Kunola Luso Lathu mu Ulaliki—Kuyala Maziko a Ulendo Wobwelelako

Cifukwa Cake Kuli Kofunika: Tikapeza munthu wacidwi, timafuna kubwelelako pa nthawi imene iye amapezeka pa nyumba kuti tikathilile mbeu ya coonadi imene tinafesa. (1 Akor. 3:6) Kuti maziko a ulendo wobwelelako ayalidwe, tiyenela kupempha mwininyumba tisanacoke za tsiku limene tingabwelenso. Kuonjezela pamenepo, zimakhala bwino kusiya funso limene tidzakambilana ulendo wotsatila. Kucita zimenezi kudzacititsa mwininyumba kufunitsitsa kuti tikabwelenso, ndipo ngati yankho la funso limenelo lili m’cofalitsa cimene tamusiyiila, adzakhala wofunitsitsa kuciŵelenga. Kuyala maziko a ulendo wobwelelako, kumacititsa kuti tisavutike kubwelelako cifukwa nkhani imene tidzakambilana imakhala yasankhidwa kale, ndipo mwininyumba amadziŵilatu zimene tidzakambilana. Tikadzaonananso naye tingamuuze kuti tabwela kudzayankha funso limene tinasiya ulendo watha kenako kupitiliza makambilano.

Mmene Mungacitile:

Pokonzekela ulaliki wa khomo ndi khomo, muzikonzelatu funso loti mudzayankhe pa ulendo wotsatila. Funsolo lingacokele m’cofalitsa cimene mukugaŵila panthawiyo, kapena lingakhale funso limene likuyankhidwa m’cofalitsa cimene timagwilitsila nchito pophunzila Baibulo ndi anthu, cimenenso mungagwilitsile nchito pa ulendo wotsatila.
Pomaliza makambilano ndi munthu amene waonetsa cidwi, muuzeni kuti muli ndi cifuno codzabwelanso. Ndiyeno mungamuuze funso limene mudzakambilana paulendo wotsatila. M’madela ena anthu ndi otangwanika kwambili cakuti sangakonde kuti mukabweleleko. Ngati zili conco, mungafunse mwininyumba kuti: “Kodi ino ndiyo nthawi yabwino imene mumapezeka panyumba? [Yembekezani yankho.] Ndingakonde kubwelanso mlungu wamawa kuti tidzakambilane yankho la funso ili kwa mphindi zocepa . . . Ngati mudzakhala wotangwanika kwambili nthawi imeneyo, mudzandiuze.”
Mukalonjeza mwininyumba kuti mudzafika pa nthawi yakutiyakuti, sungani lonjezo. (Mat. 5:37) Pambuyo paulendo wobwelelako muyenela kuyalanso maziko a ulendo wotsatila.

Yesani Kucita Izi Mwezi Uno:

Pokonzekela ulaliki wanu mwezi uno, konzekelaninso funso loti mudzayankhe ulendo wotsatila. Mungauzeko ofalitsa amene mugwila nao nchito funso limene mwakonza.