Kuongolela Luso Lathu mu Ulaliki—Mmene Tingayankhile Anthu Amene Safuna Kuti Tikambitsilane Nao

Cifukwa Cake N’kofunika: Yelekezani kuti mwadziŵa kuti kwatsala pang’ono kuti ngozi yacilengedwe icitike. Ngati anthu sangathamangile kumalo opulumukilako adzafa. Kenako mupita pa nyumba ya munthu woyandikana naye kuti mum’cenjeze, koma iye akuyankhani kuti ndi wotangwanika. Kunena zoona, simungangosiya nthawi imeneyo kumuthandiza. Anthu ambili m’gawo lathu amakana uthenga wathu. Sadziŵa kuti uthenga umene timawapelekela ndi wopulumutsa moyo. Mwina nthawi imene timawacezela io amakhala otangwanika. (Mat. 24:37-39) Kapena mwina amakana cifukwa ca mabodza amene auzidwa. (Mat. 11:18, 19) Iwo angamaone kuti sitisiyana ndi zipembedzo zina zimene zatulutsa zipatso zoipa. (2 Pet. 2:1, 2) Ngati panthawi yoyamba mwininyumba sanaonetse cidwi, tisafulumile kusiya kumulalikila.

Mmene Tingacitile:

Tisanapite kulalikila kunyumba ndi nyumba, coyamba tiziganizila za zimene anthu angakambe kuti tisapitilize kulankhula nao ndipo tiziganizilanso mmene tingawayankhile.
Ngati mwininyumba akutitsutsa, mokoma mtima tingayese kupitiliza kulankhula naye. Mwina tingacite zimenezo mwa kumuyamikila. Mwacitsanzo, ngati anena kuti ali ndi cipembedzo cake, mungayankhe kuti, “Ndinali kufuna kwambili kupeza munthu amene ali ndi cidwi ndi zinthu za kuuzimu monga inu.” Nthawi zina, kudziŵa ndi kuvomeleza maganizo a mwininyumba kapena mkhalidwe wake kungatithandize kupitiliza kulalikila. Mwacitsanzo, akanena kuti ndi wotangwanika, mungayankhe kuti: “N’zomveka zimenezo. Koma ndisanapite, ndingakonde kukupatsani izi.” Njila ina ndi kufunsa mwininyumba ngati ali ndi cipembedzo cake. Munganene kuti, “Ndinali kufuna kwambili kupeza munthu amene ali ndi cidwi ndi zinthu za kuuzimu monga inu. Kodi mumamva bwanji mukaŵelenga lonjezo la m’Baibulo lakuti Mulungu adzathetsa zoipa zonse ndi kupanga dziko lapansi kukhala malo amene anthu okonda cilungamo adzakhalamo? Kodi zimenezi zingakusangalatseni?”
Khalani wosamala. Kumbukilani kuti Yehova sakakamiza anthu kuti akhale omvela. (Deut. 30:19) Munthu aliyense ali ndi udindo umene afunika kuukwanilitsa pamaso pa Yehova. (Agal. 6:5) Ngati mwininyumba akukanabe, ndi bwino kungocokapo. Kulemekeza maganizo ake, kungathandize kuti wofalitsa wina mtsogolo akadzafika pakhomo limenelo, adzakhale ndi mwai wolalikila.—1 Pet. 3:15.

Yesani Kucita Izi Mwezi Uno:

Mukacoka panyumba ya munthu amene sanafune kulankhulana naye, muyenela kukambitsilana ndi mnzanu za njila yabwino imene mukanaigwilitsila nchito poyankha mwininyumbayo.