Ongeleya Ongwa Ina Ovitumino Viavilapo Konthele Yovituwa Oviwa
ONGELEYA ongwa, itulongesa oñgeni matusoko kovipuka viaviuka, nokutulekesa oñgeni matukala novituwa oviwa. Itukuatesako movilwa viokulinga etyi tyaviuka, nokutuvatela okukala ovanthu ovawa. Oñgeni tuanoñgonoka okuti ongeleya ongwa ilinga ngotyo?
Tala etyi apostolu Paulu wahonekelele Ovakristau votete ankho vakala mo Korintu ko Gresia. Kohale epundaumbo olio, ankho liiwe nawa mokonda yomaundalelapo alinguamo. Paulu alondola okuti: “No vokulinga omaundalelapo, ine ovokufenda onohuku mbomatutu, ine ovokulinga omaumbalehi, ine ovipuka vitoyesa, ine ovalume valala novalume vakuavo, ine ovokuvaka, ine ovelungavi, ine ononkholwa, ine ovokutendeleya, ovimphulu, kamavapiñgana ouhamba wa Huku.” Paulu ayawisako okuti: “Vamue puonwe ankho ovio mulinga. Mahi, muasukukiswa monkhali, mualingwa onosandu mba Huku, amukala omapanga ae, menyina lia Tatekulu yetu Jesus Kristu, no Kospilitu ya Huku yetu.” (1 Coríntios 6:9-11, Tradução interconfessional) Nkhele soka—ongeleya ongwa yakuatesako vamue ankho vena ovitumino konthele yetyi tyaviuka netyi tyahaviukile, avakala ovaumbili va Huku ovaviuki!
Anthi, Ombimbiliya ilondola okuti: “Mokonda makukeya omuvo umwe ovanthu kamavakahanda vali elongeso lio tyotyili. Anthi, nehando liokuvasa una uvepopila ovipuka oviwa, mavakaovola ovalongesi ovanyingi.”—2 Timóteo 4:3, Tradução interconfessional.
Onongeleya ove wii, mbukahi ñgeni konthele oyo? Okuti mbulandula ovitumino viavilapo vio Mbimbiliya konthele yotyiwa notyivi? Ine mbutomba onondonga mbayandyuluka mbukahi Mondaka ya Huku? Okupopila ovanthu ‘ovipuka vivenyalala vala momakutwi’?
Pala okukuvatela okutala inkha ongeleya yove yava ovinyango oviwa, omokonda yatyi uhaovolela omuvo opo ukumbulule omapulo malandulako?
ONTHELE: Okasamendo.
OITYI OMBIMBILIYA ILONGESA: “Otyinepo tyihumbwe novanthu aveho, nokuliyumba onthumbi pokati komulume nomukai wae. Iya vana valinga oundalelapo noumbalehi Huku mekevekoyesa.”—Hebreus 13:4, Tradução interconfessional.
EPULO: Okuti ongeleya ei, ituma aveho vokuanepa pokati kovanthu vamo, vena okulinga okasamendo?
ONTHELE: Okulihenga.
OITYI OMBIMBILIYA ILONGESA: Etyi Jesus apulwa inkha kuna ehunga lihengesa vokuelinepa, oe wati: “Kese umwe uhenga omukai wae, wahalingile oumbalehi, iya akanepa omukuavo, ulinga oumbalehi.”—Mateus 19:9, Tradução Ferreira de Almeida.
EPULO: Okuti ongeleya ei, yahumba ehongolelo lia Jesus, mokutavela vala vana velihenga nokunepa vali, tyina umwe alinga oumbalehi?
ONTHELE: Okulinga oumbalehi.
OITYI OMBIMBILIYA ILONGESA: “Tilei oumbalehi. Kese nkhali omunthu alinga, o kondye yolutu luae, anthi una ulinga oumbalehi, olutu luae muene alingila onkhali.”—1 Coríntios 6:18, Tradução Ferreira de Almeida.
“Moluotyo Huku weveyekela moluholio luavo lukundisa luovitati. Alo umwe ovakai vapilulula otyituwa tyaviuka Huku aava, na tyina tyihaviukile. Tupu, ovalume vayekapo okunepa ovakai, vatokotelwa nomahando omavi na vakuavo. Vatokela movituwa vikundisa, okulala novalume vakuavo. Iya avatambula ofeto yononkhali mbavo.”—Romanos 1:26, 27, Tradução interconfessional.
EPULO: Ongeleya oyo, ilongesa okuti oumbalehi pokati komulume nomukai ine omulume okulala nomulume ine omukai nomukai, onkhali?
ONTHELE: Okuamena ovitumino vio Mbimbiliya, pokati kovanthu vayo.
OITYI OMBIMBILIYA ILONGESA: “Yekeipo okuliwaneka na vana veliti Ovakuatate, mahi valinga omaumbalehi, velungavi, vafenda onohuku mbomatutu, vokutendeleya, ononkholwa, ine ovimphulu. Muhaliei nomunthu oo, komesa yenyi.” (1 Coríntios 5:11, Tradução interconfessional) Vana veliti Ovakristau, mahi kavelivele ononkhali mbavo, vesukisa okulingwa ñgeni? Ondaka ya Huku yati: “Polei ondingavivi pokati kenyi.”—1 Coríntios 5:13, Tradução interconfessional.
EPULO: Okuti ongeleya ei, ipola pokati kovanthu vayo kese una uhelivele nokuatomba ovitumino Viombimbiliya?
[Olutalatu pefo 6]
Ongeleya patyi ina omunkhima wokuti ilandula nawa ovitumino viavilapo Viombimbiliya konthele yovituwa oviwa?