Ongeleya Ongwa Ilongesa Ovanthu Okukala Nonthilo Nondaka ya Huku
JESUS walongesile ovanthu okukala nonthilo Nondaka ya Huku, Ombimbiliya. Otyo, tyamoneka nawa monkhalelo akumbulula Eliapu, etyi ankho limuyondya. (Mateus 4:4-11) Mongeleka, oñgeni Jesus akumbulula etyi Satanasi emuyondya okuti pilulula omamaya onombolo? Jesus waanyene okuyondyua, apopi onondaka mba Moisesi ove upondola okutanga mu Deuteronômio 8:3. Iya etyi Eliapu liaita Jesus afende kwe otyikando tyike vala, opo limuavela outumini nomauhamba aeho omouye, oñgeni Jesus akumbululile? Oe waanyene apopi otyitumino tyo Vihonekwa ove upondola okuvasa mu Deuteronômio 6:13.
Nkhele soka! Namphila Jesus Omona wa Huku, oe ankho una onthumbi mehongolelo lio Mbimbiliya tyina alongesa. Tyotyili Jesus ankho katombo Ondaka ya Huku mokonda yoviso viovanthu. (João 7:16-18) Anthi, ononkhalamutwe ononyingi mbonongeleya kononthiki mba Jesus, ankho vetupu onthilo Nondaka ya Huku. Omokonda yatyi? Ovo ankho vatala oviso viovanthu ngatyina viakolela vali tyipona Ovihonekwa Vikola. Jesus wapopilile ononkhalamutwe ombo tyiheliseta-seta ati: “Ngotyo, onwe mupola Ondaka ya Huku esilivilo ina, opo mulandule oviso muataindya. Vemphinia! Omuuli Isaia ankho una ehunga liokupopia konthele yenyi, okuti: ‘Ovanthu ava vena vala onthilo naame nomulungu, mahi omutima wavo ukahi kokule naame. Vandingila efendelo lihasilivila, mokonda valongesa ovitumino vialingwa novanthu.’”—Mateus 15:6-9, Tradução interconfessional.
Onongeleya ononyingi mouye, mba vana veliti Ovakristau na vana vehe Vakristau, navo vati vena onthilo no Mbimbiliya. Mahi, onongeleya onoñgapi ove wii mbuyekapo oviso viovanthu, tyina Ondaka ya Huku ilongesa okuti kavilingwa? Tala onongeleka onombali.
ONTHELE: Omanyina enkhimano apewa ononkhalamutwe mbonongeleya.
OITYI OMBIMBILIYA ILONGESA: Jesus wahitisile ononkhalamutwe mbonongeleya kononthiki mbae, mokonda ankho vehole omanyina enkhimano nokuhanda okupandwa. Oe wati, ovalume ovo ankho vehole “onomphangu mbakolela movipito, novipundi vio munkhima monondyuo mbomalikuambelo. Tupu, vetyihole unene okukukunyua nehumbilo enene, ponomphangu mbovitanda, nokuhanda okuihanwa okuti ‘Mulongesi.’” Jesus apopila ovalongwa vae okuti: “Mahi onwe muhetavelei okuihanwa okuti Mulongesi, mokonda omulongesi wenyi wike vala, iya onwe amuho muvakwatate. Tupu, muhaihanei nawike pano pohi okuti Tate, mokonda onwe muna vala Tate yenyi wike, ukahi keulu.”—Mateus 23:1-10, Tradução interconfessional.
EPULO: Okuti ononkhalamutwe mbongeleya ei, vetyihole okuihanwa omanyina enkhimano, nokuovola okupandwa novanthu aveho, ine vaanya ovipuka ovio okutavela otyitumino tya Jesus?
ONTHELE: Okuundapesa ovilolo mefendelo.
OITYI OMBIMBILIYA ILONGESA: “Uhelihongele ovilolo vilekesa otyipuka tyikahi keulu, na pano pohi no momeva mombuelo yoohi. Uhanyongamene kolupala luotyilolo natyike ine okuvifenda.—Êxodo 20:4, 5, Tradução interconfessional.
Apostolu João wahonekela Ovakristau okuti: “Vana vange, liyungei kovilolo!”—1 João 5:21, Tradução Ferreira de Almeida.
EPULO: Okuti ongeleya ei, itavela kotyitumino tyo Mbimbiliya tyayandyuluka nawa, tyokulityilika okuundapesa ovilolo mefendelo lia Huku?
Upondola Okuvasa Ondyila Yaviuka
Namphila kuna onongeleya ononyingi mbelikalaila hono, mahi upondola okuvasa ike ituala komuenyo. Kuna omanyingilikilo omanyingi pala okuimbuka “ongeleya yasukuka nokuayela komaiho a Huku.” (Tiago 1:27, Ferreira de Almeida) Ono testu tuelilongesa mononthele ombu, mbupondola okuelekwa nomanyingilikilo maekuvatela okuvasa ongeleya oyo.
Oityi wahaitila Onombangi mba Jeova vekuhangununine omakumbululo avo konthele yomapulo alingwa mononthele ombu? Putyina usoka kuetyi ovo vapopia, landula ongeleka ongwa yovanthu vana vo konthiki mbo valongwa votete, mepundaumbo lio Bereia. Etyi veiva ovipuka apostolu Paulu ankho apopia, “avelilongesa Ovihonekwa Vikola kese nthiki, opo vatale inkha etyi Paulu apopia otyili umue.” (Atos 17:11, Tradução interconfessional) Ngo va Bereia, inkha nove una onthilo Nondaka ya Huku nokulilongesa nombili, movasi ongeleya ituala komuenyo. Inkha moholovona okulinga ngotyo, olio etokolo liove una okulinga.
[Olutalatu pefo 9]
Ongeleya patyi ilunda ovanthu okulilongesa Ovihonekwa, opo vatale inkha etyi vekahi nokulilongesa otyili umwe?