June

Bo ba tšhutisang Baebele di nyaka ba šupetse gore ba hlupega ka matla ka bo ba tšhutang nabo. Ba tseye gore ka motshwana go nyoko ba go le magageru. A di lula gore ba lesetse go nghanelana le banghana ba bona ba botala ke mokane ba thomise go berekela Jehova. Mathitšere ya gabutši ma gelepa bo ma tšhutang nabo Baebele gore ba tšibane le ba bangwana ka ho phutegong ba gore ba ka ba gelepa gore ba mamarelane le Jehova. Ke mokane ba nyoko jabolela go nghanelana le magageru ya gore ma nyoko ba gelepa gore ba tlalele ga tso tsa Modimo le go tiyisela mo ba gahlana le tsa go ba ghula. Re nyaka gore ye mongwana le ye mongwana ye re tšhutang naye Baebele a tikwe go le wa ka ho phutegong fote re le ba mutši ka wweši ga tso tsa Modimo. Re nyaka gore ye re tšhutang naye a fo kwa a nabela go ba le magageru ya Makreste. Go nyoko ba lula gore a lesetse go nghanelana le batho ba gore a ba mo gelepe gore ga Jehova a mo nyake ka matla. (Diy. 13:20) Le mo banghana bage ba botala ba ka mmona nkare wa ba nkgela, o ko ba a di tšiba gore banghana ba mannete o ko ba kraya ka mokgahlong wa Jehova.—Mar. 10:29, 30; 1 Pet. 4:4. w20.10 17 ¶10-11

Mo nkare re nyaka go nghanelana le Jehova, di nyaka re thomise re maka senghana le Jeso. Ke ntaba go le ka mokgonone? Lebelela mabaka yawa ka mabedi. Sa mathomo Jeso o butsiye malata yage gore: “Papa o le nyaka ka matla, ka taba la gore le šupetsiye gore le nnyaka ka matla.” (Joh. 16:27) A fetsa ka gore: “Aa šiyo ye a tlang ga Papa a sa tle ka nna.” (Joh. 14:6) Lebala ka go maka senghana le Jehova mo nkare a wa thomisa ka go maka senghana le Jeso, tsotsone go ko ba go fo tshwana le go leketsa go kena ntlong ka lefasetere o sa berekisi monyako. Jeso o berekisiye mošupetso wa go tshwana le wowa mo a di hlatolla gore ke yene “monyako wa dinku.” (Joh. 10:7) Se sengwana ke gore, Jeso o šupetsiye gabutši gore o di tsere ka moka tsa Papage. O butsiye malata yage gore: “Ye a bonneng nna ke setšha a bonne le Papa.” (Joh. 14:9) Tsela ye nngwana yo re ka kgonang go tšiba Jehova gabutši ke mo re ka fo ya mahlong re tšhuta ka lephelo la Jeso. Mo re kene re tšhuta ka Jeso, ka mokgo re mo nyakang go ka sa pomege. Senghana sa rune le Jeso se nyoko tiya, ga Papage re nyoko napa re mo nyaka ka matla. w20.04 21-22 ¶5-6

Ayitsano o phela o le mpetong kela o le gedimo ga wheelchair? Ayitsano matolo yago maa lelemela kela maahlo yago aa bone gabutši? Mo nkare go ka mokgonone, ayitsano o ka kgona go taboga le bo ba gore ba sa tiyelele fote ba philegiye? Nnete o ka kgona! Ba go tlala ba gore ba šele ba gudiye fote a ba titsosenyana gabutši ba kene ba taboga ga pata ya lephelo. Mmereko wone ba ka sa wo kgone ka matšhika ya bona beng. Mara, ba kraya matšhika ya go tšwa ga Jehova gore ba thogo tiyelela ka go theetsela megahlano ya Sekreste difowunung tsa bona kela ba lebelela vidiyo ya megahlano ya beke ye nngwana le ye nngwana. Fote ba kgona le go bereka mmereko wa go maka batho malata ka go tšhomayelela ditogotela, dinese le mašaga. O sa kgongwetsi ke go sa philega gabutši kela go kwa o lelemela la go šinya o tseya nkare o ka sa di kgone go taboga ga pata ya lephelo. Jehova o go nyaka ka matla ka taba la gore o tišupetsiye o dumela gage fote o boya o tiyisela. Gana byalo di nyaka a go gelepe ka matla fote a ka sa tsoge a go lahliye. (Pis. 9:10) O nyoko šutela thina ka matla gago. w20.04 29 ¶16-17

Ke dilo difeng tso re ka bolabolang ka tsona le motho wa gore o kena kereke? Leketsa go kraya tso le tshwanang ka tsona. A ka fo ba a rapela Modimo ka yyeši, a tseya Jeso go le yene ye a phonisang batho kela a dumela gore re phela ga dinako tsa go befa ka matla tsa gore go se botala di nyoko fela. Ka taba la gore go na le tso le tshwanang ka tsona, byalo bolabola molayetsa wa Baebele ka mokgwa wa gore o nyoko nabela go wo theetsela. O sa lebale gore batho ba bangwana ba ka fo ba ba sa dumele selo se sengwana le se sengwana so kereke ya bona yi se tšhutisang. Byalo, le mo o šele o tšiba gore motho yene o kena kereke yifeng, leketsa go tšiba gore yene gabutšibutši king so a se dumelang. Mogageru ye mongwana wa morumiwa o bolabola gore batho ba bangwana ba re ba dumela ga taba ya mabitso ka mararo, mara ba ka fo ba ba sa dumele gore Papa, Morwayi le moya wa go hlawolega ke selo ka ssoši. Morumiwa yene mo a ya mahlong o re “ Mo o maka tsotsone di nyoko ba lula gore o tšibe tso le tshwanang ka tsona.” Byalo, leketsa ka matla go tšiba gore gabutšibutši batho ba dumela ga ying. Ke mokane go fo tshwana le Pawulo wa lepostola, o ko di kgoneng “go ba dilo ka mokana ga tsona, ga batho ba mehlobohlobo.”—1 Makor. 9:19-22. w20.04 10 ¶9-10

Re ka lebelela tsa ku maahlong ka lešiši ka taba la gore Daniyele le Johane ba šihlela taba ya gore bo ba berekelang Jehova le Jeso ba ko phona go sasamela hone ga gore go kene gwa šutela ga gore fote a sanka gwa ba gona. Daniyele o re mabitso ya bo ba nyoko phonang ma ko ba ma ‘ngwadiwwe pukung.’ Re ka maka byang gore mabitso ya rune ma ngwadiwe ga puku yone? Di nyaka re šupetse gore re na le tumelo ga Jeso, Senkunyana sa Modimo. (Joh. 1:29) Di nyaka re kolobetsiwe go šupetsa gore re tineyele ga Modimo. (1 Pet. 3:21) Fote di nyaka re šupetse gore re yema le Mmušo wa Modimo ka go karakara ka matla mo re kene re tšhomayelela batho, re ba tšhutisa ka Jehova. Yo ke mong yona nako ya go šupetsa gore re na le tumelo ga Jehova le ga mokgahlo wage wa gore wo na le malata ya go tshepega. Yo ke mong yona nako ya go šupetsa gore re yema le Mmušo wa Modimo. Mo re maka ka mokgonone, re nyoko phona mo Mmušo wa Modimo wo fetsa ka kgoši ya lebowa le ka kgoši ya borwa. w20.05 16 ¶18-19

Phela Adamo le Efa ke mo ba le tšiba gabutši lebitso la Jehova, le dinnete ka Mong wa lebitso lone ke mo ba sa di phuphuletse. Ke mo ba di tšiba gabutši gore ba makiye ke mang, ba neyye ke mang lephelo, ba neyye ke mang Pharadeyisi le gore ba šadisiye ke mang. (Gen. 1:26-28; 2:18) Mara nje ba yye ba berekisa monagano wa bona wa go felegelela gore ba thogo ghayela ka dilo ka mokana ga tsona tso Jehova a ba makeleng tsona? Ayitsano ba yye ba šupetsa gore ba mo nyaka ka matla fote ba leboga Mong wa lebitso lone? Phetolo yi yye ya napa yi fo ba lekgwaying mo go nyarela lenaba la Modimo le thomisa go ba leketsa. Sathane o yye a berekisa noga gore yi mmolabolele, ya segela ho ga Efa ya tiputsisela ya re: “Ayitsano nnetennete Modimo o hlayye gore le sa ji selo ga sehlare se sengwana le se sengwana sa ho tšhomong?” (Gen. 2:16, 17; 3:1) Putsiso yone ke mo go le ya bošakašakane, ke mo yi wutametsiye matsaka ya go tshwana le tšhefu. Modimo yene ke mo a ba butsiye gore ga dihlare tso tse dingwana ka mokana ga tsona ba ka ja diyengwa tsa tsona, mara ne go na le ka ssoši sa gore ne ba sa tshwanela go ja diyengwa tsa sona. (Gen. 2:9) Sathane o makiye gore di šupe nkare Modimo wa konana. Efa a ka fo ba a yye a tiputsisa gore, ‘Ye barena, nje le ra gore se gona selo sa go bafala sa gore Modimo o tipatetsele sona?’ w20.06 3-4 ¶8-9

Malata ya mangwana ya Jehova ma kwisiwwe go baba ke magageru ya mangwana. Pawulo wa lepostola o di bonne gore ka dinako tse dingwana re ka ba le ‘selo sa go kwagala sa go maka gore re kokole’ ka mogageru. Ka dinako tse dingwana di ka maka ke gore re yye ra sa tshwariwi gabutši. Mo re sa ntshe maahlo dikwakweng, re ka feleletsa re tshwere ba bangwana ka pelo. Go tuba go ka maka gore ka gonyana ka gonyana motho a be ku kgole le batho ba Jehova. Pablo wa go dula ku Borwa bya Amerikhaba yye ba mmolabolela matsaka, ba re o sinnye ka matla ke mokane sosone sa maka gore a feleletse a sa sa berekisiwa ka ho phutegong. O yye a titshwara byang? Pablo o re, “Ke mo ke kwatiye fote ka gonyana ka gonyana ke yye ka feleletsa ke le kgole le phutego.” Motho wa go kokona ke lekwalo ka taba la go ba a sa maka dilo gabutši ku botala, a ka fo tikwa nkare Modimo aa sa mo nyaka. Le mo yi le gore o yye a tisola ke mokane a kwediwa go baba, a ka fo kwa nkare a di sa mo tshwanela gore a be gare ga batho ba Modimo. O fo re king ka magageru ya gore ma gahlanne le seyemo sa go tshwana le sa magageru ya go bolabodiwweng ka wona? w20.06 19 ¶6-7

Di nyaka re tšhute go bona gore hala mahlong go nyoko sinyega ke mokane re tšwe ka pata ye nngwana. (Maheb. 5:14) Mo re beyisa, di nyaka re kgete gabutši gore re tijabodisa ka dilo tsa mošaga mang. Tso di kganang ga TV le dimuving ga go tlala di šupetsa batho ba go maka tsa go sa yi ka tsela. Modimo o silikisa ke maphelelo ya mošaga wonone fote le rune yi nyoko re kwaletsa mo nako yi kene yi ya. A re šutele thina le dilo tsa gore di nyoko maka gore ka gonyana ka gonyana senghana sa rune le Modimo se šehle. (Maef. 5:5, 6) Le rune di nyaka re ntshe maahlo dikwakweng ga matsaka ya ma sabalatsang ke bo ba go kgeloga,ba ka sabalatsa matsaka ka magageru kela ba maka gore re thomise go kamaka tse dingwana ka mokgahlo wa Jehova. (1 Thim. 4:1, 7; 2 Thim. 2:16) Matsaka ya go tshwana le yanane ma ka lelemetsa tumelo ya rune. Di nyaka re sa tshokanye ke matsaka yane. Ke ntaba? Ka taba la gore matsaka yawa ma sabalatsa “ke banna ba go fukuga ba gore a ba na nnete.” Bona ba fo nyaka “go phigisana le go phadisana” le ba bangwana. (1 Thim. 6:4, 5) Ba nyaka gore re tshepe matsaka ya bona ke mokane re kene ke bolwele bya go solasola magageru. w20.09 29 ¶13, 15

Monna le mosadi ba tshwanele ba tshwarane ka tsela ya go šupetsa gore baa nyakanana fote baa hlompana. Maef. 5:33) Baebele yi re tšhutisa gore re neyane re sa fo yageletsa. (Meber. 20:35) Ke mokgwa wofeng wo wo nyoko gelepang bo ba tseyanneng gore ba šupetsane gore baa nyakanana fote baa hlompana? Phetolo ya putsiso yone, ke go tinyanafatsa. Go tinyanafatsa go gelepiye Makreste ya go tlala gore ma thogo jabola ga mošadho ya wona. Mo re beyisa, monna ye mongwana wa gore o šadhiye ye ba reng ke Steven o re: “Mo nkare le selo ka ssoši le nyoko tshwarisana, ka matlamatla mo go na le mathatha. O ka sa re ‘king so se ka jabodisang nna?’ mara o nyoko re ‘king so se ka jabodisang rune?’” Mosadi wage ye ba reng ke Stephanie le yene o tikwa ka mokgonone. O re, “A go na ye a nyakang go dula le motho wa go kwana le go lwa. Mo re sa kwane, re pombhola selo so se makang gore re sa kwane. Ke mokane re ya rapela, re ya nyakolla fote re bolabola ka sona. A re hlaselane, mara re hlasela bothatha byone.” Mo banna le basadi ba gore ba tseyanne ba se na magetla, sosone se nyoko ba berekela. w20.07 3-4 ¶5-6

O sa tshepele ga matšhika yago kela dilo tso o kgonang go di maka mo o berekela Jehova. Pawulo ke mo a tšhutegiye ka matla fote o tšhutisiye ke morene mongwana wa go hlompega wa moyetamahlong wa Majuda ye ba reng ke Ghamaliyele. (Meber. 5:34; 22:3) Ka dinako tse dingwana Pawulo ke mo a tseyediwa gedimo ke setšhaba sa Majuda. (Meber. 26:4) Mara Pawulo ke mo a sa tshepela ga yene mong. Pawulo a sanka a kokola mo a lesetsa dilo tso ke mo di maka gore a tseyediwe gedimo setšhabeng. (Mafil. 3:8) Pawulo o di kwile gore go ba lelata la Kreste a yi taba ya go kgana. Ke mo a hloyye ke mong setšhaba sa gabo. (Meber. 23:12-14) O yye a tudiwa stereka a boya a bošela ke Maroma ya gabo jele. (Meber. 16:19-24, 37) Go tokegela gana hone, Pawulo ke mo a kwa go baba mo a bona gore go na le dilo tsa go mo kgerela. (Mrm. 7:21-25) A sanka a dumelela bo ba go mo phigisa kela dilo tsa go kekema tso a yyeng a di maka di mo maka gore a thwale mara o yye a “jabola mo a lelemela.” Ke ntaba mara? Ka taba la gore o bonne matšhika ya Modimo ma bereka mo a lelemela lephelong lage.—2 Makor. 4:7; 12:10. w20.07 16 ¶7-8

Mmereko wa go tšhomayela ka Mmušo ke wona wa gore gana byalo di nyaka re wo yetisa mahlong. Jeso o hlayye botala gore mmereko wowa wo nyoko segela kgole fote wo nyoko makega le mo go šele go le botala a kgwile. Mo Jeso a tsoga, o yye a maka mohlolo wa gore malata yage ya mangwana ma tshware dihlapi tsa go tlala. Mo a fetsa go maka mohlolo wone, o yye a šihlela taba ya gore mmereko wo wo tshwaneleng go makiwa ka matla ke wa go loba batho. (Joh. 21:15-17) Mo Jeso a soko ya legedimong, o yye a botsa malata yage gore mmereko wowa wa go tšhomayela wo a wo thommeng wo nyoko makiwa le dinageng tsa ka tawong ga Israyele. (Meber. 1:6-8) Mo go šele go fediye mengwaga ya go tlalanyana, Jeso o makiye gore Johane wa lepostola a be le mmono wa so se nyoko makegang ka “letšatši la Morena.” Ga wona Johane o bonne tsa go makatsa ke tsowa: Lengeloyi ke mo le yetetsa mmereko wa go tšhomayela ‘ditaba tsa go bafala’ di ya ga “setšhaba se sengwana le se sengwana le setšo le mmolabolo le batho.” (Kut. 1:10; 14:6) Di fo ba lekgwaying gore Jehova o sa na a nyaka gore re make mmereko wowa wa gore wo makiwa lefaseng ka mokana ga lona re šinye re wo fetsa. w20.09 9 ¶5

Ka mutšing wa Abhrahama ne go na le mathatha. Mosadi wage ye ba reng ke Sara ke mo a sa kraye bana. Taba ya gore aa kraye bana yi ba kwisiye go baba ka nako ye telele. Sara o feleletsiye a neyye Abhrahama sebereki sage so ba reng ke Haghara gore se thogo ba belegela bana. Mara mo Haghara a yimme morwayi wage ye ba reng ke Išimayele, Haghara o yye a thoma go melela Sara mafofa. Go yye gwa sa sa loka selo la go šinya Sara a raka Haghara ka mutšing wage. (Gen. 16:1-6) Sara o yye a yima ke mokane a belegela Abhrahama morwayi, Abhrahama o yye a mo reya gore ke Isaka. Abhrahama ke mo kwana ka matla le Išimayele le Isaka. Mara ka taba la gore Išimayele ne a tshwara Isaka go baba, sosone se yye sa tšhofa Abhrahama gore a rake Išimayele le Haghara. (Gen. 21:9-14) Ka nthago, Jehova o yye a botsa Abhrahama gore a make sehlabelo ka Isaka. (Gen. 22:1, 2; Maheb. 11:17-19) Ga ditaba tsowa ka dipedi, ke mo di nyaka gore Abhrahama a tshepe gore Jehova o nyoko maka tso a di tshepisiyeng ka barwayi bage. w20.08 4 ¶9-10

Nagana ka mokgo bo ba nyoko tsusiwang ba nyoko tikwang ka gona mo ba tlubula mekgwa ya bona ya botala ke mokane ba thomisa go maka dilo ka mokgo Modimo a nyakang ka gona. Bo ba tlubulang mekgwa ya bona ya botala ba nyoko dumelediwa go phila go ya go yye pharadeyising. Mara Jehova a ka sa dumelele ba go tiwomisa dihlogo gore ba phile pharadeyising ka taba la gore ba nyoko dhunghanya bala ba go loka. (Jes. 65:20; Joh. 5:28, 29) Mo go šele go lawola Mmušo wa Modimo, batho bage ba nyoko bona gore Diyema 10:22 ke mo yi sa hlayi matsaka mo yi re: “Mo Jehova a rufa motho o šala a ghannye fote Aa tukegele ka tsa go baba.” Moya wa go hlawolega wo nyoko gelepa batho ba Modimo gore ba ghanye ga tso tsa Modimo, ka gonyana ka gonyana ba nyoko tshwana le Kreste fote ba ko ba ba kene ba yenela. (Joh. 13:15-17; Maef. 4:23) Mo nako yi kene yi ya, ba nyoko fo ya ba kene ba yenela mmeleng. Lephelo le nyoko jabodisa stereka ka nako yone!—Jobo 33:25. w20.08 17 ¶11-12

Re sa lebale gore Makreste ya mangwana ma kgetiye go dula ma sa šadha. Makreste ya mangwana maa di nyaka tsa go šadha mara a ma kraye motho wa gore wa tshwanelega. Ba bangwana bo ne ba šadhiye nabo ba hlokofele. Ayitsano bo ba ka ho phutegong ba tshwanele ba butsise Makreste ya gore a ma soko šadha gore ke ntaba ma sa šadhe kela go ma botsa gore ba ka ma gelepa ka go ma krayela batho? Mara mo nkare a ma nyake go gelepiwa, ma nyoko tikwa byang mo magageru ya mangwana ma butsisa dilo tsa go tshwana le tsowa? (1 Thim. 5:13) Magageru ya gore a ma soko šadha ma nyoko jabola ka matla mo re ka ma tseyela gedimo ka taba la mekgwa ya bona ya gabutši re sa yi ka gore ma šadhiye kela e-e. A ma nyake go kwediwa go baba ka taba la gore a ma soko šadha mara ma nyaka re tseyele gedimo taba ya gore ma ya mahlong ma kene ma tshepega. Tsotsone di nyoko maka gore ma sa kwe nkare re re: ‘A re le hloke.’ (1 Makor. 12:21) Mara ma nyoko di bona gore re ma tseyela gedimo ka ho phutegong. w20.08 29 ¶10, 14

Ka nthagonyana, Jeso o yye a nyarela ga Pawulo wa lepostola. (1 Makor. 15:8) Mo Pawulo (Sawulo) a kwa lentsu la Jeso wa gore o yye a tsusiwa ke mo a tshwere tsela ya go ya Damasekhase fote o yye a ba le mmono ka Jeso a le legedimong. (Meber. 9:3-5) Tso di yyeng dya makegela Pawulo di napa di šupetsa gabutši gore taba ya gore Jeso o yye a tsusiwa a yi setori. (Meber. 26:12-15) Ba bangwana ke mo ba nyoko napa ba di tshepa ka matla tso Pawulo a di hlayang ka taba la gore o yye a hlorisa Makreste. Ka nthago ga mo Pawulo a di bonne gore nnete Jeso o yye a tsusiwa, o yye a garagara ka matla gore a botse ba bangwana nnete yone. O yye a tiyisela go teyiwa go baba, go fošediwa jele le go robegela ke sekepe a kene a sabalatsa taba ya gore Jeso o yye a kgwa a boya a phela fote. (1 Makor. 15:9-11; 2 Makor. 11:23-27) Pawulo ke mo a sa kamake gore Jeso o yye a tsusiwa bakgung la gore ke mo a tikemisele go kgwela so a se dumelang. Ayitsano tsotsone a di make gore le wene o sa kamake taba ya gore Jeso o yye a tsusiwa bakgung? Fote tsotsone a di nape di tiyisa tumelo yago ga taba ya tsogo? w20.12 3 ¶8-10

Di nyaka re tiputsise gore: ‘Ayitsano ke dula ke ya megahlanong ya phutego?’ Mo re ya ga megahlano yo mokgahlo wa Jehova wo re makeleng yona, magageru ma segela ma re tiyisa ke mokane ra tikwa re mamarele ka matla ga tso tsa Modimo. (Mat. 11:28) Fote re ka tiputsisa gore: ‘Ayitsano ke nalo letheto la gabutši la go tipalela Baebele?’ Mo nkare go na le bo o dulang nabo ka mutšing, ayitsano le tshwara morapelo wa mutši beke ye nngwana le ye nngwana? Le mo o dula o le ntoši, ayitsano o titshwarela morapelo wa mutši go tshwana le nkare o na le bo o dulang nabo? Ayitsano o maka so o ka se kgonang ga mmereko wa go tšhomayela le wa go maka batho malata? Ke ntaba re tshwanele go tiputsisa diputsiso tsone? Baebele yi re botsa gore Jehova wa di kgona go nyakolla so se leng ka dipelong le ka menaganong ya rune, byalo le rune di nyaka re tinyakolle. (1 Dikor. 28:9) Mo re di bona gore nkare di nyaka re tšhentšhe ga dilo tsa go tshwana le tso re nyakang go di segelela, ka mokgo re titshwereng ka gona le ka mokgo re naganang ka gona, di nyaka re kgopele Jehova gore a re gelepe re tšhentšhe. Yowa ke nako ya go tilukiselela ga tsa go sasamela tso di nyoko re tlelang go se botala. w20.09 19 ¶19-20

Jeso o yye a maka mošupetso wa go šupetsa tso di nyakegang gore motho a thogo ba lelata lage. O bolabodiye ka motho wa go nyaka go yaga ntlo le ka kgoši ya go nyaka go ya ntweng. Jeso o yitseri mo motho a nyaka go yaga ntlo, di nyaka “a thomise ka go dula fase ke mokane a balele gore yi nyoko mo nyaka bokaye,” gore a thogo fetsa moyago wone fote o hlayye gore di nyaka kgoši “yi thomise ka go dula fase ke mokane yi theetsele bo ba yi yeletsang,” gore yi thogo bona gore ayitsano masole ya yona ma ka di kgona go hlula ntweng. (Luk. 14:27-32) Ka mokgonone, Jeso ne a di tšiba gore mo motho a nyaka go ba lelata lage di nyaka a thomise ka go lebelela gabutši gore nje o ko di kgoneng. Ka taba lowa, di nyaka re hlohletsele bo re tšhutang nabo Baebele gore re thogo tšhuta beke ye nngwana le ye nngwana. Ka taba la gore ke wene thitšhere, di nyaka o lukiselele gabutši tso le nyoko di tšhutang nako ye nngwana le ye nngwana. O nagane ka ye o tšhutang naye Baebele le ka mokgo o ka mo hlatollelang ka gona gore a thogo kwisisa tso a di tšhutang a boye a di berekise.—Neh. 8:8; Diy. 15:28a. w20.10 7 ¶5; 8 ¶7

Tso Jeso a di tšhutisiyeng di kwala gabutši. Di nyaka re tšhutise batho dilo tso a di hlayyeng. Mara, re sa takisi taba ye kgolo maahlo. Jeso a sanka a re: ‘Ba tšhutiseneng dilo ka mokana ga tsona tso ke le butsiyeng tsona.’ Mara, o yitseri: Ba tšhutiseneng “go latelela dilo ka mokana ga tsona tso ke le butsiyeng tsona.” Gore re thogo maka tsotsone mo re tšhutisa bo re tšhutang nabo Baebele, a di nyake re fo ba mathitšhere nje mara di nyaka re boye re ba yetetse. (Meber. 8:31) Go “latelela” tso ba go botsang tsona di rela go theetsela. Mo re tšhutisa ba bangwana Baebele, re ba re ba tšhutisa so Modimo a se nyakang ho ga rune. Mara a di nyake re maka ka gonyana. Di nyaka re tšhutisa bo re tšhutang nabo Baebele gore ba berekise tso ba di tšhutiyeng mo ba kene ba phela. (Joh. 14:15; 1 Joh. 2:3) Mo re beyisa, re ka šupetsa bo re tšhutang nabo Baebele gore ba ka berekisa ditšhiko tsa Baebele byang mo ba le sekolo, mmerekong kela mo ba tijabodisa. O ka rapelela moya wa Jehova wa go hlawolega o kene o na le bo o tšhutang nabo Baebele gore wo thogo ba yetetsa.—Joh. 16:13. w20.11 2-3 ¶3-5

Malata ya Jeso ne ma gahlana le tsa go ma ghula. Mo re beyisa, ne go se ka mokana ga wona ya ma nang le Mangwalo. Ne ma se na dithulusi tsa go tšhuta ka tsona go tshwana le ka mokgo rune re nang natso lekgono. Fote ke mo di nyaka gore malata ya Jeso ma tšhomayelele batho ba go bolabola mebolabolo ya go tlala ya mehlobohlobo. Le mo malata ya Jeso ma kene ma hlakana le tsa go ma ghula tsa mošaga wonone, ma yye ma hlula ntshitshire yone, go so fete mengwaga ya go tlala ke mo ma šele ma tšhomayele ditaba tsa go bafala ga “batho ka mokana ga bona ka tlase ga legedimo.” (Makol. 1:6, 23) Ga dinako tso tsa rune, Jehova o sa na a ya mahlong a yetetsa batho bage le go ba tiyisa. Ka matlamatla o ba yetetsa a berekisa Lentsu lage lo le ngwadiwweng le hlohletsela ke moya wage. Ka ho Baebeleng, ke mo re krayang mantsu ya Jeso a ma butsiyeng malata yage gore ma ye mahlong ka mmereko wo a šeleng a wo thomme. (Mat. 28:19, 20) Jehova aa hlawolane, o yitseri ditaba tsa go bafala di nyoko sabalatsiwa “ga setšhaba se sengwana le se sengwana, setšo, mmolabolo le ga batho.” (Kut. 14:6, 7) Wa di nyaka gore molayetsa wa Mmušo wo kraye ke batho ka mokana ga bona. w20.10 21 ¶6-8

Kgoši Dafita ke mo a kwana le “molawo wa Jehova” ka matla. (Pis. 1:1-3) Dafita ke mo a di tšiba gore Jehova o phonisa bo ba gore ba tinyanafatsiye mara ba magetla aa kwane nabo. Byalo, Dafita o yye a lesetsa molawo wa Modimo wo maka gore a tšhentšhe ka mokgo a naganang. O ngwadiye gore: “Ke nyoko thanaka Jehova, yene wa go n’yetetsa. Le mo go le bošego tso ke di naganang di ya n’wolola.” (Pis. 16:7) Mo nkare re ya resa re tinyanafatsiye, re nyoko lesetsa Lentsu la Modimo le wolola tso re di naganang re soko bane re di maka. Re nyoko kwa Lentsu la Modimo le re: “Tsela ke yowa. Ariye ka yona.” Le nyoko re buyisa tseleng mo re keketlela ku kgole. (Jes. 30:21) Phela di nyoko gelepa rune beng mo re theetsela Jehova. (Jes. 48:17) Mo re beyisa, re ko ba re phonne go tšebisa ke mo di nyaka gore ye mongwana a re wolole. Fote re nyoko šutela thina ka matla ga Jehova ka taba la gore re ya di tšiba gore o re tseya re le bana bage bo a ba nyakang ka matla.—Maheb. 12:7. w20.11 20 ¶6-7

Di ka makega gore tsotsone di yye dya hlupa le ba bangwana ku Korente. (1 Makor. 15:12) Fote, ba bangwana di ka makega gore tsogo ne ba yi tseya go se ya mannete, ba tseya gore motho wa go sinya o tshwana le gore o “kgwile” mara mo go ba Mokreste go tshwana le gore o “tsusiwwe.” Le mo mabaka ya bona ma bonala nkare maa kwala mara mo ba phiga taba ya tsogo di ra gore a ba na tumelo. Mo nkare Modimo a sanka a tsosa Jeso, di ra gore go lepolla nke go si šiyo fote re sa tshwarediwa ga tso re di sinnyeng. Byalo bo ba gore ba phiga taba ya tsogo ba ko di kweng. (1 Makor. 15:13-19; Maheb. 9:12, 14) Pawulo wa lepostola ne a yi tšiba gabutši nnete ya gore “Kreste [o yye] a tsusiwa bakgung.” Tsogo yone yi phala tse dingwana ka taba la gore bo ba yyeng ba tsusiwa ba yye ba boya ba kgwa fote. Pawulo o yitseri Jeso ke yene “seyengwa sa mathomo ga bo ba yyeng ba yetsela boroko bya likgu.” Ke yene wa mathomo wa go tsusiwa go le motho wa moya fote ke yene wa mathomo ga batho ka mokana ga bona wa gore o yye a ya legedimong.—1 Makor. 15:20; Meber. 26:23; 1 Pet. 3:18, 22. w20.12 5 ¶11-12

Ka dinako tsa mapostola, mogoba wa go lawola wa ku Jerusalema ke mo wo bereka ggoši gore dilo di sepele ka letheto le ka go beba ga batho ba Modimo. (Meber. 2:42) Mo re beyisa, gana hala ga 49 C.E. mo Makreste ma sa kwane ka taba ya go bollwa, moya wa go hlawolega wo yye wa yetetsa ba mogoba wa go lawola gore ba sa takisi taba yone maahlo. Hala phutego yi sa kwana ka taba yowa, ne go ko ba go fediye ka mmereko wa go tšhomayela. Le mo mapostola le bagolo ne go le Majuda, a sanka ba lesetsa setšo sa Majuda se ba kutšetsela kela ba kutšutsela ke bo ba kwanang naso. Mara, ba yye ba tshepela ga Lentsu la Modimo le moya wa go hlawolega gore wo ba yetetse. (Meber. 15:1, 2, 5-20, 28) Di felele kaye? Jehova o rufiye sepheto sa bona, ba dula ba bebiye fote ba le ggoši ke mokane mmereko wa go tšhomayela wa ya mahlong. (Meber. 15:30, 31; 16:5) Ga dinako tsa rune, mokgahlo wa Jehova wo dula wo karakara ka matla gore batho ba Jehova ba make dilo ka letheto le ka go beba. w20.10 22-23 ¶11-12

Re ka sa kgone go maka mebereko ye mengwana ka ho ga Jehova ka taba la go tsofala, bokoka kela tse dingwana. Mo nkare re ga seyemo sa mošaga wonone, re ka tšhuta ga Kgoši Dafita. Mo ba mmotsa gore a yi yene ye a nyoko yagang tempele ya Modimo, Dafita o yye a fo thega ye Modimo a mo hlawodiyeng gore a make mmereko wone. Dafita o yye a boya a neyela ka matla ga mmereko wone. Nnete wone ke mošupetso wa gabutši wo re ka wo latelelang! (2 Sam. 7:12, 13; 1 Dikor. 29:3-5) Mogageru ye ba reng ke Hugues wa gore o dula Fora, ka taba la go lwala le go sa sa kgona go maka mmereko wa gore wo lula ka mo gaye, o yye a lesetsa go bereka go le mogolo. O ngwadiye gore: “Ke yye ka thomisa ke tikwa ke kgongwele ka matla fote ke fo ba morwalo. Mara mo nako yi kene yi ya, ke yye ka bona di mperekela go yamogela seyemo saka, fote le mo go na le tsa go nkgerela ne ke dula ke jabolela go berekela Jehova. Go fo tshwana le Ghidiyoni le 300 ya banna bo ne a bereka nabo—ka mokana ga bona ne ba tinnwe—nka sa lahle tewu!”—Bay. 8:4. w20.12 25 ¶14-15

Mo Johane wa lepostola a ngwala ka lephelo la Jeso o berekisiye mantsu ya go tshwana le go “nyakanana” le go “nyakiwa” ga tleletlele go feta ka mokgo ma berekisiwweng ga kararo ya di Ebangedi tso di ngwadiyeng ke ba bangwana. So a se tšhutisang Makreste ke gore se sengwana le se sengwana so ma se makang di nyaka se kutšetsela ke go nyakanana. (1 Joh. 4:10, 11) Mara Johane di mo tsere nako go tšhuta tsotsone. Mo Johane go sa le mosogana, ke mo a sa dule a šupetsa go nyakanana. Mo re beyisa, go yye gwa ba le nako ye nngwana mo Jeso le malata yage ba yyeng Jerusalema ba feta ka la Samariya. Batho ba mosekola wo mongwana wa gana hone Samariya ba yye ba gana go ba yamogela. Johane o yye a hlaya gore nkare go ka segela mollo wa go tšwa legedimong wo tle wo gagare batho ba hone dimitšaneng ka moka! (Luk. 9:52-56) Ka dinako tse dingwana, Johane le bhuti wage Jakobo ba yye ba rometsela mmane wa bona ga Jeso gore a ba kgopelele ditulo tsa mayemo Mmušong wage. Mo mapostola ya mangwana ma di kwelela tso Jakobo le Johane ba di makiyeng, ma yye ma bela stereka! (Mat. 20:20, 21, 24) Mara le mo Johane a yye a maka tsa go kekema, Jeso o f’lo mo nyaka go na go le ka mokgonone.—Joh. 21:7. w21.01 8-9 ¶3-4

Mo Jehova a segelela dipheto o dula a naganne ka ba bangwana. Mo re beyisa mo a šinya a maka gore go be le lephelo ke mo a sa makele yene mong mara ke mo a maka gore le bangwana ba le jabolele. A go na le ye ne a ka mo tšhofa gore a re neye Morwayi wage gore go be sehlabelo. O hlawodiye go maka tsotsone ka taba la gore ne a nyaka go gelepa rune. Jeso le yene o segelele dipheto tsa gore ka matlamatla ne di gelepa batho ba bangwana. Mo re beyisa, o f’lo ya mahlong a tšhutisa moririmane a sa llele go khutsa. (Mar. 6:31-34) Hlogo ya gabutši ya mutši ya di tšiba gore selo sa go thathafa ka matla so yi tshwaneleng yi se make ke go segelelela ba mutši wa yona dipheto fote tsotsone yi di tseyela gedimo ka matla. O kganela kgole ga taba ya go segelela dipheto go ya ka mokgo yene a tikwang ka nako yonone. Mara o lesetsa Jehova gore a mo tšhutise. (Diy. 2:6, 7) Ka mokgonone o nyoko thogo nagana ka batho ba bangwana go seng ka yene mong. (Mafil. 2:4) Mara mo monna a leketsa ka matla go latelela mošupetso wa Jehova le Jeso o nyoko ba hlogo ya mutši ya gabutši ka matla. w21.02 7 ¶19-21

Nakwela Kgoši Asa go sa le mosogana, ke mo go le motho wa go tipeya fase wa gore fote o na le lešiši. Mo re beyisa, mo ba mmeya gore go be kgoši ka nthago ga papage Abija, o yye a thoma letsima la go tlosetsela medimo ya dithombhe. Fote “o butsiye Majuda gore ma nyakane le Jehova Modimo wa bokokwane wa bona fote ba mamarele Molawo le tso a di hlayang.” (2 Dikor. 14:1-7) Fotefote, nakwela Leitopiya lo ba reng ke Zera le kutulugela Juda le na le 1 000 000 ya masole, Asa o yye a šupetsa gore o hlalefiye ke mokane a kgopela Jehova gore a mo gelepe, a re: “Barena Jehova, gago a di hlupe gore bo o ba gelepang ba tlele kela a ba na matšhika. Re gelepe Jehova Modimo wa rune, ka taba la gore re tshepiye wene.” Mantsu yawa ya go natefa ma šupetsa gore Asa ke mo a di tshepa tsa gore Jehova a ka phonisa yene le batho bage. Asa ke mo a mo tshepa ga Papage wa legedimong, fote “Jehova o yye a hlula Maitopiya.” (2 Dikor. 14:8-12) Le wene wa yi bona taba yowa ya gore go lwa le 1 000 000 ya masole a yi go kgana, mara Asa o yye a phomelela. w21.03 5 ¶12-13

Baebele yi bolabola ka batho ba bangwana ba gore a baa yenela ba gore ne ba šupetsa go nyakanana tsa mannete. Tseya ka mošupetso wa Jonathane le Dafita. Baebele yi re: “Jonathane le Dafita ke mo ba mamarelanne ka taba la senghana sa bona sa thina, fote Jonathane o yye a thomisa go mo nyaka ka matla go fo tshwana le ka mokgo a tinyakang.” (1 Sam. 18:1) Jehova o hlawodiye Dafita gore go be kgoši ka nthago ga Sawulo. Ka nthago ga hone, Sawulo o yye a jelasela Dafita a boya a nyaka le go mmolaya. Mara Jonathane morwayi wa Sawulo a sanka a di kena tsone tsa papage tsa go nyaka go bolaya Dafita. Jonathane le Dafita ba tshepisanne go dula go le banghana le mo go ka teya leduma la mošaga mang. (1 Sam. 20:42) Ke mo go na le dilo tsa go tlala tso ne di ka sinya senghana sa Jonathane le Dafita mara sa go makatsa ke gore ba f’lo ya mahlong ba kene ba na le senghana sa thina. Mo re beyisa, Jonathane ne a feta Dafita ka 30 ya mongwaga. Jonathane nke a fetsiye ka gore a ka sa nghanelane le mosogana wa gore a tšibi selo ka tsa lephelo. Le mo go le ka mokgonone, Jonathane a sanka a tseyela Dafita fase. w21.01 21-22 ¶6-7

Jeso o tshepisiye malata yage gore ma nyoko jabola tsa mannete. Fote a boya a pasopisa bo ba mo nyakang ka matla gore ba nyoko gahlana le tsa go ba ghula. (Mat. 10:22, 23; Luk. 6:20-23) Go ba malata ya Kreste di re jabodisa ka matla. Mara re ka tikwa byang mo di ka makega gore re phigise ke mašaga ya rune, re hlorisa ke ba mmušo kela mo bo re berekang nabo kela bo re kenang nabo sekolo ba re gapeletsa go maka tsa go sa loka? Dya kwisisega gore tsotsone di ka maka gore re šekele. Batho a ba tseyi taba ya go hlorisiwa go le selo so se ka makang gore motho a jabole. Mara sosone ke so Lentsu la Modimo le reng re se make. Mo re beyisa, Jakobo wa gore ke lelata o ngwadiye gore mo le gahlana le tsa go le ghula le sa nape le ro lelemela le jabole. (Jak. 1:2, 12) Fote Jeso o hlayye gore re dule re jabodiye le mo re kene re hlorisiwa. (Mat. 5:11) Jehova o hlohletsele Jakobo gore a ngwalele Makreste a ma yeletse ka dilo tso ma ka di makang gore ma thogo ya mahlong ma jabodiye le mo go na le dintshitshire. w21.02 26 ¶1-2; 27 ¶5

Ka dinako tsela tsa Thimothi, go na le bo ba yyeng ba sa tseyele gedimo taba ya gore ba berekisana le Modimo. Gana hone re tšhela Demase, Fayijelasi, Hemojinisi, Himeniyase, Alekzanda le Felithasi. (1 Thim. 1:19, 20; 2 Thim. 1:15; 2:16-18; 4:10) Batho bowa ka mokana ga bona ba šupa nkare ba yye ba ba nayo tumelo ya go tiya, mara ba yye ba yi lesetsa yi ba khwanyogela ka taba la gore ne ba sa yi tseyele hlogong. Sathane o leketsa go re lahlisa makolwane ya Jehova a re neyyeng wona, o di maka byang tsotsone? Bona ya mangwana ya mathayithayi ya a ma berekisang. O re kutšetsela ka dilo tso re tijabodisang ka tsona le tso re di bonang mo ga TV kela inthaneteng gore re thogo maka dilo tsa go befa tsa gore di nyoko maka gore re keketlele kgole le nnete. O berekisa dithaka tsa rune gore di re fukule kela o berekisa go hlorisiwa gore re lesetse mmereko wa rune wa go tšhomayela. Fote o leketsa go maka gore re keketlele kgole le nnete go re nabetsa gore re theetsele bo ba go kgeloga mo ba bolabola “matsaka ya ba reng ke ‘go tšiba’.” Mo re ka sa pasope, o ka kraya re šepisa ho nneteng ka gonyana ka gonyana.—1 Thim. 6:21. w20.09 27 ¶6-8

Ayitsano o na le monghana kela lešaga la gore le yye la go sepela ka fase? Mo nkare go ka mokgonone, o ka tšhuta se sengwana mo o ka bala ka morwayi wa Kgoši Dafita ye ba reng ke Absalomo. (2 Sam. 15:5-14, 31; 18:6-14) Mo o kene o naganne ka taba yone o yi badiyeng, thuletsela Jehova gore so motho yene a go makiyeng sona se go kwaletsiye go segela kaye. (Pis. 6:6-8) Sa go latela, tiputsise gore mo dilo tsowa ka moka di kene di makega, Dafita o tikwa byang mara. Ke mo a mo nyaka ka matla ga Absalomo fote le ga Ahitofele ke mo a mo tshepa. Mara ka babedi ga bona ba yye ba mo sepela ka fase. Ba mo kwisiye go baba ka matla, ba boya ba ro leketsa le go mmolaya. Ke mo di ka makega gore Dafita a sa sa tshepa le banghana bage ba bangwana, a sola gore le bona ba šele ba kenne ke tsa Absalomo. Ka nako yone, ke mo a ka fo tinaganela yene mong, a bona go le kawone gore a fo nyamalala a ntoši. Kela ke mo a ka fo dulela go šekela, a kgongwele. O rapele Jehova gore a mo gelepe. A kgopela le banghana bage gore ba mo gelepe. Mo a fetsa go segelela dipheto, ke mo a sa sa sinya nako. Ga Jehova le ga banghana bage, aa lesetsa go ba tshepa. w21.03 15 ¶7-8; 17 ¶10-11