Onthyulilo Yokulinga Ovivi Maiya!

HUKU wetuavela Ondaka yae ahonekesa, opo itulekese omokonda yatyi ovanthu valingila ovivi. Oe tupu wetuavela epondolo liokuliholovonena nokuliyunga, opo tutyivile okulityilika okulinga ovivi. (Deuteronômio 30:15, 16, 19) Moluotyo, tupondola okuimbuka kese yembelo eevi tuna, nokulinga etyi tyesukisa opo tuanye eyembelo olio. Okuhulililako, okulityilika okulinga ovivi, matyituetela ombembwa onthue muene navakuetu.—Salmo 1:1.

Anthi, namphila onthue tulinga ononkhono ononene mbokulityilika okulinga ovivi, mouye ovanthu vokulinga ovivi vatualako okuliyawisa unene. Ombimbiliya ilondola okuti: “Noñgonoka okuti kononthiki mbahulililako, makukeya omuvo wokuepuiya.” Okulekesa oityi ononthiki mambukalela ‘tyepuiya,’ itualako okuti: “Ovanthu mavakakala vokulihole ovo muene, vokuhole onombongo, vokulipanda, vomalityindailo, vehena onthilo na Huku, vehetavela kovohe no voina, vehena olupandu, ononkhembi. Vehena oluembia, vokuna omphata, vokutendeleya, vehetyivili okulikondola omutima, ovakalavi, no kuhehole otyiwa. Ovapakuli, vomphata, vokuna omalityindailo, vehole vali ovitalukiso tyipona Huku. Velilekesa ngatyina vena onthilo na Huku, mahi kavayeke ondaka ya Huku ihongolele omuenyo wavo.”—2 Timóteo 3:1-5.

Tyafuile onondaka ombu, okuti “ononthiki mbahulililako” ove wembumona meulo liapopiwa pombanda. Kuove oityi mbuhangununa? Ovanthu ovanyingi vati onondaka “ononthiki mbahulililako” mbulekesa okuti kuna otyipuka tyimwe matyikapwa. Oityi matyikapwa? Tala oityi Ondaka ya Huku ilaa.

Onondingavivi mambukanyimuako ambuho.

“Apa katutu ondingavivi kamaikakalako vali. Mokatala pana ankho ikala, mahi kukeivasapo vali. Mahi, ovatendi mavakapiñgana oohi, iya avakakala nombembwa onene.”—SALMO 37:10, 11.

“Jeova uyunga aveho vemuhole. Anthi onondingavivi aveho mekevenyimako.” —SALMO 145:20.

Okulingwa onya kamatyikakalako vali.

“Oe mayovola omuhepi uliyavela okuita ombatelo, na una umona ononkhumbi, na kese umwe uhena omuvateli. Makayovola ohande yae ilingwa onya no moungangala.”—SALMO 72:12, 14.

“Ovanthu tupu mavakayovoka moupika wokuhanyauka, iya avakala neyovo eewa unene liovana va Huku.”—ROMANOS 8:21.

Aviho vina ovanthu vesukisa molutu mavikafuisuapo.

“Kese umwe makapumphama mombuelo yomuvinyu wae no mombuelo yomukuyu wae, na umwe mekeveetesa owoma.”—MIQUÉIAS 4:4.

“Tyotyili mavakatunga onondyuo avakalamo, mavakatuika omiti avakalia ovinyango viatyo. Kavakatunga iya mukuavo ngae akakalamo, kamavakatuika iya mukuavo ngae ukalia. Mokonda ononthiki mbelongo liange mambukakala ngononthiki mbomuti, iya ovanthu aveho mavakalinga ovilinga vieeta ehambu liotyotyili.”—ISAÍAS 65:21, 22.

Makukakala ouviuki.

“Tyotyili, Huku kamakoyesa nouviuki ovaholovonwa vae veliyavela kwe tyitenya na tyinthiki . . . ? Jesus wapula okuti: Tyina omona womunthu ameya, okuti mavasi umwe ekolelo kombanda yoohi?”—LUCAS 18:7, 8.

“Jeova uhole ouviuki. Oe kamayekepo vana vemuyumba onthumbi. Meveyungu apeho. Mahi, ombuto yonondingavivi, maikanyimuako.”—SALMO 37:28.

Pelungavi mapakapinga ouviuki.

“Vokuatunga kombanda yoohi, tyotyili mavekelilongesa ouviuki.”—ISAÍAS 26:9.

“Kuna eulu epe noohi omphe tukahi nokukevelela ngetyi Huku alaa, muna mamukakala ouviuki.”—2 PEDRO 3:13.

Ovanthu Vekahi Nokupiluluka, Alo Umwe Hono

Tyotyili, onthue atuho tupondola okuhambukwa nomilao ovio. Mahi, oityi tyituavela onthumbi yokuti mavikafuisuapo umwe? Hono tuna elekeso liokuti omilao via Huku tyilityili mavikafuisuapo. Elekeso patyi? Elekeso olio, ovanthu ovanyingi mouye auho hono vayekapo elungavi, nomaumbalehi, ine noukalavi, iya valinga ovanthu ovakuatyili, vombembwa, neholelo. Hono Onombangi mba Jeova, valamba ponomiliau epandu-vali, vekahi meongano liovakuatate ouye auho vokuayekapo eliyapauko liomihoko, novilongo, nopulitika, novikuavo vali, ovituwa vikahi nokueta oundyale, noungangala, nokumomesa ohonde mokueenda kuehipululo aliho.a Omapiluluko atyo oo, ekahi nokulingwa hono, alekesa nawa okuti tupondola okukala nonthumbi yokuti omilao via Huku mavikafuisuapo monkhalelo yavilapo.

Oityi tyevevatela okulinga omapiluluko atyo oo? Ekumbululo livasiwa momulao omukuavo wahonekwa nomuuli Isaia. Oe wahoneka okuti:

“Tyotyili ehunyu malikakala kumwe nondyona, tupu onkhapi maikakala kumwe notyiketa, nonthane, notyiketa tyonkheyama, novinyama ovikuavo aviho kumwe, iya omukuendye omututu oe mekevilisa. . . . Alo umwe onkhulika maikalia eholi ngongombe. Omona unyama makanyanena ketoto lionyoka, iya una wakupuka makapaka okuoko kwae ketoto lionyoka ombi. Kambukevenumata ine okukalinga omapita komphunda yange ikola aiho, mokonda oohi aiho tyotyili maikeyula enoñgonoko lia Jeova, ngetyi omeva eyula melunga.”—Isaías 11:6-9.

Okuti eulo olio likahi nokupopia vala omuvo una ovinyama mavikakala nawa novanthu? Au, hatyoko vala lilekesa otyo. Tala okuti, onthele yahulililako yotestu oyo, ilekesa oityi matyikaeta epiluluko olio. Yati: “Oohi aiho tyotyili maikeyula enoñgonoko lia Jeova.” Okuti enoñgonoko lia Huku lipondola okupilulula ovituwa vio vinyama? Na katutu. Mahi, lipondola okupilulula ovanthu! Eulo olio, lipopia okuti vokuna ovituwa ovivi ngovinyama, maveviyekepo, avakala novituwa ngo via Kristu, mokonda yokuanoñgonoka etyi Ombimbiliya ilongesa nokuendelamo.

Tala ongeleka ya Petulu.b Oe ankho usoka okuti ukahi nokulwila ouviuki, puetyi elipaka meongano liomakongombanda. Etyi alongeswa nawa, atumwa okukateyapo ondyuo yomapulisa. Puetyi ankho elipongiya opo ekeiteyepo, vemukuata aende mokaleya. Petulu wakala onohanyi 18 mokaleya, iya omo atualako novilinga viae vioungangala. Mokueenda kuomuvo oo, omukai wa Petulu wahimbika okulilongesa Ombimbiliya no Nombangi mba Jeova. Etyi Petulu ayovoka mokaleya, nae ahimbika okulilongesa Ombimbiliya. Iya etyi elilongesa konthele ya Jeova Huku, tyemupa ondundo yokulinga omapiluluko omanene movituwa viae netyi ankho asoka konthele yomuenyo. Petulu wati: “Ndyipandula Jeova mokonda haipaele nawike omanima nakala ekongombanda. Pahe ndyikahi nokuundapesa omutunga wospilitu ya Huku, Ombimbiliya, pala okupopila ovanthu onondaka onongwa Mbouhamba wa Huku, onondaka mbombembwa yotyotyili nouviuki.” Petulu alo umwe watalelapo ondyuo ina ahandele okuhanyapo, opo evepopile onondaka mbombembwa nouye uhena oungangala.

Epiluluko enene Ondaka ya Huku ilinga momuenyo wovanthu, lituavela omahunga aeho, okukala nonthumbi momulao wa Huku wokuti okulinga ovivi matyikapwa. Tyotyili, ovanthu kamavatualako okulinga ovivi apeho, anthi mavapiluluka pala okulinga oviwa. Apa katutu Jeova makanyimako una wahinda okulinga ovivi, Satanasi Eliapu, ukahi monyima nokulunda ovanthu okulinga ovivi aviho vilingwa mouye. Ombimbiliya yati: “Ouye auho ukahi pomaoko ondingavivi.” (1 João 5:19) Mahi, apa katutu makanyimuako. Tupu, na vana vehetavela okuyekapo onondyila mbavo onombi, mavakanyimuako. Matyikakala otyiwa unene ngatyi, okukala nomuenyo pomuvo oo omuwa!

Oityi omunthu ena okulinga opo akakale mouye oo? Hinangela okuti, “enoñgonoko lia Jeova” likahi nokupilulula omuenyo wovanthu hono, tupu malikapilulula ouye auho apa katutu. Okukala nenoñgonoko Liombimbiliya nokuendelamo, ngetyi Petulu alinga, noove upondola okukala mouye omo “mamukakala ouviuki.” (2 Pedro 3:13) Iya onthue tukuavela ondundo opo uundapese nawa omuwo uno nkhele wesalako, opo ukale nenoñgonoko lia Huku na Jesus Kristu, mokonda otyo tyipondola okukutuala komuenyo uhapu.—João 17:3.

[Onondaka Poutoi]

[Ehangununo liolutalatu pefo 9]

Noove upondola okukevelela okukakala mouye omo “mamukakala ouviuki.”

—2 PEDRO 3:13