MOYO WATHU WACHIKHRISTU

Muzithandiza Anthu Osapembedza Kudziwa Mlengi Wawo

Kodi mumalephera kulalikira anthu osapembedza poganiza kuti mwina samvetsera uthenga wanu? Ngati ndi choncho, muzikumbukira kuti anthu ambiri amene sanali m’chipembedzo chilichonse, kuphatikizapo amene ankati kulibe Mulungu, anakhala a Mboni za Yehova. Nthawi zambiri anthu amenewa amangofunika kuwathandiza kupeza umboni woti kuli Mulungu.—Aro 1:20; 10:14.

ONERANI VIDIYO YAKUTI ANTHU OPANDA CHIKHULUPIRIRO AKHOZA KUSINTHA N’KUKHALA NDI CHIKHULUPIRIRO—ANTHU OSAPEMBEDZA, KENAKO YANKHANI FUNSO LOTSATIRALI:

Kodi zomwe zinachitikira Tommaso zakuthandizani bwanji kukhala ndi maganizo oyenera kuti muzilalikira kwa anthu osapembedza?

Yankho

Mmene mungachitire zimenezi

Ngati munthu akusonyeza kuti sakukhulupirira kuti kuli Mulungu, muzikhala oleza mtima, ndipo mwanzeru komanso mochokera pansi pamtima, muzimusonyeza kuti mukumvetsa mmene akumvera pa nkhani imene mukukambirana. (2Ti 2:24) Muzikambirana naye nkhani zimene mukuona kuti akhoza kuchita nazo chidwi. Kodi angavomere kuti mukambirane naye maumboni amene athandiza anthu ena kuyamba kukhulupirira kuti kuli Mlengi? Ngati ndi choncho, gwiritsani ntchito mabuku kapena mavidiyo amene anakonzedwa kuti azithandiza anthu pa nkhani imeneyi. Timabuku takuti Kodi Zamoyo Zinachita Kulengedwa? ndi Mmene Moyo Unayambira—Mafunso 5 Ofunika Kwambiri, tinaikidwanso pa Zinthu Zophunzitsira kuti tizipezeka mosavuta.

Poyamba, mwina mungachite mantha kukambirana ndi munthu amene sakhulupirira Mulungu. Ngati ndi choncho, mukhoza kupempha wofalitsa waluso kuti akuthandizeni. Muzikumbukiranso kuti Yehova akhoza kukuthandizani kuti muzifika pamtima anthu a mtima wabwino, ngakhale atakhala kuti poyamba sankakhulupirira kuti iye alikodi. —Mac 13:48.