Kodi Mukukonzekera Chikumbutso?

Mwambo wa Pasika womaliza umene Yesu anachita unali wofunika kwambiri. Chifukwa choti anali atatsala pang’ono kuphedwa, anakonza zoti adye Pasika ndi atumwi ake kenako n’kuyambitsa mwambo wa Chakudya Chamadzulo cha Ambuye woti uzichitika chaka chilichonse. Choncho anatuma Petulo ndi Yohane kuti akakonze chipinda choti achitiremo mwambowu. (Lu 22:7-13; onani chithunzi cha pachikuto.) Zimenezi zikutikumbutsa kufunika kokonzekera Chikumbutso chomwe chidzachitike pa 27 March. Mipingo iyenera kuti yakonzekera kale zokhudza wokamba nkhani, zizindikiro komanso zinthu zina. Komabe kodi ndi zinthu ziti zimene aliyense payekha angachite pokonzekera?

Muzikonzekeretsa mtima wanu. Muziwerenga ndiponso kuganizira malemba a pa nyengo ya Chikumbutso. Ndandanda ya malemba amenewa mungaipeze mu kabuku ka Kuphunzira Malemba Tsiku ndi Tsiku. Ndandanda ina yokhala ndi zambiri mungaipeze mu Kabuku Kothandiza Kuphunzira Mawu a Mulungu. (Onaninso Ndandanda ya Utumiki Komanso Moyo Wathu ya April 2020) Mabanja angapeze mfundo zokambirana pa kulambira kwa pabanja zokhudza kufunika kwa dipo pofufuza mu Watch Tower Publications Index kapena mu Buku la Mboni za Yehova Lofufuzira Nkhani.

Muziitanira ena. Muzigwira nawo mwakhama ntchito yoitanira anthu ku mwambowu. Ganizirani za anthu amene mungawaitane monga maulendo obwereza, amene munkaphunzira nawo Baibulo, amene mumadziwana nawo komanso achibale. Akulu ayenera kuonetsetsa kuti aitanira anthu amene anasiya kusonkhana. Musaiwale kuti ngati munthu sakhala m’dera lanu, mungathe kupeza nthawi ndi malo amene Chikumbutso chichitikire kwawoko podina pamene alemba kuti ZOKHUDZA IFEYO pa jw.org pamwamba pa tsamba loyamba. Kenako sankhani pomwe alemba kuti “Chikumbutso.”

Ndi zinthu zinanso ziti zomwe tingachite pokonzekera?