Timathokoza Mulungu ndi Khristu Chifukwa cha Ufulu Womwe Tidzakhale Nawo

Kodi mukulimbana ndi mavuto ati pa moyo wanu? Kodi ndinu mutu wabanja ndipo muli ndi maudindo ambiri? Kodi ndinu kholo koma mulibe mwamuna kapena mkazi ndipo mumafunika kusamalira banja lanu? Kodi ndinu wachinyamata amene amapita kusukulu ndipo mumavutitsidwa ndi anzanu a kusukuluko? Kapena kodi mukulimbana ndi matenda kapenanso mavuto obwera chifukwa cha ukalamba? Aliyense akukumana ndi mavuto. Akhristu ambiri akukumana ndi mavuto angapo nthawi imodzi. Komabe tikudziwa kuti posachedwapa Yehova adzathetsa mavuto onsewa.​—2Ak 4:​16-18.

Panopa timalimbikitsidwa kudziwa kuti Yehova amamvetsa mavuto athu, amayamikira kukhulupirika ndi kupirira kwathu komanso kuti watisungira madalitso osaneneka. (Yer 29:​11, 12) Nayenso Yesu amachita chidwi ndi zimene zikutichitikira. Iye amatitsimikizira kuti ‘ali nafe pamodzi’ pamene tikugwira ntchito imene anatisiyira. (Mt 28:20) Tikamaganizira za ufulu umene tidzakhale nawo mu Ufumu wa Mulungu, chikhulupiriro chathu chimalimba komanso timakhala okonzeka kupirira mavuto omwe tikukumana nawo.​—Aro 8:​19-21.

ONERANI VIDIYO YAKUTI, PITIRIZANI KUYANG’ANITSITSA YESU PAMENE MPHEPO YAMKUNTHO IKUBWERA​—MADALITSO AMENE UFUMU UDZABWERETSE NDIPO KENAKO YANKHANI MAFUNSO OTSATIRAWA:

• Kodi anthu anakhala bwanji otalikirana ndi Mulungu, ndipo zotsatira zake ndi zotani?

• Kodi anthu omwe ndi okhulupirika kwa Yehova akuyembekezera zotani m’tsogolo?

• N’chiyani chikuthandiza kuti zimene akuyembekezerazo zidzatheke?

• Kodi ndi madalitso ati a m’dziko latsopano amene inuyo mukuyembekezera mwachidwi?