Chifukwa Chimene Amachitira Chiwawa

ANA OSAŴERENGEKA AMAZUNZIDWA, kumenyedwa, kapena kuphedwa pa amodzi mwa malo achiwawa koposa padziko lapansi​—panyumba! Ku Denver, Colorado, U.S.A., khanda la milungu 27 linabadwa nthaŵi yake yobadwira isanakwane. Mwana wamwamuna ameneyo anakhala ndi moyo, ndipo atakhala m’magetsi m’chipatala kwa miyezi itatu, anampereka kunyumba kwa makolo ake. Patapita milungu itatu, mwanayo anabwerera m’chipatala. Chifukwa? Ubongo wake unavulala kwambiri chifukwa chogwedezedwa mwamphamvu ndi atate wake. Atatewo ananyansidwa ndi kulira kwa khandalo. Mwanayo anachita khungu ndipo anapuŵala. Mankhwala amakono anali atampulumutsa atabadwa masiku ake asanakwane koma sanathe kumpulumutsa ku nkhanza za atate wake.

Ana osaŵerengeka amazunzidwa, kumenyedwa, kapena kuphedwa pa amodzi mwa malo achiwawa koposa padziko lapansi​—panyumba! Ena amanena kuti ana ochuluka okwanira mwina 5,000 amaphedwa chaka chilichonse ndi makolo awo mu United States mokha! Komatu tsokalo silimapeza ana okha! Malinga nkunena kwa magazini ya World Health, “kuzunzidwa kwa akazi ndi amuna awo ndiko kumavulaza akazi ambiri a msinkhu wobereka” mu United States. Nanga m’maiko ena? “Mkazi mmodzi mwa atatu mpaka kuposa theka la akazi amene anafunsidwa [m’maiko omatukuka] anati anamenyedwapo ndi amuna awo.” Inde, nkhanza zikuwonjezeka, makamaka panyumba.

Amuna ambiri ndi akazi awo amafuna kuthetsa mikangano yawo mwachiwawa. M’maiko ena, makolo ndi aphunzitsi akakwiya amachita ana nkhanza. Anthu andewu amachita anthu ochepa mphamvu nkhanza monga maseŵera. Kodi nchifukwa chiyani anthu amachita chiwawa chotere?

Chifukwa Chimene Anthu Amachitira Chiwawa

Ena amanena kuti mwachibadwa anthu ngachiwawa. Pamene kuli kwakuti upandu wachiwawa wosiyanasiyana wachepa mu United States, uwo wawonjezeka pakati pa achinyamata. Ndipo ambiri ayamba kukonda chiwawa. Makampani atatu aakulu a wailesi zakanema anaŵirikiza chiŵerengero cha nkhani za upandu kaŵiri ndi kuŵirikiza katatu nkhani zokhudza mbanda. Inde, upandu ndi malonda aakulu! “Sikuti chiwawa timangochilekerera,” anatero katswiri wa zamaganizo Karl Menninger, “timaika nkhani zachiwawa pamasamba oyambirira a nyuzipepala zathu. Pologalamu imodzi mwa atatu kapena imodzi mwa mapologalamu athu anayi a pawailesi yakanema amasonyeza chiwawa pofuna kusangalatsa ana athu. Sitimangochilekerera! Anzanga, timachikonda.”

Zimene sayansi yapeza posachedwapa zikusonyeza kuti zochitika mu ubongo ndiponso pamalo okhala zimapangitsadi anthu kukhala aukali. “Zimene tonsefe tayamba kupeza nzakuti malo oipa amene ana ochuluka kwambiri akukhalamo, kwenikweni akukonzekeretsa mliri wa chiwawa,” anatero Dr. Markus J. Kruesi wa ku Chigawo Chofufuza za Ana pa Yunivesite ya Illinois. “Zinthu zochitika pamalo okhala zimachititsadi kusintha kwa makemikolo a mu ubongo zimene zimachititsa anthu kukhala ansontho kwambiri.” Zinthu monga “kusokonezeka kwa mabanja, kuwonjezeka kwa makolo opanda anzawo amuukwati, umphaŵi wosatha, ndi kumwerekera ndi mankhwala osokoneza bongo zingasinthe makemikolo a mu ubongo kuti munthu akhale waukali​—chotsatirapo chimene kale ankati sichingatheke,” likutero buku lakuti Inside the Brain (Mkati mwa Ubongo).

Akutero kuti kusintha kwa mu ubongo kumaphatikizapo kuchepa kwa serotonin, kemikolo ya mu ubongo imene akuiganizira kuti ndiyo imapangitsa munthu kusakhala waukali. Zofufuza zikusonyeza kuti moŵa ungapangitse serotonin kuchepa mu ubongo. Zimenezo zikupereka chifukwa chasayansi cha kugwirizana kumene akhala akukudziŵa nthaŵi yonseyi kwa chiwawa ndi kumwetsa moŵa.

Koma palinso china chochititsa kuwonjezereka kwa chiwawa lerolino. “Kumbukira,” likuchenjeza motero buku lokhulupirika lamaulosi, Baibulo, kuti “padzakhala nthaŵi zovuta m’masiku otsiriza. Anthu adzakhala adyera, aumbombo, odzitukumula, ndi odzikweza; . . . adzakhala osakoma mtima, opanda chifundo, odyerekeza, achiwawa, ndi oopsa; adzadana ndi abwino; adzakhala achinyengo, osasamala, ndi onyada kwadzaoneni . . . Utalikirane nawo anthu otere.” (2 Timoteo 3:1-5, Today’s English Version) Inde, chiwawa chimene tikuona lerolino ndicho kukwaniritsidwa kwa ulosi wa m’Baibulo wonena za “masiku otsiriza.”

Chinachakenso chikupangitsa nthaŵi zino kukhala nthaŵi yachiwawa kwenikweni. “Tsoka mtundu ndi nyanja,” likutero Baibulo, “chifukwa mdyerekezi watsikira kwa inu, wokhala nawo udani waukulu, podziŵa kuti kamtsalira kanthaŵi.” (Chivumbulutso 12:12) Mdyerekezi ndi magulu ake a ziŵanda anaponyedwa kuchokera kumwamba ndipo tsopano udani wawo wonse akuuchitira pa anthu. Pokhala “mkulu wa ulamuliro wa mlengalenga,” Mdyerekezi akusonkhezera “mzimu wakuchita tsopano mwa ana a kusamvera,” kupangitsa dziko lapansi kukhala malo achiwawa chosaneneka.​—Aefeso 2:2.

Choncho tingaupirire motani “mlengalenga” wachiwawa wadzikoli lerolino? Ndipo tingaithetse motani mikangano mosachita chiwawa?

[Mawu Otsindika patsamba 3]

Ana osaŵerengeka amazunzidwa, kumenyedwa, kapena kuphedwa pa amodzi mwa malo achiwawa koposa padziko lapansi​—panyumba!