Kuongolela Luso Lathu mu Ulaliki—Khalani Wofalitsa Wothandiza

Cifukwa Cake N’kofunika: Yesu anaona kufunika kokhala ndi wofalitsa wina polalikila. Conco, pamene anasankha ophunzila 70 anawatumiza aŵiliaŵili kuti atsogole ndi kukalalikila. (Luka 10:1) Wofalitsa wothandiza angacilikize wofalitsa mnzake pamene wapeza vuto, kapena ngati sadziŵa mmene angayankhile mwininyumba. (Mlal. 4:9, 10) Wofalitsa wothandiza angakambilane ndi mnzake zimene amadziŵa ndipo mwa apo ndi apo angapeleke malingalilo othandiza kwa amene akulalikila naye kuti iyenso akhale mlaliki wogwila mtima. (Miy. 27:17) Angalimbikitsenso mnzake mwa kukambitsilana zinthu zolimbikitsa asanafike panyumba ina.—Afil. 4:8.

Mmene Tingacitile:

Mnzathu akamalalikila tizimvetsela ndi kuonetsetsa zimene akucita. (Yak. 1:19) Akamaŵelenga lemba, tizitsatila m’Baibulo lathu. Zimenezi zidzatithandiza kukhala okonzeka kuthandiza ngati pangafukile kutelo.
Khalani osamala kuti mudziŵe nthawi imene mungalankhulepo pa makambilano. (Miy. 25:11) Mukapita ndi wofalitsa wina kuphunzilo lake, ndemanga zanu za apo ndi apo zidzakhala zothandiza kwambili. Komabe, polalikila ku nyumba ndi nyumba, mnzanu adzasangalala kwambili kumupatsa mpata wolankhula ngati ndi nthawi yake. Ngati ndi wofalitsa watsopano kapena sadziŵa mmene angayankhile kapenanso zimene angacite pamene watsutsidwa, iye adzayamikila kwambili thandizo lanu. Conco, kaya mupita ndi mnzanu ku nchito ya ulaliki wa kunyumba ndi nyumba, ulendo wobwelelako, kapena ku phunzilo la Baibulo, ndi bwino kupewa kumudula mau, kapena kulanda makambilano, mwinanso kubweletsa nkhani ina yosiyanako.
Muziuzako anzanu zimene mudziŵa. Ngati nthawi ina muona kuti mungapeleke malingalilo othandiza kwa wofalitsa amene mugwila naye nchito kuti akhale wogwila mtima muulaliki, musalephele kucita zimenezo. (Miy. 3:27) Panthawi yoyenelela munganene izi: “Muganiza kuti makambilano athu ayenda bwanji?” kapena “Kodi mungandilole kupelekako malingalilo?” kapena munganene kuti “Ine ndimayesa kucita izi.” Muzikumbukila kuti ngakhale kuti ena angayamikile kuwapatsa malingalilo panthawi ina, zikhoza kukhala zofooketsa kuwauza zilizonse zimene alakwitsa.

Yesani Kucita Izi Mwezi Uno:

Mukamaliza ulaliki ndi wofalitsa amene munali naye, muuzeni zinthu zimene anakamba kapena kucita zimene zam’pangitsa kukhala wofalitsa wothandiza.