Kunola Luso Lathu mu Ulaliki—Kuyambitsa Makambilano ndi Colinga Cakuti Ticite Ulaliki Wamwai

Cifukwa Cake N’kofunika: Tikamacita ulaliki wa kunyumba ndi nyumba, tingapeze kuti anthu ena sapezeka pa khomo. Conco tikhoza kulankhula nao tikakwela basi imodzi, tikamayembekezela dokotala, tikamapumula kunchito kapena ku sukulu, kapenanso panthawi ina. Ndi cifunilo ca Yehova kuti anthu onse amve uthenga wa Ufumu. (1 Tim. 2:3, 4) Kuti tilalikile anthu, nthawi zambili ndife amene tifunika kuyamba makambilano.

Mmene Tingacitile:

Muzikhala chelu. Kodi munthu ameneyo aoneka waubwenzi ndipo angalole kuti tilankhule naye? Kodi tingalankhule naye popanda cosokoneza ciliconse? Ofalitsa ena amayamba ndi kuyang’ana munthu kenako kumwetulila. Ndiyeno akaona kuti munthu nayenso wamwetulila, amayamba kulankhula naye.
Ngati mukucita mantha kulankhula, pemphelani ca mu mtima mwacidule.—Neh. 2:4; Mac. 4:29.
Yambani ndi mau acidule, mwina kupeleka moni. Pokambilana ndi mai wa Cisamariya, Yesu sanayambe ndi kukamba za Ufumu. (Yoh. 4:7) Nafenso nthawi zina tingayambe makambilano mwa kuwayamikila. Mwacitsanzo, tingakambe kuti: “Ana anu ndi aulemu.” Mwina mungagwilitsile nchito funso, monga lakuti: “Kodi dzulo munamva zimene anakamba pa nyuzi?”
Mukayamba makambilano, muzifunafuna njila yakuti muyambe kukambilana uthenga wabwino, koma samalani kuti musacite zimenezi mopupuluma. Kulalikila Uthenga Wabwino kusacite kukhala kokakamiza. Mwina mukhoza kunena mfundo imene ingadzutse cidwi ca munthuyo ndi kum’cititsa kufunsa funso. Mwacitsanzo, ngati mukambilana za mavuto a m’banja mungakambe kuti, “Ndinapeza malangizo othandiza a mmene tingalelele bwino ana.” Ngati mukukambilana nkhani za pa nyuzi, mungakambe kuti, “Caposacedwapa ndinakondwela pamene ndinali kuŵelenga uthenga wabwino umene unanena kuti zinthu zidzasintha.” Ngati makambilano anu atha musanacitile umboni, musagwe ulesi.
Muzinyamula tumapepala ndi zofalitsa zina kuti mugaŵile munthu amene waonetsa cidwi.

Yesani Kucita Izi Mwezi Uno:

Yesani kuyambitsa makambilano mwina kamodzi mlungu uliwonse ndi colinga cakuti mucite ulaliki wamwai.