Kodi Mungakhulupirire Ndani?—Zimene Baibulo Limanena

Anthu amakhumudwa zikakhala kuti anthu amene amawaona kuti ndi odalirika awagwiritsa fuwa la moto. Zimenezi zachititsa kuti ambiri asiye kukhulupirira . . .

• atsogoleri andale amene amaika zofuna zawo patsogolo osati za anthu amene amawaimira.

• ofalitsa nkhani amene amalephera kufalitsa nkhani molondola komanso mosakondera.

• asayansi amene sachita zinthu zokomera anthu.

• atsogoleri achipembezo amene amalowerera kwambiri zochitika za ndale m’malo mogwira ntchito ya Mulungu.

Anthu samalakwitsa kukhala osamala pa nkhani ya amene akuyenera kuwakhulupirira. Baibulo limachenjeza kuti:

• “Musamakhulupirire atsogoleri, palibe munthu amene angathe kukupulumutsani.”​—Salimo 146:3, Good News Translation.

Amene mungamukhulupirire

 Baibulo limatchula winawake amene mungamukhulupirire, Yesu Khristu. Sikuti iye anangokhala munthu wabwino amene anakhalapo zaka zambiri zapitazo. Mulungu anamuika kuti ‘adzalamulire monga Mfumu . . .  ndipo Ufumu wake sudzatha.’ (Luka 1:32, 33) Yesu ndi Mfumu ya Ufumu wa Mulungu, boma limene panopa likulamulira kuchokera kumwamba.​—Mateyu 6:10.

• Kuti mudziwe chifukwa chake mungakhulupirire Yesu, werengani nkhani yakuti “Kodi Mfumu ya Ufumu wa Mulungu Ndi Ndani?” komanso “Kodi Ufumu wa Mulungu Udzachita Zotani?”