Achinyamata Akufunsa Kuti . . .

Nchifukwa Chiyani Sinditha Kumvetsera?

“Nthawi zina zimangochitika mosayembekezereka. Ndimakhala ndikumvetsera pamsonkhano wampingo, ndiye kenaka, mwadzidzidzi, ndimayamba kulingalira zina. Pakapita mphindi khumi, ndimayambanso kumvetsera.”—Jesse.

“MVETSERA!” Kodi mumamva aphunzitsi anu kapena makolo akukuuzani zimenezo kaŵirikaŵiri? Ngati mumatero, ndiye kuti mwinamwake inu muli ndi vuto lakusamvetsera. Zotsatira zake, mukhoza kumalakwa m’kalasi. Ndiye mudzapeza kuti ena sakondwa nanu, amangokusiyani nkumati mwamwa moŵa kapena mankhwala osokoneza bongo, kapenanso kuti ndinu wamwano.

Kuposa apo, kusamvetsera kukhoza kuwononga khalidwe lanu lauzimu. Ndiponso Baibulo limalamula kuti: “Yang’anirani mamvedwe anu.” (Luka 8:18) Ndiponsotu Akristu amalamulidwa kuti ‘ayenera kusamaliradi’ zinthu zauzimu. (Ahebri 2:1) Tsono ngati zimakuvutani kumvetsera, uphungu umenewu udzakuvutani kuumvera.

Kodi vuto likhoza kukhala chiyani? Nthaŵi zina kusamvetsera kumakhala chifukwa cha matenda akuthupi. Mwachitsanzo, ofufuza ena amakhulupirira kuti matenda a Attention Deficit Disorder amapangitsidwa ndi kuwonongeka kwa makemikolo amene amathandiza kuti mauthenga aziyenda m’mitsempha ya ubongo yonyamula mauthenga.a Achinyamata ena amakhala akudwala matenda amene sanadziŵike, monga kusamva kapena kusaona bwino. Zimenezinso zikhoza kulepheretsa munthu kumvetsera. Ofufuza anapeza kuti achinyamata kaŵirikaŵiri ndiwo amavutika kumvetsera kusiyana ndi akuluakulu. Motero kusamvetsera nkowanda kwa achinyamata, ngakhale kuti nthaŵi zina mwa apo ndi apo kumachitika chifukwa cha matenda.

Kusintha kwa Kalingaliridwe Kanu

Ngati mulephera kumvetsera, zingakhale choncho chifukwa chakuti mukukula. Mtumwi Paulo analemba kuti: “Pamene ndinali mwana, ndinalankhula ngati mwana, ndinalingirira ngati mwana, ndinawerenga ngati mwana; tsopano ndakhala munthu, ndayesa chabe zachibwana.” (1 Akorinto 13:11) Inde, pamene mukukula, kalingaliridwe kanu kamasintha. Malinga ndi buku lakuti Adolescent Development, “luso latsopano la kulingalira zinthu . . . limayamba pamene mukuyamba kusinkhuka.” Mumakhala ndi luso lomvetsa ndi lopenda zinthu zovuta kumva. Mumayamba kumvetsetsa za makhalidwe, zoyenera kuchita, ndi zina zambiri. Mumayamba kulingalira za m’tsogolo mwanu monga munthu wamkulu.

Tsono nanga vuto limakhala chiyani? Popeza mumakhala ndi malingaliro onseŵa ndiponso maganizo ndi mfundo iyi ndi iyo zikuyenda mu ubongo wanu ndiye mumasokonezeka. Simuganizanso mochepekera monga mwana. Tsopano ubongo wanu umakupangitsani kulingalira ndi kupereka mafunso pa zinthu zomwe mukuona ndi kumva. Ndemanga imene mphunzitsi wapereka ikhoza kukupangitsani kuleka kulingalira zomwe mumaganiza. Koma pokhapokha mutaphunzira kaye kudziletsa, mudzakhala mukupitidwa osamva zinthu zofunika. Mokondweretsa, Baibulo limati munthu wabwinoyo Isake amatha nthaŵi ali chete kulingalira. (Genesis 24:63) Mwinamwake kumakhala ndi kanthaŵi tsiku lililonse kupumula, kulingalira, ndi kuona bwino zomwe zinakusokonezani mwina kungakhale kothandiza kuti muzisumika maganizo pa zinthu nthaŵi zina.

Malingaliro ndi Mahomoni

Malingaliro anu akhozanso kukhala chinthu chokusokonezani. Mukhoza kuyesa kuika nzeru zanu zonse pa zomwe mukuŵerenga kapena kumvetsera, koma mupeza kuti nokhanokha mwayambanso kulingalira zinthu zina. Mumasinthasintha nthaŵi zina kukhalako wonyansidwa ndi zinthu nthaŵi zina wosangalala, wodandaula mwina wodzimva kuti mukuchita bwino. Musadandaule! Sikuti mwasokonezeka nzeru. Kwenikweni zimangokhala mmene mahomoni akuchitira m’thupi mwanumo. Zomwe zikuchitikazo nzimene zimachitika munthu akamakula.

Kathy McCoy ndi Charles Wibbelsman analemba kuti: “Pa zaka zimene munthu amakhala akusinkhuka amalingalira zambiri . . . Kakhalidwe kameneka ndiko kukhala wachinyamata. Mbali ina zikhoza kukhala chifukwa cha kupanikizika maganizo chifukwa cha kusintha kumene kukukuchitikirani tsopano.” Kuwonjezera apo, tsopano mukufika pa “unamwali” wanu—nthaŵi imene zilakolako zakugonana zimakhala zazikulu kwambiri. (1 Akorinto 7:36) Mlembi wotchedwa Ruth Bell anati: “Kusintha kwa thupi pa unyamata kapena unamwali kumayambitsa chilakolako chachikulu cha kugonana. Mwina mudzapeza kuti mukulingalira kwambiri zakugonana, pa zinthu zazing’ono mwayamba kale kulakalaka kugonana ndi munthu wina, ngakhale kumangokhalira kuganiza za kugonana basi.”b

Jesse, yemwe anatchulidwa poyamba paja, amavutika chifukwa malingaliro ake amayendayenda chinthu chomwe nchofala kwa achinyamata: “Nthaŵi zina ndimalingalira za atsikana kapena mavuto ena amene ndili nawo kapena zimene ndidzachita m’tsogolo.” M’kupita kwa nthaŵi vuto la kuyendayenda kwa malingaliro lidzatha. Padakali pano, yesetsani kukhala odziletsa. Mtumwi Paulo analemba kuti: “Ndipumphuntha thupi langa, ndipo ndiliyesa kapolo.” (1 Akorinto 9:27) Pamene muphunzira kuwongolera malingaliro anu, ndipo pamenenso mungathe kuika nzeru pa zimene mukumvetsera.

Mmene Mumagonera

Thupi lanu limene likukulirakulira limafuna kuti muzigona kwambiri kuti mukule bwino ndi kuthandizanso kuti ubongo wanu uthe kulingalira bwino zinthu zosiyanasiyana zimene mumakumana nazo tsiku ndi tsiku. Koma, achinyamata ambiri amadzipangitsa kukhala otangwanika mwakuti amagona kanthaŵi kochepa chabe. Dokotala woona za mitsempha yonyamula mauthenga anathirapo ndemanga kuti: “Thupi siliiŵala maola ambiri amene mwalimana tulo. M’malo mwake, lidzapitirizabe kukumbukira ndiye mwadzidzidzi lidzafuna kuti mulipire ngongoleyo ndipo malipiro ake ndi kuiŵalaiŵala, kulephera kusumika maganizo pa chinthu chimodzi, ndi kulingalira zinthu mochedwa.”

Ofufuza ena amakhulupirira kuti mwa kungowonjezera ola limodzi kapena kuposerapo panthaŵi imene mumagona usiku uliwonse mukhoza kukulitsa kwambiri luntha lanu la kusumika maganizo pa zinthu. Nzoona kuti Baibulo limaletsa ulesi ndi kukonda tulo. (Miyambo 20:13) Komabe nzanzeru kugona nthaŵi yokwanira kuti thupi lizigwira ntchito bwino.—Mlaliki 4:6.

Chakudya ndi Kusumika Maganizo

Vuto lina likhoza kukhala chakudya. Achinyamata amakonda kudya zamafuta ndi zotsekemera. Ofufuza amati ngakhale kuti zakudya zosapatsa thanzi zingakhale zokoma pakudya, zimaoneka kuti zimapangitsa munthu kuti asamaganize kwambiri. Kufufuza kumasonyeza kuti mutu suganiza bwino ngati mwadya zakudya zopatsa mphamvu zotchedwa carbohydrate, monga buledi, dzinthu, mpunga, kapena pasta. Mwina ichi nchifukwa chakuti ma carbohydrate amawonjezera makemikolo otchedwa serotonin mu ubongo ndipo amapangitsa munthu kuwodzera. Choncho ena mwa odziŵa za zakudya amati ngati muchita kanthu kofuna kuti mutu uziganiza kwambiri nkofuna kuti muzidya chakudya chomanga ndi kukulitsa thupi cha maproteni.

Nthaŵi Ino ya TV ndi Makompyuta

Kwazaka zambiri aphunzitsi aona kuti TV ndi mafilimu ake omwe amachitika mwamsangamsanga amapangitsa kuti achinyamata asamakhale tcheru nthaŵi yaitali kumvetsera zinthu, ndipo tsopano ena akunenanso chimodzimodzi za makompyuta. Ngakhale kuti pali kutsutsana pakati pa akatswiri ponena za mmene maluso asayansi amakono ameneŵa amawonongera achinyamata, kutha nthaŵi yambiri mukuonerera TV kapena kuseŵera maseŵera pakompyuta sikungakhale kwabwino. Wachinyamata wina anavomereza kuti: “Chifukwa cha zinthu monga maseŵera a pa vidiyo, makompyuta, ndi internet, anafe timazoloŵera kuti tipeze chimene tikufuna mwamsanga.”

Vuto nlakuti, zinthu zambiri pamoyo wathu zimapezeka pokhapokha mutayesayesa, kupirira, ndi kudekha komwe ndi khalidwe la kalekale. (Yerekezerani ndi Ahebri 6:12; Yakobo 5:7.) Choncho osamayembekezera kuti, kuti zinthu zikhale zaphindu ziyenera kuchitika mwachangu ndiponso mosangalatsa. Ngakhale kuti kuonerera TV ndi kuseŵera maseŵera a pakompyuta kungakhale kosangalatsa, bwanji osasankha maseŵera ena monga kupaka utoto, kulemba zinthunzi, kapena kuphunzira kuimba ndi chida choimbira? Maluso ngati amenewo akhoza kupititsa patsogolo luso lanu la kusumika maganizo pa chinthu chimodzi.

Kodi pali njira zina zimene mungapititsire patsogolo luso lanu lakusumika maganizo pa chinthu? Inde, zilipo, ndipo nkhani yam’tsogolo idzakambapo zina mwa zimenezi.

[Mawu a M’munsi]

[Mawu Otsindika patsamba 14]

Ofufuza amati zimaoneka kuti zakudya zosapatsa thanzi zimapangitsa munthu kuti asamaganize kwambiri

[Mawu Otsindika patsamba 14]

“Nthaŵi zina ndimalingalira za atsikana kapena mavuto ena amene ndili nawo”

[Chithunzi patsamba 13]

Kodi inu mumapeza kuti kaŵirikaŵiri mumalephera kukhala tcheru ndi kumamvetsera m’kalasi?