Ongeleya Ongwa Ilongesa Ovanthu Vayo Okukala Nohole Pokati Kavo

“UNA UHENA ohole kei Huku, mokonda Huku ohole,” otyo tyapopia Ombimbiliya. (1 João 4:8, Tradução Ferreira de Almeida) Ngotyo, ongeleya ongwa, yesukisa okulonga ovanthu vayo okukala nohole pokati kavo.

Onongeleya ononyingi mbulinga ovilinga oviwa, viokuvatela ovavei, na vana vakulupa, no vokuahepa. Vaavela ondundo ovanthu vavo okuendela monondonga mbo apostolu João, wahoneka okuti: “Inkha umwe omuhona, anthi utupu omutima wokuvatela omukuatate wae ine omphange mekolelo, mahi umueete okuti wesukisa okuvatelwa, Omunthu oo utupu ohole na Huku. Vana vange, tuhakalei nohole vala nomulungu nomo malongomona. Tukalei nohole novilinga notyili”.—1 João 3:17, 18, Tradução interconfessional.

Oityi tyipitapo, tyina ovilongo vienda kovita? Okuti otyitumino tya Huku “tyokukala nohole na vakuavo ngetyi velihole ovo muene,” tyitavelwa vala tyina kuna ombembwa, mahi atyipakelwa ponthele tyina ovatumini vaholovonapo okuluisa otyilongo otyikuavo?—Mateus 22:39, Tradução interconfessional.

Jesus wati: “Inkha mukala nohole kese umwe na vakuavo, ovanthu aveho mavaimbuka okuti onwe muvalongwa vange.” (João 13:35, Tradução interconfessional) Tyina ove ukumbulula omapulo maalandulako, lipula ove muene okuti: ‘Ovanthu vongeleya yange, vena ohole novanthu aveho, omivo aviho, movipuka valinga, hakomulugu vala?’

ONTHELE: Ovita.

OITYI OMBIMBILIYA ILONGESA: Jesus watuma ovalongwa vae okuti: “Ame ndyimupopila okuti; Kalei nohole no nondyale mbenyi, nokulinga nawa vana vemuyele.”—Mateus 5:44, Tradução Ferreira de Almeida.

Etyi omatolopa eya okukuata Jesus, apostolu Petulu apolomo omutunga wae opo emuamene. Mahi, Jesus ati: “Kondola omutunga pomphangu yao; mokonda aveho vakuata omutunga, mavakankhia komutunga.”—Mateus 26:52, Tradução Ferreira de Almeida.

Apostolu João wahoneka okuti: “Okuelikalela kukahi pokati kovana va Huku, novana Veliapu, okoku: kese una uhalingi etyi Huku ahanda, ine kehole omukuatate wae mekolelo, ha wa Huku ko. Iya onondaka mueiva tunde konthyimbi ombombu: Tukalei nohole kese umwe na mukuavo. Tuhakalei nga Kaim, ankho ukahi nokukala ondingavivi, aipaa ondenge yae.”—1 João 3:10-12, Tradução interconfessional.

EPULO: Okuti ongeleya ei ilunda ovanthu vayo okulipaka movita?

ONTHELE: Opulitika.

OITYI OMBIMBILIYA ILONGESA: Etyi vamona ounongo wa Jesus wokulinga omahuviso, vamwe avahande okumupaka mopulitika potyilongo tyavo. Iya oe alingi ñgeni? “Jesus waimbuka okuti vahanda okumutyindapo kononkhono opo vekemulinge ohamba, iya oe atundupo vali aike aende komphunda.”—João 6:15, Tradução interconfessional.

Etyi Jesus akuatwa atendeleyua okuti uhongiliya ovanthu okuanya kovatumini, oe wakumbululile okuti: “Ouhamba wange ha wouye uno ko. Inkha ouhamba wange wali wouye uno, ñgeno ovaumbili vange valwa opo nahapakulwe ko va Judeu. Mahi, pahe ouhamba wange ha wouye uno.”—João 18:36, Tradução Ferreira de Almeida.

Etyi Jesus elikuambela ku Huku konthele yovalongwa vae, wati: “Neveavela ondaka yove, iya ouye auveyale, mokonda ha vouye ko, nga ame.”—João 17:14, Tradução Ferreira de Almeida.

EPULO: Okuti ongeleya ei, ilandula ongeleka ya Jesus, nokulityilika okulipaka mopulitika, alo umwe tyina otyo tyietela ovanthu vayo okuyalwa novatumini vamwe?

ONTHELE: Okapungulula.

OITYI OMBIMBILIYA ILONGESA: Etyi ovanthu votete ankho veheva Judeu vakala Ovakristau, apostolu Petulu apopi okuti: “Pahe nanoñgonoka tyotyili okuti ku Huku ovanthu aveho velifwe. Oe uhanda ouwa pala aveho vena onthilo nae nokulinga etyi ahanda, momihoko aviho.”—Atos 10:34, 35, Tradução interconfessional.

Tiaku wahonekela Ovakristau votete okuti: “Vakuatate vange mekolelo muna mu Jesus Kristu Tatekulu yetu wankhimana, muhatekulei ovanthu mononkhalelo mbelikalela! Mongeleka, sokei ñgeno mondyuo yenyi yomalikuambelo muanyingila ovanthu vevali. Umwe una ononela mbo olu nomuvalo wo vahona, iya omukuavo wahepa nokuavala omapita unene. Iya onwe amupopila una womuvalo wo vahona okuti: Pumphama apa, pomhangu yahumbwa! Konyima amupopila wokuahepa okuti: Kala opo lutai, ine pumphama pohi ponthele yotyiliatelo tyange. Kamutyiete okuti ngotyo mukahi nokulinga okapungulula pokati kenyi, nokukoyesa ovanthu nomalusoke apenga?”—Tiago 2:1-4, Tradução interconfessional.

EPULO: Okuti ongeleya ei ilongesa okuti ovanthu aveho komaiho a Huku velifwe? Nokuti ovanthu vafenda Huku kavapondola okulinga okapungulula nawike, mokonda yomuhoko ine o yolumono?

[Ehangununo liolutalatu pefo 7]

Ongeleya patyi ilongesa ovanthu vayo okulityilika mopulitika, nokuhelipungulula mokonda yomihoko nolumono, ovipuka viyapaula ovanthu?