ZIMENE ACHINYAMATA AMADZIFUNSA

Kodi Ndiyenera Kubatizidwa?—Gawo 1: Tanthauzo la Kubatizidwa

Chaka chilichonse, achinyamata ambiri amene akukulira m’banja la Mboni za Yehova amabatizidwa. Kodi inuyo mukuganizira zobatizidwa? Ngati zili choncho, poyamba muyenera kumvetsa tanthauzo la kudzipereka kwa Mulungu komanso kubatizidwa.

Kodi kubatizidwa kumatanthauza chiyani?

Mawu oti kubatizidwa omwe amapezeka m’Baibulo amatanthauza kumizidwa thupi lonse m’madzi osati kungowazidwa ndi madzi basi. Mawuwa amakhalanso ndi tanthauzo lophiphiritsa.

Kumizidwa m’madzi mukabatizidwa kumasonyeza kuti mwasiya kumangochita zimene zimakusangalatsani inuyo.
Kutulutsidwa m’madzi kumasonyeza kuti mwayamba moyo watsopano wochita zimene zimasangalatsa Mulungu.

Mukabatizidwa mumasonyeza pa gulu kuti Yehova ali ndi ulamuliro wosankha zoyenera ndi zosayenera komanso kuti mwalonjeza kuchita zimene iye amafuna.

Zoti muganizire: N’chifukwa chiyani mungafune kusonyeza pa gulu kuti mwalonjeza kumvera Yehova? Onani 1 Yohane 4:19 ndi Chivumbulutso 4:11.

Kodi kudzipereka kwa Mulungu kumatanthauza chiyani?

Musanabatizidwe muyenera kudzipereka kwa Yehova muli nokha. Kodi mungachite bwanji zimenezi?

Muyenera kupemphera kwa Yehova muli nokha n’kumamuuza kuti mwalonjeza kudzamutumikira mpaka kalekale. Muyenera kumuuzanso kuti muzidzachita zimene iye amafuna zivute zitani mosatengera zimene anthu ena angasankhe kuchita.

Mukabatizidwa mumasonyeza pa gulu zimene munachita panokha podzipereka kwa Mulungu. Mumasonyeza kwa anthu ena kuti mwasankha kuchita zimene Yehova amafuna m’malo mochita zofuna zanu.—Mateyu 16:24.

Zoti muganizire: N’chifukwa chiyani moyo wanu umakhala wabwino kwambiri mukayamba kuchita zimene Yehova amafuna? Onani Yesaya 48:17, 18 ndi Aheberi 11:6.

N’chifukwa chiyani kubatizidwa n’kofunika?

Yesu ananena kuti ophunzira ake ayenera kubatizidwa. (Mateyu 28:19, 20) Choncho masiku anonso, Akhristu ayenera kubatizidwa. Baibulo limanena kuti munthu ayenera kubatizidwa kuti adzapulumuke.—1 Petulo 3:21.

Koma muyenera kubatizidwa chifukwa chokonda Yehova ndi kuyamikira zimene iye amachita. Muyenera kukhala ndi mtima umene wolemba masalimo unali nawo polemba kuti: “Yehova ndidzamubwezera chiyani pa zabwino zonse zimene wandichitira? . . . Ndidzaitana pa dzina la Yehova. Ndidzakwaniritsa malonjezo anga kwa Yehova.”—Salimo 116:12-14.

Zoti muganizire: Kodi Yehova wakuchitirani zinthu zotani, nanga mungamubwezere bwanji? Onani Deuteronomo 10:12, 13 ndi Aroma 12:1.

Zimene achinyamata anzanu amanena

“Mukadzipereka kwa Yehova mumamulonjeza zinazake ndipo kuchita zimenezi ndi nkhani yaikulu kwambiri. Koma munthu wodzipereka kwa Yehova amapeza madalitso ambiri. Zili choncho chifukwa Yehova angatisamalire bwino kwambiri kuposa mmene tingachitire.”—Mijin.

“Yehova wasonyeza kale kuti amakukondani inuyo. Mukabatizidwa mudzasonyeza kuti mumamukonda kwambiri iyeyo. Kukhala wobatizidwa ndi mwayi waukulu komanso kumabweretsa madalitso ambiri.”—Ember.

“Kusankha kudzipereka kwa Mulungu komanso kubatizidwa ndi chinthu chofunika kwambiri chimene mungasankhe pa moyo wanu. Koma simuyenera kuopa. Ngati mwakonzekera komanso mwasankha kuchita zimenezi pa zolinga zabwino, ndi chinthu chabwino kwambiri chimene mungasankhe pa moyo wanu wonse.”—Julian.

Zimene anthu ena amanena komanso zoona zake za nkhaniyi

ZIMENE ANTHU ENA AMANENA — Anthu aakulu okha ndi amene ali nzeru zokwanira kuti abatizidwe.

ZOONA ZAKE — Munthu amasonyeza kuti ndi wanzeru osati chifukwa cha msinkhu wake koma chifukwa chakuti amakonda Yehova komanso ndi wofunitsitsa kumumvera. Ali aang’ono, Yosefe, Samueli ndi Yosiya anasonyeza kuti ndi anzeru. Masiku anonso, achinyamata ambiri akuchita zimenezi.

Baibulo limati: “Mnyamata amadziwika ndi ntchito zake, ngati zochita zake zili zoyera ndiponso zowongoka.”—Miyambo 20:11.

ZIMENE ANTHU ENA AMANENA — Ngati anzanu akubatizidwa, nanunso muyenera kubatizidwa.

ZOONA ZAKE — Munthu ayenera kusankha yekha kudzipereka kwa Mulungu komanso kubatizidwa ndipo ayenera kusankha zimenezi ndi mtima wonse. Sikuti ayenera kuchita zimenezi chifukwa wafika pa msinkhu winawake ndipo ndi zimene anthu ena anachita kapena ndi zimene ena amayembekezera.

Baibulo limati: “Anthu [a Mulungu] adzadzipereka mofunitsitsa.”—Salimo 110:3.

ZIMENE ANTHU ENA AMANENA — Ngati simunabatizidwe, simungaimbidwe mlandu pa zimene mumachita.

ZOONA ZAKE — Mumayankha mlandu kwa Yehova osati pambuyo pobatizidwa koma pambuyo podziwa zimene iye amaona kuti ndi zoyenera ndi zosayenera.

Baibulo limati: “Ngati munthu akudziwa kuchita chabwino koma sakuchichita, akuchimwa.”—Yakobo 4:17.

ZIMENE ZINGAKUTHANDIZENI: Ngati mumaopa udindo wokhala Mkhristu wobatizidwa, mungachite bwino kudzifufuza kuti mudziwe chifukwa chake mumaopa komanso zimene zingakuthandizeni kuchotsa manthawo. Ndi bwino kuwerenga Chaputala 37 m’buku la Mayankho a Zimene Achinyamata Amafunsa, Buku Lachiwiri.