Onetsani Cikondi

Cifukwa Cake Zingakhale Zovuta

Tsankho limatenga nthawi kuti lithe. Mofanana na kalombo koyambitsa matenda, kamene kamafuna khama na nthawi kuti tikagonjetse, tsankho nalonso limafuna nthawi na khama kuti tilithetse. Kodi mungacite ciani kuti mucotse tsankho mumtima mwanu?

Mfundo ya m’Baibo

Zithunzi: 1. Munthu wa ci Asian wagwila citseko kuti munthu wa cikuda amene wanyamula makapu a khofi adutse. 2. Munthu wa cikuda mmodzi-modziyo akupatsa khofi anzake amene amaseŵenza nawo, kuphatikizapo mayi uja wa cimwenye amene tamuchulapo kale.

“Valani cikondi, pakuti cimagwilizanitsa anthu mwamphamvu kwambili kuposa cinthu cina ciliconse.” —AKOLOSE 3:14.

Kodi mfundo imeneyi itanthauza ciani? Kucitila ena zinthu zabwino kumathandiza kuti muyambe kugwilizana nawo. Ndipo ngati muyesetsa kuonetsa cikondi kwa anthu, tsankho limacepela-cepela mumtima mwanu. Cikondi cikamakula mumtima mwanu, nawonso maganizo oipidwa na ŵanthu ŵena amacepa.

Zimene Mungacite

Zithunzi: 1. Mayi wokalamba wa ci Caucasian akukwela masitepe mothandizidwa na mayi wa cimwenye amenenso wanyamula zakudya za mayiyo. 2. Mayi wokalamba mmodzi-modziyo akupatsa zakudya mnansi wake amene ni munthu uja wa ci Asian tamuchulapo kale.

Ganizilani zimene mungacite poonetsa cikondi kwa anthu amene mumawaganizila kuti sali bwino. Zinthu zake sizicita kufunikila kukhala zapamwamba. Yesani kucita zinthu monga izi:

Cinthu ciliconse cabwino cimene mwacitila munthu, cimakuthandizani kucepetsa tsankho mumtima mwanu

Onetsani ulemu kwa anthu amenewo mwa kuwagwilila citseko kuti aloŵe kapena kupatsa mmodzi wa iwo malo anu okhala pamene muli pa ulendo.
Yesani kucezako nawo mwacidule, olo kuti mwina sadziŵa kukamba bwino citundu canu.
Khalani oleza mtima ngati acita zinthu m’njila imene muona kuti ni yacilendo.
Pamene afotokoza mavuto awo, onetsani kuti muwamvelela cifundo.

Citsanzo ca Zocitika Zeni-Zeni: Nazaré wa ku (Guinea-Bissau)

“Pa nthawi ina, n’nali kuona kuti anthu ocokela ku maiko ena si abwino, cifukwa n’nauzidwa kuti ambili mwa iwo amanama ku boma n’colinga cakuti liwapatse ndalama kapena thandizo lina. N’namvelanso kuti amakonda kucita zinthu zophwanya malamulo. Izi zinacititsa kuti niziwakayikila. Komabe, sin’nali kudziona ngati watsankho, cifukwa umu ni mmene ambili m’dela lathu anali kuonela anthu ocokela ku maiko ena.

“Koma m’kupita kwa nthawi, n’nazindikila kuti n’nali na tsankho. Koma malangizo anzelu a m’Baibo anithandiza kuti niyambe kucita zinthu mwacikondi na ŵanthu ocokela ku maiko ena. Tsopano siniwapewa. Koma nimawapatsa moni na kukamba nawo. Nimayesetsa kudziŵa bwino aliyense wa iwo. Lomba nimawaona moyenela, ndipo nimamasuka nawo kwambili.”