Kodi Tingatani Kuti Tisamade Nkhawa Kwambiri?

Mukamada nkhawa kwambiri mukhoza kudwala komanso kuvutika maganizo. Mwina kungakubweretsereni mavuto aakulu kuposa amene anakudetsani nkhawa poyamba.

Zinthu zimene zingachepetse nkhawa

• 

  Musamawerenge kapena kumvetsera nkhani zambiri zoipa. Simuyenera kudziwa zonse zokhudza zinthu zoipa zimene zachitika. Kudziwa zambiri zokhudza zinthuzi kungakuchititseni kuda nkhawa kwambiri komanso kuchita mantha.

  Mfundo ya m’Baibulo: “Mtima wosweka umaumitsa mafupa.”—Miyambo 17:22.

  “Ambirife timakonda kumva nkhani zatsopano zomwe n’zodabwitsa koma zimenezi n’zosathandiza. Ndikamapewa kuwerenga kapena kumvetsera nkhani pafupipafupi, nkhawa zanga zimachepa.”—John.

  Zoti muganizire: Kodi mumafunika kudziwa nkhani zatsopano nthawi zonse?

• 

  Muzikhala ndi ndandanda. Muziyesetsa kudzuka, kudya, kugwira ntchito zapakhomo komanso kugona pa nthawi yofanana tsiku lililonse. Kukhala ndi ndandanda kungakuthandizeni kuti musamade nkhawa kwambiri.

  Mfundo ya m’Baibulo: “Zolinga za munthu wakhama zimam’pindulira.”—Miyambo 21:5.

  “Mliri wa COVID-19 utayamba ndinasiyiratu kutsatira ndandanda yanga n’kuyamba kugwiritsa ntchito nthawi yambiri pochita zosangalatsa. Koma ndinkafuna kugwiritsa ntchito bwino nthawi yanga choncho ndinapanga ndandanda yochitira zinthu tsiku ndi tsiku.”—Joseph.

  Zoti muganizire: Kodi muli ndi ndandanda imene imakuthandizani kukwaniritsa zimene muyenera kuchita tsiku ndi tsiku?

• 

  Muziganizira zinthu zabwino. Kuganizira kwambiri zinthu zoipa zimene mwina zingadzachitike kumangokuchititsani kuda nkhawa. M’malomwake, muziganizira zinthu ziwiri kapena zitatu zimene mumayamikira.

  Mfundo ya m’Baibulo: “Sonyezani kuti ndinu oyamikira.”—Akolose 3:15.

  “Kuwerenga Baibulo kumandithandiza kuganizira zinthu zabwino n’kumapewa kumva nkhani zoipa. Mwina mungaone kuti sizingathandize kwenikweni koma zimathandizadi.”—Lisa.

  Zoti muganizire: Kodi mumakonda kuganizira zinthu zoipa zimene zakuchitikirani n’kumaiwala zabwino zimene zachitika?

• 

  Muziganizira anthu ena. Nthawi zambiri, tikamada nkhawa kwambiri timafuna kungokhala patokha. Koma m’malo mochita zimenezi, muziyesetsa kuganizira zimene mungachite pothandiza anthu ena.

  Mfundo ya m’Baibulo: “Musamaganizire zofuna zanu zokha, koma muziganiziranso zofuna za ena.”—Afilipi 2:4.

  “Ndimasangalala ndikamathandiza anthu ena. Zimene ndimawachitira zimawasangalatsa komanso zimandithandiza kuchepetsa nkhawa. Ndimatanganidwa kwambiri pochita zimenezi moti ndilibe nthawi yodera nkhawa.”—Maria.

  Zoti muganizire: Pa anthu onse amene mumawadziwa, kodi ndi ndani amene angafunike kuthandizidwa kwambiri? Nanga kodi mungamuthandize bwanji?

• 

  Muziyesetsa kukhala wathanzi. Muzichita masewera olimbitsa thupi komanso kupuma mokwanira. Muzidya chakudya chopatsa thanzi. Kuchita zinthu zimenezi kungakuthandizeni kukhala ndi maganizo abwino komanso kumapewa nkhawa.

  Mfundo ya m’Baibulo: “Kuchita masewera olimbitsa thupi n’kopindulitsa.”—1 Timoteyo 4:8.

  “Ine ndi mwana wanga sitingachite zambiri panja ngati mmene tikufunira. Choncho timayesetsa kuchita masewera olimbitsa thupi m’nyumba. Zimenezi zatithandiza kuti tizimva bwino komanso kugwirizana.”—Catherine.

  Zoti muganizire: Kodi mumafunika kusintha zimene mumadya komanso mmene mumachitira masewera olimbitsa thupi kuti mukhale wathanzi?

Kuwonjezera pa kuchita zinthu zimene tatchulazi, anthu ambiri achepetsa nkhawa zawo pophunzira malonjezo a m’Baibulo okhudza zinthu zabwino zimene zidzachitike m’tsogolo. Onani nkhani yakuti “Kodi Ufumu wa Mulungu Udzachita Chiyani?