Elongeso Jeova Aava Liavilapo Vali
“Tupu ovipuka aviho ame ndyivitala ngatyina vihasilivila, mokonda yenoñgonoko lia Tatekulu Jesus Kristu.”—FILIPENSES 3:8.
1, 2. Oityi Ovakristau vamwe vaholovona okulinga? Omokonda yatyi?
TUNDE pouna, Robert ankho wankhimana kosikola. Etyi ankho ena vala omanima etyinana, umwe po valongesi vae, emutalelapo peumbo liavo. Iya apopi nae okuti upondola okuhika povilinga mavimuetela omunkhima. Oe wati una ekevelelo liokuti, nthiki imwe upondola okukala ondotolo. Mokonda ovipuka ekahi nokulinga mosikola, vilekesa okuti upondola okuenda monosikola ononene onongwa mbo motyilongo tyavo. Anthi, Robert waanya okuholovona etyi ovanyingi vasoka okuti elao lihamonua tuvali, opo aundape movilinga vioukokoli-ndyila.
2 Ngetyi tyalinga Robert, Ovakristau ovanyingi, ovakuendye, novafikuena novakulu, vena onomphitilo mbokunkhimana mouye uno. Mahi, vamue vakoyapo okuhelipake movipuka ovio, opo vetyivile okunyingila movilinga via Huku vahanda okulinga. (1 Coríntios 7:29-31) Oityi tyihindila Ovakristau ovo nga Robert, okuhanda okuundapa unene movilinga viokuivisa? Vena ohole onene na Jeova. Tupu, vapanda unene esilivilo liokulongeswa nae. Okuti uhole okusoka oñgeni omuenyo wove ñgeno wakala, inkha kuelilongesile otyili? Tuna omuenyo omuwa unene, mokonda yokualongeswa na Jeova. Okusokolola nawa kouwa oo, matyituvatela okutualako okupanda esilivilo lionondaka onongwa, nokukala nombili yokupopila vakuetu.
Okulongeswa na Huku Elao Enene
3. Tuna onthumbi yokuti Jeova uhanda okulongesa ovanthu ovakuankhali mokonda yatyi?
3 Mokankhenda kae, Jeova uhanda okulongesa ovanthu ovakuankhali. Isaías 54:13 yapopia konthele yo Vakristau ovalembulwa okuti: “Ovana vove aveho mavakakala ovanthu valongeswa na Jeova, iya ombembwa yovana vove maikakala onyingi.” Tupu, onondaka ombo, mbupopia konthele “yonongi ononkhuavo” mba Kristu. (João 10:16) Otyo, tyimoneka nawa okuti eulo olio likahi nokufuisuapo mononthiki mbetu. Isaia wamona memonekelo ovanthu vatunda movilongo aviho, okunyingila mefendelo liotyotyili. Oe wati, vapopia kese umwe na mukuavo okuti: “Endyuei tulonde komphunda ya Jeova, kondyuo ya Huku ya Jako. Oe meketulongesa onondyila mbae, opo onthue tuendele monondyila mbae.” (Isaías 2:1-3) Elao enene ngatyi, okulongeswa na Huku!
4. Oityi Jeova akevelela ku vana alongesa?
4 Oityi tuesukisa okulinga opo tulongeswe na Jeova? Otyipuka otyinene tyihandwa, okukala omunthu womutendi. David omuhoneki wo no salmu wati: “Huku omuwa nomuviuki. . . . Ovatendi mevelongesa ondyila yae.” (Salmo 25:8, 9) Jesus wati: “Ame ndyikuhivilika pokati kounyingi Tate, Muene weulu noohi, mokonda waholeka ovipuka evi kovanongo noko vokualunguka. Mahi, wevihololola kovatutu.” (Lucas 10:21) Ove kutyihole okukala epanga lia Huku una “wavela vomutima weliola okankhenda vahatokalele”?—1 Pedro 5:5.
5. Oñgeni tuetyivila vala okunoñgonoka Huku?
5 Onthue vaumbili va Jeova, okuti tuanoñgonoka otyili kononkhono mbetu no kounongo wetu muene? Au. Tyotyili, pohaluetu muene, ñgeno katuakalele nenoñgonoko lia Huku. Jesus wati: “Na umue upondola okuya kuame, tyina Tate wanthuma ehemukokele.” (João 6:44) Novilinga viokuivisa, no nonkhono mbae, Jeova ukahi nokueta ovanthu vekahi ngonongi, “ovipuka viakolela viovilongo aviho.” (Ageu 2:7) Ove kupandula moluetyi ukahi pokati ka vana Jeova akokela Komona wae?—Tanga Jeremias 9:23, 24.
Okulongeswa na Huku Tyieta Ouwa Momuenyo
6. Oñgeni “enoñgonoko lia Jeova” likahi nokupilulula unene ovituwa viovanthu?
6 Eulo lia Isaia liapopia onondaka mbumwe onongwa, pala okulekesa etyi ovanthu vekahi nokupilulula ovituwa viavo hono. Ovanthu vokuali onongangala, vakala ovanthu vombembwa. (Tanga Isaías 11:6-9.) Vana vali onondyale kese umwe na mukuavo mokonda yomihoko, novilongo, vielikalaila ine omokonda yovituwa, valongeswa okukala tyahonya kumue. Vekahi ngatyina ‘vanthila omitunga viavo omatemo.’ (Isaías 2:4) Oityi valingila omapiluluko oo omanene? Ovanthu vena “enoñgonoko lia Jeova,” nokuliundapesa momienyo viavo. Namphila ovaumbili va Huku ovakuankhali, valinga eongano liotyotyili liovakuatate. Onondaka onongwa vaivisa ouye auho, novinyango oviwa mbukahi nokuava, vilekesa okuti okulongeswa na Huku tyakolela unene.—Mateus 11:19.
7, 8. (a) Ovipi ‘ovipuka vimue viatuituilwa no nonkhono,’ omu ovanthu vayovoka mokualongeswa na Huku? (b) Oityi tyilekesa okuti okulongeswa na Huku tyietela Jeova enkhimano?
7 Apostolu Paulu waeleka ovilinga viokuivisa vio vaumbili va Huku novita viopaspilitu. Oe wahoneka okuti: “Omauta ovilwa vietu, haopahitu, anthi ena ononkhono ononene mu Huku, pala okuhanya ovipuka viatuituilwa no nonkhono. Mokonda tukahi nokuhanya omalusoke novipuka aviho vilipaka kombanda yenoñgonoko lia Huku.” (2 Coríntios 10:4, 5) Ovipuka patyi vimue “viatuituilwa nononkhono,” muna ovanthu vayovolwa nelongeso lia Huku? Omulemo womalongeso omatutu, noviso, nomalongeso ovanthu, no vikuavo vali. (Colossenses 2:8) Okulongeswa na Huku, tyivatela ovanthu okuyekapo ovituwa ovivi, nokuovola okukala novituwa vina Huku ehole. (1 Coríntios 6:9-11) Tyiviukisa omuenyo wombunga. Tyiavela omuenyo wotyotyili vana ankho vehena ekevelelo. Eli, olio elongeso liesukisa hono.
8 Ngetyi tyilekesa ongeleka mailandulako, Jeova uvatela ovanthu okukala ovakuatyili. (Hebreus 13:18) Omukai umwe ko India wetavela okulongeswa Ombimbiliya, iya akala omuivisi uhenembatisalwe. Onthiki imwe etyi akondoka keumbo, okutunda kovilinga viokutunga Ondyuo Yomaliongiyo, wavasa pohi pana patalama omakalela okalienge ko olu kapondola okulanda 800 dolares. Namphila ahepa, okalienge oko weketuala kopulisa opo vaovole muene wako. Epulisa alihuvu unene netyi liamona! Konyima epulisa ekuavo alimupulu okuti, “Omokonda yatyi uhakalele nako?” Omukai oo ahangununa okuti, “Okulilongesa Ombimbiliya tyamphilulula, moluotyo, pahe ndyimukuatyili.” Nokuahuva, epulisa alipopila Omukristau omukulu wemuhindikila okuti: “Motyilongo tyino muna ovanthu vehika ko nomiliau 38. Inkha uvatela ovanthu ekwi okukala ngomukai ou, matyikala otyiwa unene.” Alo hono otyinyingi tyovanthu vapilulula omienyo viavo, mokonda valongeswa na Huku. Otyo, katyituavela omahunga omanyingi okunkhimaneka Jeova?
9. Oñgeni ovanthu vapondola okulinga omapiluluko omanene momienyo viavo?
9 Ononkhono mbo Ndaka ya Huku, nombatelo yospilitu sandu Jeova aava, vikuatesako ovanthu okulinga omapiluluko omanene momienyo viavo. (Romanos 12:2; Gálatas 5:22, 23) Colossenses 3:10 yati: “Livalekei omunthu omupe, una ukahi nokupilululwa nenoñgonoko liafuapo, opo elifwa na una wemutunga.” Onondaka mbuvasiwa Mondaka ya Huku Ombimbiliya, mbuna epondolo liokulekesa etyi omunthu atuwa mokati. Ipondola okupilulula omalusoke nonkhalelo yae yokutala ovipuka. (Tanga Hebreus 4:12.) Tyina omunthu akala nenoñgonoko liaviuka lio Vihonekwa, aendesila omuenyo wae movitumino viaviuka via Jeova, ukala epanga lia Huku, nokukevelela omuenyo wahapu.
Huku Utupongiya Pala Omuenyo Komutwe
10. (a) Omokonda yatyi Jeova vala upondola okutupongiya pala omuenyo komutwe? (b) Epiluluko patyi lihuvisa apa katutu malikalingwa ouye auho?
10 Jeova oe vala upondola okutuvatela okulipongiya pala omuenyo komutwe, mokonda oe wii etyi matyikamoneka komutwe. Oe utokola oñgeni ovanthu komutwe mavakakala. (Isaías 46:9, 10) Omaulo Ombimbiliya alekesa okuti “onthiki onene ya Jeova ikahi popepi.” (Sofonias 1:14) Konthele yonthiki oyo, Provérbios 11:4 yati: “Ovipuka viakolela kamavikasilivila monthiki yonyengo. Mahi ouviuki maukayovola kononkhia.” Tyina omuvo wamehikipo wokunyimako ouye wa Satanasi, matyikakala nesilivilo, okupandwa na Huku. Onombongo kamambukakala nesilivilo. Ezequiel 7:19 yati: “O palata yavo mavekeiyumba momatapalo, iya oolu yavo maikakala ngotyipuka tyihasilivila.” Okunoñgonoka ovipuka ovio, tyituvatela okulinga omatokolo nounongo pahetyino.
11. Omonkhalelo patyi okulongeswa na Huku tyituvatela okulipongiya pala komutwe?
11 Okulongeswa na Huku, tyitupongiya pala onthiki ya Jeova, mokutuvatela okupaka tete ovipuka viakolela momuenyo wetu. Apostolu Paulu wahonekelele Timoteo okuti: “Londola ovahona mouye uno, vehelipakeko, vahapake ekevelelo liavo momalumono ahayumbwa othumbi. Anthi, vayumbe onthumbi mu Huku.” Namphila tuahepa, tupondola okupola esilivilo kelondolo olio lia Huku. Otyo tyesukisa tyi? Tyihanda tulinge ononkhono ‘mbokulinga oviwa’ opo ‘tukale ovahona vovilinga oviwa,’ atuhasukalala nokuovola omalumono opahitu. Mokupaka ovilinga via Huku tete momienyo vietu, ‘tulipakela olumono maluketuetela ouwa komutwe.’ (1 Timóteo 6:17-19) Okulinga ononkhono ngotyo, tyilekesa okuti tuna onondunge, ngetyi Jesus ati, “tyina esilivilo patyi komunthu inkha anganyala ouye auho, mahi apesela omuenyo wae?” (Mateus 16:26, 27) Mokonda onthiki ya Jeova ikahi popepi unene, otyiwa kese umwe puonthue elipule okuti: ‘Opi ndyikahi nokupaka olumono luange? Okuti ndyimupika wa Huku ine o Womalumono?’—Mateus 6:19, 20, 24.
12. Omokonda yatyi tuhasoyela inkha ovanthu vamue vatomba ovilinga vietu viokuivisa?
12 Otyilinga tyakolela unene pokati “kovilinga oviwa” viapopiwa Mondaka ya Huku, Ovakristau vena okulinga, ovilinga viokuivisa Ouhamba wa Huku nokulinga ovalongwa. (Mateus 24:14; 28:19, 20) Ngetyi tyali pomuvo wo Vakristau votete, vamwe hono vetupu onthilo novilinga vietu viokuivisa. (Tanga 1 Coríntios 1:18-21.) Mahi otyo, katyipilulula esilivilo lionondaka tuivisa. Tupu, katyitepulula esilivilo liokuvatela kese munthu omphitilo yokukala nekolelo monondaka ombo, tyina nkhele pena omuvo. (Romanos 10:13, 14) Tyina tuvatela vakuetu okulongeswa na Huku, nonthue matutambula oviwa ovinyingi.
Jeova Wavela Ononkhano Onongwa Vana Vemuumbila Nononkhono
13. Ovipuka patyi apostolu Paulu asilepo mokonda yonondaka onongwa?
13 Etyi apostolu Paulu ehenekale Omukristau, ankho walongua opo akale nomunkhima mouye wo va Judeu. Nomanima 13, watunda mepundaumbo lio Tarsu atyitilwa, aende ko Jelusalei okukalongeswa nomulongesi wo Vitumino ankho wapandua unene utiwa o Gamaliyeli. (Atos 22:3) Mokueenda kuomuvo, Paulu ahimbika okukala nomunkhima pokati komakula ae. Watualako nokulongeswa, akala nenkhimano mo va Judeu. (Gálatas 1:13, 14) Etyi etavela onondaka onongwa, ahimbika ovilinga viokuivisa, ovipuka ovio aviho evisipo. Okuti Paulu welivelele mokonda yovilinga ovio aholovona? Au. Oe wahoneka okuti: “Ame ovipuka aviho ndyivitala ngatyina vihasilivila, mokonda yenoñgonoko lia Tatekulu Jesus Kristu, liakolela unene. Mokonda yae netavela okuyekapo ovipuka aviho, nokuvitala ngatyina vihasivila.”—Filipenses 3:8.
14, 15. Ouwa patyi tuna mokonda yokukala “ovaundapi kumwe na Huku”?
14 Nga Paulu, Ovakristau hono, vasapo ovipuka ovinyingi opo vaivise onondaka onongwa. (Marcos 10:29, 30) Okuti tuna etyi tupumbwa mokonda yokulinga ngotyo? Robert, wapopiua konthyimbi, wapopilako ovanyingi etyi ati: “Ame nalumue nelivelele. Ovilinga viomuvo auho viandyetela ehambu nouwa. Tupu, viambatela ‘okuheteka nokutala okuti Jeova omuwa.’ Tyina ndyilinga ononkhono mbokuovola vali ovilinga viokuumbila Jeova, oe apeho umpha vali oviwa vipona evi nasapo. Tyikala vala ngoti natyike nasapo. Ame nanganyala vala!”—Salmo 34:8; Provérbios 10:22.
15 Inkha ove ukahi nokuundapa movilinga viokuivisa nokulongesa hono, tupu no ove una onomphitilo mbokuheteka nokutala okuti tyili Jeova omuwa. Okuti uhole okuimbuka etyi ekuvatela nospilitu yae, pokuivisa onondaka onongwa? Uhole okumona etyi ovanthu vetavela nehambu, tyina Jeova aikula omitima viavo opo vatehelele nawa ondaka yae? (Atos 16:14) Okuti Jeova uhole okukuvatela okufinda ovitateka, pamue ukuikulila ondyila yokuyawisa vali ovilinga viove viokuivisa? Uhole okukukuatesako pomivo viovitateka, okukupameka opo utualeko okumuumbila tyina ulitehelela okuti ukahi nokutepuluka? (Filipenses 4:13) Tyina tulitehelela okuti Jeova ukahi nokutuvatela okufuisapo otyilinga tyetu, tyitufueneka vali unene ku Jeova. (Isaías 41:10) Okuti hatyiwa unene okukala ‘ovaundapi kumwe na Huku?’—1 Coríntios 3:9.
16. Oñgeni utala ononkhono ulinga pala okulongeswa na Jeova?
16 Ovanthu ovanyingi vakevelela okulinga otyipuka tyikala nesilivilo mokueenda kuomuenyo wavo auho. Tuhole okumona okuti alo umwe ovipuka viankhimana unene mouye wo hono, konyima ovanthu vevilimbwa. Anthi, ovilinga Jeova ekahi nokulinga hono, pala okusukukisa enyina liae, mavikatualako apeho tyahonekwa mehipululo lia Huku. Ovilinga ovio mavikahinangelwa apeho. (Provérbios 10:7; Hebreus 6:10) Tupandei elao tuna liokulongesa vakuetu konthele ya Jeova, ovilinga mavikatualako okuhinangelwa.
[Olutalatu pefo 25]
Vana valongeswa na Jeova, ovo ewaneno liotyotyili liovakuatate ouye auho
[Olutalatu pefo 26]
Helao ko enene “okuundapa kumwe na Huku”?
Oñgeni Ove Mokumbulula?
• Oityi Jeova akevelela ku vana alongesa?
• Oñgeni okulongeswa na Huku tyikalesa nawa omienyo viovanthu?
• Omononkhalelo patyi okuvatela vakuetu okulongeswa na Huku tyituetela ouwa?