Watchtower OMBIMBILIYOTEKA
Omutala Womulavi
OMBIMBILIYOTEKA ONLNE
Nyaneka
  • OMBIMBILIYA
  • OMIKANDA
  • OMALIONGIYO
  • w14 3/1 pp. 7-9
  • Pamekwa Novitateka Viange

Naike ovindiu iyeemba ku otyo

Tala mukwe pena etyi tyahaendele movindiu

  • Pamekwa Novitateka Viange
  • Omutala Womulavi Wivisa Ouhamba Wa Jeova—2014
  • Onthele-kati
  • Tyelifwa
  • JEOVA TYOTYILI WANKHUATESAKO
  • NAVASA ONKHALELO YOKUTYINDA OMUENYO OMUWA
  • JEOVA WATUALAKO OKUNKHUATESAKO
  • Ombimbiliya Ipilulula Omwenyo Wovanthu
    Omutala Womulavi: [Ombimbiliya Ipilulula Omwenyo Wovanthu]
  • Jeova Ukahi Nokumpha Ovipuka Ovinyingi Unene
    Omutala Womulavi Wivisa Ouhamba Wa Jeova—2015
Omutala Womulavi Wivisa Ouhamba Wa Jeova—2014
w14 3/1 pp. 7-9
Maite Morlans ukahi nokuivisila kotelefone umphumphi kotyipundi tyae tyomalola

EHIPULULO LIOMUENYO

Pamekwa Novitateka Viange

Yapopiwa na Maite Morlans

Okutala olutu luange luasosoloka luna onokilu 29, napumphama kotyipundi tyomalola, nawike utavela okuti napama. Mahi tyina olutu luange lunama, mokati ononkhono mbutualako okuliyawisa. Mandyipopi oñgeni enamo nepameko viakalesa omuenyo wange.

O Maite ko França, etyi ena omanima ekuana

Etyi ndyina omanima ekuana

Okusoka puetyi ankho ndyimona tyinthyinangelesa ehambu ankho ndyina mondyuo yetu onthutu koutakelo wo França, kuna ankho ovotate vakala. Tate yange ankho wandingila otyilihako, iya ankho ndyihole unene okuhataika motyikunino. Mo 1966, Onombangi mba Jeova aveya meumbo avatomphola ehimbwe na tate. Konyima yonohanyi epandu vali, tate atokola okukala Ombangi ya Jeova. Etyi pakala katutu me nae alandulako, iya ame andyikulila mombunga oyo ongwa.

Ovitateka viange viahimbika pokukondoka noko Espanya, kuna ovotate ankho vatunda. Omaoko ange nopoukeho viahimbika okuihama. Momanima evali tuakala nokuovola onondotolo ononyingi, konyima atuvasi ondotolo yokuhakula omahipa, nomankhipa, etyi yanthala aiti “lietaka unene”. Me ahimbika okulila. Mondyuo ina ongonga ankho ndyiiva vala onondaka ononene mbati: “doença crónica auto-imune”, “poliartrite juvenile”,a omauvela omanene. Namphila ankho ndyimona, ndyina vala omanima ekwi, mahi naimbuka okuti etyi vapopia otyivi.

Ondotolo apopi okuti ndyina okukala mondyuo yokuhakulilwa ovana vena ouvela oo. Etyi nehika, okukala mondyuo ina atyinumanesa unene. Etyi ankho tulingwa tyepuiya: Vokundapamo vateta onohuki mbange avambaleka ovikutu vimwe ovinene. Andyilipulu okuti ‘Oñgeni mandyityivili okukala muno?’ Andyihimbika okulila.

JEOVA TYOTYILI WANKHUATESAKO

Mokonda ovotate ankho vandongesa konthele ya Jeova, anehetavela okulandula oviso vio Katolika ankho vilingwa mondyuo oyo. Mahi ovaundapi avahahande okutavela omokonda nehetavelela. Andyiiti unene ku Jeova opo ahandyekepo, iya andyilitehela okuti wandyamena ndyikahi ngatyina nakuata mokuvoko kwa tate woluembia.

Ovotate ankho vayekwa vala veye okunthala katutu Motyasapalo. Mokonda ankho vandyetela omikanda opo ndyitange ekolelo liange alipame. Ovana ankho kavayekwa okukala nomikanda viavo, mahi ovaundapi vandyekele ndyikale Nombimbiliya yange, ankho ndyitanga ononthiki ambuho. Tupu ankho ndyipopia novana vakuetu konthele yekevelo liomuenyo wahapu Momphangu Yombembwa, muhakakala vali una uvela. (Revelação 21:3,4) Namphila ankho ndyiihamenua, nokuliwa nounye, ankho ndyina ehambu mokonda ekolelo liange nonthumbi mu Jeova vikahi nokutualako okupama.

Etyi palamba onohanyi epandu, ondotolo ainthumu keumbo. Ouvela wange kawahakukile, mahi ndyina ehambu mokonda ankho ndyikahi nokukondoka kovotate. Onongolo mbange mbavipala, nokuihama unene. Ankho ndyimukainthu wanama vala. Etyi natuula omanima14 andyimbatisalwa, netokolo liokutualako okuumbila Tate yange wokeulu muatyiho ndyivila. Mahi pamwe ndyinumana unene. Andyilikuambela okuti, “Oityi ndyimonena ononkhumbi? Mbambavo nthehelele? Kundyuete etyi tyikahi nokumona ononkhumbi?”

Omanima ange opoukainthu ankho epuiya unene. Ankho ndyisoka okuti nalumwe mandyikala nawa. Ankho katyinkhuatesako okulieleka nomapanga ange vena ekongoko nomuenyo omuwa. Ankho ndyilitehela okuti hisilivila nokulihaika. Mahi, ombunga yange nomapanga vankhuatesileko unene. Ndyihinangela epanga liange ankho utiwa Alicia omukulu vali kuame omanima20, ankho epanga liange enene. Wankhuatesako okutala vali kuna, tyipona kouvela wange, nokusuka navakuetu tyipona okutala kovitateka viange.

NAVASA ONKHALELO YOKUTYINDA OMUENYO OMUWA

Etyi natuula omanima18, andyimono unene ononkhumbi, iya okuenda komaliongiyo Ovakristau ankho tyimphuiya unene. Mahi, ankho ndyiundapesa “nawa omuwo” ndyikahi peumbo okulilongesa nawa Ombimbiliya. Omukanda wa Job no wa Salmu viakuatesako okunoñgonoka okuti ombatelo Jeova Huku tete etuavela oyo pamphepo tyipona yopahitu. Omalikuambelo ndyilinga apeho andyetela “ononkhono mbavilapo” “nombembwa ya Huku, ipona onondunge nomalusoke aeho.”​—2Coríntios 4:7; Filipenses 4:6,7.

Etyi natuula omanima22, andyitavela okuti omuenyo wange pahe okukala vala kotyipundi tyomalola. Ankho ndyina owoma wokuti ovanthu mavayekepo okunthala nokusoka okuti ou omukai wahapinduka ukala vala kotyipundi tyomalola. Mahi, otyipundi tyomalola tyankhuatesako, iya onkhalelo ankho ndyisoka okuti yepuiya yandyetela ouwa. Epanga liange utiwa Isabel amphopila tuundape nae onovola 60 movilinga viokuivisa mohanyi ike.

Tete, nasoka okuti okulinga ngotyo tyalema. Mahi, andyiiti ku Jeova ombatelo, nokombunga yange nomapanga, opo ndyilinge ngotyo. Ohanyi oyo ailambe liwa-liwa, pahe anahakala vali nowoma. Mokonda ankho nahanda okutualako nehambu, mo 1996 andyitokola okunyingila movilinga vioukokoli-ndyila okulinga onovola 90 kese hanyi movilinga viokuivisa. Olio etokolo ewa nalinga, tyayawisa oupanga wange na Huku nokumphameka mopahitu. Okuundapa movilinga viokuivisa tyakuatesako okupopila vakuetu ekolelo liange nokukuatesako vamwe okukala omapanga a Huku.

JEOVA WATUALAKO OKUNKHUATESAKO

Mo 2001 pondyovo, andyiviluka netukutuku andyiteke ovikalo. Etyi natualwa kosipitali ankho ndyiivite omaluihamo omanene, andyilikuambela unene okuti: “Mbambavo Jeova wahandyeke!” Iya omukai umwe ukahi koula ponthele yowange, amphulu okuti “ove Umbangi ya Jeova?” Ankho ndyitupu ononkhono mbokukumbulula epulo olio, andyipuka vala komutwe okuti enga. Omukai ati “Onombangi ndyivei nawa! Ndyihole okutanga omikanda vienyi.” Onondaka ombo mbamphameka. Alo umwe monkhalelo oyo ombi ankho ndyikahi, ndyipondola okuava oumbangi konthele ya Jeova. Olio elao enene!

O Maite kumwe no votate yae

Kumwe no votate mo 2003

Etyi nelitehela pahe ndyikahi nawa katutu, andyitokola okuivisa vali. Me ankho undyendesa kotyipundi tyange tyomalola okuliseta nosipitali, iya ovikalo viange viapakwa osesu. Kese nthiki, ankho tukatalelapo ovavei, otyo tuvepula oñgeni vekahi, nokuveavela omikanda viapolwa Mombimbiliya. Otyilinga otyo ankho katyapepukile, mahi Jeova wampha ononkhono nesukisa.

Pamwe, ame ndyihininika, andyikula “ondyanena” yange okutala kouye omupe Huku alaa

Etyi palamba omanima ehehehi, ononkhumbi mbange nonongembia aviliyawisa etyi tate ankhia. Mahi, nongotyo andyipameka omutima. Ñgeni? Ankho ndyilinga oupanga nokukala nombunga inkhuatesako okuhesuku unene novitateka viange. Tyina ndyikahi andyike, ndyitanga nokulilongesa Ombimbiliya, ine okuava oumbangi notelefone.

Maite Morlans

Tupu apeho ankho ndyihambukilwa ovipuka vimwe ngetyi omphepo tyina ifila nawa ine omuniko wononthemo. Ovipuka ovio ankho vimpha ehunga liokupandula. Tupu apeho ankho ndyiovola okuhambukwa. Nthiki imwe etyi ankho tukahi nokuivisa, epanga liange ankho ukahi nokutahula otyipundi tyange, atalama opo ahoneke ovanthu tuaivisa. Ame andyitualako okukunyuna otyipundi, mokonda ankho palauka atyikunkhunuka andyikelipuma metuku-tuku ankho litai. Atuho atuhanunuka, etyi tuatala natyike otyivi tyaendapo, atuhimbika okuyola.

Kuna ovipuka ovinyingi nehevili okulinga. Ame ndyiti, ovio ha kumbi ndyivilinga. Pamwe, ame ndyihininika, andyikula “ondyanena” yange okutala kouye omupe Huku alaa. (2Pedro 3:13) Ame ndyisoka okukala nekongoko ewa, nokuenda-enda, nokulinga atyiho. Ndyihinangela onondaka Mbohamba David mbati: “Kevelela ku Jeova; kala nomutima wakola, nokuapama.” (Salmo 27:14) Namphila olutu luange lutualako okuvototela, Jeova ukahi nokumphameka. Ndyitualako okupama namphila ndyina ovitateka.

a Poliartrite juvenile, ouvela umwe omuvi haunene uvela ovana. Ononkhono mbokuyakulila olutu mbuhimbika okusoya nokuhanyauna ekongoko nokuihama unene poukeho.

    Nyaneka Publications (1998-2026)
    Lupukamo
    Nyingila
    • Nyaneka
    • Tuma
    • Likoyela
    • Copyright © 2025 Watch Tower Bible and Tract Society of Pennsylvania
    • Etyi Tyilingwa Pokunyingilamo
    • Etyi Munyingilwa
    • Etyi Tyilingwa Pokunyingilamo
    • JW.ORG
    • Nyingila
    Okutuma