UMOYO WATHU WACIKHRISTU

Seŵenzetsani Buku Lakuti Kondwelani na Moyo Kwamuyaya! mu Ulaliki

Ndife okondwa kukhala na bulosha komanso buku latsopano, zoseŵenzetsa potsogoza maphunzilo a Baibo! Tipempha Yehova kuti atidalitse pamene tikuyesetsa kupanga ophunzila ambili. (Mat. 28:18-20; 1 Akor. 3:6-9) Kodi tiyenela kuziseŵenzetsa bwanji zida zatsopano zimenezi?

Buku lakuti Kondwelani na Moyo Kwamuyaya!, maphunzilo a Baibo okambilana komanso zocita, lili na njila yatsopano ya kaphunzitsidwe. Conco pokonzekela ndiponso potsogoza maphunzilo a Baibo, muyenela kutsatila malangizo awa:a

Ŵelengani nkhaniyo na kukambilana mafunso
Ŵelengani malemba akuti “ŵelengani,” ndipo thandizani wophunzila Baibo kudziŵa mmene angaseŵenzetsele mfundo za m’malembawo
Onetsani mavidiyo na kuwakambilana poseŵenzetsa mafunso amene alipo
Yesetsani kutsiliza phunzilo lonse pa nthawi imodzi

Mu ulaliki, gaŵilani bulosha coyamba kuti muone ngati munthu ali na cidwi. (Onani bokosi lakuti “Mmene Tingagaŵile Bulosha Yakuti Kondwelani na Moyo Kwamuyaya! pa Ulendo Woyamba.”) Ngati mwatsiliza kuphunzila bulosha, ndipo wophunzilayo afuna kupitiliza kuphunzila, mugaŵileni buku na kupitiliza kuphunzila naye kuyambila pa phunzilo 04. Ngati mumaphunzila na munthu poseŵenzetsa cimodzi mwa zofalitsa zathu zotsogozela maphunzilo, samukilani m’buku lakuti Kondwelani na Moyo Kwamuyaya! na kuona pamene pangakhale poyenela kuyambila.

Banja limodzimodzilo likuseŵenzetsa buku lakuti “Kondwelani na Moyo Kwamuyaya!” pophunzitsa munthuyo Baibo panyumba pake.

ONELELANI VIDIYO YAKUTI TAKULANDILANI KU PHUNIZILO LANU LA BAIBO, NDIYENO YANKHANI MAFUNSO OTSATILAWA:

Kodi ophunzila adzaphunzila ciani m’buku latsopanoli?
N’cifukwa ciani muyenela kuwaonetsa vidiyo imeneyi ophunzila atsopano?
Ni zolinga zotani zimene pang’ono-m’pang’ono muyenela kulimbikitsa wophunzila Baibo kudziikila na kuzikwanilitsa?—Onani chati yakuti “Nkhani Yake na Zocita m’Cigawo Ciliconse”

a DZIŴANI IZI: Mbali yakuti “Fufuzani” mungasankhe kuikambilana pophunzila kapena ayi. Ngakhale n’telo, pezani nthawi yoiŵelenga kapena kuonelela vidiyo iliyonse pamene mukonzekela. Mukatelo, mudzadziŵa zimene zingam’cititse cidwi wophunzila wanu na kum’thandiza. Buku la pacipangizo lili na malinki a mavidiyo komanso nkhani zina.

NKHANI YAKE NA ZOCITA M’CIGAWO CILICONSE
	MAPHUNZILO	NKHANI YAKE	ZOLINGA PA WOPHUNZILA
1	01-12	Onani mmene Baibo ingakuthandizileni, na mmene mungadziŵile Mwiniwake wa mawu a m’Baibo	Limbikitsani wophunzila kuti aziŵelenga Baibo, azikonzekela phunzilo, ndiponso kuti ayambe kupezeka pa misonkhano
2	13-33	Dziŵani zimene Mulungu waticitila, komanso kulambila kumene amavomeleza	Sonkhezelani wophunzila kuti aziuzako ena coonadi, komanso kuti akhale wofalitsa
3	34-47	Dziŵani zimene Mulungu amayembekezela kwa olambila ake	Limbikitsani wophunzila kuti akapatulile moyo wake kwa Yehova na kubatizika
4	48-60	Phunzilani mmene mungakhalilebe mu cikondi ca Mulungu	Phunzitsani wophunzila kusiyanitsa cabwino na coipa, na mmene angapitile patsogolo kuuzimu.