso, ke mokane Jehova a berekisa Simiyoni gore a porofete ditaba ka ngwananyana yewa wa gore ke mo go nyoko ba Kreste. (Luk. 2:25-35) Di ka makega gore Simiyoni aa phela nako ya go lefa gore a thogo bona Jeso a maka mmereko wage wa ho lefaseng, mara o yye a leboga ka matla gore o yye a šupetsiwa dilo tse dikgolo, fote o sa nyoko bona le mong tsa go feta tsone kgole ka matla! Ga lefase la nyuwane, monna yewa wa gore wa tshepega o nyoko bona gore go lawola ga Jeso go makiye gore batho ka mokana ga bona ba rufege ka mokgo mang. (Gen. 22:18) Le rune mo go ba le so Jehova a reng re mo makele sona, di nyaka re mo leboge ka matla. w19.10 22 ¶7; 23 ¶12

Re ghannye kela re ya tihlupegela, di nyaka re pasope dipelo tsa rune. Byang? Ka go sa lelekisane le go ghanya. O sa yetisi mmereko wago mahlong go feta go berekela Jehova. Mara o ko di bona byang gore o šele o yye ka matla? O ka tiputsisa diputsiso ke tsowa: ‘Mo ke le megahlanong kela ke le tšhomong, ayitsano ke dula ke nagana ka tsa mmereko waka? Kela ke dula ke nagana ka go maka gore ke be le tšheleta ya go tladisa mohlolo? Ayitsano tšheleta le dilo tsa majabajaba di maka gore nna le ye ke tseyanneng naye re dule re thuthana? Ayitsano nka kgeta go bereka mmereko wa gore batho ba wo tseyela fase gore ke thogo berekela Jehova?’ (1 Thim. 6:9-12) Mo re kene re tinyakolla ka diputsiso tsowa, re sa lebale gore Jehova o ba nyaka ka matla bo ba rapelang yene a ntoši fote o ba tshepisa gore: “Nka sa ro go lesetsa fote nka sa go lahle.” Pawulo wa lepostola o makiye ke tsotsone mo a šinya a ngwala gore: “Maphelelo ya lune go sa be ya go kwana ka matla le tšheleta.”—Maheb. 13:5, 6. w19.10 29 ¶10

Mo re bereka ggoši le magageru re thogo bona mekgwa ya bona ya gabutši ke mokane ra tšhuta ga bona, sosone sa maka gore re mamarelane. Mo re beyisa, o tikwa byang mo o le tšhomong ke mokane o kwa monghanago a yemela tumelo yage ka lešiši kela a bolabola di mmaba fote a sa kamake ka Jehova, le tso a nyoko tlang a di makela batho ku mahlong? Nnete o nyoko fo kwa o mo nyaka ka matla. Mogageru ye mongwana wa mosadi ye ba reng ke Adeline wa go ba le 23 ya mengwaga o yye a kgopela Candice wa gore ke ye mongwana wa banghana bage gore a ye naye ga tšhomo ya gore ba yi bereka ga tleletlele. Adeline o re: “Ke mo re nyaka go fo tipona re tšhomayela re na le matšato fote re natefela ke tšhomo. Ka babedi ga rune ke mo re nyaka go gotetsiwa ga tso tsa Modimo.” Ayitsano go bereka ggoši go yye gwa ba berekela? Adeline o re: “Tšatši le lengwana le le lengwana mo re fetsa go tšhomayela, ke mo re bolabola ka mokgo re tikwang le tso di re tikisiyeng ka matla ga tso ne re bolabola ka tsona, le ka mokgo re yyeng ra napa re di bona gore Jehova ke yene a re yetetsang ga mmereko wa rune wa tšhomo. Ka babedi ga rune re tikisiye ke tso ne re bolabola ka tsona ku tšhomong fote sosone sa maka gore re nape re tšibanana gabutši.” w19.11 5 ¶10-11

Lesole la ku botala ke mo le nyoko tšeba mo le ka boyela gaye le se na legawu. Morene mongwana wa go tšhutela dilo tsa botala ye ba reng ke Tacitus wa ku Roma o ngwadiye gore: “Mo lesole le ka lahla legawu la lona, ke mo di nyoko tšebisa ka matla.” Nka taba lo masole ke mo ma dula ma ngangarele magawu ya wona. Le rune re dula re ngangarele legawu la rune la tumelo ka go sa lofe megahlanong ya Sekreste fote re boya re bolabola ga ba bangwana ka lebitso la Jehova le ka Mmušo wage. (Maheb. 10:23-25) Go tokegela gana hone, re bala Lentsu la Modimo ka moka matšatši re boya re rapela Jehova gore a re gelepe re berekise dilo ka mokana ga tsona tso re di tšhutiyeng. (2 Thim. 3:16, 17) A go na so Sathane a ka se berekisang sa gore se nyoko re kwaletsa go ya go yye. (Jes. 54:17) ‘Legawu la rune le legolo la tumelo’ le nyoko re tšhireletsa. Re nyoko ya mahlong re bereka le magageru re šišimele fote re sa tekateki. Phela a yi fo ba taba ya gore re nyoko hlula ntwa ya ka moka matšatši, mara re nyoko boya re jabolela go ba ka thoko ga Jeso mo a hlula Sathane le bo ba mo latelelang.—Kut. 17:14; 20:10. w19.11 19 ¶18-19

Mo o ngwala dilo tso o nyakang go di segelela, di nyoko ba lula gore o di make. (1 Makor. 14:40) Mo re beyisa, bagolo ba phutego ba butsiwwe gore ba kgete mogolo ye a ngwalang dilo ka mokana ga tsona tso ba kwanneng ka tsona gore ba nyoko di maka, ba kgete le ye a nyoko šalang morago taba ya gore dilo tsone di ya makiwa le go bona gore dilo tsone di fetsiwa ka letšatši lo ba kwanneng ka lona. Bagolo bo ba latelelang so ba butsiwweng sona, ga go tlala ba kgona go segelela dipheto tso ba kwanneng ka tsona. Le wene o ka leketsa go maka tsotsone mo o na le tso o nyakang go di segelela. Mo re beyisa, o ka fo ngwala letheto la dilo tso o nyakang go di maka ka moka matšatši, mara o thomise ka tso o tshwaneleng go di yetisa mahlong. Tsotsone di ka go gelepa gore o thogo fetsa tso o di thommeng le go di fetsa ka nako ye nyana. Mara di nyaka o sa tshwate. Di nyaka o karakare gore o thogo maka so o se naganneng le go fetsa so o se thommeng. (Mrm. 12:11) Pawulo o butsiye Thimothi gore ‘a ye mahlong a karakara’ fote a ‘ngangarele’ ga tso di nyoko makang gore a be thitšere ya gabutši. So Pawulo a se butsiyeng Thimothi se bereka le ga tso re nyakang go di segelela mo re kene re berekela Jehova.—1 Thim. 4:13,16. w19.11 29-30 ¶15-16

Mo Moše ne a sa titshepi nakwela Jehova a re a ntshe Maisrayele Egepita, a boya a mmotsa gatleletlele gore yene a ka sa di kgone. Modimo o yye a mo kwela go baba ke mokane a mo gelepa. (Ek. 4:10-16) Tsotsone di makiye gore a thogo botsa Farawo molayetsa wa go roba wa gore ba nyoko mo yahlula byang. Ke mokane Moše o bonne mo Jehova a berekisa matšhika yage gore a thogo phonisa Maisirayele, le mo a fetsa ka Farawo le batho bage Lewatleng le Lekhubedu. (Ek. 14:26-31; Pis. 136:15) Ka nthago ga gore Moše a ntshe Maisrayele Egepita, ne ba dulela go kokola. Le mo go le sone, Moše o di bonne mo Jehova a ba lefisela pelo. (Pis. 78:40-43) Fote Moše o di bonne tsa gore Jehova wa tinyanafatsa nakwela a mo kgopela gore a sa bolaye Maisrayele. (Ek. 32:9-14) Nakwela Maisrayele ma šele ma ruriye Egepita, senghana sa Moše le Jehova se yye sa gola tsela tsa nkare yene le Papage wa ku legedimong ba kgona go bonana.—Maheb. 11:27. w19.12 17 ¶7-9

Malata ya Jeso ya go tlala ke mo go le Magaleliya. Byalo, go gahlanela thabeng ya ku Galeliya ke mo go le kawone ka matla go phala go gahlanela mutšing wa motho ye mongwana ku Jerusalema, ka taba la gore batho ke mo ba tlele. Fote Jeso ke mo a šele a gahlanne le 11 ya mapostola ga mutši wa ye mongwana ku Jerusalema. Mo nkare Jeso ke mo a nyaka gore taba yo ya go tšhomayela le ya go maka batho malata go be ya mapostola yage fela, nke a makiye ka mokgonone ku Jerusalema, nke a sa kgopela malata yage, basadi bala le batho ba bangwana gore ba gahlane naye ku Galeliya. (Luk. 24:33, 36) Taba ya go maka batho gore go be malata yo Jeso a bolabodiyeng ka yona a ya felela ga Makreste ya dinako tsa mapostola. Re di tšiba byang tsotsone? Mo Jeso a šele a kwala taba yage, o butsiye bo ba mo latelelang gore: “Ke na le lune ka moka matšatši go segela mafelelong ya masipidiselo yawa ya dilo.” (Mat. 28:19,20) Lekgono mmereko wa go maka batho gore go be malata wo makiwa lefase ka mokana ga lona. O fo nagana nje! Batho ba go teya gana hala ga bo 300 000 mongwaga wo mongwana le wo mongwana baa kolobetsiwa gore go be Dihlatse tsa Jehova fote ba boya ba ba malata ya Jeso Kreste! w20.01 2 ¶1; 3 ¶5-6

Go kena ke bolwele bya gore o fo tikwa a lelemela o sa le ye monyana. Go sa kraye mmereko mo o šele o gudiye. Go sa kgone go berekela Jehova ka mokgo o nyakang ka gona ka gore šele o tsofele. Mo nkare le wene o lebanne le tsa mošaga wonone, di ka makega gore o tikwe nkare a yi wene motho. Dilo tsa mošaga wonone di ka re kona mojabolo, dya maka gore re titseyele fase fote senghana sa rune le ba bangwana sa thoma go kgwelakgwehla. Batho ba tseya lephelo la motho go fo tshwana le ka mokgo Sathane a le tseyang ka gona. Ke botala Sathane a kene a tseyela batho fase. O makiye Efa lešidi ka go mmotsa gore o nyoko lokologa mo a ka sa theetsele Modimo mara a kene a di tšiba gabutši gore tsotsone di nyoko maka gore a kgwe. Ke botala Sathane a kene a lawola lefase lowa. Byalo a di makatse mo bo ba yetang mahlong ba tseyela batho fase fote ba sa ba hlompe. Jehova yene o nyaka gore re tikwe re le batho fote mo re gahlana le tsa go re maka gore re tikwe re se selo, wa re gelepa.—Mrm. 12:3. w20.01 14 ¶1-4

Jeremiya o fetsiye 40 ya mengwaga kela ya go feta yone, a dula le batho ba go sa tshepege, gana hone go kena le bayagelani le mašaga yage ya gore ma tšwa toropong yo a goleleng ga yona yo ba reng ke Anathothe. (Jer. 12:6) Le mo go le sone, ke mo a sa phele a ntoši. Mara o yye a botsa mabhalani wage ye ba reng ke Bharuke ka mokgo a tikwang le rune re thogo di tšiba gore ke mo a tikwa byang. (Jer. 8:21; 9:1; 20:14-18; 45:1) O fo nagana mo Bharuke a kene a ngwala tso Jeremiya a mo yanegelang tsona, di yye dya maka gore ba nyakanane ka matla ba boye ba hlompane. (Jer. 20:1, 2; 26:7-11) Jeremiya o fetsiye mengwaga ya go tlala a kene a botsa Maisrayele a šišimele ka so se nyoko makegang ka Jerusalema. (Jer. 25:3) Nakwela Jehova a nyaka gore Maisrayele ma tisole, o yye a kgopela Jeremiya gore a ngwale taba yone ga lengwalo la go phutiwa. (Jer. 36:1-4) Ka taba la gore Jeremiya le Bharuke ba berekiye ggoši dikgwedi tsa go tlalanyana ka mmereko wo Modimo ke mo a ba neyye wona, sosone se makiye gore ba thogo ba le nako ya gabutši ya go bolabola ka dilo tso di makiyeng gore tumelo ya bona yi tiyelele. w19.11 2-3 ¶3-4

Re tshwanele re ma tshware byang magageru ya banna le ya basadi ya gore ma tlotsiwwe? Di ko ba di se gabutši go gadimisa motho ka matla le mo go ka ba go le bhuti wa Kreste wa go tlotsiwa. (Mat. 23:8-11) Mo Baebele yi bolabola ka bagolo, yi re hlohletsela gore re “yekisele tumelo ya bona” mara a yi re botse gore re make motho ye mongwana gore go be moyetamahlong wa rune. (Maheb. 13:7) Ke nnete gore Baebele yi re ba bangwana “ba tshwanele ke go hlompiwa ka matla.” Mara yi bolabola ka mokgonone ka taba la gore “ba wokamela gabutši” fote “ba bereka ka matla ga taba ya go bolabola le go tšhutisa,” go se ka taba la gore ba tlotsiwwe. (1 Thim. 5:17) Mo re gadimisa re boya re tseyela bo ba go tlotsiwa gedimo ka matla, re ka maka gore ba tšebe. Sa go napa se sinya ka matla, ke mo re ka maka gore ba feleletse ba ba le magetla. (Mrm. 12:3) Aa šiyo le ka wweši wa rune ye a ka nyakang go tikraya a makiye gore ye mongwana wa Makreste ya go tlotsiwa kela bobhuti wa Kreste a feleletse a makiye dilo tsa gore a yi tsona!—Luk. 17:2. w20.01 29 ¶8

Pawulo wa lepostola ke mo a na le tsa go tlala tso di ka makang gore a dule a šekela. Ka taba la gore ke mo a ma nyaka ka matla magageru, ke mo di mo šekedisa ka matla mo ma na le mathatha. (2 Makor. 2:4) Ba gore ke mo ba mo phigisa ba yye ba mo tula ba boya ba mmošela jele. Fote ke mo di nyaka gore a tiyisele tsa go sasamela tsa gore di ka maka gore a šekele tsa go tshwana le “go gayela sela le sela.” (Mafil. 4:12) Ka taba la gore o yye a robegela ke sekepe gararo, sosone se fo re šupetsa gore go sepela ka sekepe ne go šekedisa Pawulo. (2 Makor. 11:23-27) Pawulo o yye a gelepa king nakwela a šekela? Pawulo ke mo a šekela mo magageru ma gahlana le tsa go ma ghula, mara a sanka a leketsa go lukisa mathatha ya bona ka moka ka boyene beng. Pawulo ke mo a di tšiba tsa gore a ka sa di kgone go maka dilo ka mokana ga tsona. O yye a kgopela banna ba gore baa tshepega ba go tshwana le Thimothi le Tito gore ba make mmereko wa go tlala ka phutegong. A re kamake gore mmereko wo magageru yane ma wo makiyeng wo makiye gore Pawulo a sa sa šekela ka matla.—Mafil. 2:19, 20; Tito 1:1, 4, 5. w20.02 23

Jehova o nyaka gore le rune re mo theetsele. Di ya mo tshwanela gore re mo theetsele ka taba la gore ke yene ye a re Makiyeng, ke yene ye a Makang gore re ye mahlong re kene re phela fote o hlalefiye go phala babelegi ka mokana ga bona. Mara selo se segolo so se makang gore re theetsele Modimo ke gore re mo nyaka ka matla. (1 Joh. 5:3) Go na le dilo tsa go tlala tso di re tšhofang gore re theetsele Jehova mara yene aa re gapeletsi gore re mo theetsele. Jehova o makiye gore re lokologe go maka tso re di nyakang, byalo di mo jabodisa ka matla mo a bona re kgeta go mo theetsela ka go di nyaka. Babelegi ba nyaka gore bana ba bona ba dule ba tšhireletsegiye. Ke taba lo ba ba beyelang melawo. Mo bana ba latelela melawo yone, ba šupetsa gore ba tshepa babelegi ba bona fote baa ba hlompa. Byalo di gabutši ka matla gore re tšibe melawo ya Papa wa rune wa magedimong ke mokane re phele ka yona. Mo re maka tsotsone, re šupetsa Jehova gore re mo nyaka ka matla, re ya mo hlompa fote go maka tsotsone di ya re berekela. (Jes. 48:17, 18) Mara bo ba gore ba tseyela melawo ya Jehova fase, ba feleletsa ba tikwisiye go baba.—Magal. 6:7, 8. w20.02 9-10 ¶8-9

Go fo tshwana le Abhigheyili, di nyaka re be le lešiši gore re bolabole mo re bona gore ye mongwana o kare o thoma go maka selo sa gore se nyoko mo gorometsa ga gore a feleletse a sinnye ka matla. (Pis. 141:5) Di nyaka re šupetse gore re ya hlompa mara re sa beyele lešiši kgole le rune. Mo re kgona go yeletsa motho ka mokgwa wa gabutši, re šupetsa gabutši gore ke rune banghana ba mannete. (Diy. 27:17) Bagolo ka matlamatla ke bona bo di nyakang ba be le lešiši gore ba thogo bolabola le ba gore ba thoma go maka tsa gore a yi tsona ka ho phutegong. (Magal. 6:1) Bagolo ba di tšiba gabutši gore le bona a baa yenela fote di ka makega gore le bona ba nyake go yeletsiwa ga tse dingwana tšatši le lengwana. Mara tsotsone a di make bagolo gore ba lesetse go kgala bo ba tshwaneleng gore ba wolodiwe. (2 Thim. 4:2; Tito 1:9) Mo ba yeletsa motho, ba leketsa go berekisa so ba neyiwweng sona gore ba thogo tšhutisa motho yene gabutši fote ba mo lefisele pelo. Ba ma nyaka ka matla ga magageru fote sosone se ba maka gore ba kwe ba nyaka go ma gelepa. (Diy. 13:24) Mara se segolo so ba hlupegang ka sona ke go šupetsa gore ba hlompa Jehova ka go sa tseyele melawo yage fase le go dula ba pasopiye phutego gore yi sa kwisiwi go baba.—Meber. 20:28. w20.03 20 ¶8-9

Jehova o berekisiye Moše gore a thogo phonisa Maisrayele. Mara o thomisiye leng go mmerekisa? Gale ke mo go le nakwela Moše a tikwa gore o šele a le gabutši ka nthago ga “go tšhutisiwa mehlobo ka mokana ga yona ya go hlalefa ya Maegepita”? (Meber. 7:22-25) Awwa, Jehova o yye a berekisa Moše nakwela a šele a fetsiye go mo wolola gore a tšhute go tinyanafatsa le go ba monna wa go dula a kgibiye. (Meber. 7:30, 34-36) Jehova o yye a neya Moše lešiši gore a thogo bolabola le kgoši ya go ba le matšhika ka matla ya hala Egepita. (Ek. 9:13-19) Re tšhuta gore Jehova o berekisa batho ba gore ba leketsa go mo yekisela le ba gore ba tshepa yene gore o nyoko ba neya matšhika. Jehova o di makiye go tlugisela botala tsa gore malata yage ma thogo maka dilo tsa mohlobohlobo. Wene o nyoko maka ying ka wene? Ga go tlala di fo ya ka gore wene mong o karakara go segela kaye. (Makol. 1:29) Mo o ka fo lesetsa Jehova a go berekisa, a ka maka gore o be motšhomayedi wa go ba le matšato, a ka maka gore tsa go tšhutisa o di kgone, o kgone go kgomoletsa ba bangwana, o tšibe mmereko, o be monghana wa gabutši kela selo se sengwana le se sengwana so a se nyakang gore a segelele dilo tsage. w19.10 21 ¶5; 25 ¶14

Banghana ba gabutši ba nyoko re gelepa gore re dule re tshepegela Jehova. Mo o nyaka go ba le monghana wa gabutši, le wene di nyaka o be monghana wa gabutši. (Mat. 7:12) Mo re beyisa, Baebele yi re re berekise nako ya rune le matšhika ya rune gore re gelepe ba bangwana, ka matla bo ba gore ba napa ba “nyaka thušo.” (Maef. 4:28) Mo re di nyaka ka matla go gelepa ba bangwana, a go na gore re sa jabole. (Meber. 20:35) Batho bo re ba hlawolang gore go be banghana ba rune ba nyoko re gelepa mo re gahlana le tsa go re ghula fote ba nyoko re gelepa gore re dule re bebiye. Go fo tshwana le nakwela Elikgu a yye a theetsela mo Jobo a mo hlayisela ka tso di mo hlupang, le rune banghana ba rune ba ka re theetsela ba lefisiye pelo ho re ba botsa tso di re hlupang. (Jobo 32:4) A di nyake re lebelela gore banghana ba rune go be bona ba re tseyelang dipheto, mara re ko ba re šupetsa gore re hlalefiye mo re theetsela tso ba di bolabolang solanka di tšwa ka Baebeleng. (Diy. 15:22) A di nyake re gana mo banghana ba rune ba nyaka go re gelepa, di nyaka re tshwane le Kgoši Dafita wa gore o yye a dumela mo ba mo yeletsa. (2 Sam. 17:27-29) Ka nnetennete, banghana ba mošaga wonone re ba neya ke Jehova.—Jak. 1:17. w19.04 11 ¶12; 12 ¶14-15