Mleme Waung’ono Kwambiri — Watchtower LAIBULALE YA PA INTANETI

Mleme Waung’ono Kwambiri

● Mu 1973, katswiri wina wa zinthu zamoyo, dzina lake Kitti Thonglongya, ndi anzake anagwira mileme yosiyanasiyana yoposa 50 m’phanga linalake pafupi ndi mathithi otchedwa Sai Yok ku Thailand. Iye anatumiza ina mwa milemeyi kwa Dr J. E. Hill yemwe amagwira ntchito kumalo osungira zinthu zakale mumzinda wa London. N’zomvetsa chisoni kuti Kitti anamwalira asanadziwe kuti pa mileme yomwe anatumizayo, panali mtundu wina watsopano, womwe Hill anaupatsa dzina la katswiriyu n’cholinga choti anthu azimukumbukira.

Mileme imeneyi ndi yaing’ono kwambiri kuposa mileme ina yonse yomwe anthu akuidziwa ndipo ili m’gulu la zinyama zing’onozing’ono kwambiri padziko lonse. Ndi yaitali pafupifupi masentimita atatu ndipo mapiko ake amatalika pafupifupi masentimita 13. Ili ndi mphuno yooneka ngati ya nkhumba komanso ilibe mchira ndipo makutu ake ndi aakulu.

Sipezekapezeka

Mileme imeneyi imangopezeka ku nkhalango yotetezedwa ya Sai Yok ku Thailand ndi ku Myanmar basi. Mofanana ndi mileme ina, milemeyi ikamafufuza chakudya monga tizilombo, imalira ndipo phokosolo limathandiza milemeyi kudziwa mmene iyendere kuti ikapeze chakudyacho. Komanso popeza kuti ili ndi mapiko okulirapo poyerekezera ndi thupi lake, milemeyi imatha kuuluka malo amodzimodzi kwa nthawi yaitali. Zimenezi zimathandiza kuti izitha kugwira chakudya chake m’mitengo popanda kutera. Milemeyi imakonda kukhala m’malo otentha m’mapanga. Imakonda malo amenewa chifukwa chakuti imakhala yotetezeka komanso m’malowa mumatentherako. Zimene mileme yaing’ono imeneyi imachita n’zogometsa ndipo zimasonyeza kuti Mlengi ndi wanzeru.—Chivumbulutso 4:11.

Popeza kuti milemeyi imapezeka m’madera ochepa kwambiri, ngati anthu atapanda kusamala, milemeyi ikhoza kutheratu. Anthu ena akuyesetsa kupeza njira zotetezera milemeyi, koma kudula mitengo mwachisawawa, kulambula misewu komanso kuchuluka kwa alendo odzaona malo, zikusokoneza ntchito yoteteza milemeyi moti sizikudziwika ngati ikhalekobe m’tsogolomu.

[Bokosi/Chithunzi patsamba 21]

MILEME ILIPO YAMITUNDU YOSIYANASIYANA

Padziko lonse pali mitundu pafupifupi 1,000 ya mileme ndipo pa zinyama zonse ndi mleme wokha umene umauluka. Mileme yaikulu kwambiri imalemera pafupifupi kilogalamu imodzi ndipo mapiko ake amatha kufika mamita 1.5 (1). Pamene mileme yaing’ono kwambiri imalemera magalamu awiri ndipo mapiko ake amatha kufika masentimita atatu (2).

[Mawu a Chithunzi patsamba 21]